Wan okasi fu kisi leri fu Yehovah èn fu de nanga prisiri
1. Fa Yehovah e sorgu taki den futuboi fu en kisi a leri di den abi fanowdu?
1 Na wan lobi-ati fasi Yehovah e sorgu taki den futuboi fu en e kisi ala sani di den abi fanowdu fu kon sabi en. Furu sma na ini a grontapu disi no sabi Yehovah, ma wi e kisi bogobogo leri fu en. Na agersifasi wi e kisi bogobogo nyanyan, aladi den sma dati e dede fu angri (Yes. 65:13). Den distrikt kongres di e hori ala yari, na wan fasi fa Yehovah e sorgu taki wi e kisi leri fu en. Yu e seti sani kaba fu de ala den dri dei na a distrikt kongres di nen „A santa yeye fu Gado e tiri wi”? Ala sani seti so taki wi leri furu moi sani na a kongres disi.
2. San wi musu du fu sreka wisrefi gi a kongres?
2 Sreka sani na fesi: „Den sani di wan sma di de fayafaya, e sreka na fesi, sa abi bun bakapisi trutru” (Odo 21:5). Fu dati ede, te yu e sreka sani fu go ala dri dei na a kongres, dan yu no musu draidrai fu taki nanga yu wrokobasi fu aksi fri fu wroko efu dati de fanowdu. Efu yu abi presi fanowdu fu tan, dan yu seti dati kaba? A ben o bun tu fu seti sani gi a brekten nyanyan, so taki yu kan de makandra nanga den brada nanga sisa fu yu na a presi pe a kongres e hori. Seti sani fu doro fruku ibri dei na a kongres, so taki yu kan feni wan bun sidon presi, èn so taki yu kan singi a fosi singi èn arki a fosi begi.
3. Sortu krosi wi musu weri te wi e go na a kongres?
3 Wi musu sorgu taki wi e weri krosi di fiti èn di e sori taki wi abi lespeki gi trawan (1 Tim. 2:9, 10). Den distrikt kongres e gi wi heri moi okasi fu gi kotoigi na sma di e libi na ini a birti drape. Te wi e weri krosi na wan fasi di fiti na a presi pe a kongres e hori, èn te wi e weri a lapelkarta fu wi, dan sma kan si taki wi de tra fasi leki sma di no de na bribi. Na so fasi sma e kisi wan bun denki fu wi.
4. San o yepi wi nanga wi osofamiri fu kisi furu wini fu a programa?
4 Arki bun: A no de fu taki dati wi no wani misi nowan pisi fu a programa fu a kongres (Odo 22:17, 18). Te den brada e leisi wan tekst, dan a ben o bun fu leisi dati tu na ini wi Bijbel èn fu skrifi sani syatu di wi wani hori na prakseri. Disi sa yepi wi fu tan poti prakseri na a programa, na presi fu poti prakseri na sani di no de prenspari. Na mofoneti, wi kan taki nanga trawan fu den prenspari sani di wi ben skrifi. A de so wan tu yari kaba taki son yonguwan e sidon nanga makandra na a kongres èn den e takitaki aladi a programa e hori, noso den e seni boskopu gi makandra tapu cellulair. Efu wi abi yongu pikin, noso tini, dan a ben o bun taki wi e sidon arki a programa makandra leki osofamiri, na presi fu meki den yonguwan sidon na wan tra presi makandra nanga tra yonguwan.
5. Fa wi kan nyan moro bun fu a kongres?
5 Nyan bun fu a demakandra di yu o abi: Te yu e nyan wan switi nyan makandra nanga mati, dan dati e gi yu moro prisiri (Odo 15:17). Na so a de tu, taki wi o nyan moro bun fu a kongres te wi de makandra nanga wi brada nanga sisa. Fu dati ede, te a programa no e hori, a ben o bun fu go taki nanga tra brada nanga sisa di wi no sabi ete, èn fu abi demakandra nanga den. Dati o gi wi prisiri trutru (Ps. 133:1). Te a fesiman e gi wi a kari fu go sidon fosi a poku bigin, dan wi musu tapu nanga den tori di wi e taki nanga trawan, èn wi musu go sidon fosi a programa bigin.
