Yu man „abra kon na Masedonia”?
1. San ben meki taki Paulus nanga den kompe fu en go na Masedonia?
1 Na a ten fu a yari 49, na apostel Paulus gowe fu Antiokia na ini Siria fu bigin a di fu tu zendelingwaka fu en. A ben wani go na Efeise nanga tra foto na ini Pikin Asia. Ma na presi fu dati, a santa yeye gi en wan kari na ini wan fisyun fu „abra kon na Masedonia”. Nanga prisiri en nanga den kompe fu en teki a kari disi, èn den kisi a grani fu seti a fosi gemeente na ini a kontren dati (Tori. 16:9, 10; 17:1, 2, 4). Na ini a ten disi, son presi na grontapu abi moro wrokoman fanowdu fu du a kotiwroko (Mat. 9:37, 38). Yu man yepi?
2. Fu san ede son sma no e prakseri fu froisi go na wan tra kondre?
2 Kande yu wani de wan zendeling neleki Paulus, ma yu no denki seryusu fu froisi go na wan tra kondre. A kan taki yu no man go na a Gileadskoro fu di yu owru tumusi, fu di yu na wan sisa di no trow, noso fu di yu abi yongu pikin fu kweki ete. Kande yu no ben prakseri fu froisi go na wan tra kondre fu di yu feni taki yu no o man leri wan tra tongo. Noso a kan taki fu di ekonomia problema de na ini yu eigi kondre yu froisi go na wan tra kondre, èn fu dati ede yu e frede fu froisi baka. Ma a kan taki baka te yu begi fu a tori, yu e kon si taki den sortu situwâsi disi no abi fu tapu yu fu froisi go na wan tra kondre pe moro yepi de fanowdu.
3. Fu san ede yu no abi fu go na a Gileadskoro fosi, fu abi bun bakapisi te yu e preiki na ini wan tra kondre?
3 A de fanowdu fu go na a Gileadskoro fosi? San ben meki taki Paulus nanga den kompe fu en ben abi bun bakapisi na ini a preikiwroko? Na fu di den ben frutrow na tapu Yehovah nanga a santa yeye fu en (2 Kor. 3:1-5). Fu dati ede, srefi efu yu de na ini situwâsi di e meki taki yu no man kisi a spesrutu leri disi, toku yu kan abi bun bakapisi te yu e preiki na ini wan tra kondre. Hori na prakseri tu taki yu e kisi leri doronomo na a Theokrasia Diniwroko-skoro nanga a Diniwroko Konmakandra, di yu sa man gebroiki bun awinsi pe yu e dini. Efu yu wani go na a Gileadskoro noso na wan srefi sortu skoro, dan yu kan froisi go na wan tra kondre, èn dati kan meki yu kisi bun ondrofeni. Disi kan yepi yu bakaten efu yu kisi a kari fu go na wan spesrutu skoro.
4. Fu san ede owru brada nanga sisa no musu denki taki den no o man froisi fu go preiki na ini wan tra kondre?
4 Owruwan: Owru brada nanga sisa di lepi èn di abi wan bun gosontu ete, kan de wan bigi yepi na ini kondre di abi yepi fanowdu. Yu de nanga pensyun? Son brada nanga sisa di no e kisi furu pensyun moni, kan sorgu densrefi bun na ini wan pôti kondre, den kan abi nofo moni fu pai gi datra, fu di kande den kostu na ini a kondre dati lagi moro leki na ini a kondre pe den ben tan fosi.
5. Fruteri wan ondrofenitori fu wan brada di ben de nanga pensyun èn di froisi go na wan tra kondre.
5 Wan owruman di e pionier èn di de nanga pensyun, ben tan na ini wan kondre pe den e taki Ingrisitongo. A brada disi ben froisi go na wan presi na ini a zuid-owstusei fu Asia pe sma fu tra kondre lobi fu go koiri. A ben froisi go drape fu yepi wan Ingrisitongo grupu di abi neigi preikiman. A grupu disi ben preiki gi den 30.000 trakondre sma di e libi na ini a kontren dati. Na ini tu yari, 50 sma ben e go na den konmakandra. A brada skrifi: „Mi kisi den moro moi blesi fu di mi froisi kon tan dyaso. Ten no de nofo fu fruteri fu ala den blesi disi!”
