Den distrikt kongres fu wi e sori krin san na a tru anbegi
1. Te den Israelsma ben abi den fesa, dan fu sortu tru tori den ben man denki èn taki fu den?
1 Den Israelsma fu owruten ben musu kon makandra dri leisi wan yari fu hori spesrutu fesa. Aladi na den mansma ben musu go, toku a de so taki nofo tron a heri osofamiri ben go na Yerusalem fu de na den moi konmakandra disi (Deut. 16:15, 16). Na den sortu okasi disi den ben man denki dipi fu prenspari tru tori èn den ben man taki fu den sani dati tu. San na wan tu fu den tru tori disi? Wan fu den na taki Yehovah na wan Gado di lobi fu gi èn di e sorgu sma na wan lobi-ati fasi (Deut. 15:4, 5). Wan trawan na taki den ben kan abi a frutrow taki a ben o tiri èn kibri den (Deut. 32:9, 10). Fu di den Israelsma ben de wan pipel di ben e tyari a nen fu Yehovah, meki den ben musu hori na prakseri taki den ben musu tyari densrefi na wan reti fasi soleki fa Yehovah wani (Deut. 7:6, 11). Na ini a ten disi den alayari distrikt kongres fu wi e tyari den srefi wini dati kon gi wi.
2. Fa a programa fu a distrikt kongres o yepi wi fu frustan den tru tori fu Bijbel moro bun?
2 A programa e meki wi frustan den tru tori fu Bijbel: Na den distrikt kongres fu wi, wi abi lezing, drama, demonstrâsi nanga interview di e yepi wi fu frustan den tru tori fu Bijbel moro bun èn fu fiti den sani dati na ini wi libi (Yoh. 17:17). Den brada du furu kaba fu seti sani gi a kongres di e kon. Na organisâsi fu Yehovah seti wan programa di e taki spesrutu fu den sani di de fanowdu gi ala sma (Mat. 24:45-47). Yu e angri fu si èn yere san de na ini a programa fu a yari disi?
3. San wi musu du fu kisi wini fu a programa?
3 A no de fu taki dati wi o kisi moro wini te wi de ala dri dei na a kongres èn te wi e poti prakseri na a programa. Bigin taki nanga yu basi fu teki fri den dei dati. Seti sani fu rostu bun ibri neti so taki yu kan de na ai te a programa e hori. Furu sma feni taki den man tan poti prakseri na a programa te den e tan luku a takiman èn te den e skrifi wan tu prenspari sani. No meki yu cellulair puru yu prakseri noso di fu trawan na a programa. No takitaki, no seni sms, no dringi noso nyan te a programa e hori.
4. Fa papa nanga mama kan yepi den pikin fu kisi wini fu a kongres?
4 Na ini den Sabat yari, te den osofamiri na ini Israel ben kon makandra fu yere fa sma ben e leisi a Wèt na a ten fu a Kampufesa, dan „ala pikin” ben de nanga den fu ’arki èn leri den wèt disi’ (Deut. 31:12). A moi fu si fa osofamiri e sidon nanga makandra na a kongres èn fa den yonguwan e tan na ai èn den e poti ala den prakseri na a programa! Ibri neti a ben o bun fu luku den sani di unu skrifi èn taki fu den pisi fu a programa di unu ben lobi. Fu di „don de na ini na ati fu wan boi”, meki papa nanga mama musu luku den pikin fu den, srefi den wan di de tini. Na a pauze den no musu gi den pikin ’pasi fu du san den wani’.—Odo 22:15; 29:15.
5. Fa wi e moi a tru anbegi te wi e tyari wisrefi na wan bun fasi?
5 Wi musu moi a tru anbegi: A bun fasi fa wi e tyari wisrefi na ini a kontren pe a kongres e hori e moi a tru anbegi (Tit. 2:10). Den sma di e wroko na hotel noso tra presi e si te sma di e go drape abi pasensi èn te den e taki na wan switifasi nanga den wrokoman (Kol. 4:6). Di den brada fu wan bijkantoro ben taki nanga wan driktoro fu wan hotel pe Kotoigi ben wani go tan, dan a driktoro taigi den brada: „Wi breiti srefisrefi te den sma fu unu e kon na a hotel fu wi fu di den na bun sma. Den abi bun maniri èn den abi switifasi. Ala ten den e sori lespeki gi den wrokoman èn den e hori a presi a bun.”
