TORI FU A KAFTI | A FETI DI KENKI GRONTAPU

A sma di e meki taki feti nanga pina de

Tapu 11 november 1918, a Fosi Grontapufeti kon na wan kaba. Ala bisnis ben tapu èn sma ben e dansi na strati. Ma a no ben de fu langa. Leti baka a feti, wan tra rampu pasa di ben ogri omeni leisi moro a feti srefi.

Na ini yuni 1918, wan takru siki di sma sabi leki a Spaanse griep ben broko na mindri den srudati di ben e feti na ini Fransikondre. Heri esi sma kon si o takru a siki disi ben de. Fu eksempre, na ini wan tu mun nomo, a kiri moro Amerkan srudati na ini Fransikondre, leki san a feanti ben kiri. A siki disi panya esi-esi na heri grontapu, fu di den srudati di ben drai go baka na den kondre di a feti kaba, tyari a siki disi go nanga den.

Na ini den yari baka a feti, bigi angriten ben de èn furu kondre ben abi moni problema. Na ini 1918 di a feti kon na wan kaba, dan furu sma na ini Europa ben e dede fu angri. Na a ten fu 1923, a moni fu Doisrikondre ben lasi en waarde. Siksi yari baka dati, a heri ekonomia fu grontapu fasi. Te fu kaba, na ini 1939, a Di Fu Tu Grontapufeti bigin. Te yu luku en bun, dan a ben gersi leki a Fosi Grontapufeti ben e go doro. San meki taki den rampu disi pasa a wán baka a trawan?

A MARKI FU DEN LASTI DEI

Bijbel profeititori e yepi wi fu kon si fa a du kon taki son sani pasa na ini a historia, èn na so a de tu nanga a Fosi Grontapufeti. Yesus Krestes ben taki fu wan ten te a ’wan pipel ben o go feti nanga a tra pipel’ èn angriten nanga siki ben o de na heri grontapu (Mateyus 24:3, 7; Lukas 21:10, 11). A ben taigi den disipel fu en taki den rampu dati ben o de a marki fu den lasti dei. Wi kan leisi moro fu a tori disi na ini a buku Openbaring di e sori taki den rampu di e pasa na grontapu abi fu du nanga wan feti di pasa na hemel.—Luku a faki „Feti na grontapu èn na hemel”.

A srefi Bijbel buku disi e taki fu fo asiman. Dri fu den asiman disi e prenki den srefi rampu di Yesus ben taki fu den wan pisi ten na fesi. Dati na feti, angriten, nanga takru siki. (Luku a faki „Den fo asiman e rèi kaba?”) A de krin taki a fosi grontapufeti ben de a bigin fu rampu di e pasa te now ete. Bijbel e sori tu taki na Satan e meki taki den sani disi e pasa (1 Yohanes 5:19). Oiti wan kaba o kon na a makti fu en?

A buku Openbaring e gi wi a dyaranti tu taki a „ten syatu” gi Satan (Openbaring 12:12). Dati meki a de nanga bigi atibron èn a e meki taki bun furu rampu e pasa dyaso na grontapu. Ma den problema disi e sori tu taki a ten fu en e kon syatu.

WAN KABA E KON NA DEN WROKO FU DIDIBRI

A Fosi Grontapufeti kenki grontapu trutru. A meki taki ibri tron baka kondre e feti nanga makandra, sma e opo densrefi teige tirimakti, èn libisma no e frutrow tiriman moro. A feti dati e sori krin tu taki den fringi Satan komoto na hemel (Openbaring 12:9). A tiriman fu grontapu di sma no man si, de leki wan ogri-ati tiriman di sabi taki a no abi langa moro. Te den dei fu en kon na wan kaba, dan fosi den problema di a Fosi Grontapufeti tyari kon o kaba.

Te yu e luku den Bijbel profeititori, dan yu kan abi a frutrow taki heri esi Yesus Krestes, wi hemel Kownu, o „tyari wan kaba kon na den wroko fu Didibri” (1 Yohanes 3:8). Milyunmilyun sma e begi kaba taki Gado Kownukondre kon. Yu e du dati tu? Tangi fu a Kownukondre dati, meki sma di e bribi na ini Gado o si taki te fu kaba a wani fu Gado, a no a di fu Satan, o pasa na grontapu (Mateyus 6:9, 10). Te Gado Kownukondre o tiri, dan noiti moro wan grontapufeti o de, iya, noiti moro feti o de! (Psalm 46:9) Kon sabi moro fu a Kownukondre dati, dan yu o si a ten te freide o de na heri grontapu!—Yesaya 9:6, 7.

