Yesus libi nanga diniwroko

Wan tiriman di de moro hei leki libisma èn di ala sma ben sa wani

TE Yesus gi nanga yepi fu wan wondru dusundusun sma fu nyan, dan den sma e ferwondru. „Disi seiker de na proféiti di ben sa kon na ini grontapu”, den e taki. Den e kon na a bosroiti dati Yesus no wawan mu de na profeiti di de moro bigi leki Mozes, ma dati a ben sa de ooktu wan tumsi bun tiriman di ala sma ben sa wani. Fu dat’ede den e meki a plan fu grabu en èn meki a tron kownu.

Ma Yesus e si san den abi na prakseri. Datmeki ai handri esesi fu sorgu dati nanga tranga den no meki en tron kownu. Ai seni den ipi sma gwe, e dwengi en disipel fu go ini den boto fu drai go baka na Kapernaüm èn hari ensrefi dan go tapu a bergi fu begi. A neti dati Yesus e de drape en wawan.

Syatu bifo dei opo Yesus e luku lontu komoto fu na hei presi pe a de èn e si fa wan krakti winti e wipi den skwala fu na se go na loktu. Ini a leti fu na pikinmoro furu mun, bika Pascha ben de a mofodoro fu kon, Yesus e si dati a boto nanga en disipel nanga bun furu muiti man fu psa den skwala. Den man e pari a boto nanga ala makti.

Te Yesus e si disi, a e saka na bergi èn e waka tapu den skwala go na a sei fu a boto. Te a waka wan pisi fu feifi te siksi kilometer, a e kon na en disipel. Ma ai waka doro netleki a sa waka psa den. Te den e si en, den e bari taki: „Na wan takru sani!”

Yesus e trowstu den nanga den wortu: „Na mi; no frede.”

Ma Petrus e taki: „Masra efu a de yu, komanderi mi dan fu kon na yu abra na watra.”

„Kon!”, Yesus e piki.

Tapu dati Petrus e dyompo abra a boto èn e waka tapu a watra go na Yesus. Ma efu Petrus e luku a bigi winti, ai frede, èn efu ai bigin sungu, ai bari,: „Masra, yepi mi!”

Wantewante Yesus e langa en anu èn e grabu en hori, aladi ai taki: „Yu e abi pikin bribi, fu san-ede yu go degedege?”

Bakadi Petrus kren go baka ini a boto, makandra nanga Yesus, a winti e go didon èn den disipel e ferwondru, ma den ben musu ferwondru te yu luku en bun? Efu den ben ferstan „san den brede ben wani taki” fudi den ben abi wan yoisti ferstan ini a bigi wondru di Yesus ben du wantu yuru a fesi di a ben gi nyanyan na dusundusun sma nanga soso feifi brede nanga tu fisi dan den no ben a fu ferwondri so dati a ben kan waka abra watra èn ben kan komanderi a winti fu go didon. Ma now den disipel e gi Yesus grani èn den e taki: „Yu de trutru a Manpikin fu Gado.”

Syatu bakadati den e doro Genesareth, wan tumsi moi fatu lagi presi na Kapernaüm. Drape den e trowe den ankra fu a boto. Ma te den go a syoro, dan den sma e herken Yesus èn den e waka na heri kontren fu go teki den sma di e siki. Te den sma disi e tyari kon na tapu den bedi na Yesus èn e fasi soso nomo a franya fu en tapusei krosi, den e kon betre krinkrin.

A tra dei a ipi sma di ben de kotoigi fu na wondrufasi fu gi nyanyan na dusundusun sma e si dati Yesus gwe. Te pikin boto komoto fu Tiberias, den e go ini den boto èn e pari go na Kapernaüm fu suku Yesus. Te den feni en, den aksi: „Rabbi, oten yu kon dyaso?” A piki fu Yesus sa tyari furu sani kon a krin. Yohannes 6:14-25; Mattéus 14:22-36; Markus 6:45-56.

◆ San den sma wani du nanga Yesus bakadi a ben gi dusundusun sma fu nyan nanga yepi fu wan wondru?

◆ San Yesus e si komoto fu a bergi pe a ben hari go en wawan èn san a e du dan?

◆ Fu san-ede den disipel no ben a fu ferwondru fu den sani disi?

◆ San e pasa bakadi den ben doro na a syoro?