Pristeri a boen njoensoe — Tapoe wan tactvolfasi
1 „Meki a taki foe joe de alaten switi, moksi nanga sowtoe, sodati joe sabi fa joe moe gi wan piki na ibriwan sma” (Kolosse 4:6). Fa disi de wan toemsi moi rai di na apostel Paulus ben gi! Wi e doe boen foe hori na rai disi na prakseri efoe wi e prati na waarheid nanga tra sma. — 2 Kor. 6:3.
NA INI NA OSO-FOE-OSO DINIWROKO
2 Tact wani taki dati wan sma wani sabi san foe doe ofoe san foe taki foe hori boen matifasi nanga tra sma èn foe sorgoe foe den no naki foetoe. Na ini wi oso-foe-osowroko wi e miti sma di e taki dati den abi en druk. Efoe wi e si dati den abi en troetroe druk, dan wi kan pristeri sjatoe den boekoe èn taki dati wi wani kon baka nanga ala prisiri foe taki nanga den. Efoe a gersi dati den no abi en toemsi druk, dan wi kan taki: „Dan wi sa meki en sjatoe.” Dan baka dati wi kan sori sjatoe san wi wani taki èn libi en wan minuut ofoe toe so.
3 Sontron wi kan abi foe doe nanga wan ososma di grofoe. Ini wi piki wi nowani sori taki wi no abi maniri èn ’pai ogri nanga ogri’ (Rom. 12:17). Wi moe de tactvol èn poti prakseri na tapoe na fermane ini Odo 15:1: „Wan safoe piki e drai atibron poeroe.” Na materiaal tapoe bladzijde 15-24 foe na Tak-go-tak-kon-boekoe sa jepi wi foe piki na ososma tapoe wan safoe èn tactvolfasi.
TAPOE GOBAKA
4 Te wi e go baka na sma di ben teki boekoe, dan nofotron wi e si dati den no ben loekoe na ini den boekoe. Wi wani gi dekati na den sortoe sma disi foe lési den boekoe di den ben teki. Foe kisi den so fara na tapoe wan tactvolfasi wi ben kan sori na tapoe moi aksi di a boekoe e piki. Disi kan wiki na jeje apteiti foe den èn boewégi den foe loekoe na ini na materiaal di druk èn di den abi.
5 Foeroe foe wi ben ondrofeni wan dé dati wi ben meki wan definitief mofo foe wan gobaka ma ben moesoe si dati na ososma no ben de na oso di wi ben go baka. Aladi disi e broko joe saka èn a ben kostoe wi ten nanga moeiti, tokoe te wi miti a sma baka, wi moe de alaten ete tactvol ini san wi e taki. Wi kan ferteri en dati a ben speti wi di wi no ben miti en na oso èn taki dati wi sa doe wan ekstra moeiti foe kon baka na en èn e loekoe a fesi foe abi wan bijbel takmakandra moro fara.
TAPOE BIJBELSTUDIE
6 Sma no alaten e sreka densrefi tapoe den bijbelstudie foe den. Efoe disi de so, dan wi kan teki wan pisten foe meki den si fa den kan sreka densrefi a fesi. Ofoe wi ben sa kan sori tapoe wantoe sani di den ben kon sabi foedi den ben sreka densrefi biten a fesi. Na studie sa go moro grati èn den sa go moro boen a fesi.
7 Wan sma di wi e studeer nanga en, kande no sa fisiti so geregeld den komakandra leki a ben sa moesoe doe te joe loekoe en boen. Wi ben sa kan taki foe tekst leki Psalm 133:1 ofoe Hebrewsma 10:24. 25 èn kan aksi en san den vers disi e leri en. Son prékiman di kon esesi na ini na waarheid, kande e lasi pasensi nanga den sma di e go safrisafri na fesi. Ma wi no wani foe frigiti dati a no ala sma de a srefi èn soboen wi moe abi nanga sonwan moro pasensi.
8 Paulus ben skrifi gi Timóteus dati ’wan srafoe foe Masra moe de nanga switifasi gi ala sma èn nanga safrifasi moe leri den sma di no e teki sani na wan boen fasi’ (2 Tim. 2:24, 25). Efoe dati de so nanga den sma „di no e teki sani na wan boenfasi”, dan seker wi moe lolo na wan safri èn tactvol fasi na den sma di ben sori someni belangstelling dati den ben agri nanga wan bijbelstudie. A mindri den joe ben sa abi ooktoe den pikin foe wi èn trawan nanga soema wi e studeri.
9 Te wi e meki a boen njoensoe bekenti na oso-foe-oso, tapoe gobaka ofoe tapoe bijbelstudie, meki wi alamala waka na baka na toemsi moi eksempre foe na Bigi Leriman, Jezus Kristus, di ben taki foe ensrefi: „Mi abi safri-ati èn de nanga sakafasi foe ati” (Matt. 11:29). Wi moe sori densrefi egifasi foe di wi de nanga safrifasi èn de tactvol te wi e préki èn e abi wan prati na a wroko di de na ini na meki foe discipel.