Yu kan dini na wan presi pe moro Kownukondre preikiman de fanowdu?

„Wi ben abi wan bun libi na ini Amerkankondre, ma wi ben e broko wi ede taki a fasi fa sma drape ben e feti fu kon gudu, ben o abi takru krakti tapu wi èn tapu den tu boi fu wi. Mi nanga mi wefi ben dini fosi leki zendeling, èn wi ben wani a libi dati baka. Na a ten dati wi no ben abi furu sani, ma wi ben abi wan koloku libi.”

FU DI Ralph nanga Pam ben wani a sani dati, meki na ini 1991 den bosroiti fu skrifi difrenti bijkantoro, fu fruteri den brada taki den wani dini na wan presi pe moro Kownukondre preikiman de fanowdu. A bijkantoro fu Meksikow skrifi den baka, èn den taigi den taki Kownukondre preikiman de tranga fanowdu na ini den kontren pe sma e taki Ingrisitongo. Fu taki en leti, a bijkantoro ben taki dati „a nyanyan lepi kaba fu koti” na ini den kontren dati (Yoh. 4:35). Syatu baka dati, Ralph nanga Pam, makandra nanga den boi fu den di ben abi 8 yari nanga 12 yari, teki a kari disi èn den bigin sreka sani fu froisi go na Meksikow.

Wan bigi kontren

Ralph e fruteri: „Fosi wi froisi gowe fu Amerkankondre, wan tu brada nanga sisa di ben abi a bun fu wi na prakseri, ben taigi wi: ’Ogri kan miti unu te unu froisi go na wan tra kondre!’ ’Fa unu o du te unu kon siki?’ ’Fu san ede unu o go preiki na ini kontren pe sma e taki Ingrisitongo? Den sma di e taki Ingrisitongo drape no o wani sabi noti fu a tru anbegi!’ Ma wi no ben meki noti tapu wi fu go drape. Wi no teki a bosroiti disi somarso, ma wi ben denki bun fu a tori disi. Wi ben seti sani furu yari langa kaba. Wi ben sorgu taki wi no teki bigi paiman na wi tapu, wi ben kibri moni, èn leki osofamiri wi ben taki fu den muilek sani di wi ben kan miti drape.”

Ralph nanga en osofamiri fisiti a bijkantoro fu Meksikow fosi. Drape, den brada sori den a karta fu a heri kondre èn den taigi na osofamiri disi: „Disi na a kontren pe un musu wroko!” A famiri disi go tan na ini a foto San Miguel de Allende, pe furu sma fu tra kondre e tan. A foto disi de sowan 240 kilometer na a noord westsei fu Meksikow City. Dri yari baka di den doro drape, wan Ingrisitongo gemeente fu 19 preikiman ben seti na ini a foto dati. Dati ben de a fosi Ingrisitongo gemeente na ini Meksikow, ma moro ben de fu du ete.

Pikinmoro wán milyun sma fu Amerkankondre e libi na ini Meksikow. Boiti dati, yu abi furu sma na ini Meksikow di e taki Ingrisitongo fu di den abi dati fanowdu gi a wroko fu den, noso gi den sani di den e studeri na skoro. Ralph e taki: „Wi ben begi gi moro wrokoman fu preiki. Wi ben abi wan kamra na ini wi oso, di ben de spesrutu gi brada nanga sisa di ben kon na ini a kontren fu wi fu luku efu den man kon dini drape.”—Num. 13:2.

Den seti den libi tra fasi fu man abi moro ten gi a preikiwroko

A no teki langa, di moro brada nanga sisa ben doro drape, fu di den ben wani du moro na ini a preikiwroko. Tu fu den ben de Bill nanga Kathy fu Amerkankondre. Den ben dini 25 yari kaba na ini kontren pe moro preikiman de fanowdu. Den ben abi na prakseri fu leri Spanyorotongo, ma den kenki prakseri di den froisi go na a foto Ajijic, di de na a syoro fu a Chapala Meer. Disi na wan moi presi pe sma di go nanga pensyun na ini Amerkankondre, e kon libi. Bill e taki: „Na ini Ajijic wi ben go suku moro sma di e taki Ingrisitongo èn di ben wani kon sabi a tru anbegi.” Tu yari baka di Bill nanga Kathy doro na ini a foto dati, den ben abi a prisiri fu si fa wan gemeente seti drape, iya, disi ben de a di fu tu Ingrisitongo gemeente na ini Meksikow.

