Oiti yu aksi yusrefi: ’San e pasa trutru baka te wan sma dede? Den lobiwan fu wi di dede e pina na wan presi? Wi o si den baka wan dei? Fa mi kan de seiker taki den dedewan o kon na libi baka?’ Grantangi, meki wi go luku san Bijbel e leri. Wi o luku fosi san Bijbel e taki fu dede. Baka dati wi o luku sortu howpu Gado Wortu e gi.

San e pasa te wan sma dede?

SAN BIJBEL E TAKI: „Den libiwan sabi taki den o dede. Ma den dedewan no sabi notinoti èn den no e kisi pai moro tu, bika nowan sma e memre den moro. Ala san yu anu feni fu du, du dati nanga ala yu krakti, bika na ini Grebi, a presi pe yu o go, sma no e wroko, den no e prakseri, den no sabi sani èn den no abi koni.”a​—Preikiman 9:5, 10.

Grebi na a presi pe sma e go te den dede. Sma di de na ini Grebi no sabi notinoti èn nowan wroko e du drape. Fa a reti-ati man Yob ben e denki fu a Grebi? A ben lasi ala en gudu nanga en pikin na ini wán dei. Baka dati a kisi takru butsweri na en heri skin. Ne a begi Gado: „Mi winsi taki yu ben o kibri mi na ini Grebi. Mi winsi taki yu ben o kibri mi” (Yob 1:13-19; 2:7; 14:13). Son Bijbel gebroiki a wortu „hel” na presi fu „Grebi” na ini a tekst disi. Ma a de krin taki Yob no ben e si a Grebi leki wan presi pe a ben o bron nanga faya èn pe a ben o pina moro srefi. Ma a ben e si en leki wan presi pe a ben o feni frulekti.

Wan tra fasi de tu fa wi kan sabi san e pasa te wan sma dede. Wi kan ondrosuku den Bijbel tori fu aiti sma di ben kon na libi baka di den ben dede.​—Luku a faki „Bijbel e taki fu den aiti sma disi di kon na libi baka”.

Nowan fu den aiti sma disi taki dati den ben de na wan presi pe a libi ben switi noso pe den ben e pina. Efu den sma di ben kon na libi baka ben go na so wan presi di den dede, dan yu no denki taki den ben o fruteri tra sma? Yu no denki taki disi ben o skrifi na ini Bijbel tu so taki ala sma kan leisi en? Ma Bijbel no e taki noti fu den sani dati. Nowan fu den aiti sma fruteri den tori dati. Fu san ede? Fu di den no ben sabi notinoti. Den ben de ini wan sortu dipi sribi. Fu taki en leti, son leisi Bijbel e agersi dede nanga sribi. Fu eksempre, di a meisje fu Yairus ben dede, dan Yesus ben taki dati „a e sribi”.​—Markus 5:39.

We dan sortu howpu de gi den dedewan? Den kan wiki baka fu a sribi dati?

Sma di dede man kon na libi baka?

SAN BIJBEL E TAKI: „A yuru o kon te ala den sma di de na ini den grebi o yere [Yesus] sten èn den o komopo drape.”​—Yohanes 5:28, 29.

Sobun Yesus ben taki dati na ini a ten di e kon te a Kownukondre o tiri, dan ala den grebi ben o leigi. Fernando di ben kari na ini a fosi artikel e taki: „Mi ben breiti trutru di mi leisi Yohanes 5:28, 29 fu a fosi leisi. A tekst disi gi mi trutru howpu èn dati meki mi no e frede te mi e prakseri a ten di e kon.”

Na ini owruten a reti-ati man Yob ben fruwakti taki baka te a dede Gado ben o wiki en baka te fu kaba. Yob ben aksi: „Efu wan libisma dede, a kan kon na libi baka?” Ne a piki sondro fu tweifri: „Solanga mi de na ini katibo [na ini Grebi], mi o wakti teleki frulusu kon. Yu o kari mi èn mi o piki yu.”​—Yob 14:14, 15.

