’Meki a wani fu Gado pasa’
1. San na a thema fu a spesrutu dei konmakandra fu a dienstyari 2012, èn fu san ede a bun fu poti prakseri na a tori disi?
1 Yehovah meki wi fu di a ben wani (Openb. 4:11). Wi no o man sabi fu san ede wi de na libi, efu wi no e kon sabi san na a wani fu Gado èn efu wi no e du a wani fu en. A sani disi no makriki fu du, fu di wi musu feti nanga den firi di wi abi fu ’du sani di a skin nanga a denki fu wi wani’ noso fu „libi neleki grontapusma” (Ef. 2:3; 1 Petr. 4:3; 2 Petr. 2:10). Efu Gado no yepi wi, dan ’Didibri ben kan kisi wi libilibi fu du a wani fu en’ (2 Tim. 2:26). A spesrutu dei konmakandra na ini a dienstyari 2012, o yepi ibriwan fu wi fu du a di fu dri sani na ini a begi di Yesus leri den bakaman fu en. A sani dati na: „Meki yu wani pasa.”—Mat. 6:9, 10.
2. Sortu aksi o kisi piki na a programa?
2 Aksi di o kisi piki: Te yu o arki a programa, dan suku a piki tapu den aksi disi: Sortu tra prenspari sani wi musu du boiti fu arki Gado Wortu? Fa wi kan frustan moro bun san na a wani fu Gado? Fu san ede wi musu de klariklari fu yepi ala sortu sma? Fa wi kan kon abi wan koloku libi di e gi wi prisiri? Un yonguwan, san un musu sori Yehovah? Sortu wini wi e kisi te wi e du a wani fu Gado? Fu san ede a de tumusi prenspari fu gi trawan deki-ati èn fu tranga den?
3. Fa wi kan kisi wini dorodoro fu a spesrutu dei konmakandra programa?
3 Du muiti fu de drape èn arki a programa bun. Wan brada fu Bethel, wan kring-opziener, noso wan distrikt-opziener o de drape leki fisiti takiman. Fosi a programa èn baka a programa yu kan go taki nanga en èn nanga en wefi, efu a trow. Te yu drai go baka na oso, dan ’no frigiti den sani di yu yere’, ma luku a programa baka nanga yu osofamiri èn taki fa unu kan du a wani fu Gado moro bun.—Yak. 1:25.
4. Fu san ede a de prenspari taki wi e poti a wani fu Gado na a fosi presi ini wi libi?
4 Heri esi den sma di e du san densrefi wani èn di e weigri fu du san Yehovah wani, o kisi pori (1 Yoh. 2:17). Dati meki wi de nanga tangi taki Yehovah sreka a programa disi na a yoisti ten gi wi, fu yepi wi fu si a wani fu Gado leki a moro prenspari sani na ini wi libi!