Yu ben sabi a sani disi?

Bifo Gado ben taigi na apostel Petrus fu go na Kornelius, dan a ben e tan nanga Simon, wan man di ben e meki leer nanga a buba fu meti. Fu san ede a de prenspari taki Bijbel e taki fu disi?

▪ Tori fu den Apostel e taki dati Petrus ben e tan „wan heri pisi ten na Yope na wan man di nen Simon, èn di e meki leer nanga a buba fu meti”. Boiti dati, „na oso fu en de krosibei fu a se” (Tori fu den Apostel 9:43; 10:6). Den Dyu ben si a wroko di sma ben e du fu meki leer nanga a buba fu meti, leki wan lagi wroko di no krin. Soleki fa a Talmud e sori, dan den Dyu ben si a wroko disi a srefi leki a wroko di sma ben abi fu puru pupe na wan presi. A wroko di Simon ben du, ben meki taki nofo tron a ben fasi a dedeskin fu meti. Disi ben wani taki dati doronomo a no ben krin, soleki fa a wet ben taki (Lefitikus 5:2; 11:39). Soleki fa difrenti buku e sori, dan a ben kan de so taki Simon ben e gebroiki sewatra fu du en wroko, èn taki a ben libi dorosei fu a foto fu di a „wroko di a ben e du ben meki a presi tingi”.

Aladi dati ben de so, toku disi e sori taki Petrus no ben abi trobi fu go tan nanga Simon. Disi e sori taki kande Petrus ben leri fu no denki leki den Dyu di ben desko sma di den ben si leki sma di no krin. Petrus ben handri neleki Yesus di no ben desko sma.​​—Mateyus 9:11; Lukas 7:36-50.

Yesus ben taki: „Yusrefi taki so.” San den wortu disi wani taki?

▪ Di Kayafas, a Dyu granpriester, ben wani taki Yesus taki na fesi ala sma efu en ben de Krestes, a Manpikin fu Gado, dan Yesus piki en: „Yusrefi taki so” (Mateyus 26:63, 64). San Yesus ben wani taki nanga den wortu dati?

Yesus no ben suku wan fasi fu no piki na aksi fu Kayafas. Soleki fa a sori, dan den wortu „yusrefi taki so” ben de wan sani di den Dyu ben gwenti taki fu sori taki san wan sma taki, tru. Fu eksempre, a Yerusalem Talmud, wan Dyu kerki buku di ben tyari kon na wán na ini a di fu fo yarihondro, e taki dati di sma ben aksi wan Dyu man efu wan rabi dede, dan a piki den: „Yu taki en kaba.” Sma ben frustan taki a tru dati a rabi dede.

Yesus ben lespeki a makti di a granpriester ben abi fu meki sweri fu taki san tru. Boiti dati, efu Yesus no ben taki noti, dan a granpriester ben kan denki taki Yesus ben wani sori taki en no ben de a Krestes. Sobun, di Yesus piki en: „Yusrefi taki so”, dan na so fasi a ben sori taki a sani di a granpriester taki, tru. A srefi tori disi di Markus skrifi, e taki dati di Kayafas ben aksi Yesus efu en na a Mesias, dan nanga deki-ati Yesus piki: „Iya, na mi.”​—Markus 14:62; luku sosrefi Mateyus 26:25 nanga Markus 15:2.

[Prenki na tapu bladzijde 18]

Wan presi pe sma e meki leer na ini Fez, na Marokow