Yesus libi nanga diniwroko

Suma Yesus ben de te yu luku en bun?

TE A boto na ini san Yesus nanga en disipel sidon na ini e tapu na a lanpe fu Bethsaïda, dan den sma e tyari wan breni sma kon na en èn e begi en fu fasi a man èn fu dresi en. Yesus e teki a man na en anu èn e tyari en go na dorosei fu a dorpu, èn bakadi a ben spiti tapu en ai, a e aksi: „Yu e so wan sani?”

„Mi e si sma,” a man e piki, „bika mi e si sani di gersi bon, ma den e waka lontu.” Yesus e poti en anu na tapu den ai fu na man èn e meki den ai fu en kon bun, sodati a kan si bun. Dan Yesus e seni a man go na oso nanga na komando fu no go ini na dorpu.

Now Yesus e gwe nanga en disipel na a dorpu Cesaréa Filipi, te na a farawe noordsei fu Palestina. A de wan bun langa waka, sowan 50 kilometer, na den moi presi pe Cesaréa Filipi didon, tapu wan hei fu 350 meter moro hei leki na sewatra. Na waka e teki kande seiker wantu dei.

Na pasi Yesus e hari ensrefi go en wawan fu begi. Soso negi ofu tin mun libi ete fu go miti a dede fu en, èn a e broko en ede fu den disipel fu en. Furu sma no e waka moro na en baka, someni langa kaba. Trawan bruya èn mandi fudi a ben weigri fu du leki fa na pipel ben wani fu meki en tron kownu, èn fudi di en feanti ben tyalansi en, a no ben gi wan marki komoto fu hemel fu buweisi en kownuwroko. Suma en disipel e bribi now te yu luku en bun dati a de? Te den doro a presi pe Yesus ben e begi, a e aksi: „Suma den ipi sma e taki dati mi de?”

„Son sma e taki Yohannes a Dopuman,” den e peki, „trawan Elia, trawan baka Yeremia ofu wan fu den profeiti.” Iya, den e denki dati Yesus de wan fu den man disi èn dati a ben opobaka fu dede!

„Ma suma unu e taki dati mi de?” Yesus e aksi.

Wantron so Petrus e piki: „Yu de na Kristus, na Manpikin fu na libi Gado.”

Bakadi Yesus ben taki dati a piki fu Petrus ben bun, a e taki: „Ooktu mi e taigi yu: Yu na Petrus, èn a tapu na stonbergi disi mi sa bow mi gemeente, èn den portu fu Hades no sa wini en.” Dyaso fu na fositron Yesus e meki bekenti dati a sa bow wan gemeente èn dati srefi dede no sa hori den memre fu en ini strafu baka na getrow waka fu den na grontapu. Dan a e taigi Petrus: „Mi sa gi yu den sroto fu na kownukondre fu hemel.”

Na so Yesus e tyari kon a krin dati Petrus sa kisi spesrutu grani. Nono, Petrus no e kisi na fosi presi a mindri den apostel, èn ooktu a no e tron na fundamenti fu na gemeente. Yesus srefi de na stonbergi na tapu san na gemeente ben sa bow. Ma Perus sa kisi dri sroto, nanga san a sa opo na okasi gi difrenti sortu fu sma fu go ini na kownukondre fu hemel.

Petrus ben gebroiki na fosi sroto tapu a dei fu na pinksterfesa ini 33 G.T. di a ben meki kon na krin gi dyu di ben abi berow san den ben mu du fu kisi ferlusu. Na di fu tu sroto a ben gebroiki syatu na baka di a ben opo gi Samaritansma di ben e bribi na okasi fu kon na ini na kownukondre fu Gado. Dan a ben gebroiki na ini 36 G.T. na di fu dri sroto fudi a ben opo gi heiden di no ben besnij, Cornelius nanga en mati a srefi okasi.

Yesus e go doro nanga takmakandra fu en nanga en apostel. A e meki den mandi fudi ai ferteri den dati a sa pina heri esi na ini Yerusalem èn dati dede e wakti en. Petrus di no e ferstan dati Yesus sa wiki go kisi hemel libi, e teki Yesus go na wan sei. „De bun gi yusrefi, Masra,” a e taki. „A sani disi no sa miti yu kwetkweti.” Yesus e drai ensrefi èn e piki: „Go a mi baka, Satan! Yu de wan ston fu nakifutu gi mi, bika yu no e denki den prakseri fu Gado, ma di fu den libisma.”

A de krin dati tra sma leki den apostel e rèis makandra nanga Yesus, sobun a e kari den now fu tyari kon a krin dati a no de wan eenvoudig zaak fu de wan bakaman fu en. „Efu wan sma wani waka kon na mi baka,” na so a e taki, „dan a no mu ke fu ensrefi èn mu teki en pina-udu èn mu waka alaten na mi baka. Bika a sma di wani ferlusu en sili, sa lasi en ma a sma di e lasi en sili fu mi ede èn fu na bun nyunsu ede, sa feni en.”

Iya, den bakaman fu Yesus sa ben musu fu de nanga dekati èn ben offer densrefi fu ben sori dati den ben warti na bunati fu en, Soleki a e taki: „Bika a sma di ini na sutadu èn sondu geslagti disi syen gi mi èn gi den wortu fu mi, gi en na Manpikin fu libisma sa syen ooktu te a sa kon ini na glori fu en Tata nanga den santa engel.” Markus 8:22-38; Mattéus 16:13-28; Lukas 9:18-27.

◆ Fu san-ede Yesus e broko-ede fu en disipel?

◆ Sortu difrenti prakseri den sma ben abi fu na aksi suma Yesus de?

◆ Sortu sroto Petrus ben kisi èn fa a ben gebroiki den?

◆ Sortu pirai Petrus ben kisi èn fu san-ede?