„Arki èn Teki Moro Leri”
1 A buku Odo e taki dati koni e bari taki: „Arki, bika mi e taki fu sani di de prenspari srefisrefi, èn mi e opo mi mofobuba fu taki fu san reti. Mi abi rai nanga koni di yu sa man gebroiki bun. . . . Arki mi; iya, koloku den sma de di e hori mi pasi. Bika suma feni mi, seiker sa feni a libi èn e kisi bun wani fu Yehovah” (Odo 8:6, 14, 32, 35). Den wortu disi e sori heri bun sortu leri wi o kisi na a „Leriman fu Gado Wortu” Distrikt Kongres.
2 Den ondrosuku den sani di a bradafasi na heri grontapu abi fanowdu, èn a kongres programa sreka fu taki fu den nowtu disi. Den Bijbel leri èn den bun rai di o gi, man yepi wi fu de koloku efu wi fiti den. Den kan yepi wi fu tan abi wan bun matifasi nanga Yehovah èn fu tan na a pasi fu têgo libi. Sondro tweifri wi abi bun reide fu „arki èn teki moro leri”.—Odo 1:5.
3 Bifo a Programa: Fu kisi winimarki dorodoro fu den sani di o taki dan wi musu de na wi sidon presi èn wi musu de nanga ala wi prakseri te a programa e bigin. Disi wani taki dati wi musu orga wi eigi sani bun. Wan prenspari sani di o yepi wi na te wi e bigin sreka sani fruku. Go sribi fruku a neti na fesi. Wiki fruku nofo so taki ibriwan sma di e tan nanga yu na ini wán oso, e kisi ten fu sreka ensrefi èn fu nyan wan sani. Kon fruku na a presi pe a kongres e hori so taki yu kan feni wan sidon presi èn so taki yu kan du prenspari sani bifo a programa e bigin. A presi o opo 8.00 mamanten, èn a programa o bigin ibri dei 9:30 mamanten.
4 Ibri pisi fu a programa musu bigin na wan fasi di e gi wi Gado glori, bika a prenspari reide fu san ede wi e kon makandra na fu prèise Yehovah „na mindri den ipi sma di kon makandra” (Ps 26:12). Fu kan du dati, dan wi alamala e kisi deki-ati fu sidon bifo den kari a fosi singi. Disi de akruderi a frumane fu Bijbel: „Meki ala sani feni presi na wan fasi di fiti èn leki fa sani seti” (1 Kor 14:40). San dati wani taki gi ibriwan fu wi? Te yu e si a fesiman e sidon tapu a podium te a fosi pisi fu a poku e bigin prei, dan go sidon wantewante. Disi o gi yu na okasi fu singi a fosi singi fu ibri pisi fu a programa nanga yu heri ati, èn na so wan fasi yu e prèise Yehovah.—Ps. 149:1.
5 Te a Programa E Hori: Esra „ben sreka na ati fu en fu go suku rai na a wet fu Yehovah èn fu du en” (Esra 7:10). Fa wi kan sreka wi ati fu kisi a leri di Yehovah e gi? Te yu e luku den difrenti nen fu den lezing di skrifi na tapu a programa, dan aksi yusrefi: ’San Yehovah wani taigi mi nanga a programa disi? Fa mi kan gebroiki den sani disi fu a bun fu misrefi èn fu mi osofamiri?’ (Yes. 30:21; Ef. 5:17). Tan aksi yusrefi den sani disi a heri kongres. Skrifi syatu wan tu penti san yu wani gebroiki. Teki a ten fu taki fu dati ibri dei na a kaba fu a programa. Disi o yepi yu fu tan memre èn fu tan du san yu leri.
6 Na wan tyalensi fu poti prakseri na wan sani furu yuru baka makandra. San kan yepi efu wi e bigin denki tra sani? Gebroiki yu ai heri bun. Moro furu den sani di wi ai e si, e hari wi prakseri (Mat. 6:22). Fu dati ede, kakafutu te yu wani drai luku iniwan sani di yu yere noso iniwan sani di e pasa. Tan luku a takiman. Leisi tu na ini yu eigi Bijbel te a takiman e leisi wan tekst, èn no tapu yu Bijbel te a e taki fu a tekst.
7 Kresten lobi o gi wi deki-ati fu luku bun taki wi no puru trawan prakseri te a programa e hori (1 Kor. 13:5). Disi na „wan ten fu tan tiri” èn fu arki (Preik. 3:7). Fu dati ede luku bun taki yu no e takitaki èn wakawaka efu a no de fanowdu. Sorgu taki yu no e go furu leisi na toilet fu di yu sreka sani na fesi. No nyan noso dringi te leki a yuru doro fu du dati, boiti efu yu abi spesrutu gosontu problema. Den wan di e waka nanga cellulair, pieper nanga kamera fu meki felem noso fowtow, no musu gebroiki den sani disi na so wan fasi taki den e hari a prakseri fu trawan puru. Papa nanga mama musu sreka sani gi a heri osofamiri — so srefi gi den tini fu den — fu den kan sidon makandra, so taki den man luku fa den pikin fu den e poti prakseri.—Odo 29:15.
8 A yari di pasa wan owruman di kon na den kongres someni tenti yari kaba ben taki: „Mi ben firi taki a kongres disi ben de wan spesrutu wan fu wan tra sani ede. Pikin moro ibri arkiman ben skrifi wan tu sani, so srefi den yongu pikin. A ben de wan moi sani fu si. Den arkiman ben gebroiki Bijbel bun te den takiman ben aksi den fu opo den Bijbel na wan spesrutu tekst”. Te sma e arki so bun, dan dati na trutru wan sani di de fu prèise. A no abi wini wawan gi wi èn gi den tra sma di kon na a kongres; ma san moro prenspari na taki a e gi Yehovah Gado, wi Gran Leriman, glori.—Yes. 30:20.