Owruman — Kibri na panti di de na yu frantiwortu
„Poti prakseri na yu srefi èn na a heri ipi, di santa yeye ben poti yu fu wroko leki opziener a den mindri, fu wey na gemeente fu Gado, di a ben bay nanga na brudu fu en eygi Manpikin.” — TORI FU DEN APOSTRU 20:28.
1. San wani taki na kresten panti?
YEHOVAH GADO gi den sma ini en organisâsi na grontapu wan wondru panti leki frantiwortu. Ma san na wan panti? A de wan warti sani di gi na wan sma a di musu gi frantiwortu fu dati. Na kresten panti wani taki „na patron fu gosontu wortu”, na waarheid di kon na wi nanga yepi fu na Buku èn di wi e kisi leki ’nnyan na a reti ten’ fu „na kotrow èn koni srafu” (2 Timoteyus 1:13, 14; Mateyus 24:45-47). Na panti disi wani taki so srefi tu na diniwroko di e go makandra nanga na waarheid, fu di na waarheid musu preyki ini na gemeente èn dorosey fu na gemeente (2 Timoteyus 4:1-5). Konnukondre preykiman, makandra nanga den owruman di santa yeye poti, musu warderi na panti disi leki wan tumusi diri sani.
2. Sortu panti owruman abi moro ete, èn san Petrus ben taki fu dati?
2 Kresten owruman kisi ete wan panti leki den frantiwortu — na frantiwortu fu wey na ipi fu Gado. Na ini na tori disi na apostru Petrus ben skrifi: „Na den owruman a mindri unu mi e gi na frumane disi, bika mi srefi na wan owruman neleki den èn wan kotoygi fu na pina fu Krestes, iya, wan sma di e teki prati na a glori di sa kon na krin: Wey na ipi fu Gado di de na yu sorgu, no ondro dwengi, ma klariklari, no nanga lobi gi oneerlijk wini, ma nanga faya, no leki sma di e basi den di de na gudu fu Gado, ma fu di yu e sori taki yu de eksenpre gi na ipi. Èn te na Gran Hèrder sori en srefi, yu sa kisi na kownu-ati fu glori di no e flaw.” — 1 Petrus 5:1-4
3. Fu san kresten owruman musu de wan fonten?
3 Kresten owruman „musu sori taki den de leki wan kibripresi gi na winti èn wan kibripresi gi na hebi alen, leki kriki ini wan kondre sondro watra, leki na kowru fu wan hebi stonbergi di de leti opo in wan kondre di da drey” (Yesaya 31:1, 2). Disi wani taki taki owruman musu de wan fonten fu seykerfasi, vrede nanga stabiliteit gi na ipi fu Gado futuboy di yu kan teki gersi nanga skapu. Den e aksi fu wan owruman ofu ondrohèrder fu na ipi „moro leki fa a gwenti de” fu di den kisi „na frantiwortu fu furu sani”. (Lukas 12:48). Èn san den kisi leki frantiwortu, de seyker wan diri panti di den musu kibri.
Fu san-ede yu kisi en?
4. Fu san-ede someni owruman de fanowdu?
4 Na de di moro leki 57.000 gemeente fu Yehovah Kotoygi de na a heri grontapu e aksi dusundusun bekwaam man di abi yeye fasi fu sorgu gi na ipi fu Gado. Furu owruman de na ini ibri kondre èn disi de wan reyde fu prisiri. Te yu luku na a heri grontapu dan yu abi gemiddeld so wan 60 kownukondre preykiman na ini ibri gemeente. Yu abi fu dati-ede furu wroko gi owruman fu du. — 1 Korente sma 15:58.
