Yeyses libi nanga diniwroko
Yeyses e gi leri na ini Yerikow
GAWGAW Yeyses nanga na ipi sma di e waka makandra nanga en e doro na Yerikow, di ddon so wan sani fu wan dey waka komoto fu Yerusalen. A de krin taki Yerikow na wan dobru foto, di a wan pisi de na owru dyu foto èn na moro nyun pisi de na Romen foto di ddon so wan wan nanga afu kilomeytri fu makandra. Te na ipi sma e waka komoto fu na owru foto èn e waka miti na nyun-wan dan tu breni begiman e yere na wunyuwunyu. Wan fu den nen Bartimeyus.
Sodra Bartimeyus e yere taki Yeyses e waka psa, dan en nanga en konpe e bari taki: „Masra, abi sari-ati nanga wi, manpikin fu Davidi!” Te na ipi sma e krasi den fu tapu den mofo, dan den e bari moro tranga srefi: „Masra, abi sari-ati nanga wi, Manpikin fu David!”
Yeyses e tan tanapu te a e yere na wunyuwunyu. A e aksi den sma di e lontu en fu tyari den sma kon na en di e bari so tranga. Den e go na den breni begiman èn e taygi wan fu den: „Abi deki-ati, opo tanapu, a e kari yu.” Nanga bigi prisiri na breniman e trowe en tapusey krosi, e dyonpo opo èn e go na Yeyses.
„San yu wani taki mi du gi yu?”, Yeyses e aksi den tu man.
„Masra, meki wi ay kon opo”, den e aksi.
Nanga sari na ati, Yeyses e meri den ay fu den. Leki fa na tori fu Markus e taki, dan Yeyses e taygi wan fu den: „Go, a bribi fu yu meki yu kon betre.” Wantronwantron den breni begiman e kon si baka èn sondro degedege den tu e gi Gado grani. Te ala sma e si san psa, den so srefi tu e preyse Gado. Sondro draydray Bartimeyus nanga en konpe e waka baka Yeyses.
Te Yeyses e hari psa Yerikow, dan wan kofarlek bigi ipi sma e waka na en baka. Ibriwan sma wani si a sma di dresi den breniman. Den sma e pusupusu fu ala sey lontu Yesus, so taki sonwan no man fu si wan pisi fu en srefi. Sakeyus, na edeman fu den belastingman ini èn lontu Yerikow, de so srefi wan fu den. A de tumusi pikin fu si san e psa.
Fu dati-ede Sakeyus e lon go na fesi èn e kren go ini wan murbey figabon sey na pasi di Yeyses o waka psa. Komoto fu na bun presi disi a kan si ala sani bun. Te na ipi sma e kon krosibey, dan Yeyses e luku go na tapu èn e taki: „Sakeyus, kon esi-esi na ondro, bika tide mi musu tan na yu oso.”
Sakeyus nanga prisiri e saka go na ondro èn e lon go na oso fu seti ala sani gi en prenspari fisitiman. Ma te den sma si san e psa, den alamala e bigin knoru. Den no e feni en bun taki Yeyses de leki fisitiman na so wan man oso. Sakeyus kon gudu fu di a bidrigi sma te a ben piki belastingmoni.
Furu sma e waka go na en baka, èn te Yeyses e go na ini na oso fu Sakeyus, den e kragi: „A go na a oso fu wan man di de wan sondari.” Ma Yeyses e si taki Sakeyus na wan sma di sa kan kon kisi berow. Èn Yeyses fesi no e fadon, bika Sakeyus e opo tanapu èn e fruklari: „Luku! Afu fu den gudu fu mi, Masra, mi e gi na den pôti sma, èn san mi ben puru na sma skin nanga falsi kragi, mi e gi fo tron baka.”
Sakeyus e sori taki a abi opregti berow fu di a e gi afu fu den gudu fu en na den pôti sma èn na tra afu fu kobroyki fu pay san a ben kisi nanga yepi fu bidrigi fasi. A de krin taki nanga yepi fu en belastingbuku a kan si omeni a musu gi den sma di a ben fufuru. Fu dati-ede a e pramisi plechtig fu gi fo tron fu dati baka ini akruderi nanga a wet fu Gado pe tanapu: ’Efu wan man fufuru wan skapu, a musu gi fo pikin meti fu na skapu.’
Yeyses e prisiri nanga na fasi fa Sakeyus e pramisi fu prati den gudu fu en, bika a e taki: „Tide na oso disi kisi frulusu, bika en tu na wan manpikin fu Abraham. Na Manpikin fu libisma kon fu suku èn fu frulusu san ben lasi.”
No so langa psa kba Yeyses ben agersi na situwâsi fu den lasiwan fu di a ben fruteri na tori fu na lasi manplkin. Now wi abi wan trutru eksenpre fu wan sma di ben lasi èn di den ben feni baka. Awinsi den kerki fesiman e knoru nanga kragi na makandra nanga ala den sma di e waka na den baka fu na prakseri di Yeyses e poti na sma so leki Sakeyus, toku Yeyses e tan suku den lasi manpikin disi fu Abraham èn e meki den kon bun baka. Mateyus 20:29-34; Markus 10:46-52; Lukas 18:35—19:10; Exodus 22:1.
◆ Pe Yeyses kande e miti den breni begiman èn san a e du gi den?
◆ Suma na Sakeyus, èn fu san-ede a e kren go ini wan bon?
◆ Fa Sakeyus e sori taki a abi berow?
◆ Sortu leri wi e kisi fu a fasi fa Yeyses e handri nanga Sakeyus?