Den distrikt kongres—Wan ten fu anbegi Gado nanga prisiri
1. Na sortu fasi den fesa fu Israel ben de a srefi leki den distrikt kongres fu wi na ini a ten disi?
1 Yosef, Maria, den pikin fu den, nanga trawan ben gwenti go na Yerusalem gi den alayari fesa. Na den okasi disi, den èn sosrefi tra anbegiman no ben e prakseri den broko-ede fu den, ma den ben poti prakseri na a moro prenspari sani na ini den libi. A sani dati abi fu du nanga na anbegi fu den. Na den fesa dati sma ben abi a ten fu prakseri èn fu taki fu a bunfasi fu Yehovah. Boiti dati, den ben e poti prakseri na a Wet. Na den distrikt kongres fu wi di e kon, wi o abi den srefi sortu okasi dati fu anbegi Yehovah nanga prisiri.
2. San wi musu du fu seti sani gi a distrikt kongres di e kon?
2 A de fanowdu fu sreka sani: A famiri fu Yesus di ben e tan na ini Nasaret ben musu waka ala nanga ala sowan 200 kilometer fu go na Yerusalem èn fu drai kon baka. Aladi wi no sabi omeni brada nanga sisa Yesus ben abi, toku wi kan frustan taki Yosef nanga Maria ben musu du furu muiti fu seti sani bun fu man go na den fesa dati. Yu seti ala san de fanowdu fu go ala dri dei na a distrikt kongres di e kon? Kande disi wani taki dati yu musu teki fri fu wroko noso dati yu musu taki nanga yu wrokobasi, noso a sma di e gi yu pikin leri na skoro. Yu kan teki en na yu tapu fu yepi wan sma na ini a gemeente fu go na a kongres efu dati de fanowdu?—1 Yoh. 3:17, 18.
3. Fa den fesa na ini Israel ben gi sma na okasi fu abi demakandra di ben e gi den deki-ati?
3 Demakandra di e gi deki-ati: Na den Dyu fesa, anbegiman ben abi a moi okasi fu abi demakandra di ben gi den deki-ati! A no de fu taki dati a famiri fu Yesus, ben wani si den mati fu den baka di den no ben si langa. Den ben abi a moi okasi tu fu tron mati fu den furu Dyu èn fu den sma di ben teki a Dyu bribi. Ala den sma disi ben go na Yerusalem noso den ben komoto drape.
4. Fa wi kan sori taki wi abi warderi gi a kon di wi e kon makandra nanga wi Kresten brada nanga sisa?
4 Wan reide fu san ede a getrow èn koni srafu seti sani gi wi fu kon makandra fu arki den lezing na den distrikt kongres na presi fu skrifi den sani dati na ini buku noso tijdschrift, na fu di wi kan gi makandra deki-ati te wi e kon makandra (Hebr. 10:24, 25). Fu dati ede, seti sani so taki yu kan doro fruku na a kongres ibri dei fu abi demakandra nanga trawan, fosi a fesiman fu a programa taki dati wi kan go sidon fu di a poku o bigin prei. Na presi fu gowe fu a presi pe a kongres e hori fu go teki nyanyan, wi e kisi a deki-ati fu tyari pikinso nyan èn fu tan drape so taki wi kan miti èn taki nanga den sma na a kongres. Wi e kon makandra nanga wi Kresten brada nanga sisa, èn wi musu abi warderi gi dati fu di na wan kado fu Yehovah.—Mika 2:12.
5. San o yepi wi fu kisi wini dorodoro fu a programa?
5 Wan okasi fu teki leri: Sensi di Yesus ben yongu, a ben kisi wini fu den fesa, fu di na den okasi dati a ben e leri sani fu en hemel Tata (Luk. 2:41-49). San o yepi wi nanga wi osofamiri fu kisi wini dorodoro fu den difrenti pisi fu a programa? Tan sidon na yu presi te a programa e hori èn no taki nanga trawan efu dati no de fanowdu. No meki yu cellulair noso wan tra sani puru a prakseri fu yu, noso fu tra sma. Tan luku a takiman èn skrifi sani syatu na tapu papira. Sidon makandra leki osofamiri, so taki yu kan sorgu taki den pikin fu yu e arki tu. Na mofoneti teki ten fu taki nanga makandra fu den sani di unu ben feni moi.
6. San wi musu hori na prakseri te a abi fu du nanga a fasi fa wi e weri krosi èn e moi wisrefi?
6 A fasi fa wi e weri krosi èn e moi wisrefi: Den bisnisman fu tra kondre di ben e waka a pasi tu, ben kan si wantewante suma na a famiri fu Yesus nanga tra Dyu anbegiman di ben e go noso kon fu den fesa. Den ben kan si dati fu di den sma disi ben abi franya na a ondrosei lanki fu den krosi èn blaw titei na tapusei fu den franya (Num. 15:37-41). Aladi Kresten no e weri spesrutu krosi, sma sabi taki wi e weri krosi di fiti èn taki wi de krin. Wi musu poti prakseri spesrutu na a fasi fa wi e weri krosi te wi e go èn e kon fu a kongres. Srefi efu wi kenki krosi baka a programa, wi musu weri krosi di e gi Yehovah glori èn wi musu weri wi lapelkarta. Na so fasi sma o si krin taki wi na Kotoigi èn dati kan abi bun krakti na den tapu.
