Yesus libi nanga diniwroko

BAKADI Yesus ben gwe libi na oso fu wan prenspari Fariseiman — a de krin taki a ben de wan memre fu na Sanhedren — a e go moro fara na Yerusalem. Bigi ipi sma e waka na en baka. Ma san na den prakseri fu den? San de trutru ini na tori te wan sma wani de wan tru bakaman fu en?

Aladi den e waka go moro fara, dan Yesus e drai luku den ipi sma èn e meki kande den skreki nanga den wortu: „Efu wan sma e kon na mi èn no abi ogri-ati gi en papa nanga mama èn uma èn pikin èn brada èn sisa, èn srefi gi en eigi sili, no kan de mi disipel.”

San Yesus e bedoel? No dati en bakaman letterlek mu abi ogri-ati gi den famirman fu den. Den mu abi ogri-ati gi den moro furu ini na fasi disi taki den mu lobi den mendri leki den lobi Yesus. Den e taki fu Yesus fositen tata Yakob taki a ben abi „ogri-ati” gi Lea èn ben lobi Rachel, san ben wani taki taki Lea kisi someni lobi leki en sisa Rachel.

Prakseri ooktu taki Yesus ben taki taki wan disipel srefi ben mu abi ogri-ati gi „en eigi sili” ofu libi. Agen Yesus e bedoel taki wan tru disipel ben mu lobi En moro leki en eigi sili. Yesus na a fasi disi e poti krakti a tapu taki a de wan seryusu frantwortu fu tron en disipel. A no de wan sani pe wan sma kan bigin nanga en sondro fu go denki bun a fesi.

Fu de wan disipel e tyari muilekheid nanga frufolgu kon, soleki a e sori moro fara: „A sma di no e tyari en pina-udu èn no e kon na mi baka no kan de mi disipel.” Wan tru disipel sobun mu de klari fu ondrofeni na srefi syen di Yesus ben ferdrage, san kande srefi kan wani taki taki Gado feyanti e kiri en, soleki disi ben sa psa dyonsro nanga Yesus.

Den ipi sma di ben waka baka Yesus, sobun ben mu ondrosuku finifini san a wani taki fu de wan disipel fu Yesus. Yesus e poti krakti na tapu disi nanga yepi fu wan agersitori. „Suma fu unu fu eksempre” na so a e taki, „di wani bow wan toru, no e go sidon fosi fu bereken den kostu, fu si efu a abi nofo fu klari en? Noso a ben kan psa taki a e poti na fundamenti fu en, ma no man fu klari na wroko èn dan ala sma di e luku kande sa bigin fu spotu èn taki: ’A sma disi ben bigin bow, ma a no ben kan klari na wroko.’”

Yesus e sori nanga na eksempre disi na den ipi sma di e waka baka en, taki bifo den kan tron en disipel den mu abi fosi na overtoigi taki den kan du ala sani di de ini a tori, netleki wan sma di wani bow wan toru, na fesi sa go luku fu sabi seiker taki a abi den sani fu klari na wroko. Baka disi Yesus e taki ete wan agersitori èn a e taki:

„Ofu sortu kownu di e hari go feti nanga wan tra kownu, no e go sidon fosi fu tak-go-tak-kon efu nanga wan legre fu tin dusun man kan kakafutu gi na sma di e hari kon na en nanga twenti dusun man? Bika efu a no man fu du disi, dan a e seni, aladi a trawan de fara ete na pasi, wan boskopuman èn e begi fu vrede.”

Moro fara Yesus e poti krakti a tapu pe a tori e go na ini den agersitori fu en te a e taki: „Fu dati-ede yu kan de seiker taki nowan sma fu unu kan de mi disipel, efu a no taki adyosi gi ala en gudu.” Den ipi sma di e waka na en baka mu de klari fu du dati — èn dati de ooktu so gi ibri tra sma di e leri fu Kristus. Efu den wani de en disipel, dan den mu de klari fu offer ala san den abi — ala den gudu, makandra nanga a libi srefi. Yu de klarklari fu du dati?

„Sowtu seiker de tumsi bun”, Yesus e go moro fara. Na ini en bergipreiki a ben taki taki en disipel de a sowtu fu na grontapu, san wani taki taki den abi wan krakti na tapu sma fu meki den tan sondro fu go pori, net soleki letterlek sowtu de wan sani di e hori wan sani sodati a no pori. „ma efu na sowtu lasi en krakti, nanga san dan a sa kisi tesi? A no warti moro gi na gron èn ooktu no gi mest”, Yesus e bosroiti. „den e trowe en go na doro. A sma di abi yesi fu yere meki a yere.”

Yesus e sori sobun taki srefi den sma di wan pisiten kaba de disipel, no mu kon swaki ini den faste bosroiti fu go doro. Efu disi ben sa psa, dan den ben kan tron wan sani di no abi waarde, wan sani fu spotu gi na grontapu disi, di no bun gi Gado èn te yu luku en bun srefi de wan syen gi Gado. Fu dati-ede net leki doti sowtu di lasi en krakti, den sa trowe den go na doro, iya go pori. Lukas 14:25-35; Genesis 29:30-33; Mattéus 5:13.

◆ San a wani taki gi wi famirman èn gi wi srefi fu abi ogri-ati gi wi srefi?

◆ Sortu agersitori Yesus e gi èn san den wani taki?

◆ San de a mama fu a tori fu Yesus lasti wortu di e go fu sowtu?