Yu de srekasreka gi den moi sani di wi o leri na a kongres?
1. Sortu sani yu musu sreka te yu o hori wan nyanyan fesa?
1 Yu musu sreka furu sani te yu o hori wan fesa. Yu musu bai nyanyan sani, yu musu sreka a nyanyan, èn baka dati yu o poti en na tapu tafra. Yu musu seti sani tu fu prati a nyanyan. Boiti dati, yu musu sreka a presi pe den sma o nyan. Den sma di o kon na a fesa musu sreka densrefi tu, spesrutu efu den e komoto na farawe presi. Aladi furu wroko musu du fu sreka switi gosontu nyanyan gi wan fesa di yu o abi nanga mati èn famiri, toku a muiti di yu o meki no de fu soso. Heri esi Yehovah Kotoigi na heri grontapu o kon makandra na ini bigi grupu nanga pikin grupu fu teki leri na a „Tan na ai!” Distrikt Kongres. Iya, a kongres disi o de leki wan fesa. Furu wroko du kaba fu sreka sani gi a programa. Wi alamala kisi wan kari kaba. Wi musu sreka wisrefi tu fu man de drape, èn fu nyan bun fu a programa.—Odo 21:5.
2. San yu musu du fu man de na ala den dei fu a kongres?
2 Kisi wini fu a programa: Yu seti sani kaba so taki yu kan de na ibri pisi fu a kongres, pe yu o kisi furu leri? Efu a de fanowdu, fruteri yu wrokobasi taki yu o go na ala den dei fu a kongres, sosrefi a fosi dei. Yu sabi kaba fa yu o go na a kongres èn pe yu o tan? Den owruman musu luku taki sani sreka fu sorgu gi den owrusma nanga den sikisma èn sosrefi tra sma di abi yepi fanowdu.—Yer. 23:4; Gal. 6:10.
3. Fu san ede wi no musu go na wan internationaal kongres efu wi no kisi wan kari?
3 Son kondre o abi internationaal kongres. Hori na prakseri taki son gemeente nanga sma fu tra kondre kisi wan kari fu go na den kongres disi. Den bijkantoro seti sani bun, baka di den kon sabi omeni sma kisi kari fu kon na den kongres disi. Na so fasi den sabi omeni sidonpresi nanga hotel kamra de fanowdu gi den sma disi. Te preikiman di no kisi wan kari e go na den internationaal kongres disi, dan tumusi furu sma o de drape.
4. San o yepi wi fu de srekasreka gi a programa fu ibri dei?
4 Pruberi fu kon fruku na a kongres ibri dei, so taki yu kan feni wan sidonpresi bifo a programa bigin. Teki wan tu miniti fu luku a programa di yu kisi fosi a kongres bigin. Disi o yepi yu fu sreka yu ati gi den leri di yu o kisi (Esra 7:10). Te a fesiman fu a programa taki dati poku o bigin prei, dan a ben o bun fu sidon arki a poku èn wakti fu bigin nanga a fosi singi nanga begi.
5. Fa yu nanga yu osofamiri kan kisi wini fu a programa?
5 Te osofamiri e sidon makandra na a kongres, dan papa nanga mama sa man sorgu taki den pikin fu den e arki a programa bun (Deut. 31:12). Ala sma e kisi a deki-ati fu leisi na ini den Bijbel te a takiman e leisi den tekst. Te yu skrifi den prenspari sani, dan dati kan yepi yu fu poti prakseri bun na a programa. Bakaten, den sani di yu skrifi o yepi yu fu memre den moro prenspari tori fu den lezing. No taki nanga trawan te a programa e hori, èn no opo fu yu sidonpresi efu dati no de fanowdu. Efu yu abi wan cellulair, dan no meki dati puru yu prakseri noso a di fu a trawan, na a programa. Fu san ede yu no e taki nanga trawan san yu ben lobi fu a programa, na a kaba fu ibri dei?
6. Sortu moi okasi wi e kisi na den kongres, èn fa yu kan nyan bun fu na okasi disi?
6 Na a distrikt kongres, wi abi na okasi fu abi bun demakandra nanga wi brada nanga sisa. Wi no e ondrofeni a sani disi na grontapu (Ps. 133:1-3; Mark. 10:29, 30). Fu san ede yu no e pruberi fu leri sabi den sma di e sidon na yu sei, èn fu taki nanga den na ini a pauze? Disi na wan fu den wini di wi abi te wi no e tyari bigi nyanyan kon na a kongres, èn te wi no e libi a presi pe a kongres e hori, fu go bai nyanyan na dorosei. Sorgu taki yu e teki na okasi disi fu gi makandra deki-ati.—Rom. 1:11, 12.