5. Tapu a gron fu san wan man e kisi na grani fu dini leki owruman?
5 Efu yu de wan owruman, fu san-ede yu ben kisi na blesi grani disi dan? Du di yu du bepaalde sani èn fu di yu abi yeye eygifasi. Yu musu stuka fu eksenpre fayafaya na Wortu fu Gado (Yosuwa 1:7, 8). Yu musu teki prati fayafaya na a velddienst, so srefi tu e yepi tra sma fu tron preykiman fu na Kownukondre. Baka di ’den tesi yu fosi fu luku efu yu de bun nofo’, yu ben dini kotrow leki dinari na ini na diniwroko. Yu ’ben feti a baka’ ofu ben suku fu kisi den bekwaamheid fu wan opziener, èn e frustan taki fu de wan opziener na wan „tumusi moy wroko” (1 Timoteyus 3:1, 10). Neleki fa a ben de nanga Timoteyus na so ’den brada ben gi wan bun bericht fu yu’ (Tori fu den apostru 16:2). Di den ben rikomanderi yu leki owruman, kande seyker yu ben de psa twenti yari ofu moro owru ete, èn yu ben abi ondrofeni fu na libi. Na gemeente ben go respeki yu leki wan brada, di na yeyefasi de lepi èn di sma no e frede fu go na en èn di man fu gi bun ray fu Beybri èn di kan hori frutrow tori gi en srefi. — Odo 25:9, 10.
Fa yu kan kibri na panti di de na yu frantiwortu
6, 7. Soru ray 1 Timoteyus 4:13-15 e gi fu yepi wan man fu kibri na panti di den gi en leki wan owruman?
6 Iya, efu yu de wan owruman, dan bun reyde ben de taki yu ben kisi na kresten wroko fu hori ay tapu sani. Èn fa yu ben firi taki a de wan grani! Ma fa yu kan kibri na panti di de na yu frantiwortu?
7 Wan fasi fu kibri na panti di de na yu frantiwortu leki owruman de fu de positief èn nanga faya na ini a du fu den wroko fu yu. Wi alamala kisi ini Yehovah organisâsi wroko fu difrenti sortu frantiwortu. Tan so bun na yu presi èn de tevrede fu ’tyari yu srefi leki wan mendriwan’ (Lukas 9:46-48; teki gersi nanga Krutuman 7:21). Luku den grani di yu kisi leki wan diri sani, èn noyti wroko „nanga wan slak anu” (Odo 10:4). No tan tanapu na wan pe, ma nanga Yehovah yepi go na fesi na ini ala pisi fu na diniwroko. Iya, waka na baka na ray disi di Paulus ben gi na Timoteyus: „Go doro fu poti yu srefi na tapu na leysi, na frumane èn na gi leri na sma. No wisiwasi na presenti na ini yu, di yu ben kisi nanga yepi fu wan taki di sani ben taki a fesi èn di na skin fu owruman ben poti anu na tapu yu. Denki dipi fu den sani disi, go krinkrin na ini den, so taki na go na fesi fu yu mag de krin na fesi fu ala sma.” — 1 Timoteyus 4:13-15.
8. San sa yepi wan owruman fu gi bun ray èn fu prati tapu konmakandra wan sani san e bow trawan na yeyefasi?
8 Sorgu fu yu hori wan bun seti fu yu ten fu stuka nanga yu srefi, san e tyari froktu kon. Leki owruman nanga reti den e fruwakti fu yu taki yu e gi bun beybri ray. Yu leysi na heri Beybri kba fu sreka yu srefi gi na frantivortu disi èn yu ben go denki dipi fu san yu ben leysi — èn dati kande furu tron kba? (Odo 15:28) Fa a de nanga den prati nanga lezing di den ben gi yu fu na podium? Sreka den bun a fesi, na ini begi e aksi Yehovah fu en yepi so taki yu man gi den sma di de tapu wi konmakandra wan sani san meki den e kon gudu na yeye fasi. Owruman spesrutu musu taki wortu ’di bun fu bow sma, so taki nanga disi wan sani mag gi den arkiman san de bun gi den’. — Efesiya sma 4:29; Romen 1:11.
