Kolokoe den sma de di e gebroiki makti tapoe wan joisti fasi!
„Jehovah no de esesi foe kisi atibron èn bigi ini krakti [ofoe makti], a de, èn Jehovah kwetkweti no sa libi sani sondro foe gi strafoe.” — NAHUM 1:3.
1. Foe san-ede wan sma di abi makti ofoe di abi bepaalde koni no abi réde foe meki bigi?
BOEN FOEROE fasi foe makti de di sma di abi ferstan kan gebroiki tapoe wan joisti fasi. Foe na natuurleke koni di wi kisi ofoe foe omstandigheid meki wi abi kande wan ofoe tra spesroetoe fasi foe makti ofoe bepaalde talenti. Ma disi de wan réde foe meki bigi? Kwetkweti. San wi e lési na ini Jeremia 9:23? „Na koniwan no moe meki bigi foe en koni èn a trangawan no moe meki bigi foe en tranga. Na goedoewan no moe meki bigi foe en goedoe.” Foe san-ede? Na ini 1 Korinte 4:7 na apostel Pauluse gi wan boen piki: „Soema e meki joe kenki foe wan trawan? Ija, san joe abi di joe no ben kisi? Efoe now joe ben kisi en troetroe, foe san-ede, joe e meki bigi dan netleki joe no ben kisi en?”
2. Foe san-ede wi moe loekoe boen, te a e go foe a gebroiki foe makti?
2 Foe san-ede wi moe loekoe boen dati wi no gebroiki a tapoe wan fowtoe fasi na makti di wi abi ofoe den koni di kande wi sa abi? Foe di „na firi foe sma ati . . . de takroe foe en jongoe jari kaba” (Genesis 8:21). Foedi wi alamala abi a firi disi, di wi ben kisi, foe lobi wisrefi nomo, meki wi moe loekoe boen alaten srefsrefi dati wi gebroiki wi makti ofoe den koni foe wi tapoe wan joisti fasi. Wan poëmaman ben tjari wan dé na prakseri disi kon na fesi: „Wan goedoe no de ofoe a e trowe wan skaduw foe sorgoe di e gi frede. Makti no de ofoe wan trapoe de di kibri na ini wan fini fasi.” Ija, foe na onvolmaakti fasi di wi ben kisi meki alaten na firi de foe gebroiki makti tapoe wan fasi pe wi e prakseri wisrefi now.
Jehovah — a de makti ma ooktoe koni èn regtvaardiki
3. Ferteri foe a makti di Jehovah abi?
3 Nowan tra sma moro, leki Jehovah, na Mekiman, e gi wi wan toemsi moi, ija volmaakti eksempre na ini na gebroiki foe makti. A no e fetfeti èn no e kisi atibron esesi, srefi te a de fanowdoe dati a gebroiki en makti tapoe wan sma ofoe wan sani (Nahum 1:3). Nowan sma abi moro bigi makti leki Gado èn foe dat’ede wi e kari en na Almaktiwan. Nanga leti ai gebroiki na titel „Almaktiwan” gi ensrefi (Genesis 17:1). A no abi wawan sma di dorodoro na a fasi dati kan abi krakti di no skotoe, ma ooktoe foe di a abi ala makti na ini en positsi leki Soeverein Masra foe na universum di a ben meki. Foe datmeki nowan sma kan prefoeroe ’foe ori en anoe ofoe kan taki gi en: „San joe e doe?”’ — Daniël 4:35.
4. Foe san-ede a de wan koni sani foe frede Jehovah?
4 Foedi Jehovah Gado de almakti, meki a e sori koni dati wi frede foe meki a no firi boen. Ija, „na frede foe Jehovah de a bigin foe koni, èn a sabi foe na Moro santawan, na dati na ferstan” (Odo 9:10). Paulus e warskow wi foe no meki Jehovah Gado djaroesoe foedi wi e teki prati na wan ofoe tra fasi foe anbegi kroektoe gado, bika „wi de moro tranga leki en sonten?” Kwetkweti! (1 Korinte 10:22) Tokoe ala sma di foe espresi e psa den regtvaardiki gebod foe Gado e doe netleki den de tranga moro Jehovah! Den wortoe foe Paulus moro fara e poti krakti na tapoe a punt disi: „Na Gado foe wi de ooktoe wan faja di e njan ala sani.” — Hebrewsma 12:29.
