Tyari wisrefi na wan fasi di e gi Gado glori
1. Fu san ede a makriki gi sma fu sabi taki Yehovah Kotoigi e go na den kongres?
1 A no muilek gi sma fu si taki wi e go na wan distrikt kongres. Na furu presi pe den kongres e hori, nyunsuman e fruteri sma taki wi o abi wan kongres. Furu tron den hotel nanga restaurant lai nanga sma di e go na a kongres, èn den sma di e tan na ini a birti e si taki wi e weri lapelkarta. Wi o go luku wan tu sani now fu memre wi fa wi musu tyari wisrefi fu gi Gado glori te wi e go na wan kongres.—1 Petr. 2:12.
2. Fa wi kan gi Gado glori te wi e weri krosi na wan fasi di fiti na a birti pe a kongres e hori?
2 Weri krosi na wan fasi di fiti: Te wi e weri krosi na wan fasi di fiti te wi e go na a kongres, dan dati abi krakti tapu den sma di e luku wi. Ma den krosi di wi e weri na tra okasi, soleki, te wi e go nyan na wan restaurant, te wi e go na wenkri, kan abi moro krakti na tapu den sma di e luku wi. Aladi den krosi di wi e weri na den okasi disi no de leki te wi e go na den konmakandra, toku a fasi fa wi e weri krosi na den tra okasi disi musu sori taki wi e weri krosi na wan fasi di fiti èn di e sori taki wi e gi Gado glori. Den krosi disi de tra fasi leki fa wi e weri na oso. Den sma di e luku wi musu si taki wi de tra fasi leki sma di no de na bribi (Rom. 12:2). Boiti dati, wi musu weri wi lapelkarta, fu di disi e sori sma taki wan kongres e hori, a e gi wi na okasi tu fu gi kotoigi èn fu meki trawan di de na a kongres sabi suma na wi.
3. Fa wi kan sori taki wi abi pasensi èn bun maniri?
3 Abi pasensi èn bun maniri: Na ini a ten disi pe furu sma e prakseri densrefi wawan èn den no de nanga tangi, a musu de switi gi sma di e luku wi fu si taki wi abi pasensi èn bun maniri te wi e go teki bus èn te wi de na wan restaurant! (2 Tim. 3:1-5) Te wi e hori wan sidonpresi gi sma noso te wi e go teki den nyun publikâsi, dan wi no musu suku wi eigi bun, ma di fu trawan (1 Kor. 10:23, 24). Baka di wan man ben go na wan kongres a fosi leisi a taki: „Mi no man memre nowan fu den lezing di ben hori a dei dati, ma a fasi fa den Kotoigi ben tyari densrefi mi no o frigiti noiti moro.”
4. Fu san ede wi musu de klariklari fu yepi na a kongres efu a kan?
4 De klariklari fu yepi: Tru Kresten na sma di de klariklari fu yepi (Ps. 110:3). Yu de klariklari fu yepi na a kongres? Na wan kongres, sowan 600 brada nanga sisa ben yepi fu krin a presi fosi a kongres hori. Den sma di ben wroko drape ben taki: „Disi na a moro moi sani di wi si oiti! Wi no man bribi taki ala den sma disi e wroko sondro fu kisi pai.” Wi e angri fu de na a distrikt kongres fu 2013, fu kisi na okasi fu arki èn teki leri fu Gado èn fu gi en glori.
[Faki na tapu bladzijde 3, 4]
Sani di wi musu hori na prakseri gi a distrikt kongres fu 2013
◼ Programa ten: A presi pe a kongres e hori sa opo 8.00 yuru mamanten. Tapu ala den dri dei, a programa sa bigin 9.20 mamanten. Te a poku e prei na a bigin fu a programa, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 4.50 bakadina, èn tapu sonde a sa kaba 3.35 bakadina.
◼ A presi fu poti wagi: Grantangi, arki den yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di e tan nanga yu na ini a srefi oso, den sma di kon nanga yu na ini a srefi wagi noso boto, noso den sma nanga suma yu e studeri now.—1 Kor. 13:5.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, noso grasi batra.
◼ Bijdrage: Wi kan sori taki wi e warderi den sani di seti gi a kongres, te wi e gi friwani bijdrage gi a wroko di e du na heri grontapu. Sma kan gi tyèk sosrefi tapu a nen fu Gemeente Paramaribo van Jehovah’s Getuigen.
◼ Dresi: Efu yu e gebroiki spesrutu dresi, dan grantangi tyari san yu abi fanowdu na a kongres, fu di yu no o man feni den sortu dresi disi drape.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone. Yu kan arki a programa tapu 107.9 FM.
◼ Gi kotoigi te yu e kisi na okasi: Gebroiki ibri okasi di yu e kisi fu gi kotoigi. Efu wan sma wani taki wi musu go na en oso fu fruteri en moro fu Bijbel, skrifi a nen nanga na adres fu en. Yu kan gi a sekretarsi fu yu gemeente den sani di yu skrifi. Efu a de fanowdu, a sekretarsi kan seni dati go na a bijkantoro, noso a kan sorgu taki wan preikiman e go na a sma.
◼ Restaurant: Te yu de na wan restaurant, dan tyari yusrefi na wan fasi di fiti, so taki yu e gi grani na Yehovah.
◼ Friwani wroko: Iniwan sma di wani yepi kan gi den nen na a Afdeling fu friwani wrokoman. Pikin di no doro 16 yari kan yepi tu te den e wroko makandra nanga den papa, noso mama, noso wan tra sma di e luku den.