Tan wakti tapu Yehovah
1. San na a nen fu a kongres, èn fu san ede a nen disi fiti?
1 Yesaya ben skrifi: „Yehovah na wan Gado fu retidu. Koloku fu ala den sma di e tan wakti tapu en” (Yes. 30:18b). Furu Bijbel tori de di e fruteri fa Gado ben strafu den feanti fu en, èn fa a ben frulusu den getrow futuboi fu en. Sortu sani den disiten anbegiman fu Yehovah e leri fu den tori dati? San wi kan du now fu de srekasreka gi ’a bigi dei fu Yehovah di o meki sma frede’? (Yoèl 2:31, 32) A „Frulusu de krosibei!” Distrikt Kongres di e kon, sa gi wi deki-ati fu denki dipi fu den aksi dati èn fu ondrosuku wisrefi. A sa yepi wi fu tan wakti tapu Yehovah.
2. Fa wi kan sori taki wi abi warderi gi a distrikt kongres fu wi?
2 Yu seti sani kaba fu man kisi wini fu ala dri dei fu a kongres? Fu eksempre, yu aksi yu wrokobasi kaba efu yu kan kisi fri ten fu man go na a kongres? No du disi na a lasti momenti. Begi Gado fu yepi yu ini a tori disi. Baka dati, aksi yu basi efu yu kan kisi fri ten (Neh. 2:4, 5). Na a srefi fasi, wi no musu wakti te na a lasti momenti efu wi musu sreka fa wi o go na a kongres èn pe wi o tan, noso efu wi musu sreka tra prenspari sani. Te wi e sreka sani bun na fesi, dan wi e sori taki wi abi furu warderi gi a programa di Yehovah seti fu gi wi leri. Owruman musu luku suma abi yepi fanowdu fu sreka sani gi a kongres. Den musu luku spesrutu den graniwan na ini a gemeente.—Gal. 6:10.
3. Fa a pipel fu Yehovah musu tyari ensrefi na ini a kontren pe a kongres e hori?
3 Wi e gi Gado grani te wi e tyari wisrefi na wan fasi di fiti: Te wi e kon makandra na den kongres, dan nanga a bun fasi fa wi e tyari wisrefi, wi e gi kotoigi na ala sma. San dati wani taki gi wi? Te wi e go na hotel, nyanyan-oso, noso wenkri na ini a kontren pe a kongres e hori, dan sma musu prisiri fu si fa wi e tyari wisrefi leki Kresten. Sma musu man si taki wi abi langa pasensi, taki wi abi safri-ati, taki wi man dwengi wisrefi, èn taki wi de klariklari fu fiti wisrefi (Gal. 5:22, 23; Fil. 4:5). Wi alamala musu sori a lobi di ’no e tyari ensrefi na wan fasi di no fiti, di no e suku en eigi bun, èn di no e mandi esi’. Srefi te wi e kisi fu du nanga problema noso muilek situwâsi, wi sa wani „du ala sani fu gi Gado glori”.—1 Kor. 10:31; 13:5.
4. Fa papa nanga mama kan yepi den pikin fu den fu tyari densrefi na wan fasi di e gi Yehovah grani?
4 Baka wan kongres, wan driktoro fu wan hotel ben fruwondru srefisrefi nanga a bunfasi fa den yonguwan fu wi ben e tyari densrefi èn fa den ben e weri krosi. A man disi taki dati a ben o lobi fu abi Yehovah Kotoigi na ini a hotel fu en ala ten. Disi na trutru wan sani di e gi prisiri! Disi e sori taki unu leki papa nanga mama gi den yonguwan bun leri. A no ben o de wan koni sani gi papa nanga mama fu libi den pikin den wawan na ini wan hotel kamra sondro taki wan sma luku den. Papa nanga mama musu sorgu taki wan sma e luku den pikin fu den doronomo (Odo 29:15). Meki den gi Yehovah grani èn meki den prisiri en ati nanga a bun fasi fa den e tyari densrefi!—Odo 27:11.