5. Foe-san-ede a de so dati foe di Jehovah de almakti disi no moe foeroe wi nanga wan frede di e meki wi siki?
5 Den troe tori disi ben sa kan foeroe wi nanga wan frede ofoe ongosontoe skrek’ati, efoe Jehovah almakti krakti no ben de krinkrin ini balans nanga en dri tra moro prenspari égifasi: koni, geregtigheid nanga lobi. Efoe ai gebroiki en makti tapoe wan sani ofoe wan sma, dan ai doe disi alaten tapoe wan fasi di de ini wanfasi ofoe ini akroederi nanga den égifasi disi. Na froedoe foe Noach ten ben de foe eksempre wan troetroe sori foe Jehovah makti. Ma na fasi fa Jehovah ben gebroiki en makti ben de onregtvaardiki ofoe sondro lobi? Kwetkweti! Na libismafamiri e pori en pasi na so wan fasi dati Gado ben mandi ini en ati foe san a ben si (Genesis 6:5-11). Foe di den goddelowsoesma foe bifo na Froedoe ben gebroiki den blesi foe Gado tapoe wan fowtoe fasi, meki nanga leti a ben opo doe wan sani di a ben krin a grontapoe foe den spesroetoe foe di den no ben poti prakseri na tapoe na warskow foe na „prékiman foe regtvaardikifasi”, Noach. — 2 Petrus 2:5.
6. San e kon na krin foe na fasi fa Jehovah ben handri nanga Sodom èn Gomorra?
6 Di den sma foe Sodom nanga Gomorra ben sori dati den ben de sondari di ben pori srefsrefi, foedi den ben gebroiki den blesi di den ben kisi foe Jehovah leki memre foe a libismafamiri tapoe wan fowtoefasi, meki a ben gi na komando dati den sma ben moesoe kisi pori. Foedi a ben hori en mati Abraham na ini prakseri meki Jehovah ben ferter na a bribi man dati en prakseri di a ben abi nanga Sodom nanga Gomorra. Abraham ben gersi taki a ben denki dati disi ben de wan serjoesoe gebroiki foe makti na tapoe wan fowtoe fasi èn foe dat’ede ben aksi Jehovah: „Na Kroetoeman foe na heri grontapoe no sa doe reti?” Ma Abraham ben si disi na wan fowtoefasi. Te foe kaba a ben moesoe piki dati a bosroiti foe Jehovah ben de troetroe regtvaardiki bika joe no ben kan feni ete, tin regtvaardiki sili ini den toe foto. Séker e kon nanga disi na krin o soifri Jehovah e loekoe a tapoe dati a e gebroiki en makti tapoe wan regtvaardikifasi. — Genesis 18:17-33; Jesaja 41:8.
7. Foe san-ede Farao ben ferdini dati Jehovah ben gebroiki en makti tége en?
7 Bakaten, di a ten ben kon foe fri den Israëlsma foe na onregtvaardiki katibo foe Egypte, Jehovah ben gi Farao na okasi foe wroko nanga en makandra. Disi no ben sa tjari wan takroe bakapisi kon gi Farao nanga en pipel ma a tiriman dati ben wégri nanga wan bigimemre èn tranga-ede fasi foe doe leki fa Jehovah ben aksi. Foe dat’ede meki Jehovah ben meki tin plaag kon tapoe Egypte pe a ben sori Farao na wan demonstratie foe en makti baka na trawan (Exodus 9:16). Bakadi Farao ben meki den Israëlsma go, a ben tan nanga wan tranga-ede fasi foe tjalansi Jehovah foe di a ben hari go na baka den Israëlsma. Foe dat’ede nanga reti Jehovah ben gebroiki en bigi krakti foe pori Farao nanga en sroedatimakti na ini na Redi Se (Psalm 136:15). Meki wi poti disi a fesi, dati na ini ibri aparti geval Jehovah ben gebroiki ooktoe en makti foe kibri en getrow dienstknegti: Noach nanga en osofamiri, Lot nanga en toe oemapikin, èn na naatsi Israël. — Genesis 19:16.