6. Fruteri wan ondrofenitori fu yusrefi di e sori fa wi kan gi kotoigi na sma di e libi na ini a birti pe a kongres e hori.
6 Gebroiki ibri okasi fu gi kotoigi: Nofo tron te den kongres e hori, wi e kisi moi okasi fu gi kotoigi. Baka a programa, furu brada nanga sisa e go na presi pe den kan nyan, èn fu di den ben weri den lapelkarta meki trawan ben wani sabi moro fu a kongres. Disi ben meki taki den ben abi moi takimakandra nanga sma èn den ben man gi kotoigi fu a tru anbegi. Sonwan fu den sma di ben wani sabi moro fu a kongres, ben go arki a programa fu di den kisi wan kari.
7. Fu san ede wi musu go na a distrikt kongres di o hori?
7 A teki furu yuru langa fu sreka sani gi a programa, fu sreka a presi pe a kongres o hori, fu orga den difrenti afdeling fu a kongres, èn fu sreka den difrenti lezing. Ala den sani di den brada sreka na wan lobi-ati fasi, so taki wi kisi bun leri na a kongres, e sori wi taki Yehovah e sorgu bun gi en pipel. Meki a de so taki wi alamala de na a kongres èn nyan bun fu ala den sani di wi o leri drape! Te wi o du dati, dan wi no de leki grontapusma, ma wi o ’bari fu prisiri bika na ati fu wi o firi bun’.—Yes. 65:14.
[Faki na tapu bladzijde 3]
Sani di wi musu hori na prakseri gi a distrikt kongres
◼ Programa ten: Tapu ala den dri dei, a programa sa bigin 9.20 mamanten. A presi pe a kongres e hori, sa opo 8.00 yuru mamanten. Te a poku na a bigin fu a programa e prei, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 4.55 bakadina, èn tapu sonde a sa kaba 4.00 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di kon nanga yu na ini a srefi wagi noso boto, noso gi den sma di e tan nanga yu na ini a srefi oso.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe fu go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, grasi batra, noso dringi di abi sopi na ini.
◼ Bijdrage: Wi kan sori taki wi e warderi den sani di seti gi a kongres, te wi e gi friwani bijdrage gi a wroko di e du na heri grontapu. Wi kan gi den bijdrage disi na ini a Kownukondre zaal fu wi, noso na a kongres. Ibri tyèk di e gi leki bijdrage na a kongres musu skrifi na tapu a bankrekeningnummer 11.14.255 (DSB Bank) fu a ’Watchtower Bible and Tract Society’.
◼ Te sma kisi mankeri: Efu wan sma kisi mankeri na a presi pe a kongres e hori, grantangi go na wan fu den dienst-yepiman di de krosibei. Wantewante a dienst-yepiman sa go na wan fu den sma di e yepi na a EHBO fu a kongres, so taki den kan luku o seryusu a mankeri de èn yepi a sma dati.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone (den sani di yu kan poti na yu yesi so taki yu wawan kan arki). Yu kan arki a programa tapu 107.9 FM.
◼ Te yu wani poti sani tapu cassette: Yu no musu poti sani soleki cassette-recorder nanga felem-kamera na a stroom noso na den apparaat di den brada e gebroiki gi a programa. Yu kan gebroiki cassette-recorder nanga felem-kamera soso te den no e meki babari noso te den no de na pasi fu tra sma.
◼ Gi kotoigi te yu e kisi na okasi: Gebroiki ibri okasi di yu e kisi fu gi kotoigi. Efu wan sma wani taki wi musu go na en oso fu fruteri en moro fu Bijbel, skrifi a nen nanga na adres fu en. Yu kan gi a sekretarsi fu yu gemeente den sani di yu skrifi. Efu a de fanowdu, a sekretarsi kan seni dati go na a bijkantoro, noso a kan sorgu taki wan preikiman e go na a sma.
◼ Te yu wani meki fowtow: Efu yu e meki fowtow na a ten fu a programa, grantangi no meki a kamera koti faya te yu e meki a fowtow.
◼ Cellulair telefon nanga pager: Den sani disi musu seti na so wan fasi taki den no e puru a prakseri fu tra sma.