Yeyses libi nanga diniwroko

Den disipri e taki-go-taki-kon nanga makandra te na dede fu Yeyses e kon krosibey

YEYSES nanga en disipri de krosibey fu na Yordan pe den e koti abra komoto fu na distrikt Pereya go na Yudeya. Furu tra sma e waka nanga den go na a Pascha-fesa fu 33 G.T., di sa hori, kon wi taki baka wan wiki.

Yeyses e waka na fesi den disipri, èn den e fruwondru fu na deki-ati bosroyti di a teki. Prakseri pikinso taki Thomas wan tu wiki a fesi di Lasarus ben dede èn Yeyses ben de so fara fu komoto fu Pereya go na Yudeya, ben gi den trawan deki-ati: „Meki wi go tu fu dede nanga en.” Prakseri tu taki na Sanhedrin ben bigin meki plan fu kiri Yeyses, baka di Yeyses ben wiki Lasarus opo. A no wan fruwondru sani taki den disipri de nanga frede te den e kon now baka na ini Yudeya.

Fu sreka den a fesi tapu san e wakti den, meki Yeyses e teki den twarfu apostru na wan sey èn e fruteri den: „Wi e hari go now no Yerusalen, èn den sa gi na Manpikin fu libisma abra na den granpristri èn den sabiman fu wèt. Èn den sa krutu en taki a musu dede èn gi en abra na sma fu den nâsi èn den sa spotu en èn spiti tapu en èn krawasi en èn kiri en. Ma dri dey na baka a sa opo baka.”

Disi na a di fu dri tron ini den lasti mun taki Yeyses ben fruteri en disipri fu na dede nanga na opobaka fu en. Èn aladi den e arki en, toku san disi wani taki e psa na den frustan. Kande disi ben kon fu di den e bribi taki a kownukondre fu Israèl sa kon baka na grontapu èn den e luku go a fesi na ini wan grontapu kownukondre nanga Krestes fu kisi glori nanga grani.

A mindri den sma di e waka go na Yerusalen fu nyan na Pascha, yu abi Salome, na mma fu den apostru Yakobus nanga Yohanes. Yeyses ben kari den man disi „manpikin fu na dondru”, sondro degedege dati ben de fu na atibron karakter fu den. Den tu disi wan heri pisiten kba abi na ambisi fu kisi wan prenspari presi na ini Krestes kownukondre èn den fruteri den mma fu dati. A mma now e go na Yeyses fu a bun fu den, e boygi gi en èn e aksi en wan bun.

„San yu wani?”, Yeyses e aksi.

„Taki, taki den tu manpikin fu mi mag sdon na ini yu kownukondre na wan na yu reti-anusey èn na trawan na yu kruktu-anusey.”

Fu di Yeyses e frustan fu suma na aksi kon trutru, meki ay taygi Yakobus nanga Yohanes: „Unu no sabi san unu e aksi. Unu o man dringi na beyker di mi de so fara fu dringi?”

„Iya, wi kan”, den e piki. Aladi Yeyses dyonsrode ben fruteri den taki wan frufolgu e wakti en èn dati te fu kba den sa kiri en, dan a de krin, taki den no e frustan taki na tapu dati Yeyses e sori te a e taki fu „na beyker” di a de so fara fu dringi.

Toku Yeyses e taygi den: „Na beyker fu mi unu sa dringi trutru, ma na sdon na mi reti-anusey èn na mi kruktu-anusey no de na mi fu gi, ma a de gi den di mi Tta ben sreka dati gi den.”

Te den tin tra apostru baka wan pisiten kon sabi san Yakobus nanga Yohanes ben aksi, dan den ati e bron. Kande Yakobus nanga Yohanes ben de den fesiman ini na fosi taki-go-taki-kon a mindri den apostru fu na aksi suma de na moro bigiwan. Na sani di den e aksi now, e sori taki den no ben poti a ray di Yeyses ben gi fu na afersi disi na ini den libi. A sari fu taki taki te now ete na winsi fu den fu abi wan prenspari posisi de tranga.

So bun fu du wan sani nanga a lasti kesekese disi èn na bita-ati di e kon fu dati, meki Yeyses e kari den twarfu apostru kon na wan. Aladi na wan lobi fasi a e gi den ray dan a e taki: „Unu sabi taki den tiriman fu den nâsi e basi den èn den bigiman abi makti tapu den. Na so a no de na un mindri, ma suma na mindri unu di wani kon de bigi musu de unu dinari, èn suma na un mindri di wani de a fosiwan, musu de unu srafu.”

Yeyses e gi na eksenpre di den musu waka na en baka, so leki a e tyari kon na krin: „Neleki fa na Manpikin fu libisma no ben kon fu sma dini en, ma fu dini sma èn fu gi en sili leki wan lusupreys ini na presi fu furu sma.” Yeyses no wwan ben dini fu na bun fu tra sma, ma sa go srefi so fara taki a e dede gi na libismafamiri! Den disipri abi na srefi yeye-fasi fanowdu leki di fu Krestes fu wani fu dini sma na presi fu sma dini den èn fu wani de a mendriwan na presi fu de wan sma di abi prenspari posisi. Mateyus 20:17-28; Markus 3:17; 9:33-37; 10:32-45; Lukas 18:31-34; Yohanes 11:16.

◆ Fu san-ede den disipri e kon frede now?

◆ Fa Yeyses e sreka en disipri fu san o psa?

◆ Sortu sani den e aksi Yeyses èn sortu krakti disi abi tapu den tra apostru?

◆ Fa Yeyses e du nanga na problema di kon a mindri en apostru?