7. Fu san ede wi musu prakseri fu yepi na a kongres?
7 Yepiman de fanowdu: Furu sma de fanowdu fu yepi so taki sani kan waka bun na den kongres. Yu kan gi yu nen fu yepi? (Ps. 110:3) A wroko di e du na den kongres na santa diniwroko èn a de wan moi kotoigi gi tra sma. Wan basi fu wan presi di den ben yuru fu hori kongres ben feni en so kefalek taki den yepiman ben krin a gebow, taki a skrifi: „Mi wani taigi unu tangi fu a tumusi moi okasi disi di mi ben ondrofeni. Ala ten mi ben yere taki Yehovah Kotoigi na spesrutu sma di abi wan bun nen na wi, fu di ala ten te den gowe a presi krin moro leki di den ben kon. Unu nanga na organisâsi fu unu e meki a presi disi de moro bun gi a libimakandra. Unu du dati nanga wan grupu sma di abi bun maniri trutru èn noiti wi miti sma leki unu.”
8. Sortu okasi wi kan kisi fu gi kotoigi te wi de na a presi pe a kongres e hori?
8 Okasi fu gi kotoigi: Furu sma na ini a kontren pe a kongres e hori sa si taki wi weri bun krosi, taki wi moi wisrefi na wan fasi di fiti, èn taki wi weri wan lapelkarta. Disi kan meki taki den wani sabi suma na wi èn dati e gi wi na okasi fu fruteri den fu a kongres. Wan boi fu fo yari ben tyari wan buku di ben kon na doro na wan kongres di a go na wan presi fu nyan baka a programa, èn a sori na uma di e wroko drape a buku. Disi ben gi a papa nanga mama fu a boi, na okasi fu gi na uma wan kari fu kon na a kongres.
9. Fa wi kan sori warderi gi a leri di wi e kisi fu Yehovah, neleki a famiri fu Yesus?
9 Den owruten fesa ben de prisiri okasi gi den Dyu di ben wani leri moro fu Yehovah, èn den ben breiti te a ten ben doro fu go na den fesa disi (Deut. 16:15). A famiri fu Yesus ben de klariklari fu du ala san ben de fanowdu fu go na den fesa dati èn fu kisi wini dorodoro fu dati. Na a srefi fasi wi e warderi den distrikt kongres fu wi tu èn wi e si den leki wan kado fu wi lobi hemel Tata (Yak. 1:17). Now na a ten fu sreka wisrefi gi na okasi disi di wi abi ala yari fu anbegi Yehovah nanga prisiri!
[Faki na tapu bladzijde 6, 7]
Sani di wi musu hori na prakseri gi a distrikt kongres
◼ Programa ten: Tapu ala den dri dei, a programa sa bigin 9.20 mamanten. A presi pe a kongres e hori, sa opo 8.00 yuru mamanten. Te a poku na a bigin fu a programa e prei, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 4.55 bakadina, èn tapu sonde a sa kaba 3.40 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di kon nanga yu na ini a srefi wagi noso boto, noso gi den sma di e tan nanga yu na ini a srefi oso. Yu kan hori sidonpresi tu gi den sma nanga suma yu e studeri.—1 Kor. 13:5.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe fu go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, noso grasi batra.
◼ Bijdrage: Wi kan sori taki wi e warderi den sani di seti gi a kongres, te wi e gi friwani bijdrage gi a wroko di e du na heri grontapu. Wi kan gi den bijdrage disi na ini a Kownukondre zaal fu wi, noso na a kongres. Sma kan gi tyèk sosrefi tapu a nen fu ’Gemeente Paramaribo van Jehovah’s Getuigen’.
◼ Te sma kisi mankeri: Efu wan sma kisi mankeri na a presi pe a kongres e hori, grantangi go na wan fu den dienst-yepiman di de krosibei. Wantewante a dienst-yepiman sa go na wan fu den sma di e yepi na a EHBO fu a kongres, so taki den kan luku o seryusu a mankeri de èn yepi a sma dati.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone (den sani di yu kan poti na yu yesi so taki yu wawan kan arki). Yu kan arki a programa tapu 107.9 FM.
◼ Te yu wani poti sani tapu cassette: Yu no musu poti sani soleki cassette-recorder nanga felem-kamera na a stroom noso na den apparaat di den brada e gebroiki gi a programa. Yu kan gebroiki cassette-recorder nanga felem-kamera soso te den no e meki babari noso te den no de na pasi fu tra sma.
◼ Gi kotoigi te yu e kisi na okasi: Gebroiki ibri okasi di yu e kisi fu gi kotoigi. Efu wan sma wani taki wi musu go na en oso fu fruteri en moro fu Bijbel, skrifi a nen nanga na adres fu en. Yu kan gi a sekretarsi fu yu gemeente den sani di yu skrifi. Efu a de fanowdu, a sekretarsi kan seni dati go na a bijkantoro, noso a kan sorgu taki wan preikiman e go na a sma.
◼ Friwani wroko: A prisiri di wi abi fu di wi de na den kongres, o kon moro bigi srefi te wi gi wi nen fu du wroko di de fanowdu (Tori. 20:35). Iniwan sma di wani yepi kan gi den nen na a afdeling fu friwani wrokoman. Pikin di no doro 16 yari kan yepi tu te den e wroko makandra nanga den papa, noso mama, noso wan tra sma di e luku den.