Wi o kisi blesi fu Yehovah dri dei langa
1. San wi kan fruwakti fu a distrikt kongres fu a yari disi?
1 Na ini a grontapu disi fu Satan di de leki wan drei kontren, Yehovah e tan tranga den futuboi fu en (Yes. 58:11). Wan fasi fa Yehovah e gi wi krakti baka, na te na alayari distrikt kongres e hori. Te a kongres fu a yari disi e kon moro krosibei, dan fa wi kan sreka wisrefi fu kisi krakti baka èn fu gi trawan deki-ati?—Odo 21:5.
2. Sortu sani wi musu sreka now gi a kongres?
2 Efu yu no du dati ete, dan teki ten now fu sreka yu eigi schema èn seti sani tu na a grontapuwroko fu yu so taki yu kan de na ala den dri dei fu a kongres. Yu luku o langa a o teki fu doro na a presi pe a kongres o hori, so taki yu kan doro biten èn feni sidon presi fosi a programa bigin? A no de fu taki dati wi no wani misi nowan fu den moi sani di Yehovah sreka fu gi wi krakti baka! (Yes. 65:13, 14) Yu seti sani kaba pe yu o tan èn fa yu o go na a kongres?
3. Sortu rai o yepi wi nanga wi osofamiri fu kisi wini dorodoro fu a programa?
3 San o yepi yu fu tan poti bun prakseri na a programa? Efu a kan, rostu bun ibri neti na a ten fu a kongres. Luku a takiman. Suku ibri tekst na ini yu Bijbel. Skrifi sani syatu. A ben o bun efu osofamiri e sidon nanga makandra so taki papa nanga mama kan yepi den pikin fu poti bun prakseri na a programa (Odo 29:15). Kande yu kan taki leki osofamiri fu den moro prenspari sani fu a programa ibri neti. Fu man sorgu taki yu osofamiri e tan kisi deki-ati srefi baka a kongres, dan na a Osofamiri Anbegi yu kan taki fu spesrutu sani fu a programa di yu osofamiri kan fiti na ini den libi.
4. Fa wi kan yepi trawan na ini wi gemeente fu kisi deki-ati fu a kongres?
4 Yepi trawan fu kisi deki-ati: Wi wani taki trawan kisi deki-ati fu a kongres tu. A de so taki owru preikiman noso trawan na ini a gemeente abi yepi fanowdu fu go na a kongres? Yu man yepi den? (1 Yoh. 3:17, 18) Owruman, spesrutu den grupu-opziener, musu sorgu taki den preikiman disi e kisi a yepi di den abi fanowdu.
5. Fa wi o prati den kari gi a kongres? (Luku sosrefi a faki na tapusei.)
5 Neleki fa a ben de kaba, dan dri wiki fosi a kongres wi o abi wan spesrutu kotoigiwroko fu gi sma wan kari fu kon na a kongres. Den gemeente musu poti en leki marki fu prati den kari di den kisi èn fu du dati so furu leki den man na ini a heri kontren fu den. Efu yu osofamiri abi wan tu kari ete na a kaba fu a kotoigiwroko, dan un musu tyari dati go na a kongres so taki unu kan gebroiki den fu gi kotoigi te unu kisi na okasi. Unu sa yere moro fu disi na a programa tapu freida. Efu yu osofamiri denki taki den no o gebroiki den kari disi, dan den musu gi den kari na a dienst-yepiman te unu doro na a kongres. Grantangi hori wan fu den kari gi yusrefi fu di yu o abi dati fanowdu na a lasti lezing tapu sonde.
6. Na sortu fasi wi kan sori taki wi abi bun maniri te wi de na a kongres?
6 A de wan moi sani te wi e sori taki wi abi bun maniri: Na ini a ten disi furu sma „lobi densrefi nomo” èn den no e broko den ede nanga trawan. Fu dati ede, a de wan heri moi sani fu de na mindri Kresten brada nanga sisa di e du muiti fu sori bun maniri! (2 Tim. 3:2) Wi e sori taki wi abi bun maniri fu di wi no o meki babari te wi doro na a kongres èn wi o du sani na wan orga fasi. Boiti dati, wi o hori sidonpresi soso gi den sma di e libi nanga wi na ini wán oso, den sma di e rèi makandra nanga wi go na a kongres, noso gi den sma nanga suma wi e studeri now. Te a fesiman o bigin nanga a programa èn a o aksi wi fu suku wi sidonpresi so taki wi kan arki a poku, dan wi o du dati tu. Wi e sori tu taki wi abi bun maniri te wi e poti wi cellulair na so wan fasi taki a no e puru a prakseri fu trawan na a programa. Boiti dati, te a programa e hori, dan wi no o takitaki, wi no o seni boskopu tapu cellulair, wi no o nyan, èn wi no o wakawaka lontu te dati no de fanowdu.
