Arki èn leri
1. Fu san ede wi musu meki moro muiti fu arki èn teki leri te wi de na a distrikt kongres?
1 Heri esi den distrikt kongres fu a yari 2013 o bigin. Furu wroko ben du fu sreka a programa disi di sa poti prakseri na den sani di den brada nanga sisa na heri grontapu abi fanowdu. Yu sreka sani kaba fu de ala den dri dei na a kongres? Furu sani de di kan puru wi prakseri te wi de na den bigi kongres. Fu dati ede wi musu meki muiti fu poti bun prakseri na a programa. Fu di a programa langa moro den gemeente konmakandra, meki wi musu meki moro muiti fu poti prakseri. Boiti dati wi kan kon weri fu di wi musu go fara na den kongres, noso tra sani de di kan meki wi kon weri. San o yepi wi fu tan na ai, so taki wi kan arki èn teki leri?—Deut. 31:12.
2. Fa wi kan sreka wi ati gi den sani di wi o leri na a kongres?
2 Fosi a kongres bigin: A website fu wi, www.pr418.com, abi a kongres programa na tapu èn sosrefi den nen fu ala den lezing nanga wán noso tu prenspari tekst fu ibri lezing. Efu wi man go tapu Internet, dan a ben o bun fu luku a programa, so taki wi kan sreka wi ati gi den sani di wi o yere na a kongres (Esra 7:10). Yu man meki ten na yu Osofamiri Anbegi fu luku a programa, so taki unu kan kisi na angri fu go na a kongres?
3. San o yepi wi fu arki bun?
3 Te a programa e hori: Efu a de fanowdu, dan go na toilet fosi a konmakandra bigin. Efu a kan, dan kiri yu cellulair so taki a no e puru yu prakseri te sma e bèl noso sms yu. Na so fasi yu no o kisi a firi fu sms tra sma te a programa e hori. Efu yu cellulair musu tan leti, dan poti en na so wan fasi taki a no e puru tra sma prakseri te wan sma ben o bèl yu. Efu yu e gebroiki wan tablet computer te a programa e hori, dan du en na so wan fasi taki a no e puru a prakseri fu trawan. Pruberi fu no nyan noso dringi te a programa e hori (Preik. 3:1). Tan luku a takiman. Luku na ini yu Bijbel te wan tekst e leisi. Skrifi wan tu sani di yu feni prenspari.
4. Fa papa nanga mama kan yepi den pikin fu arki èn teki leri?
4 Wi wani tu taki den pikin fu wi e arki èn e teki leri. Odo 29:15 e taki: „Te sma e gi wan pikin pasi fu du san a wani, a o gi en mama syen.” Fu dati ede a bun te wan osofamiri e sidon na makandra so taki papa nanga mama kan sorgu taki den pikin e poti prakseri na a programa, na presi fu takitaki, seni sms, noso e wakawaka lontu. Srefi te den pikin yongu tumusi fu frustan ala sani fu a programa, toku wi kan leri den fu no sribi èn fu sidon pî.
5. Fu san ede a bun fu luku baka san wi leri na a kongres, èn fa wi kan du disi?
5 Ibri dei baka a programa: No go sribi tumusi lati. Go sribi fruku so taki yu rostu bun. Te yu e luku baka san yu ben leri, dan dati sa yepi yu fu tan memre den sani disi. Dati meki a bun fu teki wan tu miniti ibri neti leki osofamiri fu taki fu a programa. Efu yu nanga mati e go nyan na wan presi, dan a ben o bun fu tyari den sani di yu ben skrifi fu a programa èn taki fu wan tu fu den sani dati. Baka a kongres te yu de na oso, dan yu kan teki ten fu taki na yu Osofamiri Anbegi fa unu kan gebroiki den sani di unu ben leri. Yu kan poti ten na wan sei ibri wiki fu taki fu wan fu den nyun publikâsi di wi kisi na a kongres.
6. Taki fu san ede a no bun nofo fu de na a kongres.
6 Efu wan sma bori wan nyanyan, yu no e kisi wini fu en efu yu no e nyan en. Na so a de tu nanga den sani di wi o leri na a distrikt kongres. Wi o kisi furu wini te wi de drape na a heri kongres èn te wi e arki bun èn e du den sani di wi leri.