Poti Prakseri na Santa Wortu
1 A no ben o de wan koni sani fu poti prakseri na ala sani san sma e taki. Ma te Gado e taki, dan wi abi wan prenspari reide fu arki (Deut. 28:1, 2). Koloku taki skrifiman ben skrifi „den santa wortu fu Gado” nanga yepi fu Gado en santa yeye gi wi eigi bun (Rom. 3:2). A distrikt kongres di e kon now sa de wan tumusi moi okasi fu yere den wortu disi te den brada sa leisi èn sa taki fu den wortu disi. Fa yu kan sori taki yu e poti spesrutu prakseri?
2 Doro Fruku Ibri Mamanten: Prakseri fa den Israèlsma ben prisiri di den ben taigi den taki den ben musu kon makandra na fesi Yehovah na a Sinaibergi fu arki a Wet (Ex. 19:10, 11, 16-19). Efu yu abi a srefi fasi fu denki te wi e kisi rai fu Yehovah na a distrikt kongres, dan yu sa sreka sani fu doro fruku ibri dei. Wi no kan arki a heri programa efu wi e kon lati èn e hendri trawan te wi e meki muiti fu feni wan sidonpresi. Den sa opo den portu fu a presi pe a kongres e hori aiti yuru mamanten. Ibri dei a programa sa bigin 9.30 mamanten.
3 Srefi son wan di e kon fruku, no e sidon na den sidonpresi te a konmakandra e bigin. Fu san ede disi e pasa? Den e wakti te leki a fesiman e taki san na a fosi singi, bifo den e tapu fu taki nanga mati èn dan den e bigin waka go na den sidonpresi. Luku taki wan tu miniti bifo den e singi a fosi singi ibri leisi te a programa e bigin, dan a fesiman sa sidon na tapu a podium, ala di den e bigin drai poku fu den Kownukondre singi. Disi na wan marki gi wi taki a ten doro fu teki presi! Te a fesiman e kari a fosi singi, dan wi sa de srekasreka fu singi prèisesingi makandra gi Yehovah.
4 Arki Leki wan Heri Osofamiri Makandra: Di den ben leisi den santa wortu gi den Israèlsma di ben konmakandra, dan osofamiri èn so srefi den „pikin-nengre” ben musu arki èn leri (Deut. 31:12). Na den kongres fu wi, wi no musu libi pikin „sondro fu poti prakseri na” den (Odo 29:15). Papa nanga Mama musu sreka sani gi a heri osofamiri, so srefi gi den tini fu den, so taki den kan sidon makandra. Son papa nanga mama e wakti te a fosi singi e bigin bifo den e tyari den yongu pikin fu den go na toilet. Ma disi no ben sa leri den pikin kwetikweti o prenspari singi nanga begi de na ini wi anbegi. Efu dati kan, dan a moro bun fu sorgu taki yu e go na toilet bifo a programa e bigin.
5 Efu wi rostu nofo ibri neti èn efu wi no e nyan hebi na deiten, dan dati sa yepi wi fu arki a heri dei. Poti prakseri na san a takiman e taki. Weigri fu prakseri tra sani. Leisi den tekst tu di a takiman e leisi na ini Bijbel. Skrifi syatu wan tu penti. Te ibri lezing e hori, dan prakseri san a takiman taki èn luku fa yu sa gebroiki den sani dati. Taki fu a programa leki wan osofamiri na a kaba fu a dei. Sortu penti ibriwan sma feni moi? Fa yu osofamiri kan gebroiki den sani disi di den leri na wan bun fasi?
6 Sori Lespeki gi a Wortu fu Gado: Den kongres e gi wi bun okasi fu taki nanga mati èn fu abi demakandra di e gi sma deki-ati. Te wi e kon fruku, dan wi sa abi ten fu taki nanga trawan bifo a programa e bigin. Ma toku son wan e bigin wan takimakandra te a programa e hori, ala di den e meki a fowtu fu denki taki na ini so wan bigi konmakandra presi den no e puru a prakseri fu furu sma. Srefi te bigi konmakandra e hori, dan disi na wan ten fu arki, soleki fa a de te wi e go na den konmakandra na ini a Kownukondre zaal. Cellulair, pieper nanga kamera fu meki film nanga fowtow, no musu puru a prakseri fu trawan te a programa e hori.
7 Di Moses ben e kisi a Wet fu Yehovah, dan ’a no ben nyan brede èn a no ben dringi watra’ (Ex. 34:28). Na a srefi fasi a no ben sa fiti fu nyan noso dringi ala di a kongres programa e hori. Wakti te leki a ’ten di den poti fu du disi’ doro, boiti efu seryusu problema nanga a gosontu fu yu no man meki yu du dati.—Preik. 3:1.
8 Na son kongres a e tan de wan problema taki furu brada nanga sisa èn srefi yongu pikin e wakawaka lontu te a programa e hori. Den dienstyepiman sa kisi a wroko fu aksi den sma disi fu drai go baka na a konmakandra presi. Friwani wrokoman di e wroko na difrenti afdeling musu go sidon baka fu arki so esi leki den kaba a wroko fu den. Den friwani wrokoman musu sidon arki a programa, boiti efu a de fanowdu taki den e opo fu di den poti den fu du wan prenspari wroko te a programa e hori. Den no musu anga-anga na ondro den bon èn den no musu go taki nanga trawan ala di a programa e hori.
9 Noiti wi ben sa wani kon tron sma di ’ben kon dofu’ te den e arki Gado Wortu (Hebr. 5:11). Fu dati ede, meki wi abi a fasti bosroiti fu sori lespeki fu di wi o poti bun prakseri te den e taki fu den santa wortu fu Yehovah na a distrikt kongres di e kon.