Marta a sisa fu Lasarus ben sabi taki dedesma o wiki baka. Baka di Lasarus dede, Yesus taigi en: „Yu brada o kon na libi baka.” Marta taigi en: „Mi sabi taki a o kon na libi baka te na opobaka o de na a lasti dei.” Yesus piki en: „Mi na a opobaka nanga a libi. A sma di e bribi na ini mi, sa kon na libi baka, awansi a dede” (Yohanes 11:23-25). Baka dati Yesus wiki Lasarus wantewante. A span tori disi e sori wi pikinso nomo fu san o pasa na ini a ten di e kon. Prakseri fa a o de te dedesma na ala sei fu grontapu o kon na libi baka.

Sma o kisi wan opobaka fu libi na ini hemel?

SAN BIJBEL E TAKI: Gado Wortu e sori taki na opobaka fu Yesus ben de heri tra fasi leki den tra aiti di kari na ini Bijbel. Den aiti sma dati ben kon na libi baka na grontapu. Ma luku san Bijbel e taki fu na opobaka fu Yesus: „Yesus Krestes . . . go na hemel èn now a de na Gado en reti-anusei” (1 Petrus 3:21, 22). Yesus ben de a wan-enkri sma di ben o kisi wan opobaka fu libi na ini hemel? Wan pisi ten na fesi Yesus ben taigi den apostel fu en: „Te mi gowe èn mi sreka wan presi gi unu kaba, dan mi o kon baka èn mi o teki unu na ini oso, so taki unu kan de pe mi de.”​—Yohanes 14:3.

Krestes go na hemel èn a sreka wan presi gi sonwan fu den disipel fu en. Ala nanga ala, 144.000 sma o kisi wan opobaka fu libi na hemel (Openbaring 14:1, 3). Ma san den bakaman disi fu Yesus o go du na hemel?

Den o abi furu wroko fu du drape! Bijbel e taki: „Den sma di kisi a fosi opobaka, de koloku èn den de santa. A di fu tu dede no abi makti tapu den sma disi, ma den o de priester fu Gado èn fu Krestes, èn na ini den wán dusun yari, den o tiri leki kownu makandra nanga en” (Openbaring 20:6). Den wan di o kisi wan opobaka fu libi na ini hemel o tiri grontapu leki kownu nanga priester makandra nanga Krestes.

Suma o kisi wan opobaka fu libi na grontapu?

SAN BIJBEL E TAKI: Bijbel e taki fu wan lezing di na apostel Paulus ben hori: „Neleki den man disi, mi abi a howpu taki Gado sa gi wan opobaka na den sma di du san reti èn na den sma di no du san reti.”​—Tori fu den apostel 24:15.

Suma na den sma di „du san reti” soleki fa Paulus e taki? Luku wan eksempre. Fosi a reti-ati man Danièl dede wan engel taigi en: „Yu o go rostu, ma yu o opo baka fu kisi yu pai na a kaba fu den dei” (Danièl 12:13). Pe Danièl o kisi wan opobaka? „Den reti-ati sma o kisi grontapu èn fu têgo den o tan libi drape” (Psalm 37:29). Yesus ben taki tu: „Koloku fu den safri-ati sma, bika den o kisi grontapu” (Mateyus 5:5). Danièl nanga tra reti-ati mansma nanga umasma o kisi wan opobaka fu libi na grontapu baka, fu têgo srefi.

Suma na den sma di „no du san reti” soleki fa Paulus ben taki? Na den milyunmilyun sma di dede sondro taki den kisi na okasi fu kon frustan san Bijbel e leri èn fu du san den leri. Baka te den kisi wan opobaka den o kisi na okasi fu kon leri sabi Yehovaha nanga Yesus èn fu sori taki den lobi den (Yohanes 17:3). Ala den sma di bosroiti fu dini Gado o abi a howpu fu libi solanga Yehovah de na libi, iya fu têgo.

Fa a libi o de na grontapu?

SAN BIJBEL E TAKI: Gado „o figi ala watra puru na den ai èn dede no o de moro. Nowan sari, noso krei, noso pen no o de moro” (Openbaring 21:4). „Den o bow oso èn den srefi o tan na ini. Den o prani droifidyari èn den srefi o nyan fu en.”​—Yesaya 65:21.

Prakseri fa a o de fu de makandra nanga den lobiwan fu yu di kisi wan opobaka na ini a ten dati. Ma na aksi na: Fa yu kan de seiker taki den sma di dede o kon na libi baka?