9. San wan owruman musu du leki fa 2 Timoteyus 4:2 e taki?
9 Poti leki owruman prakseri tapu na deki-ati di Paulus e gi: „Preyki na wortu, hori yu srefi na en leki wan tranga fanowdu afersi, na ini bun ten, na ini muylek ten, gi piri-ay, gi strafu, frumane nanga ala langa pasensi èn koni fu leri sma” (2 Timoteyus 4:2). Paulus ben broko en ede nanga a fadon komoto na bribi, fu di son sma ini na gemeente ’ben strey nanga wortu’, ben sungu den srefi go na ini ’law strey-aksi’ èn den ’no ben de nanga bun yeyefasi gi na waarheid’ (2 Timoteyus 2:14-18, 23-25; 3:8-13; 4:3, 4). Ma efu na gemeente ben e ondrofeni now wan muylek ofu bun ten, Timoteyus ben musu ’preyki na wortu’. Disi ben sa tranga konpe bribiman fu kaka futu gi na fadon komoto na bribi. Owruman so srefi tu ini na ten disi musu preyki na Wortu, ofu na boskopu fu Gado, di e doro na ati èn e gi deki-ati fu hori tranga na den markitiki fu Gado. — Hebrew sma 4:12.
10. Fu san-ede wan owruman alaten baka musu wroko nanga sma fu en osofamiri èn nanga trawan na ini na velddienst?
10 Fu kan taki nanga makti, dan wan owruman musu libi ini akruderi nanga a Wortu fu Gado. Ma a no e kibri wan panti di de na en frantiwortu krinkrin efu ini a gemeente wwan, tapu a podium, ’a e preyki na wortu’. Na ini na srefi kontekst Paulus ben gi Timoteyus tranga: „Du na wroko fu wan evangelium preykiman.” Fu „du yu diniwroko dorodoro” leki wan owruman, dan yu musu preyki na Wortu fu Gado „na publiki èn oso fu oso” (2 Timoteyus 4:5; Tori fu den apostru 20:20, 21). Wroko fu dati-ede na ini na velddienst nanga sma fu yu osofamiri. Disi kan dipi na yeye banti mindri yu nanga yu uma èn sa du yu pikin bun srefi srefi tu. Kobroyki so srefi tu ten fu wroko makandra nanga tra sma a fu na gemeente na ini na preykiwroko. Disi e tranga yeye banti èn e meki brada lobi gro (Yohanes 13:34, 35). A no de fu taki taki wan owrunan musu feti a baka fu hori en balansi ini a prati fu en diri ten a mindri en osofamiri nanga a gemeente. Te a kobroyki na koni fu si sani a sa sorgu fu no tumusi furu ten na a wan èn na so fasi libi a trawan na wan sey èn du en ogri.
11. Fu san-ede wan owruman musu wroko tranga fu meki en bekwaamheid leki owruman kon moro bigi?
11 Fu kibri leki owruman na panti di de na yu frantiwortu dan yu musu wroko tranga fu meki na bekwaamheid fu yu leki owruman kon moro bigi. „A sma di e gi leri, meki a poti en srefi tapu en leri,” Paulus ben taki, „ofu a sma di e frumane, meki a poti en srefi tapu a frumane” (Romen 12:7, 8). Fu di wan leriman e tanapu e leri tra sma, meki den abi a reti fu fruwakti furu fu en. Efu wan owruman na wan seryusu fasi ben sa lasi pasi na ini en leri èn disi e tyari problema kon gi en konpe bribiman, dan a e kon ini lin fu kisi wan krutu fu Gado. Iya, leriman ’sa kisi wan moro hebi krutu’ (Yakobus 3:1, 2; Mateyus 12:36, 37). Owruman so bun musu de seryusu stukaman fu Gado Wortu èn poti dati na ini den libi. Dan den konpe bribiman sa warderi srefi srefi na Beybri leri fu den, di a poti di den e poti dati na ini den libi e hori baka gi en. A sa kibri na gemeente tu gi krakti di no bun, pe yu abi na ini en na fadon komoto na bribi.
Tan farawe fu trapu
12. Sortu ray di ben poti kba fositen na ini na tijdschrift disi sa yepi wan owruman fu tan farawe fu na fowtu kobroyki fu na tongo?
