Sani di wi musu hori na prakseri gi a kongres
Programa ten: A presi pe a kongres e hori, sa opo 8.00 yuru mamanten. Tapu ala den dri dei, a poku na a bigin fu a programa o bigin prei 9.20 mamanten. Te a poku bigin, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba na wan ten fu 5.00 yuru bakadina èn tapu sonde a sa kaba na wan ten fu 4.00 yuru bakadina.
Prèise Yehovah nanga singi: Sensi owruten a pipel fu Yehovah e prèise en nanga singi èn te now ete poku de wan prenspari sani na ini a tru anbegi (Ps. 28:7). Ibri dei a programa fu a kongres e bigin nanga poku. Den no e prei a poku disi somarso, ma a e yepi wi fu leri moro fu Yehovah èn fu anbegi en. Sobun, te a fesiman e taki dati a poku o bigin prei, dan wi musu go sidon èn arki a poku na presi fu taki tori. Te wi e du dati, dan wi e sori taki wi e warderi a muiti di den brada nanga sisa du fu meki a poku. Tu leisi wan yari brada nanga sisa e pai den eigi kostu fu go te na Patterson, New York, so taki den kan meki den moi poku disi gi wi. Baka te wi arki a poku, dan ala sma musu singi makandra èn prèise Yehovah nanga den Kownukondre singi fu wi.
A presi fu poti wagi: Grantangi, arki den yepiman te den e sori yu pe yu kan poti yu wagi.
Sidonpresi: Te yu doro na a kongres, dan no lon go na wan sidonpresi neleki yu e strei nanga trawan. Grantangi hori trawan na prakseri, srefi efu yu no o man sidon pe yu ben o wani. Te wi no e denki wisrefi nomo, dan wi e sori taki wi na tru Kresten èn disi e meki taki den sma di e si wi kan prèise Gado (Yoh. 13:34, 35; 1 Kor. 13:5; 1 Petr. 2:12). Hori sidonpresi soso gi den sma di e tan nanga yu na ini a srefi oso, den sma di kon nanga yu na ini a srefi wagi noso boto, noso den sma nanga suma yu e studeri. Grantangi, no poti sani na tapu tra sidonpresi di yu no e hori gi den sma disi. Na so fasi tra sma kan si taki den kan sidon drape. Wan spesrutu faki de pe den owruwan nanga den sikiwan kan sidon. Fu di furu sturu no de drape, meki na wán noso tu sma di e yepi wan owru sma kan go sidon drape nanga den.
Weri krosi di fiti gi Kresten: Den krosi di wi e weri na a kongres, musu fiti gi Kresten èn wi no musu weri krosi leki grontapusma (1 Tim. 2:9). Srefi fosi a kongres èn baka a kongres, wi no musu weri krosi leki wi de na oso èn den krosi fu wi no musu syabisyabi tu. Te wi du dati, dan wi no o syen fu weri wi lapelkarta èn wi no o syen fu preiki gi sma te wi kisi na okasi. A fasi fa wi e weri krosi èn a fasi fa wi e tyari wisrefi te wi de na den kongres, o meki taki reti-ati sma o wani arki a boskopu fu Bijbel di kan kibri den libi. Boiti dati, a o meki Yehovah prisiri.—Sef. 3:17.
Fa fu gebroiki sani soleki cellulair nanga kamera: Wi kan sori taki wi e hori trawan na prakseri te wi e seti wi cellulair noso tablet na so wan fasi taki a no e puru a prakseri fu trawan. Te wi e gebroiki sani soleki kamera, video recorder, noso tablet, dan wi no wani puru trawan prakseri èn wi no wani tapu den fu si san e pasa na a podium. Wi e sori taki wi abi bun maniri tu te wi no e seni sms noso e-mail sondro taki a de fanowdu na a ten fu a programa.
Brekten nyanyan: Grantangi, tyari yu eigi nyanyan kon na a kongres, so taki yu no abi fu gowe go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox noso grasi batra.
Bijdrage: Wi kan sori taki wi e warderi den sani di seti gi a kongres, te wi e gi bijdrage gi a wroko di e du na heri grontapu. Sma kan gi tyèk sosrefi tapu a nen fu „Gemeente Paramaribo van Jehovah’s Getuigen”.
Dresi: Efu yu e gebroiki spesrutu dresi, dan grantangi tyari san yu abi fanowdu na a kongres, fu di yu no o man feni den sortu dresi disi drape.
Sorgu taki yu no kisi mankeri: Luku bun taki yu no kisi mankeri èn taki yu no grati fadon. Ibri yari, sma e kisi mankeri fu di den e weri susu nanga hei hak. A bun fu weri susu di no o meki yu kisi mankeri.
Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone. Yu kan arki a programa tapu 107.9 FM.
Preiki te yu e kisi na okasi: Gebroiki ibri okasi di yu e kisi fu preiki. Efu wan sma wani taki wi musu go na en oso fu fruteri en moro fu Bijbel, dan yepi en fu skrifi na jw.org fa wi kan miti en, noso skrifi a nen nanga na adres fu en na tapu a Nabezoek-papira (S-43). Yu kan gi a sekretarsi fu yu gemeente den sani di yu skrifi.
Restaurant: Te yu de na wan restaurant, dan weri krosi èn tyari yusrefi na wan fasi di fiti, so taki yu e gi grani na Yehovah.
Friwani wroko: Iniwan sma di wani yepi kan gi en nen na a Afdeling fu friwani wrokoman. Pikin di no doro 16 yari kan yepi tu te den e wroko makandra nanga den papa, noso mama, noso wan tra sma di e luku den.