Ken nanga Joanne fu Kanada, ben wani seti sani tra fasi na ini den libi tu, so taki den ben o abi moro ten gi Kownukondre afersi. Den froisi go na Meksikow tu. Ken e fruteri: „A ben teki ten fu kon gwenti a libi drape, pe son leisi waran watra nanga stroom no de, noso pe a telefon no e wroko wan tu dei langa.” Ma a ben gi den furu prisiri fu teki prati na a preikiwroko. Syatu baka di den doro, Ken tron wan dinari ini a diniwroko, èn tu yari baka dati a tron wan owruman. Na a bigin, a ben muilek gi na umapikin fu den, Britanny, fu de na ini wan pikin Ingrisitongo gemeente pe wan tu yonguwan nomo ben de. Ma baka di a bigin go yepi fu bow Kownukondre zaal, a kon abi furu bun mati na ini a heri kondre.

Patrick nanga Roxanne, fu a distrikt Texas na Amerkankondre, ben breiti fu yere taki krosibei fu a presi pe den e tan, furu zendeling ben e go. Drape na ini Meksikow den zendeling e preiki gi sma di e taki Ingrisitongo. Patrick e taki: „Baka di wi ben go na a foto Monterrey, di de na a noord owstusei fu Meksikow, wi ben si taki Yehovah ben wani taki wi go yepi drape.” Na ini feifi dei, den ben man seri na oso fu den na ini Texas, èn a ben de neleki den ’abra go na Masedonia’ (Tori. 16:9). A no ben makriki gi den fu wroko nofo moni fu sorgu den osofamiri, ma na ini tu yari nomo, den ben abi a prisiri fu si fa wan pikin grupu fu 17 Kotoigi gro kon tron wan gemeente fu 40 preikiman.

Jeff nanga Deb, na wan tra trowpaar di seti sani tra fasi na ini den libi fu man du moro na ini a preikiwroko. Den ben seri a bigi oso fu den na ini Amerkankondre, èn den froisi go na wan pikin oso na ini Cancún, wan foto na a owstusei syoro fu Meksikow. Fosi, den ben gwenti fu go na bigi konmakandra di ben hori na presi di ben abi airco èn di ben de krosibei fu den oso. Now a e teki aiti yuru fosi den doro na wan bigi konmakandra na ini Ingrisitongo, di e hori na wan stadion sondro daki. Ma den ben abi a prisiri fu si taki na ini Cancún wan gemeente seti fu sowan 50 preikiman.

Son brada nanga sisa fu Meksikow bigin yepi tu fu preiki gi sma di e taki Ingrisitongo. Fu eksempre, di Rubén nanga en osofamiri yere taki a fosi Ingrisitongo gemeente ben seti na ini San Miguel de Allende, èn taki a kontren fu a gemeente dati na heri Meksikow, dan wantewante den bosroiti fu go yepi drape. Disi ben wani taki dati den ben musu leri Ingrisitongo, den ben musu kon gwenti nanga wan tra kulturu, èn den ben musu go na farawe presi. Den ben musu go 800 kilometer ibri wiki fu go na den konmakandra. Rubén e fruteri: „Wi ben abi a prisiri fu preiki gi sma fu tra kondre di e libi furu yari kaba na ini Meksikow, ma di e yere a bun nyunsu na ini den eigi tongo fu a fosi leisi. Sonwan fu den ben krei srefi soso fu di den ben warderi a muiti di wi ben meki.” Baka di Rubén nanga en osofamiri ben yepi a gemeente na ini San Miguel de Allende, den go dini leki pionier na ini a foto Guanajuato, na mindrisei fu Meksikow. Drape den yepi fu seti wan Ingrisitongo gemeente fu moro leki 30 preikiman. Tide na a dei, den e dini na ini wan Ingrisitongo grupu na ini Irapuato, wan foto krosibei fu Guanajuato.

Den e preiki gi sma di den no man miti so makriki

Boiti den sma fu tra kondre, furu sma fu Meksikow e taki Ingrisitongo tu. Nofo tron a muilek fu fruteri den sma disi a Kownukondre nyunsu, fu di den e libi na ini gudu birti pe sma di e wroko gi den e kon na a doro. Noso efu den sma disi srefi e kon na a doro, den no wani arki a boskopu fu wi fu di den e denki taki Yehovah Kotoigi na wan pikin sekte na ini a kontren drape. Ma te Kotoigi fu tra kondre e preiki gi den sortu sma disi, dan sonwan fu den e arki.

