Yeyses libi nanga diniwroko

Leri di e go fu brokotrow nanga na lobi di sma musu lobi pikin-nengre

YEYSES nanga den disipri de na pasi e go na Yerusalen na ini 33 G.T. fu nyan drape na Paska. Den e koti na Yordanliba abra èn e teki na pasi psa na distrikt Pereya. Yeyses ben de wan tu wiki a fesi kba so srefi tu na ini Pereya, ma na a ten dati den ben kari en kon na Yudeya fu di en mati Lasarus ben siki. Drape na ini Pereya Yeyses ben taki nanga den Fariseyman fu na tori fu brokotrow, èn now den e tyari na afersi agen kon tapu taliment.

A mindri den Fariseyman difrenti denki de fu a brokotrow. Moses ben taki taki wan sma ben kan meki den prati en nanga wan uma fu „wan sani ede di no fiti fu a sey fu na uma”. Son sma e bribi taki taki disi abi temake soso nanga a tori fu wan libi di no krin. Ma tra sma abi na denki taki „wan sani di no fiti” abi temake so srefi tu nanga kofarleki pikin sondu. So bun nanga na prakseri fu tesi Yeyses, meki den Fariseyman e aksi Yeyses: „Wan man abi pasi fu den prati en nanga en uma tapu ibri sortu gron?” Den abi na overtoygi taki san Yeyses o taki tu, a sa tyari en kon na ini problema nanga Fariseyman di abi wan tra denki.

Tapu wan meystri fasi Yeyses e handri na afersi fu di a no e kobroyki na wan ofu tra libisma denki ma e poti prakseri tapu na prakseri di ben de bigin bigin fu na trowlibi. „Unu no ben leysi?”, na so a e aksi, „taki en di ben meki den bigin bigin ben meki den leki man èn leki uma èn ben taki: ’Fu dati-ede meki wan man sa gwe libi en ppa nanga mma èn tay hori na en uma, èn den tu sa de wán skin’? So bun, den no de moro langa tu, ma wán skin. San Gado tyari fu dati-ede kon na ondro wán ttyari, no wan sma musu prati.”

Na prakseri fu Gado bigin bigin, na so Yeyses e sori, de taki trowpatna musu taki kotrow na makandra èn no musu pruberi fu kisi brokotrow. Efu dati de so, na so den Fariseyman taki: „Fu san-ede Moses ben taki fu gi en wan papira taki den seni en gwe èn fu prati nanga en?”

„Moses ben gi unu pasi fu na trangafasi fu unu ati ede taki unu kan meki den prati unu nanga unu uma,” Yeyses e piki, „ma disi no ben de so bigin bigin.” Iya, di Gado ben poti na ini a dyari fu Eden na soyfri markitiki gi na trowlibi, a no ben meki wan seti fu brokotrow.

Moro fara Yeyses e taygi den Fariseyman: „Mi e taygi unu taki ala sma di meki den prati en nanga en uma, boyti tapu na gron fu hurudu [Griki tongo: por·neiʹa], èn e trow wan trawan e du sutadu.” A e sori nanga disi taki por·neiʹa san wani taki bigi seks hurudu, de na wan enkri gron di Gado e feni bun fu wan brokotrow.

Nanga a prakseri taki a trowlibi musu de wan kruderi di e tan, nanga soso na gron disi fu brokotrow, e meki den disipri e taki: „Efu a de gi wan man nanga en uma na a fasi disi, dan moro bun fu na trow.” A no de fu taki taki wan sma di e wegi-go-wegi-kon fu trow, muru frustan seyker seyker na tan di na trowbanti musu tan!

Yeyses e taki now fu na fasi fu de sondro fu trow. A e tyari kon na krin taki son boy koboru leki euniki èn no man fu trow fu di a manpresi fu den fu kan meki pikin no ben gro kon de wan sani. Trawan, na libisma meki den tron euniki fu di tapu wan ogri-atifasi den ben puru den manpresi. Èn te fu kba son sma e dwengi na lostu fu trow èn fu prisiri den srefi na ini seksdemakandra, so taki den kan gi den srefi krin krin na afersi di abi temake nanga na kownukondre fu heymel. „A sma di kan meki presi gi en [gi na fasi fu de sondro fu trow], meki a meki presi gi dati”, no so Yeyses e bosroyti.

Now den sma e bigin tyari den yongu pikin fu den kon na Yeyses. Ma den disipri e piri-ay gi den pikin èn e pruberi fu seni den gwe, èn a no de fu taki fu di den wani kibri Yeyses gi stress di no de fanowdu. Ma Yeyses e taki: „Meki den yongu pikin kon na mi; no pruberi fu tapu den, bika den di de leki den, abi na kownukondre fu Gado. Fu tru, mi e taygi unu: A sma di no e teki na kownukondre fu Gado leki wan yongu pikin, kweti kweti no sa go na ini.”

Fa Yeyses e gi dyaso tumusi moy leri! Fu kan go na ini Gado kownukondre, dan wi musu abi na sakafasi nanga na fasi fu a gridi fu leri sani neleki yongu pikin. Ma na eksenpre fu Yeyses e sori wi so srefi tu o prenspari a de taki ppa nanga mma spesrutu e psa ten nanga den pikin fu den. Yeyses e meki wi si now omeni a lobi pikin-nengre fu di a e teki den na ini en anu èn e blesi den. Mateyus 19:1-15; Deuteronomium 24:1; Lukas 16:18; Markus 10:1-16; Lukas 18:15-17.

◆ Sortu difrenti denki den Fariseyman abi fu brokotrow, èn fa den e pruberi fu tesi Yeyses fu dati-ede?

◆ Fa Yeyses e du tapu a muyti fu den Fariseyman fu tesi en, èn san a e kari leki na wan enkri gron fu brokotrow?

◆ Fu san-ede Yeyses disipri e taki taki a no de wan frustandiki sani fu trow, èn sortu ray Yeyses e gi?

◆ San Yeyses e leri wi nanga a demakandra fu en nanga yongu pikin?