8. Foe sortoe boen rède Jehovah ben opo doe sani tege Sanherib tapoe a fasi fa bijbel skrifi foe dati?
8 Hondrohondro jari na baka na ini a ten foe kownoe Hizkia, Jehovah Gado ben sori en bigi makti tapoe wan toemsi aparti èn regtvaardikifasi di na Assyria kownoe Sanherib ben tapoe skreki gi Jeruzalem. Jehovah pipel, na ondro na tiri foe na loyaal kownoe Hizkia di ben frede Gado ben begi en foe kisi jepi. Den ben dini en getrow èn foe dat’ede Gado ben opo doe wan sani foe a boen foe den. Na boskopoeman foe kownoe Sanherib na a tra sé ben gafa taki: ’No arki na Hizkia, no meki a kori oenoe nanga a pramisi dati Jehovah sa fri oenoe. Den gado foe den tra naatsi ben kan ferloesoe den pipel poeroe foe na anoe foe Sanherib. Nowan foe den gado disi ben man foe doe disi, foe san-ede oenoe e denki dan dati Jehovah sa fri oenoe?’ (Jesaja 36:13-20) Foe na bigitaki disi meki Gado ben moesoe gebroiki eenvoudig en bigi makti, nanga leki bakapisi dati 185.000 sroedati ben fadon na ini wán neti leki boewijsi dati troetroe wan difrenti ben de a mindri den gado foe den naatsi nanga Jehovah.
9. Sortoe tra eksempre wi kan kari di e sori dati Jehovah e loekoe soifri tapoe a fasi fa a e gebroiki en makti?
9 Loekoe pikinso ete wan pisi foe foeroe eksempre di ben sa kan gi. Di Jehovah ben naki Mirjam nanga gwasi, dan disi ben de wan volmaakti regtvaardki èn koni sori foe en makti. Mirjam ben ferdini sowan sortoe strafoe foedi a ben taki so asranti nanga en brada Mozes, di Gado ben poti foe doe wroko (Numeri 12:1-15). Na so ooktoe di kownoe Uzzia sondro foe sjen ben psa go na ini na tempel santapresi ben teki na reti ini anoe foe offer switismeri tapoe na gowtoe-altari èn ben wégri nanga wan bigimemrefasi foe den levietpriester ben tjari en kon tapoe tra prakseri. Jehovah e sori en makti foe di nanga reti a ben naki a kownoe nanga gwasi (2 Kronieken 26:16-21). A no ala den sondoe foe den ben de na srefi bigi èn soboen Jehovah ben strafoe den no alaten na srefi hebi: Na gwasi foe Mirjam ben de foe wan pisten, ma Uzzia dede leki wan gwasiman. Na so fasi wi kan si dati Jehovah alaten e loekoe soifri a tapoe dati en makti e gebroiki tapoe wan koni èn regtvaardikifasi, sodati a kan kibri den getrow-wan di lobi en èn sa pori den godelowsoewan.
Na eksempre foe Jezus Kristus
10, 11. Foe sortoe sani di psa e kon a krin dati Jezus ben e broko en ede foe gebroiki makti tapes wan joisti fasi?
10 Ini a tori foe a gebroiki foe makti a Manpikin foe Gado ben de troetroe wan sma di ben waka na baka en Tata tapoe wan toemsi boen fasi. Wan foe den fosi sani di psa di ben sori dati, de di Satan ben stré nanga en foe a skin foe Mozes. Na Logos makriki ben kan piri ai tranga gi Satan, ma presi foe dati na Logos, te joe loekoe en boen ben naki wan stap go na baka foe meki na strafoe foe Jehovah Gado srefi kon. — Judas 8, 9.
