Jezus libi nanga diniwroko
Watra-ai ben meki presi gi bigi prisiri
TE Jaïrus e si taki na oema di ben abi na lon foe broedoe ben kon betre, dan seker a e kisi moro fertrow ete ini den wondroekrakti di Jezus abi. Jaïrus ben aksi Jezus a fesi kaba tapoe a dé disi efoe a ben wani kon jepi en lobi oemapikin foe twarfoe jari di ben de foe dede. Ma te den e waka go na oso foe Jaïrus, na wan pe ofoe ini a birti foe Kapernaum, wan oema e kon betre foedi soso a e fasi na tapoesé krosi foe Jezus.
Ma ala a ten disi a sani e psa san Jaïrus ben frede moro foe en. Aladi Jezus de e taki ete nanga na oema, dan wan ipi man e kon di e taigi Jaïrus safri taki: „Joe oemapikin dede! Foe san-ede joe ben sa tan trobi moro langa na Leriman?”
Fa disi ben de wan kefarlek hebi njoensoe! Go prakseri pikinso: A man disi, di ini a gemeenschap sma e si leki wan hé6sma, sondro jepi e jere now dati en oemapikin dede. Ma Jezus e jere san taki. Foe dat’ede ai drai loekoe Jaïrus èn foe gi en dek’ati: „No frede, sori soso bribi.”
Jezus e go nanga a man disi di sari ben teki en abra na oso. Te den doro, dan sma de drape di e kré èn e sari boen tranga. Wan boen bigi ipi sma kon makandra èn alamala e bari foe sari. Aladi Jezus e go na inisé a e aksi: Foe san-ede oenoe e meki someni babari èn kré? Na jongoe meisje no dede, ma a e sribi.
Te den sma e jere disi, dan den bigin spotoe èn lafoe Jezus, bika den sabi dati a meisje dede troetroe. Ma Jezus e taki dati ai sribi nomo, foedi a ben wani meki sma si nanga den krakti di a ben kisi foe Gado, dati a de net so makriki foe meki sma drai komoto foe dede leki foe wiki den poeroefoewan dipi sribi
Jezus e seni now ala sma go na dorosé boiti Petrus, Johannes, Jakobus, èn na papa nanga mama foe na meisje di dede. Dan ai go nanga den féfi disi na inisé pe a jongoe meisje didon. Jezus e hori en na en anoe èn ai taki: „Tal’i-tha cu’mi” san wani taki te joe vertaal en: „Meisje, mi e taigi Joe: Opo tanapoe!” Èn wantewante a meisje opo tanapoe èn ai go waka! Te a papa nanga mama e si dati dan den no sabi san den moe doe foe bigi prisiri ede.
Bakadi Jezus ben taki dati a pikin ben moe kisi wan sani foe njan, a e komanderi Jaïrus nanga en oema dati den no ben mag taigi nowan sma san ben psa. Ma aladi Jezus taki den wortoe disi tokoe na tori e panja go na ini na heri kontren dati. Disi na a di foe toe tron di Jezus e wiki wan sma komoto foe dede. Mattéus 9:18-26; Markus 5:35-43; Lukas 8:41-56.
◆ Sortoe njoensoe Jaïrus e kisi, èn fa Jezus e gi en dek’ati?
◆ Sortoe situatie den e miti te den kon na a oso foe Jaïrus?
◆ Foe san-ede Jezus e taki dati a pikin e sribi nomo?
◆ Soema na den féfi sma di ben de kotoigi foe en dati Jezus ben wiki a pikin komoto foe dede?