Luku na eksempre fu Gloria di e libi na ini a foto Querétaro, na mindrisei fu Meksikow. A e fruteri: „Wan tu leisi Kotoigi di e taki Spanyorotongo ben kon na mi oso, ma mi no ben wani arki den. Ma di mi osofamiri nanga den mati fu mi bigin kisi problema, mi ben brokosaka èn fu dati ede mi begi Gado fu yepi mi. Syatu baka dati, wan uma di e taki Ingrisitongo kon na mi oso. A ben aksi efu wan sma na ini na oso e taki Ingrisitongo. Fu di a ben de wan sma fu tra kondre, meki mi ben wani sabi moro fu en, èn mi taigi en taki mi e taki Ingrisitongo. Di a ben e taki nanga mi, mi ben e denki: ’San na Amerkan uma disi e du dyaso na ini mi birti?’ Ma mi ben aksi Gado fu yepi mi. A ben kan de so taki na Gado seni na uma disi fu tra kondre fu kon yepi mi.” Gloria bigin studeri Bijbel èn a go na fesi heri esi teleki a teki dopu, aladi en famiri ben gens en. Now Gloria e dini leki wan gewoon pionier, èn en masra nanga en manpikin e dini Yehovah tu.

Den sma di e du moro na ini a preikiwroko e kisi blesi

A no makriki fu dini na wan presi pe moro Kownukondre preikiman de fanowdu, ma sma e kisi furu blesi te den e du dati. Ralph, di wi ben taki fu en kaba na a bigin, e taki: „Wi ben studeri Bijbel nanga sma fu Ingrisikondre, China, Yamaika, Sweden, èn srefi sma fu Gana di ben de famiri fu a kownu. Sonwan fu den Bijbelstudenti disi go na ini a furuten diniwroko srefi. Den tu boi fu wi bigin pionier makandra nanga wi, èn den e dini now na Bethel na ini Amerkankondre.”

Now, 88 Ingrisitongo gemeente de na ini Meksikow èn sosrefi bun furu grupu. San meki taki a wroko go na fesi so esi? Furu sma di e taki Ingrisitongo na ini Meksikow noiti no ben taki ete nanga Yehovah Kotoigi. Trawan e arki a bun nyunsu, fu di den famiriman nanga mati no de drape fu gens den, soleki fa dati ben kan pasa na ini a kondre pe den komoto. Trawan baka, bigin studeri Bijbel fu di den go nanga pensyun èn den abi moro ten now. Boiti dati, pikinmoro afu fu den preikiman na ini den Ingrisitongo gemeente e dini leki pionier, èn dati e meki taki den gemeente de fayafaya èn den e gro.

Blesi di e wakti yu

A no de fu taki dati moro sma na grontapu sa arki a Kownukondre boskopu di wi e preiki na ini den eigi tongo. Fu dati ede, a e gi wi deki-ati fu si taki furu brada nanga sisa, iya, owruwan, yonguwan, sma di no trow nanga sma di trow, de klariklari fu froisi go na kontren pe moro Kownukondre preikiman de fanowdu. A tru taki den sma disi kan kisi fu du nanga muilek situwâsi, ma den sani dati na noti te den e teki en gersi nanga a prisiri di den abi te den e feni reti-ati sma di wani arki den tru tori fu Bijbel. Yu kan kenki sani na ini yu libi so taki yu kan froisi go na wan kontren na ini yu eigi kondre, noso na wan tra kondre pe moro Kownukondre preikiman de fanowdu? (Luk. 14:28-30; 1 Kor. 16:9)a Efu dati de so, yu kan de seiker taki furu blesi e wakti yu.