7. San wi musu sreka te a abi fu du nanga den krosi di wi o weri?
7 Krosi: A de moi fu si taki Yehovah ben taigi den Israelsma fu meki franya na a ondrosei lanki fu den krosi, èn den ben musu poti wan blaw titei tapusei fu den franya fu a krosi (Num. 15:37-41). Disi ben de fu memre den taki den na wan pipel di Yehovah teki fu anbegi en. Te wi e weri krosi na wan fasi di fiti èn na wan lespeki fasi, dan dati e sori taki wi de tra fasi leki grontapusma. Na so fasi wi e gi bun kotoigi na den sma di e si wi, srefi te wi e go nyan na wan presi baka a programa. Fu dati ede, luku bun sortu krosi yu o weri.
8. Fa wi kan gi kotoigi na sma te wi de na a presi pe a kongres e hori?
8 Gi kotoigi: Hori na prakseri taki wi kan gi kotoigi na sma na ini a kontren pe a kongres e hori. Baka wan kongres, wan brada nanga en wefi ben go nyan na wan presi, èn a brada ben sori a man di ben tyari a nyanyan kon, a lapelkarta fu en. Ne a aksi a man efu a si furu sma nanga a karta dati. A man ben taigi en taki a ben si furu sma nanga a karta dati, èn a ben aksi ensrefi fu san ede den sma ben weri a karta. Na so den bigin taki nanga makandra èn a brada gi a man wan kari fu kon na a kongres.
9. Fa wi kan sori warderi gi Yehovah, a sma di gi wi wan kari?
9 Aladi na den brada o hori den lezing, interview, nanga demonstrâsi, toku na Yehovah, wi Tata na hemel, e gi wi den moi leri disi ibri yari (Yes. 65:13, 14). Wi e sori warderi gi Yehovah di gi wi wan kari, te wi de na ibri dei fu a kongres èn te wi e poti prakseri na ibri pisi fu a programa. Yu seti ala sani kaba gi a kongres?
[Faki na tapu bladzijde 6]
Sani di wi musu hori na prakseri gi a distrikt kongres
◼ Programa ten: Tapu ala den dri dei, a programa sa bigin 9.20 mamanten. A presi pe a kongres e hori, sa opo 8.00 yuru mamanten. Te a poku na a bigin fu a programa e prei, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 4.55 bakadina, èn tapu sonde a sa kaba 4.00 bakadina. Gi den internationaal kongres a programa tapu fodewroko o bigin 1.20 bakadina èn a o kaba 4.55 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di kon nanga yu na ini a srefi wagi noso boto, noso gi den sma di e tan nanga yu na ini a srefi oso.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe fu go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, grasi batra, noso dringi di abi sopi na ini.
◼ Bijdrage: Wi kan sori taki wi e warderi den sani di seti gi a kongres, te wi e gi friwani bijdrage gi a wroko di e du na heri grontapu. Wi kan gi den bijdrage disi na ini a Kownukondre zaal fu wi, noso na a kongres. Sma kan gi tyèk sosrefi tapu a nen fu ’Gemeente Paramaribo van Jehovah’s Getuigen’.
◼ Te sma kisi mankeri: Efu wan sma kisi mankeri na a presi pe a kongres e hori, grantangi go na wan fu den dienst-yepiman di de krosibei. Wantewante a dienst-yepiman sa go na wan fu den sma di e yepi na a EHBO fu a kongres, so taki den kan luku o seryusu a mankeri de èn yepi a sma dati.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone (den sani di yu kan poti na yu yesi so taki yu wawan kan arki). Yu kan arki a programa tapu 107.9 FM.
◼ Te yu wani poti sani tapu cassette: Yu no musu poti sani soleki cassette-recorder nanga felem-kamera na a stroom noso na den apparaat di den brada e gebroiki gi a programa. Yu kan gebroiki cassette-recorder nanga felem-kamera soso te den no e meki babari noso te den no de na pasi fu tra sma.