6. Fruteri wan ondrofenitori fu wan sisa di no trow èn di froisi go na wan tra kondre pe moro yepi ben de fanowdu.
6 Sisa di no trow: Yehovah gebroiki sisa na wan tumusi moi fasi fu fruteri a bun nyunsu na ini kondre pe moro yepi de fanowdu (Ps. 68:11). Wan yongu sisa di no trow, ben wani du moro na ini a diniwroko na ini wan tra kondre, ma wi kan frustan taki en papa nanga mama ben broko den ede taki ogri ben kan miti en. Dati meki a bosroiti fu go na wan kondre pe dyugudyugu no ben de na politiek sei èn na ekonomia sei, a skrifi go na a bijkantoro, èn a ben kisi bun bodoi di sori en krin san a ben kan du. Na ini den siksi yari di a tan na ini a kondre, a kisi furu blesi. A e taki: „Na ini mi eigi kondre mi ben o abi wan tu Bijbelstudie. Ma fu di mi ben go dini na ini wan kondre pe yepi ben de fanowdu, mi ben man abi furu Bijbelstudie èn disi yepi mi fu man gi leri moro bun.”
7. Fruteri wan ondrofenitori fu wan osofamiri di ben froisi go na wan tra kondre.
7 Osofamiri: Efu yu abi pikin, dan disi musu tapu yu fu froisi go na wan tra kondre fu yepi fruteri a bun nyunsu drape? Wan osofamiri di abi tu pikin fu aiti nanga tin yari, ben teki a bosroiti fu froisi go na wan tra kondre. A mama skrifi san den ben ondrofeni: „Wi breiti taki wi ben man kweki den pikin fu wi dyaso, bika den ben abi demakandra nanga spesrutu pionier nanga zendeling. Wi ben kon abi wan moro bun libi fu di wi ben go dini na presi pe moro yepi de fanowdu.”
8. Wan sma man froisi go na wan tra kondre sondro fu leri wan tra tongo? Fu san ede?
8 Efu yu e denki taki yu no man leri wan tra tongo: Yu no wani froisi go na wan tra kondre, fu di yu e frede fu leri wan tra tongo? A kan taki sma e taki a tongo fu yu na ini tra kondre pe moro Kownukondre preikiman de fanowdu. Wan trowpaar di e taki Ingrisitongo ben froisi go na wan kondre pe sma e taki Spanyorotongo èn den ben go na wan kontren pe bun furu Ingrisitongo sma froisi go tan. Baka di a bijkantoro gi den wan tu nen fu difrenti Ingrisitongo gemeente na ini a kontren dati di ben abi yepi fanowdu, dan den teki a bosroiti fu go na wan fu den gemeente èn den fisiti a gemeente tu tron. Den drai go baka na oso, den meki moro mendri kostu ibri mun, èn wan heri yari den poti moni na wan sei. Di den ben de srekasreka fu froisi, dan den brada na ini a kontren dati yepi den fu feni wan oso di den ben man pai.
9, 10. San den sma di froisi komoto fu den eigi kondre kan prakseri fu du? Fu san ede?
9 Sma di go libi na ini wan tra kondre: Yu go libi na ini wan tra kondre fosi yu tron wan Kotoigi? A kan taki furu yepi de fanowdu na ini a kondre pe yu gebore. Kande yu kan prakseri fu froisi go baka so taki yu man yepi drape. Kande a o moro makriki gi yu fu feni wroko nanga wan tanpresi, leki gi wan sma di de fu wan tra kondre. Kande yu e taki a tongo fu a kondre dati kaba. Boiti dati, a kan taki sma wani arki moro te yu e fruteri den a Kownukondre boskopu, leki te wan sma fu wan tra kondre ben o du dati.