6. Fa wi kan moi a tru anbegi nanga a fasi fa wi weri krosi?
6 Te wi weri wi lapelkarta, dan dati e sori sma taki wi e hori wan kongres èn dati e meki tra sma na a kongres sabi suma na wi. Boiti dati wi e kisi na okasi tu fu preiki gi tra sma di e si wi. Sma o si taki wi di abi a lapelkarta weri krin krosi na wan fasi di fiti. Den o si taki wi de tra fasi leki sma fu a grontapu disi di e weri syabisyabi krosi noso krosi di e wiki den sekslostu fu trawan (1 Tim. 2:9, 10). Fu dati ede wi musu luku bun sortu krosi wi weri na ini a kontren pe a kongres e hori. Te wi o weri tra krosi fu go nyan na wan presi baka a kongres, dan wi musu hori na prakseri taki wi na sma di e go na a kongres èn wi no musu weri krosi na so wan fasi leki na oso wi de.
7. San na wan fasi fa wi e kisi deki-ati fu wi Kresten brada nanga sisa na a kongres?
7 Na den fesa di ben hori na ini Israel, den sma ben abi switi demakandra nanga den tra Israelsma di ben kon anbegi Gado tu èn den sma di ben kon fu tra kondre. Disi ben meki taki wánfasi de (Tori 2:1, 5). Na den distrikt kongres fu wi a de moro krin fu si fa wi e libi leki Kresten brada nanga sisa fu makandra èn disi na wan aparti sani trutru. Nofo tron a e naki sma ati te den e si fa wi e libi nanga makandra neleki wi de na ini a paradijs kaba (Ps. 133:1). Na presi fu go bai nyanyan na dorosei na ini a pauze, a moro bun fu tyari wan pikin sani fu nyan. Teki na okasi dati fu miti èn taki nanga brada nanga sisa di e sidon krosibei fu wi.
8. Fu san ede a bun fu yepi leki friwani wrokoman efu wi man?
8 Nofo tron sma e fruwondru fu si fa den kongres fu wi orga bun èn fa sani e waka na wan bun fasi, spesrutu te den e yere taki na friwani wrokoman du ala a wroko. Yu „de klariklari” fu yepi du wan wroko na a kongres? (Ps. 110:3) Nofo tron heri osofamiri e yepi leki friwani wrokoman. Na so wan fasi den e leri den pikin fu yepi trawan. Efu yu e syensyen, dan wan moi fasi fa yu kan miti tra sma na te yu e yepi du wan wroko na a kongres. Wan sisa ben taki: „Mi no ben sabi furu sma drape, soso mi famiri nanga wan tu mati. Ma di mi yepi krin a presi, mi miti furu brada nanga sisa. A sani disi ben gi mi furu prisiri!” Te wi e yepi du wan wroko na a kongres, dan wi o kisi moro prisiri fu di wi o meki moro mati (2 Kor. 6:12, 13). Efu noiti yu yepi leki friwani wrokoman, dan aksi den owruman san yu musu du fu man yepi.
9. Fa wi o gi sma wan kari fu kon na a kongres?
9 Gi sma wan kari fu kon arki den tru tori fu Bijbel: Soleki fa a ben de na ini den yari na fesi, dan dri wiki fosi a kongres wi o teki prati na a kotoigiwroko fu gi sma wan kari fu kon. Den gemeente o du ala san den man fu gi ala sma na ini a kontren fu den a kari fu kon. (Luku a faki di nen „Fa wi o gi sma wan kari fu kon na a kongres?”) Te yu abi den papira ete, dan yu musu tyari dati kon na a kongres. Den sma na a kongres o gebroiki den papira disi fu preiki gi sma na ini a kontren pe a kongres e hori.
10. Fruteri ondrofenitori di e sori sortu bun bakapisi wi abi te wi e gi sma wan kari fu kon na a kongres.
10 Sma e kon te wi gi den wan kari? Na wan kongres wan dienst-yepiman ben yepi wan trowpaar fu feni wan sidonpresi. Den ben taigi a brada taki den ben kisi wan kari èn den „ben wani sabi moro fu a tori”. Den rèi moro leki 320 kilometer fu go na a kongres! Na wan tra presi, wan sisa di ben e go oso fu oso ben gi wan man wan fu den kari èn a man disi trutru ben wani sabi moro fu a kongres. Fu dati ede a sisa teki ten fu taki nanga a man fu den sani di skrifi na tapu a papira. Baka wan tu dei di a sisa ben de na a kongres, a si a man nanga wan mati na a kongres èn den ben abi wan fu den nyun publikâsi di wi ben kisi.
