Jezus libi nanga diniwroko

Srefi en ben tron wan discipel

FA A de wan skreki sani te jezus e go a sjoro! Foe na berpe di de krosbé toe ongewoon wilder man e lon kon tapoe en! Ogri-jeje de a den tapoe. Foedi foe den kande de a more hogriwan èn foedi a de moro langa ondro a makti foe den orgri-jeje meki dati prakseri e poti moro tapoe en.

Na man disi di joe sa sari en e libi langaten kba nanga soso skin a mindri den grebi. Ai bari dé nanga neti doro èn ai koti ensrefi nanga ston. A de so ogri dati nowan sma abi na dek’ati foe waka psa na a pasi dati. Den proeberi foe poti en ini boei, ma ai hari den keti broko èn ai panja na isri di de na en foetoe. Nowan sma abi a krakti foe dwengi en.

Aladi a man e lon go na tapoe Jezus èn e fadon na en foetoe sé, dan den ogri-jeje di hori en na ini den makti e meki a bari: „San mi abi foe doe nanga joe, Jezus, Manpikin foe a Moro Hé Gado? Mi e poti joe na ondro sweri na Gado, foe no pina mi.”

„Komoto foe na libisma, doti jeje” Jezus e taki alaten baka. Ma dan Jezus e aksi en: „Fa joe nen de?”

„Mi nen na Legioen bika wi de nanga foeroe”, na piki de. Ogri-jeje e feni en wan switi sani foe si a pina foe sma di den sabi foe kisi ini den makti èn den feni en wan moi sani, èn dati de krin, foe fadon na den skin tapoe wan lagifasi nanga wan heri ipi sma makandra. Ma now di den abi foe doe nanga Jezus den e begi foe no iti den go na ini a peti di no abi gron. Agen wi e si o bigi na makti de di Jezus abi, sodati a kan basi srefi takroe ogri-jeje. Nanga disi e kon ooktoe na krin dati den ogri-jeje sabi foe a kroetoe foe Gado gi den te foe kaba, dati wani taki dati makandra nanga a tiriman foe den, Satan na Didibri, den sa sroto na ini a peti di no abi gron.

Krosbé tapoe a bergi wan ipi meti foe sowan 2000 agoe e njan grasi. Foe dat’ede den ogri-jeje e taki: „Seni wi go ini den agoe, sodati wi kan go na ini den.” A de krin dati den ogri-jeje ben abi na wan ofoe tra onnatuurlek èn ogri-ati prisiri foe teki a skin foe mekisani foe meti abra. Efoe Jezus o gi den pasi foe go ini den agoe dan den o trowe ala den 2000 foe na let’opoe pisi foe na bergi go dede ini a sé.

Te den man di e tjari den agoe e si disi, den o lon gwe foe ferteri a njoensoe alape ini a foto èn ini a kondre a lontoe. Tapoe dati den sma e kon loekoe san pasa. Te den doro den e si a man foe soema den ogri-jeje ben komoto na en tapoe, èn loekoe, a abi krosi èn a de nanga en krin froestan na den foetoe foe Jezus.

Ai-kotoigi e ferteri den sma fa a man kon boen. Den e ferteri ooktoe foe na freemde fasi tapoe san den agoe ben dede. Te den sma e jere disi den e kon frede èn den e aksi Jezus tranga foe a komoto foe a kontren foe den. Foe dat’ede ai doe san den e aksi èn ai go ini a boto. A man di ogri-jeje ben de na en tapoe ben aksi Jezus efoe a mag go nanga en. Ma Jezus e taigi en: „Go na oso, na den famiri foe joe, èn ferteri den ala sani di Jehovah ben doe gi joe èn na sar-ati di a ben sori joe.”

Gewoonlek Jezus e komanderi den sma di ai dresi foe no taki nanga nowan sma foe a tori, foedi a no wani dati den sma teki bosroiti tapoe a gron foe sensatie tori. Ma na uitzondering disi na wan sani di fiti, bika na man di ogri-jeje ben de na en tapoe kan gi kotoigi na sma di kande no sa man miti Jezus moro. Boiti foe dati, na de foe a man drape sa de wan kotoigi foe na makti di Jezus abi foe doe boen sani èn na sofasi sa de wan wegi tege den takroe njoensoe di kande sma ben sa ferteri foe na lasi foe den agoe.

Ini akroederi nanga na komando di Jezus e gi en, na man di ben abi ogri-jeje na en tapoe e gowe. A e bigin ala pe na ini a Dekápolis foe ferterl ala sani di Jezus ben doe gi en, èn den sma e ferwondroe srefsrefi. Mattéus 8:28-34; Markus 5:1-20; Lukas 8:26-39; Openbaring 20:1-3.

◆ San de kande na rede foe san-ede prakserl spesroetoe ben poti na tapoe wán man di ogri-jeje ben de na en tapoe aladi toe ben de?

◆ San e sori dati den ogri-jeje ben sabi dati ini a ten di e kon wan peti di no abi gron e wakti den?

◆ Foe san-ede ogri-jeje kande e feni en wan prisiri sani foe teki libisma nanga meti abra?

◆ Foe san-ede Jezus e komanderi a man di ogri-jeje de na en tapoe leki wan uitzondering foe ferteri tra sma san En ben doe gi en?