Jezus libi nanga diniwroko
Jezus e strafoe den Fariséman
EFOE den ogri-jeje e trowe go a doro nanga a makti foe Satan, so Jezus e taki, dan Satan de kontrari ensrefi. „Ofoe meki a bon boen dan den froktoe boen”, na so Jezus e go morofara, „ofoe meki a bon wan pori wan dan de froktoe wan poriwan; bika a den froktoe joe sa sabi a bon.”
A de wan law sani foe meki sma jere a kragi dati sowan boen froktoe leki a poeroe foe ogri-jeje ben sa de a bakapisi dati Jezus e dini Satan. Efoe a froktoe de boen, dan a bon no kan de wan poriwan. Den pori froktoe di den Fariséman e meki èn di de na ini den kragi nanga gens de a bewijsi dati densrefi de pori sma. „Sneki pikin,” Jezus e bar taki, „fa oenoe kan taki boen sani te oenoe de godelowsoe? Bika san foeroe na ati psa marki na dati na mofo e taki.”
Foedi den wortoe foe wi de wan spikri foe na ati-toestand foe wi, meki san wi e taki de wan fundamenti. „Mi e taigi oenoe,” Jezus e taki „dati den sma sa gi frantwortoe tapoe na kroetoedé foe ibri soso wortoe di den e taki, bika akroederi joe wortoe den sa ferklari joe regtvaardiki èn akroederi joe wortoe den sa kroetoe joe.”
Aladi Jezus doe ala den kraktiwroko disi, tokoe den meester foe wet nanga Fariséman e aksi: „Leriman, wi wani si wan marki foe joe.” Aladi den sma disi di ben komoto foe Jerusalem kande no ben si Jezus wondroe persoonlijk, tokoe aikotoigi ben ferteri disi tapoe wan fasi di no kan dati a no de so. Foe dat’ede Jezus ben taigi den djoe tiriman: „Wan godelowsoe èn soetadoe geslagti e tan soekoe wan marki, ma a no sa kisi nowan leki na marki foe Jona.”
Te Jezus e tjari kon a krin san ai bedoel, ai taki morofara: „Netleki Jona ben de dri dé nanga dri neti na ini na bere foe na boen bigi fisi, na so na Manpikin foe Libisma sa de dri dé nanga dri neti na ini na ati foe grontapoe.” Bakadi na bigi fisi ben swari Jona, a ben kon a doro leki a ben opo komoto foe dede, èn foe dat’ede Jezus ben taki afesi dati a sa dede èn tapoe a di foe dri dé sa opo kon libi baka. Tokoe den djoe tiriman e trowe „na marki foe Jona”, srefi aladi Jezus bakaten foe troe komoto foe dede.
Foe dat’ede Jezus e taki dati den man foe Ninivé, di ben abi berow tapoe a préki foe Jona, sa opo kon ini na kroetoe foe kroetoe den djoe di ben trowe Jezus. Ini asrefi fasi den e taki foe nasrefi ondrofeni foe na koningin foe Scheba di ben komoto na den kaba foe gronatpoe foe jere na koni foe Salomo èn di ben ferwondroe foe san a ben si èn jere. „Ma loekoe!”, Jezus e taki, „moro leki Salomo de dja.”
Jezus e gi morofara na agersitori foe wan man foe soema wan ogri-jeje e komoto a tapoe en. Ma na man no e foeroe na légi presi nanga boen sani èn nanga dati meki sébi tra moro ogri-jeje e kon tapoe en di de moro godelowsoe. „A so a go ooktoe nanga na godelowsoe geslakti disi,” Jezus e taki. Na Israël natie ben kon krin èn ben ondrofeni kenki, soleki na gwe foe wan pisten foe wan jeje di no krin. Ma dati na natie alaten ben trowe den proféti foe Gado, nanga leki hémarki na gens kontrari Kristus srefi, e tjari kon afesi dati a godelowsoe toestand foe en now de moro ogri leki na ini a bigin.
Aladi Jezus e taki, dan en mama nanga en brada e kon èn e moksi densrefi na a ipi sma. Wan sma e taigi en now: „Loekoe! Joe mama nanga joe brada tanapoe na dorosé èn e proeberi foe taki nanga joe.”
„Soema na mi mama èn soema na mi brada”, Jezus e aksi. Te ai langa en anoe go na en disipel, ai taki: „Loekoe! mi mama èn mi brada! Bika ala sma di e doe a wani foe mi Tata, di de na hemel en dati de mi brada èn mi sisa èn mi mama.” Nanga disi Jezus e sori dati o diri den banti de ooktoe di e tai en nanga en famiriman, en matifasi nanga en discipel de moro diri. Mattéus 12:33-50; Markus 3:31-35; Lukas 8:19-21.
◆ Fa den Fariséman ben misi foe meki na bon èn na froktoe kon de boen?
◆ San ben de „na marki foe Jona”, èn fa den ben trowe en?
◆ Fa na natie Israël ben de leki a man foe soema wan ogri-jeje ben komoto na tapoe en?
◆ Fa Jezus ben meki kon boen a fesi na ini sortoe krosbé matifasi a ben de nanga en discipel?