„Meki wi alamala makandra hei a nen fu en”
1. Sortu okasi wi alamala sa abi fu hei a nen fu Gado, èn fa wi kan sreka sani now na fesi?
1 „O gi Yehovah glori makandra nanga mi, . . . èn meki wi alamala makandra hei a nen fu en”, na so a psalm skrifiman ben singi (Ps. 34:3). A „Waka nanga Gado” distrikt kongres sa gi wi na okasi fu hei a nen fu Yehovah, makandra nanga den brada èn den sisa fu furu gemeente. Yu seti sribipresi kaba, yu seti kaba fa yu o go na a kongres, èn yu seti sani fu kisi fri ten fu yu grontapuwroko kaba? A de wan koni sani fu seti den sani disi fruku na fesi.—Odo 21:5.
2. Fu san ede a bun fu seti sani fu doro fruku na a presi pe a kongres e hori?
2 Te wi doro na a presi pe a kongres sa hori: Wi musu sreka furu sani fosi wi go na a kongres. Te wi e komoto fruku na oso, dan dati sa yepi wi fu lusu problema di wi no fruwakti èn wi sa man feni wan sidonpresi biten, so taki wi kan abi wan prati nanga wi heri ati na a fosi singi nanga begi (Ps. 69:30). Wan tu miniti bifo a programa o bigin, a fesiman sa teki en sidonpresi na tapu a podium aladi Kownukondre poku e plèi. Wi alamala musu teki wi sidonpresi na a ten dati so taki a programa kan bigin na wan fasi di fiti.—1 Kor. 14:33, 40.
3. Fa wi kan sori taki wi e hori tra sma na prakseri te wi e suku wan sidonpresi?
3 Gado Wortu e taki dati wi musu ’meki ala den sani fu wi feni presi nanga lobi’ (1 Kor. 16:14). Te wi doro na a konmakandra-presi, dan wi no sa lon, hasti wisrefi, noso pusu trawan, soso fu feni wan bun sidonpresi fosi trawan. Na so fasi wi e sori taki wi e hori trawan na prakseri. Wi kan hori wan sidonpresi soso gi den wan di e rei makandra nanga wi na ini wán wagi, noso den wan di e libi nanga wi na ini wán oso.—1 Kor. 13:5; Fil. 2:4.
4. Sortu sani wi kan seti gi a pauze, èn fa wi kan nyan bun fu dati?
4 Grantangi, tyari un eigi brekten-nyanyan, na presi taki yu e libi a kongres dyari ini a pauze fu go bai wan sani fu nyanyan. Te wi e du dati dan wi alamala sa prisiri fu a demakandra di wi sa abi, èn wi sa man de na a bigin fu a bakadina programa. Efu a de fanowdu, wi kan gebroiki wan pikin ijsbox di wi kan poti na ondro wi sturu. Wi no musu tyari bun bigi ijsbox, grasi kan, nanga sopi na a kongres.
5. Fa wi kan sreka wi ati gi rai di wi sa kisi?
5 Wan fesa-nyanyan na yeye fasi e wakti wi: Kownu Yosafat ben de wan sma di ben ’sreka en ati fu suku a tru Gado’ (2 Kron. 19:3). Fa wi kan sreka wi ati fosi a kongres? Den artikel na bakasei fu na Ontwaakt! fu 22 mei nanga a di fu 8 yuni e taki fu wan tu sani fu a fesa-nyanyan na yeye fasi di sreka gi wi. Fu san ede unu no e prakseri dipi fu den artikel disi, so taki unu kan kisi moro prisiri fu go na a fesa-nyanyan na yeye fasi di Yehovah sreka gi wi? Fu sreka wi ati wani taki tu dati wi e aksi Yehovah fu yepi wi fu frustan o prenspari en rai de di wi sa kisi èn fu yepi wi fu fiti en na ini wi libi.—Ps. 25:4, 5.
6. Sortu winsi wi abi, èn fu san ede?
6 Wi alamala e angri fu leri moro fu Gado Wortu, fu di wi sabi taki te wi e du dati, dan wi kan kon kisi frulusu (1 Petr. 2:2). Sobun, meki wi alamala de na a „Waka nanga Gado” distrikt kongres èn meki wi ’hei a nen fu Yehovah makandra’.—Ps. 34:3.
[Faki na tapu bladzijde 3]
Fasi fa wi kan hei a nen fu Gado
◼ Seti sani na fesi
◼ Sori lobi gi trawan
◼ Sreka na ati fu yu