5. Fa wi kan gi Yehovah grani nanga a fasi fa wi e weri krosi èn e moi wisrefi?
5 Weri krosi èn moi yusrefi na wan fasi di fiti: Wi alamala kan yepi fu meki taki sma kisi wan bun denki fu a kongres. Wi kan du disi te wi e sorgu taki den krosi di wi e weri èn a fasi fa wi e moi wisrefi no de soleki fa grontapusma e du dati. Wi no e weri krosi di abi tumusi furu pranpran, krosi di e meki a gersi leki wi no abi lespeki gi trawan, noso krosi di wi e weri te wi de na oso noso te wi e go koiri. Wi musu hori disi na prakseri te wi e go na a kongres èn te wi e komoto fu a kongres, te wi e yepi fu sreka a presi pe a kongres o hori, èn te wi de drape kaba fu arki a programa. Leki futuboi fu Gado wi no e suku wi eigi wini nomo, ma wi e si a nen fu Yehovah leki a moro prenspari sani di wi musu hori na prakseri. Osofamiri-edeman abi a frantwortu fu sorgu taki ala ten den sma na ini na osofamiri e tyari densrefi na wan lespeki fasi èn nanga krin frustan.—1 Tim. 2:9.
6. Fu san ede a de prenspari taki na ini wi fri ten wi e weri krosi di fiti, soleki fa wi e du dati te a kongres e hori?
6 Te wi e go na wenkri èn te wi e go na nyanyan-oso na ini wi fri ten, dan a de prenspari tu fu weri krosi di fiti. Te wi e go na wan nyanyan-oso baka a kongres, dan a fiti fu weri den krosi di wi ben weri go na a kongres. Te wi e weri wi lapelkarta, dan wi kan kisi okasi fu gi kotoigi na sma di wi e miti.—2 Kor. 6:3, 4.
7. San wi kan du fu meki a kongres waka bun èn fu meki a tron wan prisiri sani? (Luku a faki „Sani di wi musu hori na prakseri gi a distrikt kongres.”)
7 Yesaya ben taki na fesi: „Yehovah sa tan wakti fu sori unu bun-ati, èn fu dati ede a sa opo fu sori unu sari-ati” (Yes. 30:18a). Te wi abi warderi gi a sari-ati nanga a no-frudini bun-ati fu Yehovah, dan disi musu meki wi gi en grani nanga a fasi fa wi e tyari wisrefi èn nanga a fasi fa wi e weri krosi te wi e kon makandra na a kongres fu wi. Meki a „Frulusu de krosibei!” Distrikt Kongres gi glori na a Gado fu wi, èn meki a kongres yepi wi fu tan wakti en!
[Faki na tapu bladzijde 5]
Sani di wi musu hori na prakseri gi a distrikt kongres
◼ Programa ten: Tapu ala den dri dei, a programa sa bigin 9.30 mamanten. Den doro sa opo 8.00 mamanten. Wan tu miniti bifo a programa sa bigin, a fesiman sa sidon na tapu a podium aladi Kownukondre poku sa prei. Na a ten dati, wi alamala musu go sidon, so taki a programa kan bigin na wan fasi di fiti. Tapu freida a programa sa kaba 5.15 bakadina, tapu satra a sa kaba 5.05 bakadina, èn tapu sonde a sa kaba 4.10 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di kon nanga yu na ini a srefi wagi noso boto, noso gi den sma di e libi nanga yu na ini a srefi oso.
◼ Brekten nyanyan: Grantangi tyari yu eigi brekten nyanyan, na presi taki yu e gowe fu a kongres-dyari fu go bai nyanyan na ini a pauze. Yu kan tyari wan pikin ijsbox di yu kan poti na ondro wan sturu. Na a presi pe a kongres e hori, sma no mag tyari bigi ijsbox, grasi kan nanga batra, noso dringi di abi sopi na ini.
◼ Bijdrage: Furu kostu e meki fu seti wan distrikt kongres. Wi kan sori taki wi e warderi disi, te wi e gi friwani bijdrage gi a wroko di e du na heri grontapu. Wi kan gi den bijdrage disi na ini a Kownukondre zaal fu wi, noso na a kongres.
◼ Te wan ongoloku pasa: Efu wan sma kisi mankeri na a presi pe a kongres e hori, dan grantangi taigi disi na wan fu den dienst-yepiman di de krosibei. Wantewante a dienst-yepiman sa taigi disi na den sma fu na EHBO, so taki wan sma di sabi san fu du, kan luku o seryusu a mankeri de èn kan yepi a sma dati.
◼ Te yu wani poti sani tapu cassette: Yu no musu poti sani soleki cassette-recorder nanga felem-kamera na a stroom noso na den apparaat di den brada e gebroiki gi a programa. Yu kan gebroiki den sani dati soso te den no e meki babari noso te den no de na pasi fu tra sma.
◼ Te yu wani meki fowtow: Efu yu e meki fowtow na a ten fu a programa, dan grantangi no meki a kamera koti faya te yu e meki a fowtow.
◼ Cellulair telefon nanga pager: Den sani disi musu seti na so wan fasi taki den no e puru a prakseri fu tra sma.