Feti na grontapu èn na hemel

Sowan 1900 yari bifo a Fosi Grontapufeti bigin, Satan ben wani gi Yesus „ala den kownukondre fu grontapu” (Mateyus 4:8, 9). Yesus weigri den sani dati, ma bakaten a kari Didibri „a tiriman fu grontapu” (Yohanes 14:30). Na apostel Yohanes ben skrifi tu taki „heri grontapu de na ini a makti fu na ogriwan”.—1 Yohanes 5:19.

Efu Satan Didibri abi so furu makti, dan wi kan frustan taki na en ben de frantwortu gi a fosi grontapufeti èn gi den rampu di a feti dati tyari kon. A no de fu taki dati a buku Openbaring e sori taki Satan de frantwortu gi den rampu di pasa na grontapu sensi 1914. Luku syatu sortu sani pasa, soleki fa kapitel 12 fu Openbaring e sori:

Vers 7 Wan feti bigin na ini hemel. Mikael (Yesus Krestes) nanga a bigi kaiman (Satan) e feti nanga makandra.
Vers 9 Den e fringi Didibri, di „e kori sma na heri grontapu” kon na grontapu.
Vers 12 „Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu.”

Bijbel nanga den sani di pasa na grontapu e sori taki a feti disi pasa na hemel baka di Gado Kownukondre seti na hemel na ini 1914.a Sobun, na ini a srefi prenspari yari dati, wan feti bigin na hemel èn na grontapu.

a Luku kapitel 8 fu a buku San Bijbel e leri wi trutru?, di Yehovah Kotoigi tyari kon na doro.

Den fo asiman e rèi kaba?

A weti asi. A sma di e rèi en na wan kownu na hemel. A Kownu, Yesus Krestes srefi, na a sma di e rèi fu feti gi retidu (Psalm 45:4). A fosi sani di a e du, na taki a e puru Satan nanga den ogri yeye fu en na hemel.—Openbaring 6:2; 12:9.

Na asi di redi leki faya. A sma di e rèi en abi a makti „fu meki feti kon na grontapu” (Openbaring 6:4). Sensi 1914, feti e pasa doronomo na grontapu. Sowan 21 yari nomo baka a Fosi Grontapufeti, wan tra grontapufeti bigin pe moro sma lasi den libi. Sma e taki dati sowan 60 milyun sma dede na ini a Di Fu Tu Grontapufeti. Sensi 1945, moro pikin feti pasa, ma den feti disi ogri tu. Son historia skrifiman e taki dati moro leki wán hondro milyun sma lasi den libi na ini feti na ini a di fu 20 yarihondro.

A blaka asi. A sma di e rèi en abi wan wegi na ini en anu di e prenki angriten (Openbaring 6:5, 6). Na a ten fu a fosi grontapufeti, den feanti fu Doisrikondre tapu pasi gi sma fu tyari nyanyan kon na ini a kondre èn a sani disi meki taki 750.000 sma na ini Doisrikondre dede fu angri. Moro leki tu milyun sma fu Rosiakondre dede fu angri na ini 1921, èn den srefi sortu rampu disi pasa na tra presi. Ala nanga ala, sowan 70 milyun sma dede fu angri na ini a di fu 20 yarihondro. Ibri yari, moro leki dri milyun pikin di no doro feifi yari ete, e dede fu di den no e nyan bun.

Na asi di abi wan sikisma kloru. A sma di e rèi en e tyari takru siki kon di e kiri ipi-ipi sma (Openbaring 6:8). A fosi takru siki di kiri ipi-ipi sma na ini a di fu 20 yarihondro ben de a Spaanse griep. Wi no sabi soifri omeni sma dede, ma a kan taki a griep disi kiri sowan 50 milyun sma. „A siki disi di ben panya na heri grontapu ben de wan fu den moro bigi rampu di pasa oiti”, na so a buku Man and Microbes e taki. „Srefi a takru siki di sma ben sabi leki Zwarte dood (blaka dede) no ben kiri so furu sma so esi.” Poki, malaria, nanga tuberculose na tra takru siki di kiri hondrohondro milyun sma na ini a di fu 20 yarihondro.