No kon weri
1 Na Jariboekoe 1991 (Bakratongo) e taki foe wan span gro di e feni presi na heri grontapoe. Na wan kondre baka na trawan e gi njoensoe foe wan njoen heimarki ini preikiman.
2 Ma fa a de na ini na gebied foe joe? Joe e miti mi-no-kefasi? Den sma de sondro firi gi na Kownoekondre-boskopoe? Joe e miti pikinso sma na oso? Pikinso sma e doe boen a tapoe? Efoe dati de so, joe kan kisi deki-ati kande nanga jepi foe na rai fu Paulus na ini Galasia sma 6:9: „No meki wi gi abra foe doe san de toemoesi boen, bikasi na a joisti ten wi sa koti efoe wi no e kon weri.” Doe san de toemoesi boen, wani taki seiker taki wi preiki na boen njoensoe foe na kownoekondre doro foe doro. Wi moesoe tan preiki nanga wan tranga fanowdoe fasi, te leki Jehovah taki taki a wroko kaba (Jes. 6:8). Srefi na ini moeilek kontren den e feni te now ete sma di gersi skapoe.
3 San wi kan doe foe no kon weri ini na diniwroko? Kenki na fasi fu bigin na tori ofoe den biginwortoe foe wi, ben sa kan de wan jepi. Na Taki-go-taki-kon-boekoe (Bakratongo) abi toemoesi boen rai. Joe proeberi den? Wan toemoesi sjatoe, ma wantewante fasi foe bigin na tori kan hori na prakseri foe moro ososma. Meki den sma sabi taki joe de drape foedi joe abi persoonlijk belangstelling gi den èn na tanboen foe den.
WROKO NANGA A SPESROETOE PRISTERI
4 Na ini februari wi kan sori wi broko-ede gi trawan foedi wi e pristeri den pikinso moro owroe boekoe. Awinsi na tapoe sortoe boekoe sma e poti na prakseri, a no moeilek foe feni na ini dati wan kapitel ofoe wan pisi di e taki foe Gado Kownoekondre. Ibriwan foe wi e rikomanderi na Kownoekondre disi èn e horibaka gi en nanga jepi foe na preiki foe na boen njoensoe. Den boekoe na toemoesi boen wrokosani foe jepi trawan foe kon sabi moro foe na Kownoekondre di den e kari so foeroetron ini na begi foe den, ma di den sabi tokoe so pikinso foe en.
5 Na ini foeroe boekoe prenki de foe paradijs situwâsi. Soema no ben sa wani libi ini den sortoe omstandigheid dati? Den sortoe prenki dati èn wantoe sani di teki boen, èn di poeroe foe wan ofoe toe paragraaf foe taki, sa de wan heriboen sani na a pristeri foe den dri pikinso moro owroe boekoe foe wan bijdrage foe soso Sƒ 3,-. So wan fasi foe bigin na Tori e fiti boen na a tori foe takimakandra foe now.
6 Seiker wi srefi kan kisi deki-ati èn tranga foedi ibri wiki wi e teki prati na a Kownoekondre preikiwroko. Boiti foe dati wi jejefasi kan hori hei foedi sondro foe misi wi e studeri na Wortoe foe Gado èn abi wan doronomo prati na den gemeente konmakandra. — Hebr. 10:23-25.
GI TRAWAN DEKI-ATI FOE TAN TRANGA
7 Joe kan jepi joe srefi èn gi trawan deki-ati foedi joe e wroko nanga den ini na velddienst (Gal. 6:10). Foe san-ede joe no ben sa aksi den pionier nanga den owroeman efoe joe kan wroko nanga den? So srefi den wan di de ongeregeld ofoe kande inaktief, ben sa kan kisi deki-ati foe na belangstelling foe joe gi na jeje tanboen foe den.
8 Wi alamala moesoe horidoro na ini a dienst foe Jehovah èn no kon weri na ini den moeilek lasti dei disi. Na horidoro disi sa jepi wi leki kresten foe tan fajafaja awasi moeilekhèit de ofoe taki foe na sei foe trawan den de sondro firi (Hebr. 10:36-39). Begi Jehovah foe kisi tranga (Jes. 40:29-31). Aksi en foe jepi joe horidoro èn hori wan positief jejefasi. No frigiti taki wi e doe na wroko foe Gado. En e si san wi e doe na ini en dienst èn a no e frigiti dati (Hebr. 6:10). Soboen no meki wi kon weri! Ma meki foe dati-ede wi ’abi alaten foeroe foe doe na ini a wroko foe Masra’, nanga na froetrow taki Jehovah e tranga wi gi na ’toemoesi boen wroko’ foe en. — 1 Kor. 15:58; Gal. 6:9.