7. Fa wi kan kisi deki-ati èn fa wi kan gi trawan deki-ati te wi abi demakandra nanga wi brada nanga sisa?
7 Demakandra di e gi wi deki-ati: Den kongres e gi wi moro okasi fu nyan bun fu a Kresten wánfasi nanga a bradafasi (Ps. 133:1-3). Fu san ede yu no e ’opo yu ati’ fu di yu o du muiti fu go miti brada nanga sisa fu tra gemeente? (2 Kor. 6:13) Kande yu kan poti en leki marki fu kon leri sabi awansi wán tra sma noso wán tra osofamiri ibri dei. Na ini a brekten pauze wi abi a moi okasi fu du dati. Fu dati ede, tyari wan pikin sani fu nyan èn nyan nanga trawan di de drape. Na so fasi yu kan abi demakandra nanga den, na presi fu gowe go bai nyanyan noso fu go nyan na wan presi di de krosibei fu pe a kongres e hori. Disi kan meki yu abi a prisiri fu kon kisi bun mati.
8. Fu san ede a ben o bun fu yepi na a kongres, èn fa wi kan du dati?
8 A e gi wi deki-ati trutru te wi e wroko makandra nanga wi brada nanga sisa na ini a santa diniwroko! Yu kan gi yu nen fu yepi na wan fu den afdeling noso yu kan yepi yu gemeente fu krin a presi? (Ps. 110:3) Efu yu no abi wan wroko ete di yu kan du na a kongres, dan kande yu kan go na a Afdeling fu friwani wrokoman. Te furu sma de fu yepi, dan a wroko no hebi so èn a e du nanga moro prisiri.
9. Fu san ede wi musu poti spesrutu prakseri na a fasi fa wi e tyari wisrefi èn fa wi e weri krosi na a ten fu a kongres?
9 Tra sma e feni en wan moi sani te den e si taki wi e tyari wisrefi na wan bun fasi: A no soso te a programa e hori wi musu tyari wisrefi na wan bun fasi, ma wi musu du dati ala den dri dei fu a kongres. Den sma di e si wi na a presi pe a kongres e hori musu man si a difrenti na mindri wi nanga sma di no de Kotoigi. Iya, den musu man si a moi fasi fa wi e tyari wisrefi (1 Petr. 2:12). A fasi fa wi e weri krosi èn e moi wisrefi te wi de na a kongres, na a presi pe wi e tan, èn na den presi pe wi e go nyan, musu gi Yehovah grani (1 Tim. 2:9, 10). Te wi e weri wi lapelkarta, dan sma o man si taki wi na Yehovah Kotoigi. Disi kan gi wi na okasi fu fruteri den fu a kongres fu wi èn fu gi den wan moro bun kotoigi.
10. Sortu ondrofenitori e sori taki wi kan gi wan bun kotoigi te wi e tyari wisrefi leki Kresten?
10 Sortu krakti a abi tapu trawan te wi e tyari wisrefi na wan bun fasi na a kongres? Soleki fa wan koranti artikel ben taki, dan wan basi fu wan fu den presi di den brada ben gebroiki fu hori den kongres, ben taki: „Den sma abi switifasi trutru. Wi breiti fu abi den dyaso ibri yari.” A yari di pasa, wan man di no de wan Kotoigi, ben lasi en portmoni na a hotel pe den sma fu a kongres ben e tan. Di den tyari a portmoni nanga ala san ben de na ini, go na a basi fu a hotel, dan a basi taigi a man: „Koloku taki Yehovah Kotoigi abi a kongres fu den krosibei èn taki a hotel lai nanga den. Efu dati no ben de so, dan kande yu no ben o feni yu portmoni baka.”
11. Te a kongres e kon krosibei, san musu de a marki fu wi, èn fu san ede?
11 Den kongres fu a yari disi e kon krosibei. Furu muiti du fu sreka a programa èn fu seti ala sani na a presi pe a kongres o hori, so taki wi kan kisi deki-ati. Poti en leki marki fu de na ala den dri dei fu a kongres, èn de srekasreka gi den sani di Yehovah nanga en organisâsi seti gi yu. Abi a fasti bosroiti fu gi trawan deki-ati fu di yu o sori bun maniri, fu di yu o abi demakandra di e gi prisiri, èn fu di yu o tyari yusrefi na wan bun fasi. Na so yu nanga trawan kan firi neleki wan sma di ben go na a kongres a yari di pasa, èn di ben skrifi: „Mi no kan memre wan moro moi sani di mi ondrofeni leki disi!”