10 Wan man ben lowe fu Albania go na Italiakondre, a feni wan bun wroko drape èn a ben seni moni gi en famiri na Albania. Baka di a tron wan Kotoigi, a bijkantoro fu Albania aksi en fu leri wan tu spesrutu pionier fu Italiakondre, na Albaneisitongo. Den spesrutu pionier ben o froisi go na Albania fu dini pe moro yepi ben de fanowdu. A brada skrifi: „Den spesrutu pionier ben e go na wan kontren di mi ben gowe libi. Den no ben sabi a tongo èn den ben breiti srefisrefi fu go. Mi e taki Albaneisitongo èn mi na fu Albania. San mi ben e du ete na Italiakondre?” A brada ben bosroiti fu drai go baka na Albania fu yepi preiki a bun nyunsu. A e taki: „A de so taki mi e sari taki mi gowe libi a wroko nanga a moni di mi ben e meki na ini Italiakondre? Kwetikweti! Mi feni wan trutru bun wroko na ini Albania. Soleki fa mi e si a tori, dan a moro prenspari wroko di e gi têgo prisiri, na fu dini Yehovah nanga ala san yu abi!”
11, 12. San den wan di wani froisi go na wan tra kondre musu du?
11 San yu musu du: Fosi Paulus nanga den kompe fu en ben go na Masedonia, den ben wani go na westsei, ma „a santa yeye ben tapu den”, èn fu dati ede den go na noordsei (Tori. 16:6). Di den ben de krosibei fu Bitinia, dan Yesus tapu den fu go drape (Tori. 16:7). Yehovah e gebroiki Yesus ete fu tiri a preikiwroko (Mat. 28:20). Fu dati ede, efu yu e prakseri fu froisi go na wan tra kondre, dan taki nanga Yehovah na ini begi meki a tiri yu.—Luk. 14:28-30; Yak. 1:5; luku a faki di nen „Fa yu kan sabi efu wan kondre pe yu wani go, abi yepi fanowdu?”
12 Aksi den owruman fu yu nanga tra lepi Kresten meki den taigi yu krin efu yu o man dini na ini wan tra kondre (Odo 11:14; 15:22). Leisi artikel di wi tyari kon na doro èn di e taki fa wi kan dini na ini wan tra kondre. Suku fu kon sabi sani tu fu a kondre pe yu ben sa wani go. Yu man go wan tu dei na a kondre pe yu wani froisi go? Efu yu wani froisi go trutru na wan tra kondre, dan yu kan skrifi a bijkantoro na ini a kondre dati efu yu wani sabi moro. Yu kan gebroiki na adres fu a bijkantoro di skrifi na ini a moro nyun Yaribuku. Ma na presi fu seni a brifi go langalanga na a bijkantoro, yu kan gi den owruman na ini yu gemeente a brifi so taki den kan skrifi san den e denki, fosi den seni en go.—Luku Wi orga fu du a wani fu Yehovah, bladzijde 111, 112.
13. Fa a bijkantoro o yepi yu, ma san yusrefi musu du?
13 A bijkantoro o skrifi sani fu a kondre di yu kan gebroiki bun so taki yu kan teki wan bosroiti. Ma den no o man gi yu wan brifi di o yepi fu kisi den papira fu yu, den no o man yepi yu fu feni wan tanpresi, visum, noso tra lanti papira. Den sani disi na sani di yusrefi musu ondrosuku èn sreka bun, fosi yu froisi. Boiti dati, na yusrefi musu go na den ambassade fu meki yu visum èn fu kisi primisi fu kan wroko. Den wan di wani froisi musu sorgu gi den sani di den abi fanowdu èn gi den lanti papira.—Gal. 6:5.