[Futuwortu]

[Faki na tapu bladzijde 21]

A hari en prakseri di a si o koloku sma de di go nanga pensyun

Beryl ben froisi fu Ingrisikondre go na Kanada. Drape a ben e wroko leki wan basi gi difrenti bigi bedrijf fu tra kondre. A ben sabi rèi asi heri bun tu, èn den ben teki en srefi fu rèi gi Kanada na a Olympis Prei na ini 1980. Di Beryl go nanga pensyun, a froisi go na Chapala, Meksikow. En nanga en masra ben gwenti fu go nyan na den nyanyan-oso na ini a kontren dati. Te Beryl ben e si koloku sma di ben e taki Ingrisitongo èn di de nanga pensyun, dan a ben waka go miti den èn a ben aksi den san den e du na ini Meksikow. Nofo tron den sma dati ben de Yehovah Kotoigi. Beryl nanga en masra ben denki taki efu sma de koloku èn efu den abi wan marki na ini a libi fu di den sabi Gado, dan densrefi wani fu kon sabi en tu. Di Beryl go wan tu mun langa na den Kresten konmakandra, dan a agri fu studeri Bijbel. Wan tu yari langa, Beryl ben man dini leki wan gewoon pionier.

[Faki na tapu bladzijde 22]

„A de wan blesi fu abi den dyaso nanga wi”

Den brada trutru abi warderi gi den sma di e froisi kon na den kondre fu yepi na kontren pe moro Kownukondre preikiman de fanowdu. Wan bijkantoro na wan fu den Karibis èilanti ben skrifi: „Efu den hondrohondro sma fu tra kondre di e dini dyaso, ben o gowe, dan den gemeente no ben o tranga moro. A de wan blesi fu abi den dyaso nanga wi.”

Gado Wortu e taki dati „den umasma di e fruteri a bun nyunsu, na wan bigi legre” (Ps. 68:11). Fu dati ede, a no de fu fruwondru taki furu sisa di no trow e dini na ini tra kondre. Den sisa disi di de klariklari fu gi densrefi, na wan bigi yepi. Wan bijkantoro na ini wan kondre na owstu Europa ben taki: „Na ini furu fu den gemeente fu wi, bun furu sisa de, èn son leisi moro leki afu fu den preikiman na sisa. Furu fu den no de so langa na ini a tru anbegi, ma den pionier sisa disi di no trow èn di kon fu tra kondre, e yepi furu fu gi den sortu nyunwan disi leri. Wi abi furu warderi gi den sisa disi fu tra kondre!”

Fa den sisa disi e feni en fu dini na ini tra kondre? Angelica, wan sisa di pasa 30 yari èn di e dini wan tu yari kaba na ini wan tra kondre leki pionier, e taki: „Mi e kisi fu du nanga furu muilek situwâsi. Wan fu den presi pe mi ben go, mi ben musu waka na tapu tokotoko pasi ibri dei èn a ben hati mi trutru fu si fa so furu sma e pina. Ma mi ben kisi prisiri fu di mi ben man yepi sma na ini a diniwroko. A ben naki mi ati tu di furu fu den sisa fu a kontren drape ben taki mi tangi dati mi kon yepi den. Wan sisa ben taigi mi taki na fu di mi kon te drape na a kondre fu en fu dini leki pionier, meki ensrefi go na ini a furuten diniwroko.”

Sue, wan pionier sisa di pasa 50 yari, e taki: „A no de fu taki dati yu o kisi fu du nanga muilek situwâsi, ma den sani disi na noti te yu e teki den gersi nanga den blesi di yu e kisi. A de wan heri moi sani fu teki prati na a preikiwroko! Fu di mi e wroko furu nanga yongu sisa na ini a preikiwroko, meki mi man fruteri den san mi leri fu Bijbel nanga den publikâsi fu wi, èn fa dati yepi mi nanga den problema di mi ben abi. Nofo tron den e taigi mi taki na eksempre fu mi èn a fasi fa mi horidoro so furu yari leki wan pionier sisa di no trow, e yepi den fu si taki densrefi kan horidoro te de e kisi fu du nanga problema na ini den libi. A e gi mi furu prisiri taki mi man yepi den sisa disi.”

[Karta na tapu bladzijde 20]

(Efu yu wani si pe den sani disi skrifi, luku a tijdschrift)

MEKSIKOW

Monterrey

Guanajuato

Irapuato

Ajijic

Chapala

Chapala Meer

San Miguel de Allende

Querétaro

MEKSIKOW CITY

Cancún

[Prenki na tapu bladzijde 23]

Son preikiman abi a prisiri fu preiki gi trakondre sma di yere a bun nyunsu fu a fosi leisi