11 Na fosi tesi di Satan ben tjari kon na Jezus na ini na sabana, ben abi foe doe nanga na afersi foe na gebroiki foe makti. Satan ben wani kori Jezus foe a gebroiki en makti di no ben de foe wan libisma nanga wan fasi di a ben prakseri ensrefi nomo foe meki ston kon tron njanjan. Disi ben de wan kefarlek bigi tesi bika Jezus no ben njan fotenti dé èn a ben „kisi angri”. Na fasi fa Satan ben tjari na tesi disi kon kaba ben abi leki marki foe kisi Jezus foe waka na baka wan libifasi pe a ben prakseri ensrefi nomo, bika a ben bigin na a fasi disi: „Efoe joe de wan manpikin foe Gado, taki dan gi den ston disi dati den tron brede.” A no de foe taki dati a ben howpoe dati Jezus ben sa piki: „Ma natuurlek mi de wan manpikin foe Gado, èn foe boewijsi disi mi sa kenki den ston disi kon ini brede.” Ma na presi a meki den kori en ofoe fadon ini a trapoe foe handri tapoe wan fasi pe a ben prakseri ensrefi nomo, meki Jezus piki: „Boekoe taki libisma no sa libi wawan foe brede ma foe ibri taki di komoto foe Jehovah mofo” (Mattéus 4:1-4). A ben poti a sani disi di ben wani taki dati degedege ben de ofoe a ben de wan pikin foe Gado a wan sé, èn a ben wégri foe gebroiki na makti di Gado ben gi en tapoe wan fowtoe fasi.
12. Fa Jezus ben sori bakaten ooktoe dati a no ben e feti foe abi makti?
12 Bakaten, bakadi Jezus Kristus ben gi njanjan na féfi doesoen man èn ooktoe ete foeroe oema nanga pikin, den djoe ben wani meki en tron kownoe. Efoe a ben teki a pristeri foe den, dan disi ben sa wani taki a gebroiki tapoe wan fowtoe fasi foe na makti di a ben abi foe abi makti tapoe sma nanga jepi foe en wondroe. A ben sabi dati a ben moe kibri en neutraliteit na ini a tori foe grontapoe politiek èn ben moe wakti te leki Jehovah ben sa gi en na kownoewroko (Johannes 6:1-15). Bakaten moro, di na lagi pipel ben kon foe kisi en, a ben kan kari na jepi foe twarfoe legioen engel èn nanga dati a ben kan meki a psa dati den no ben kisi en. Ma dati ben sa de wan fowtoe gebroiki foe makti bika a ben de a wani foe en Tata dati a ben sa saka ensrefi. — Mattéus 26:39, 53.
Tra sma di no ben meki wan fowtoe gebroiki foe makti
13, 14. Sortoe toemsi moi eksempre Gideon ben gi, pe e sori dati a no ben e feti foe abi makti? (b) Fa Saul ben gi na a bigin foe en kownoewroko wan boen eksempre?
13 A mindri den onvolmaakti libisma di ben kakafoetoe foe na tesi foe gebroiki makti na wan fowtoe fasi, wi moe kari a nen foe kroetoeman Gideon. Bakadi a ben fri Israël poeroe foe na anoe foe Midian, a pipel ben wani meki en tron kownoe. Gideon ben wégri èn a ben taki nanga leti: „Misrefi no sa tiri tapoe oenoe, èn ooktoe mi manpikin no sa tiri tapoe oenoe . . . Jehovah sa tiri tapoe oenoe.” Ma a ben sori ete dati a ben de nanga bescheidenfasi leki te na a bigin foe a waka nanga libi foe en leki kroetoeman. Èn a piki foe Gideon ben sori na égi denki foe Jehovah ini a tori foe na libisma kownoewroko tapoe Israël. Foe na piki di Jehovah ben gi na Israël di den ben aksi na ini a ten foe na proféti Samuël foe wan kownoe, wi kan sabi fa a e denki foe dati. — Kroetoeman 8:23; 6:12-16; 1 Samuël 8:7.