[Prenspari pisi na tapu bladzijde 4]
Neleki fa a ben de kaba, dan dri wiki fosi a kongres wi o abi wan spesrutu kotoigiwroko fu gi sma wan kari fu kon na a kongres
[Prenspari pisi na tapu bladzijde 6]
A fasi fa wi e weri krosi èn e moi wisrefi te wi de na a kongres, na a presi pe wi e tan, èn na den presi pe wi e go nyan, musu gi Yehovah grani
[Prenspari pisi na tapu bladzijde 7]
Abi a fasti bosroiti fu gi trawan deki-ati fu di yu o sori bun maniri, fu di yu o abi demakandra di e gi prisiri, èn fu di yu o tyari yusrefi na wan bun fasi
[Faki na tapu bladzijde 4-7]
Sani di wi musu hori na prakseri gi a distrikt kongres fu 2011
◼ Programa ten: Tapu ala den dri dei, a programa sa bigin 9.20 mamanten. A presi pe a kongres e hori, sa opo 8.00 yuru mamanten. Te a poku na a bigin fu a programa e prei, dan wi alamala musu go sidon, so taki a programa kan bigin na wan fasi di fiti. Tapu freida nanga satra a programa sa kaba 4.55 bakadina, èn tapu sonde a sa kaba 3.40 bakadina.
◼ A presi fu poti wagi: Grantangi, arki den dienst-yepiman te den e sori yu pe yu kan poti yu wagi.
◼ Sidonpresi: Yu kan hori sidonpresi soso gi den sma di e tan nanga yu na ini a srefi oso, den sma di kon nanga yu na ini a srefi wagi noso boto, noso den sma nanga suma yu e studeri now.—1 Kor. 13:5.
◼ Brekten nyanyan: Grantangi, tyari yu eigi brekten nyanyan go na a kongres, so taki yu no abi fu gowe go bai nyanyan na ini a pauze. Yu kan tyari wan pikin ijsbox di yu kan poti na ondro yu sturu. Na a presi pe a kongres e hori, sma no mag tyari bigi ijsbox, noso grasi batra.
◼ Bijdrage: Wi kan sori taki wi e warderi den sani di seti gi a kongres, te wi e gi friwani bijdrage gi a wroko di e du na heri grontapu. Wi kan gi den bijdrage disi na ini a Kownukondre zaal fu wi, noso na a kongres. Sma kan gi tyèk sosrefi tapu a nen fu Gemeente Paramaribo van Jehovah’s Getuigen.
◼ Te sma kisi mankeri: Efu wan sma kisi mankeri na a presi pe a kongres e hori, grantangi go na wan fu den dienst-yepiman di de krosibei. Wantewante a dienst-yepiman sa go na wan fu den sma di e yepi na a EHBO fu a kongres, so taki den kan luku o seryusu a mankeri de èn yepi a sma dati.
◼ Dresi: Efu yu e gebroiki spesrutu dresi, dan grantangi tyari san yu abi fanowdu na a kongres, fu di yu no o man feni den sortu dresi disi drape.
◼ Sma di no man yere bun: A programa sa de fu yere na radio na a presi pe a kongres e hori. Fu man arki a programa, yu musu tyari wan pikin FM radio nanga wan headphone (den sani di yu kan poti na yu yesi so taki yu wawan kan arki). Yu kan arki a programa tapu 107.9 FM.
◼ Gi kotoigi te yu e kisi na okasi: Gebroiki ibri okasi di yu e kisi fu gi kotoigi. Efu wan sma wani taki wi musu go na en oso fu fruteri en moro fu Bijbel, skrifi a nen nanga na adres fu en. Yu kan gi a sekretarsi fu yu gemeente den sani di yu skrifi. Efu a de fanowdu, a sekretarsi kan seni dati go na a bijkantoro, noso a kan sorgu taki wan preikiman e go na a sma.
◼ Nyanyan-oso: Te yu de na wan nyanyan-oso, dan tyari yusrefi na wan fasi di fiti, so taki yu e gi grani na Yehovah.
◼ Friwani wroko: A prisiri di wi abi fu di wi de na den kongres, o kon moro bigi srefi te wi gi wi nen fu du wroko di de fanowdu (Tori. 20:35). Iniwan sma di wani yepi kan gi den nen na a Afdeling fu friwani wrokoman. Pikin di no doro 16 yari kan yepi tu te den e wroko makandra nanga den papa, noso mama, noso wan tra sma di e luku den.
[Faki na tapu bladzijde 5]
Fa wi o gi sma wan kari fu kon na a kongres?
Fu di wi wani du so furu leki wi man fu wroko a heri kontren fu wi, meki wi musu taki syatu. Kande wi kan taki disi: „Fa yu tan? Na heri grontapu wi e teki prati na a wroko disi fu gi sma wan kari. A kari disi na gi yu. Tra prenspari sani di yu musu sabi skrifi na tapu a papira.” A fesisei fu a kari disi o hari sma prakseri. Sobun, gi na ososma a papira na so wan fasi taki a kan si a fesisei wantewante. De nanga faya. Te yu e prati a papira tapu satra nanga sonde, dan yu kan gi a sma den tijdschrift tu te dati fiti.