14. Nanga san wi musu luku bun te wi e go fisiti noso e froisi go na wan kondre pe lanti tapu a wroko fu wi?
14 Kondre pe lanti tapu a wroko fu wi: Na ini son kondre den brada nanga sisa musu luku bun te den e du a diniwroko fu den (Mat. 10:16). Den preikiman di e fisiti noso e froisi go na den kondre disi, kan meki taki sma e poti prakseri na a wroko fu wi sondro taki a de fanowdu. Sma kan du ogri nanga den brada nanga sisa na ini a kondre dati. Efu yu wani froisi go na so wan kondre, dan grantangi skrifi go na a bijkantoro fu yu kondre nanga yepi fu den owruman na ini yu gemeente, fosi yu e seti sani moro fara.
15. Fa den wan di no man froisi go na wan tra kondre, kan du moro na ini a diniwroko na a kontren pe den e libi?
15 Efu yu no man froisi go na wan tra kondre: A de krin taki furu fu wi no man froisi go na wan tra kondre. Yu no musu lasi-ati te yu no man froisi go. Kande ’wan tra bigi doro opo gi yu fu go wroko’ (1 Kor. 16:8, 9). Kande a kring-opziener fu yu sabi pe yu kan go yepi, sondro taki yu abi fu froisi. Kande yu kan yepi na ini wan krosibei gemeente noso grupu di e taki wan tra tongo. Noso yu kan du moro na ini yu eigi gemeente. Awinsi na ini sortu situwâsi yu de, a de prenspari fu du yu diniwroko nanga yu heri ati.—Kol. 3:23.
16. Fa wi musu handri te wan sma wani froisi fu go dini na wan tra kondre?
16 Yu sabi wan lepi Kresten di wani dini na ini wan tra kondre? Dan horibaka gi en èn gi en deki-ati! Baka Rome nanga Aleksandria, dan Antiokia di de na ini Siria ben de a moro bigi foto fu a heri kontren fu Rome, na a ten di Paulus ben gowe fu Antiokia. Fu di a kontren ben bigi so, meki a kan taki a gemeente na ini Antiokia ben abi a yepi fu Paulus fanowdu èn a no de fu taki dati den ben o misi en trutru efu a ben o gowe. Ma Bijbel no e sori taki den brada drape ben gi Paulus deki-ati fu no gowe. A de krin taki den no ben prakseri a kontren fu den wawan, ma den ben hori na prakseri taki a preikiwroko musu du na heri „grontapu”.—Mat. 13:38.
17. Fu san ede a ben o bun fu luku efu wi man „abra kon na Masedonia”?
17 Paulus nanga den kompe fu en ben kisi furu blesi di den teki a kari fu abra go na Masedonia. Na a ten di den ben de na ini a foto Masedonia di de na ini Filipi, den ben miti Lidia èn „Yehovah opo en ati so taki a ben kan poti prakseri na den sani di Paulus ben e taki” (Tori. 16:14). Paulus nanga den kompe fu en di ben de zendeling, ben musu prisiri di Lidia nanga en heri osofamiri teki dopu! Na ini furu kondre, yu abi reti-ati sma di de leki Lidia èn di no yere a Kownukondre boskopu ete. Efu yu „abra kon na Masedonia” yu kan abi furu prisiri fu feni èn yepi den sma disi.
[Faki na tapu bladzijde 5]
Fa yu kan sabi efu wan kondre pe yu wani go, abi yepi fanowdu?
• Luku na ini a moro nyun Yaribuku. Luku spesrutu gi omeni sma di e tan na ini a kondre, wán preikiman musu preiki.
• Gebroiki na Index fu leisi artikel nanga ondrofenitori fu a kondre dati.
• Taki nanga preikiman di fisiti noso di ben libi na ini a kondre dati.
• Efu yu wani froisi go na wan kondre pe yu kan preiki na ini a tongo di yu e taki, dan luku tapu Internet noso na ini tra grontapu buku fu si omeni sma na ini a kondre dati e taki a tongo fu yu.