Na wan don sani fu bribi taki den dedewan o kon na libi baka? Nôno. Luku fa na apostel Paulus ben e denki fu a tori dati. A ben skrifi: „Efu na ini a libi disi wawan wi howpu tapu Krestes, dan wi de fu sari moro leki ala tra libisma. Ma Krestes kisi wan opobaka trutru. Fu den wan di dede en na a fosiwan di kisi wan opobaka” (1 Korentesma 15:19, 20). Paulus ben e bribi taki den dedewan o kisi wan opobaka. Na opobaka fu Yesus ben meki taki a ben de seiker fu a sani dati (Tori fu den apostel 17:31).a Dati meki Paulus ben taki dati Yesus na „a fosiwan” fu den wan di o kisi wan opobaka fu libi fu têgo. Efu Yesus na a fosiwan, dan dati e sori taki trawan o kisi wan opobaka tu.

Luku wan tra sani fu san ede yu kan de seiker taki den dedewan o kon na libi baka. Yehovah na a Gado di e taki san tru. „Gado . . . no man lei” (Titus 1:2). Noiti Yehovah lei, èn noiti a o du dati tu. Yehovah pramisi taki den dedewan o kon na libi baka, èn a sori srefi taki a man wiki den dedewan. Sobun, yu denki taki a no o du san a pramisi? Wi kan de seiker taki a o du dati!

Fu san ede Yehovah o gi den dedewan wan opobaka na ini a ten di e kon? Fu di a lobi sma. „Efu wan libisma dede, a kan kon na libi baka?”, na dati Yob ben aksi. „Yu o kari mi èn mi o piki yu. Yu o angri fu si mi, a sani di yu meki nanga yu eigi anu” (Yob 14:14, 15). Yob ben de seiker taki en lobi Papa na hemel ben o angri fu tyari en kon na libi baka. Gado kenki? „Mi na Yehovah. Mi no kenki” (Maleaki 3:6). Te nanga now Gado e angri fu tyari den dedewan kon na libi baka, so taki den kan de gosontu èn koloku. Na dati ala papa noso mama di lobi en pikin ben o wani efu en pikin kon dede. Den no abi a makti fu du dati, ma Gado abi a makti fu du san a e winsi.​—Psalm 135:6.

Yehovah o gi en Manpikin a makti fu meki den wan di e sari fu di den lasi wan lobiwan, prisiri baka. Fa Yesus feni en fu gi sma wan opobaka? Fosi Yesus gi Lasarus wan opobaka, a si fa den sisa nanga den mati fu Lasarus ben e sari, ne ensrefi „bigin krei” (Yohanes 11:35). Wan tra leisi, Yesus miti nanga wan uma fu a foto Nain di ben lasi en wan-enkri manpikin. Yesus ben „firi sari gi en èn a taigi en: ’No krei moro.’” Wantewante Yesus wiki a boi fu na uma (Lukas 7:13). Sobun, Yesus e firi sari trutru te wan sma dede. A o breiti kefalek fu wiki den dedewan so taki sma di ben e sari kan de nanga bigi prisiri baka.

Yu ben sari fu di yu lasi wan lobiwan na ini dede? Kande yu e denki taki dede na wan problema di noiti o lusu. Ma wan lusu de, èn dati na taki Gado o meki en Manpikin wiki den dedewan. No frigiti taki Gado wani taki yu si a ten dati. A wani taki yu de drape fu brasa den lobiwan fu yu di kon na libi baka. Prakseri fa a o de fu libi fu têgo makandra nanga den, sondro fu frede taki yu o lasi den baka!

Lionel, di ben kari na ini a fosi artikel e taki: „Te fu kaba, mi leri taki den dedewan o kon na libi baka. Na a bigin mi no ben bribi a sani dati, èn mi no ben e frutrow a sma di fruteri mi a sani dati. Ma mi go luku na ini Bijbel èn mi si taki a tru! Mi no man wakti fu si mi granpapa baka.”

Yu wani kon sabi moro? Yehovah Kotoigi o breiti fu sori yu na ini yu eigi Bijbel fu san ede den de seiker taki den dedewan o kon na libi baka.b