Kon makandra fu prèise Yehovah
1. San na a thema fu a kongres, èn fu san ede Yehovah de warti fu kisi na anbegi fu wi?
1 Yehovah abi krakti pasa marki, a koni fu en bigi so kefalek taki a dangra fu frustan, a retidu fu en bun dorodoro, èn na En den e kari lobi. Leki Mekiman, a Sma di gi wi libi, èn leki a moro Hei Tiriman, en wawan de warti fu kisi na anbegi fu wi (Ps. 36:9; Openb. 4:11; 15:3, 4). Na ini augustus nanga september a „Gi Gado glori” Distrikt Kongres sa gi wi krakti fu tan tanapu baka a bosroiti di wi teki fu prèise en leki a wan-enkri tru Gado.—Ps. 86:8-10.
2, 3. Fa wi sa abi bun bakapisi te wi sreka sani bun?
2 Sreka sani bun: Fu kisi wini dorodoro fu a yeye fesa di Yehovah seti gi wi, dan a de prenspari taki wi sreka sani bun (Ef. 5:15, 16). Yu seti yu sribipresi kaba? Yu seti kaba fa yu sa go na a kongres? Yu sreka sani fu kisi fri ten fu wroko noso fu skoro kaba? No libi den prenspari sani disi te na a lasti momenti. Efu yu e wakti tumusi langa fu aksi fri fu yu wroko, dan yu kan misi wan pisi fu a moi okasi disi. Wi alamala musu de presenti na ibri pisi fu a programa.
3 Poti en leki marki fu doro fruku ala den dei fu a kongres. Dati sa meki taki yu abi wan sidonpresi kaba te a fosi singi e bigin èn a sa yepi yu fu sreka yusrefi fu de nanga ala yu prakseri na a leri di wi sa kisi. Ibri dei sma sa man kon na a bigi konmakandra-presi bigin nanga 8.00 yuru mamanten. Grantangi no hori sidonpresi gi tra sma boiti efu den sma de yu krosibei famiri noso den sma di kon nanga yu na ini a srefi oto.
4. Fu san ede wi e kisi a rai fu tyari wi eigi brekten nyanyan go na a kongres?
4 Wi e aksi unu fu tyari un eigi brekten nyanyan, na presi fu libi a kongres dyari soso fu go bai nyanyan. Te wi e wroko makandra nanga den seti disi, dan wi e yepi fu meki a kongres kon tron wan prisiri sani èn a e gi wi moro ten fu abi demakandra nanga tra brada nanga sisa (Ps. 133:1-3). Grantangi hori na prakseri taki wi no abi primisi fu tyari grasi batra nanga sopi sani na a kongres.
5. Fa wi kan bigin sreka wi ati gi a kongres?
5 Arki èn leri: Esra ben sreka en ati na wan opregti fasi soso fu kisi a wortu fu Gado (Esra 7:10). A ben opo en ati gi den leri fu Yehovah (Odo 2:2). Wi kan bigin sreka wi ati gi a kongres, srefi fosi wi gowe fu oso fu go na a kongres. Wi kan denki dipi fu a thema fu a kongres èn wi kan abi wan takimakandra fu en nanga wi osofamiri.
6. San kan yepi wi fu hori wi prakseri na a programa? (Luku a faki.)
6 Na ini wan bigi zaal, furu sani de di kan puru wi prakseri. Den sani disi kan puru wi prakseri fu den tori di a takiman e taki. Te a sani disi e pasa, dan wi e lasi furu prenspari bodoi. Den rai di de fu feni na ini a faki di de na ini na artikel disi kan yepi wi fu poti prakseri moro bun na den rai di wi e kisi.
7, 8. Fa wi kan sori taki wi e hori den firi fu tra sma na prakseri?
7 Sori taki yu e hori den firi fu trawan na prakseri: Wi kan gebroiki kamera fu meki fowtow noso felem na a ten fu a programa, ma wi musu hori trawan na prakseri. Te wi e hori trawan na prakseri dan wi e meki fotow noso felem komoto fu wi sidonpresi. Cellulair telefon musu seti na so wan fasi taki den no e puru a prakseri fu trawan fu a programa. Nowan kamera noso tra sani musu poti na a stroom fu a bigi konmakandra-presi.
8 Wi e angri trutru fu kon makandra fu prèise Yehovah! Meki wi teki a fasti bosroiti fu gi en glori, èn fu de na ibri pisi fu a programa, fu arki bun èn fu du san wi e leri.—Deut. 31:12.
[Faki na tapu bladzijde 3]
Fa fu arki na kongres
▪ Denki dipi fu den nen fu den lezing
▪ Suku den tekst na ini a Bijbel
▪ Skrifi wan tu fu den ede-penti fu a lezing
▪ Luku san na den penti di yu kan fiti na ini yu libi
▪ Luku baka san yu leri