14 Di tokoe ete den ben teki poti wan kownoe, dan Saul na ini a bigin ben gi wan toemsi moi eksempre na ini a tori foe a dwengi foe joesrefi na ini a gebroiki foe makti. Wantoe boen-foe-noti man ben taki: „’Fa a wan disi sa ferloesoe wi?’ Foe dat’ede den ben ferakti en . . . ma a ben tan leki wan sma di ben babaw.” Now di a ben kisi kownoemakti a ben kan handri wantewante ma a no ben doe dati. Ooktoe di Saul ben kisi na wini na tapoe den Ammonietsma dan wantoe foe den sma di ben de na en ondro ben prakseri dati disi ben de wan boen momenti foe teki refensi tapoe den sma di ben ferakti Saul. Foe dat’ede den ben taigi en: „Soema e taki: ’Saul — a sa de kownoe tapoe wi?’ Tjari den man dati kon dja, sodati wi kan kiri den.” Ma Saul no ben denki so kwetkweti. A ben gi piki: „Tapoe a dé disi nowan man no moe kiri, bika tide Jehovah ben tjari ferloesoe kon gi Israël.” Wi kan si dati Saul troetroe ben bigin boen èn abi wan bescheidenfasi (1 Samuël 9:21; 10:20-23, 27; 11:12, 13). Fa a de wan sari sani dati a ben bigin gebroiki tapoe wan fowtoe fasi en kownoemakti èn foe dat’ede a ben waka takroe nanga en! — 1 Samuël 28:6; 31:3-6.
15, 16. (a) Sortoe kotoigi kroetoeman Samuël ben kan gi ini a tori foe na fasi fa a ben gebroiki en makti foe hori kroetoe? (b) Sortoe srefi eksempre kownoe David ben gi?
15 Samuël, a proféti di ben de ooktoe kroetoeman na ini Israël, ben gi wantoe moi eksempre. Foe sensi en jongoe jari Gado ben gebroiki en srefsrefi. Samuël ben hori kroetoe na wan regtvaardikifasi tapoe en pipel èn ben meki fri kon gi en. A ben gebroiki en positsi tapoe wan fowtoe fasi gi wan wini foe ensrefi? Kwetkweti! Ini en adjosi wortoe na a pipel a ben taki: „Loekoe, mi ben arki na oen sten na ini ala san san oenoe ben taigi mi dati mi ben moe meki wan kownoe tiria tapoe oenoe. . . . Dja mi de. Kotoigi tege mi na fesi foe Jehovah èn na fesi foe en salfoewan. Na kaw foe soema mi ben teki ofoe na boeriki foe soema mi ben teki ofoe soema mi ben bedrigi ofoe soema mi ben kwinsi ofoe foe na anoe foe soema mi ben teki wan moni foe tapoe mi mofo foe tapoe mi ai nanga dati?” A pipel foe en ben moe piki dati Samuël waka nanga libi ini ala den afersi disi ben de sondro fowtoe. A no ben gebroiki tapoe wan fowtoe fasi en makti ini en positsi leki kroetoeman. — 1 Samuël 12:1-5.
16 Ooktoe wi no moe loekoe psa na toemsi moi eksempre di David ben gi. Toetron a ben abi Saul na ini en makti èn a ben kan kiri en. David ben kan tak-go-tak-kon: ’Saul wani kiri mi soboen a e go foe en libi ofoe di foe mi.’ Ofoe tapoe wan fasi pe a ben prakseri ensrefi nomo a ben kan tak-go-tak-kon: ’Foe di Samuël ben salfoe mi leki a kownoe di boo kon a tapoe Israël, dan disi te foe kaba ben moesoe kon de so. Foe san-ede dati no kan de dan now?’ Nono, David ben e wakti nanga pasensi te leki a ben de Jehovah ten foe gi en na kownoekondre (1 Samuël 24:1-22; 26:1-25). Ma a wan sari sani foe moe taki dati David, baka di a ben tron kownoe, na toe okasi ben gebroiki en makti tapoe wan fowtoe fasi: di a ben meki Uria dede èn di a ben teri na legre foe Israël. — 2 Samuël 11:15; 24:2-4, 12-14.