11. Fu san ede a de prenspari taki wi e go na den alayari distrikt kongres?
11 Den fesa di ben hori na spesrutu ten fu a yari ben de lobi-ati seti fu Yehovah, di ben yepi den Israelsma fu „dini en nanga wan krin ati èn na wan reti fasi” (Yos. 24:14). Na so a de tu taki den alayari distrikt kongres fu wi e yepi wi fu „gi yesi na a tru leri” èn den de wan tumusi prenspari pisi fu wi anbegi (3 Yoh. 3). Meki Yehovah blesi a muiti di ala sma e du di lobi den tru tori fu Bijbel èn meki den kisi wini dorodoro!
[Prenspari pisi na tapu bladzijde 4]
A bun fasi fa wi e tyari wisrefi na ini a kontren pe a kongres e hori e moi a tru anbegi
[Prenspari pisi na tapu bladzijde 4]
Dri wiki fosi a kongres wi o teki prati na a kotoigiwroko fu gi sma wan kari fu kon
[Faki na tapu bladzijde 9]
Sani di wi musu hori na prakseri gi a distrikt kongres fu 2012
◼ Programa ten: Tapu ala den dri dei, a programa sa bigin 9.20 mamanten. A presi pe a kongres e hori, sa opo 8.00 yuru mamanten. Te a poku na a bigin fu a programa e prei, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 4.55 bakadina, èn tapu sonde a sa kaba 3.40 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di e tan nanga yu na ini a srefi oso, den sma di kon nanga yu na ini a srefi wagi noso boto, noso den sma nanga suma yu e studeri now.—1 Kor. 13:5.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, noso grasi batra.
◼ Bijdrage: Wi kan sori taki wi e warderi den sani di seti gi a kongres, te wi e gi friwani bijdrage gi a wroko di e du na heri grontapu. Sma kan gi tyèk sosrefi tapu a nen fu Gemeente Paramaribo van Jehovah’s Getuigen.
◼ Te sma kisi mankeri: Efu wan sma kisi mankeri na a presi pe a kongres e hori, grantangi go na wan fu den dienst-yepiman di de krosibei. Wantewante a dienst-yepiman sa go na wan fu den sma di e yepi na a EHBO fu a kongres, so taki den kan luku o seryusu a mankeri de èn yepi a sma dati.
◼ Dresi: Efu yu e gebroiki spesrutu dresi, dan grantangi tyari san yu abi fanowdu na a kongres, fu di yu no o man feni den sortu dresi disi drape.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone (den sani di yu kan poti na yu yesi so taki yu wawan kan arki). Yu kan arki a programa tapu 107.9 FM.
◼ Gi kotoigi te yu e kisi na okasi: Gebroiki ibri okasi di yu e kisi fu gi kotoigi. Efu wan sma wani taki wi musu go na en oso fu fruteri en moro fu Bijbel, skrifi a nen nanga na adres fu en. Yu kan gi a sekretarsi fu yu gemeente den sani di yu skrifi. Efu a de fanowdu, a sekretarsi kan seni dati go na a bijkantoro, noso a kan sorgu taki wan preikiman e go na a sma.
◼ Nyanyan-oso: Te yu de na wan nyanyan-oso, dan tyari yusrefi na wan fasi di fiti, so taki yu e gi grani na Yehovah.
◼ Friwani wroko: Iniwan sma di wani yepi kan gi den nen na a Afdeling fu friwani wrokoman. Pikin di no doro 16 yari kan yepi tu te den e wroko makandra nanga den papa, noso mama, noso wan tra sma di e luku den.
[Faki na tapu bladzijde 9]
Fa wi o gi sma wan kari fu kon na a kongres?
Fu di wi wani du so furu leki wi man fu wroko a heri kontren fu wi, meki wi kan taki syatu. Kande wi kan taki disi: „Fa yu tan? Na heri grontapu wi e teki prati na a wroko fu gi sma wan kari. A kari disi na fu yu. Tra prenspari sani di yu musu sabi skrifi na tapu a papira.” De nanga faya. Te yu e prati a papira tapu satra nanga sonde, dan yu kan gi a sma den tijdschrift tu te dati fiti.
[Raportu na tapu bladzijde 5-8]
2011 DINIWROKO RAPORTU FU YEHOVAH KOTOIGI NA HERI GRONTAPU
(Luku a Kownukondre diniwroko)