„Tan tyari unsrefi na wan bun fasi na mindri den grontapusma”
1. Fu san ede wi musu tyari wisrefi na wan bun fasi te wi de na a kongres?
1 Ibri yari te wi de na den kongres fu wi, sma e luku wi. Dati meki a prenspari taki a fasi fa wi e tyari wisrefi e sori sortu Gado wi e anbegi (Lef. 20:26). Den bun maniri fu wi nanga den krosi di wi weri musu sori sma krin taki wi na trutru bakaman fu Krestes. Te wi o de na a distrikt kongres noso na wan internationaal kongres a yari disi, dan fa wi kan ’tan tyari wisrefi na wan bun fasi na mindri den grontapusma’, so taki wi kan gi glori na wi hemel Tata?—1 Petr. 2:12.
2. Fa wi kan sori Kresten fasi na a ten fu a kongres?
2 Tyari wisrefi leki Kresten: A lobi di wi e sori gi makandra èn a fasi fa wi e libi nanga „den wan di de na dorosei fu a Kresten gemeente”, de heri tra fasi leki san grontapusma e du (Kol. 3:10; 4:5; 2 Tim. 3:1-5). Wi musu sori switifasi èn wi musu abi pasensi te wi de na ini bus noso te wi de na ini wan restaurant, srefi te problema opo kon.
3. Sortu rai papa nanga mama e kisi, èn fu san ede?
3 Papa nanga mama musu luku den pikin bun te den de na a kongres èn na ini wan restaurant (Odo 29:15). A driktoro fu wan restaurant ben taigi wan trowpaar: „Wi lobi fa unu de. Den sma fu unu nanga den pikin abi bun maniri èn den e sori lespeki gi trawan. Ala den wrokoman dyaso ben taki bun fu unu, èn wi e winsi taki unu ben kan kon dya ibri wiki.”
4. Fu san ede wi musu luku bun san wi e weri te wi de na a birti pe a kongres e hori?
4 Weri krosi di fiti gi wan Kresten: Den krosi di wi e weri na a kongres, musu fiti gi wan Kresten èn wi no musu weri krosi leki grontapusma (1 Tim. 2:9). Srefi fosi a kongres èn baka a kongres, wi no musu weri krosi leki wi de na oso èn den krosi fu wi no musu syabisyabi tu. Te wi du dati, dan wi no o syen fu weri wi lapelkarta èn wi no o syen fu preiki gi sma te wi kisi na okasi. A fasi fa wi e weri krosi èn a fasi fa wi e tyari wisrefi te wi de na den kongres, o meki taki reti-atisma o wani arki a boskopu fu Bijbel di kan kibri den libi. Boiti dati, a o meki Yehovah prisiri.—Sef. 3:17.