Waka baka Krestes fu di yu e tyari yusrefi na wan lespeki fasi
1. San a nen fu a kongres fu a yari disi abi fu du nanga a tyari di wi musu tyari wisrefi na wan lespeki fasi?
1 Bijbel e fruteri taki Yehovah, a Moro Hei Tiriman, e tyari ensrefi na so wan fasi taki ala sma musu lespeki en (Ps. 104:1). Ala ten Yesus ben taki èn du sani na wan fasi di ben sori taki a ben gi grani na en Tata èn na den sani di en Tata seti (Yoh. 17:4). Ibriwan fu wi sa kisi na okasi fu teki na eksempre fu Yesus èn fu gi glori na Yehovah na den „Waka baka Krestes!” Distrikt Kongres.
2. Fa wi kan gi Yehovah grani te wi e sreka wisrefi fu de na a kongres ala den dri dei?
2 Sori lespeki gi Gado: Wi e gi Yehovah grani te wi e seti sani fu de na a konmakandra di a sreka gi wi fu gi wi leri. Yu taki kaba nanga a wrokobasi fu yu, èn yu seti sani kaba fu man de na a kongres ibri dei, sosrefi tapu freida? Yu seti sani fu doro biten so taki yu kan feni wan sidonpresi, èn so taki yu kan singi a fosi singi èn arki a fosi begi? Yu seti yu brekten nyanyan so taki yu kan nyan makandra nanga yu brada nanga sisa na a presi pe a kongres e hori? Na a bigin fu a mamanten èn a bakadina programa fosi a poku bigin prei, dan a fesiman e aksi wi fu go sidon. Te a e du dati, dan wantewante wi musu tapu nanga den tori di wi e taki nanga trawan èn wi musu go sidon.
3. Fa wi e sori lespeki gi Gado te wi e poti yesi arki a programa?
3 Wi e gi wi hemel Tata grani sosrefi te wi e poti yesi arki a programa. Baka di wan nyunsuman luku fa sani ben waka na wan kongres na ini a birti fu en, a skrifi taki sma ben o fruwondru fu si fa den sma na a kongres „ben e tyari densrefi na wan moi fasi. Den ben sidon arki na wan lespeki fasi, èn a ben de krin fu si taki den ben lobi a leri di den ben kisi fu Gado.” A ben taki sosrefi dati a ben fruwondru fu si wan „bigi grupu pikin di ben abi bun maniri èn di ben suku den tekst na ini a Santa Bijbel”. Te a programa e hori, a no bun fu taki tori, fu seni boskopu gi sma nanga yu cellulair telefon, fu nyan, noso fu wakawaka lontu. Pikin musu sidon nanga den papa nanga mama, so taki papa nanga mama kan yepi den fu kisi wini fu a programa (Deut. 31:12; Odo 29:15). Te wi e meki muiti fu du den sani disi, dan wi e sori lespeki gi trawan èn wi e sori sosrefi taki wi e warderi a tumusi prenspari leri di wi e kisi fu Yehovah.
4. Fu san ede wi musu weri krosi di fiti te wi de na a kongres?
4 Weri krosi di fiti gi wan Kresten: Furu sma ben taki dati den warderi den rai di wi kisi na ini wan lezing di wi yere na a lasti distrikt kongres. A lezing ben nen „Tyari yusrefi na wan lespeki fasi ala ten”. A ben tyari kon na krin taki den krosi di den futuboi fu Gado e weri èn a fasi fa den e moi densrefi, musu fiti gi wan Kresten. A yari disi wi musu poti seryusu prakseri na a tori disi baka. Den krosi di wi e weri èn a fasi fa wi e moi wisrefi e sori efu wi lobi Yehovah, èn efu wi e feni en wan grani fu de wan Kotoigi fu en. Ala ten wi musu weri krosi di fiti gi sma „di e taki dati den e anbegi Gado”.—1 Tim. 2:9, 10.