17. Fa Paulus ben sori dati a no ben abi noiti bigi ai èn dati a no ben e meki tapoe wan fowtoe-fasi gebroiki foe en makti?
17 A mindri den bakaman foe Jezus Kristus na apostel Paulus ben gi na ini a tori disi wan toemsi moi eksempre. A ben kan eis jepi foe den gemeente di a ben e dini. Ma a no ben e meki wan fowtoe gebroiki foe en makti. Gi den owroeman foe Efese a ben taki: „Mi no ben angri foe nowan sma solfroe ofoe gowtoe ofoe krosi. Oenoe sabi srefi dati den anoe disi ben sorgoe foe mi égi fanowdoe èn ini di foe den di ben de na mi” (Tori foe den Apostel 20:33, 34). Di na apostel ben skrifi gi na gemeente na Korinte, a ben taki tapoe na punt disi tapoe wan moro krakti fasi ete (1 Korinte 9:1-18). A ben abi a makti foe ben poti grontapoe wroko a wansé, bika soema e dini leki sroedati tapoe en égi kostoe? Mozes no ben taki foe no tai a mofo foe wan kaw di e masi alési? „Ma”, so Paulus e bodoi, „mi no ben meki gebroiki foe nowan foe den seti disi.” San ben de den paiman? „Dati mi, aladi mi e meki a boen njoensoe bekenti, mag gi a boen njoensoe sondro kostoe, foe no meki tapoe wan fowtoe fasi gebroiki foe wi makti na ini a boen njoensoe.”
18. (a) Fa wi moe denki foe na toemsi moifasi fa Jehovah e gebroiki en makti? (b) Foe san-ede wi kan taki foe den sma di ini na pistori disi e waka na baka en dati den de kolokoe?
18 Wi kan taki troetroe: ’Kolokoe den sma de di no e gebroiki den makti a tapoe wan fowtoe-fasi.’ Fa Jehovah Gado abi wan toemsi boen nen foe di a ben gi sowan toemsi moi eksempre èn e meki en almakti krakti de alaten ini balans nanga en tra égifasi, en koni, retidoe nanga lobi! Nanga na psalmsingiman David wi kan taki foe dat’ede: „Blesi Jehovah o mi sili, ija, ala san de ini mi, en santa nen” (Psalm 103:1). Alasma di e waka na baka na eksempre foe Jehovah na ini a joisti gebroiki foe makti, de foe troe kolokoe. Den eksempre di wi ben loekoe foe na bijbel, e bewijsi foe dat’ede ooktoe, aladi wi de onvolmaakti libisma, dati wi kan gebroiki na makti di wi abi tapoe wan joisti fasi. Te wi e doe disi, dan wi no sa abi wawan wan soifri konsensi ma e kisi ooktoe na boenati foe Gado èn kompe-libisma e respeki wi.
Joe kan memre san e kon now?
◻ Foe san-ede rai na ini a tori foe gebroiki makti na tapoe wan fowtoe fasi de fanowdoe?
◻ Foe sortoe eksempre e kon na krin dati Jehovah Gado e gebroiki makti na tapoe wan joisti fasi?
◻ Foe san-ede wi kan taki dati Jezus ben loekoe soifri a tapoe foe no gebroiki en makti na tapoe wan fowtoe fasi?
◻ Sortoe sma di nen kari na ini den Hebrew Boekoe ben sori dati den no ben gebroiki makti na tapoe wan fowtoe fasi?
◻ Fa na apostel Paulus ben sori taki a ben de wan boen eksempre na ini a tori foe a gebroiki foe makti?
[Prenspari pisi na tapoe bladzijde 2]
Lobi Makti Geregtigheid Koni
[Prenki na tapoe bladzijde 3]
Nanga reti Gado ben sori en makti:
ini a Froedoe
na Sodom èn Gomorra
na a Redi Se