5. Fa yu kan sori taki yu e lespeki Yehovah nanga den krosi di yu e weri baka a programa?
5 Ma a de so taki wi musu weri krosi di fiti soso te wi de na a kongres? No frigiti taki furu sma sa luku wi fu di wi e weri wan lapelkarta na a ten fu a kongres. Den krosi di wi e weri musu sori taki wi no de leki tra sma. Fu dati ede, srefi na ini wi fri ten wi musu weri krosi di fiti. Fu eksempre, te wi e go nyan na wan presi baka a programa, dan wi musu weri krosi neleki te wi e go na a kongres. Sobun, wi no musu weri jeans bruku, syatu bruku, T-shirts noso bosroko. Disi o sori sma di e libi na ini a kontren pe a kongres e hori, taki wi e lespeki Gado! Yehovah e prisiri te wi e weri krosi di e sori taki wi na futuboi fu en.
6. Sortu bun bakapisi wi e kisi te wi e tyari wisrefi na wan lespeki fasi soleki fa a fiti gi wan Kresten?
6 Den bun bakapisi di wi e kisi: Te wi e tyari wisrefi na wan lespeki fasi na den kongres soleki fa a fiti gi wan Kresten, dan wi e kisi okasi fu gi kotoigi èn den sma di e luku wi o denki bun fu wi. Na a kaba fu wan kongres, wan lantiman ben taki: „Noiti ete mi si sma di e tyari densrefi na so wan bun fasi. Unu de soifri leki fa Gado wani taki wi musu de.” Te wi e tyari wisrefi na wan lespeki fasi, dan wi e sori taki wi e lespeki tra sma èn taki wi lobi den, èn wi e gi glori na Yehovah (1 Petr. 2:12). A e sori tu taki wi abi frede gi Gado èn taki wi e warderi a grani di wi abi fu kisi leri fu wi Tata (Hebr. 12:28). Meki wi du ala muiti fu tyari wisrefi na wan lespeki fasi na a „Waka baka Krestes!” Distrikt Kongres fu a yari disi.
[Faki na tapu bladzijde 5]
Sani di wi musu hori na prakseri gi a distrikt kongres
◼ Programa ten: Tapu ala den dri dei, a programa sa bigin 9.20 mamanten. A presi pe a kongres e hori, sa opo 8.00 yuru mamanten kaba. Te Kownukondre poku e bigin prei, wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 5.05 bakadina, èn tapu sonde a sa kaba 4.10 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di kon nanga yu na ini a srefi wagi noso boto, noso gi den sma di e tan nanga yu na ini a srefi oso.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe fu go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, grasi batra, noso dringi di abi sopi na ini.
◼ Bijdrage: Furu moni de fanowdu fu hori wan distrikt kongres. Wi kan sori taki wi e warderi disi, te wi e gi friwani bijdrage gi a wroko di e du na heri grontapu. Wi kan gi den bijdrage disi na ini a Kownukondre zaal fu wi, noso na a kongres. Ibri cheque di e gi leki bijdrage na a kongres musu skrifi na tapu a bankrekeningnummer 11.14.255 (DSB Bank) fu a ’Watchtower Bible and Tract Society’.
◼ Te sma kisi mankeri: Efu wan sma kisi mankeri na a presi pe a kongres e hori, grantangi go na wan fu den dienst-yepiman di de krosibei. Wantewante a dienst-yepiman sa go na wan fu den sma di e yepi na a EHBO fu a kongres, so taki den kan luku o seryusu a mankeri de èn yepi a sma dati.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone (den sani di yu kan poti na yu yesi so taki yu wawan kan arki).
◼ Te yu wani poti sani tapu cassette: Yu no musu poti sani soleki cassette-recorder nanga felem-kamera na a stroom noso na den apparaat di den brada e gebroiki gi a programa. Yu kan gebroiki cassette-recorder nanga felem-kamera soso te den no e meki babari noso te den no de na pasi fu tra sma.
◼ Gi kotoigi te yu e kisi na okasi: Gebroiki ibri okasi di yu e kisi fu gi kotoigi. Efu wan sma wani taki wi musu go na en oso fu fruteri en moro fu Bijbel, skrifi a nen nanga na adres fu en. Yu kan gi a sekretarsi fu yu gemeente den sani di yu skrifi. Efu a de fanowdu, a sekretarsi kan seni dati go na a bijkantoro, noso a kan seni en go na wan gemeente noso a grupu di kan sorgu taki wan preikiman e go na a sma.
◼ Te yu wani meki fowtow: Efu yu e meki fowtow na a ten fu a programa, grantangi no meki a kamera koti faya te yu e meki a fowtow.
◼ Cellulair telefon nanga pager: Den sani disi musu seti na so wan fasi taki den no e puru a prakseri fu tra sma.