12 Kibri na panti tu di de na yu frantiwortu leki wan owruman fu di yu e tan farawe fu trapu. Wan fu den disi na wan fowtu kobroyki fu a tongo leki leriman. Na fanowdu fu luku bun na ini disi Yehovah organisâsi langa ten ben poti krakti a tapu. Na so fu eksenpre a tijdschrift disi na ini na uitgave fu 15 mei 1897 ben taki fu Yakobus 3:1-13 èn ben taki spesrutu fu owruman: „Efu den abi wan tongo di e taki grati dan dati kan de wan kanari fu bigi blesi, so taki bigi nomru fu sma kan wini kon gi Masra, gi na waarheid èn gi na pasi fu regtfardikifasi; ma na a tra sey efu a tongo kon doti nanga sondu, a e du ogri di yu no man fruteri fu en — du ogri na a bribi, na den bun gwenti, na bun wroko. A de fu tru wan tru sani taki ala sma di e kobroyki na presenti fu gi leri na tra sma, e poti wan moro bigi frantiwortu na en tapu na ini na ay fu Gado nanga libisma. . .. Den sma di wani de wan fonten pe a Wortu fu Gado e komoto fu den go a doro èn e gi blesi nanga kowru-ati nanga tranga, musu luku a tapu taki bita watra, falsi leri di ben sa meki wan fluku kon, wan wortu di e du ogri — di e afrontu Gado èn e dray en wortu — no sa feni ini den wan kanari fu tyari wortu kon na doro. Ini a teki fu sma leki fesiman gi konmakandra wi no musu luku psa na kwaliteit fu na ’tongo’, so leki poti dya. A no den wan nanga na faya tongo den musu teki, ma den moro safri-atiwan, den wan di e du sani nanga marki, di e ’dwengi’ a tongo fu den èn e feti a baka fu ’taki soso nanga ala soyfri fasi den wortu fu Gado’.” O prenspari a de taki wan owruman e kobroyki en tongo na wan yoysti fasi!
13. Nanga san owruman musu luku bun ini na tori fu ontspanning?
13 Abi ontspanning psa marki de so srefi tu wan trapu di wi musu koti pasi gi en. Ontspanning musu gi wan kresten kowru-ati èn bow en, ma no musu weri en ofu puru en prakseri. Boyti fu dati, opziener musu de „nanga marki na ini gwenti” (1 Timoteyus 3:2). Efu du sani nanga marki e tiri san yu e du ini a tori fu ontspanning dan disi sa kibri yu nanga yu osofamiri èn sa gi na gemeente wan tumusi moy eksenpre. Yu no ben sa gi wan bun eksenpre efu alaten baka na ini weekend yu e gwe fu abi ontspanning aladi yu konpe bribiman de fayafaya ini na velddienst. Na bun nyunsu musu preyki èn owruman musu de faya kownukondre preykiman di e teki fesi ini na wroko disi. — Markus 13:10; Titus 2:14.
14. (a) Sortu beybri eksenpre e poti prakseri tapu na fanowdu gi owruman fu klbri den srefi gi sekshurudu? (b) Sortu ray di ben gi alaten baka ini na tori fu na yepi fu yeye sisa owruman no musu poti na wan sey?
14 Seks hurudu na ete wan trapu di wan sma musu tan farawe fu en. Na moreel fadon fu na grontapu kan abi krakti srefi tapu wan owruman efu a no e kaka futu gi den kori di Satan e kobroyki na ini a muyti fu en fu broko na soyfri retifasi fu a pipri fu Gado (Teki gersi nanga Mateyus 4:1-11; 6:9, 13). Go prakseri taki na profeyti Bileyam baka ala muyti di a du fu fluku den Israèl sma sondro fu a ben waka bun ben taki-go-taki-kon taki Yehovah srefi ben sa fluku den efu den ben kan kori den go na ini seks anbegi. Fu dati-ede Bileyam ben leri na kownu fu Mowab, Balak, „fu poti wan ston fu naki futu gi den manpikin fu Israèl, fu den nyan sani di ben tyari leki srakti-ofrandi gi dan kruktu gado èn fu den du hurudu”. Den ben tan farawe fu na trapu dati? Nôno, bika 24.000 Israè1 sma ben dede nanga na krawasi di Yehovah ben seni go fu di den ben abi hurudu gemeenschap nanga den uma fu Mowab èn ben boygi gi den Gado fu den (Openbaring 2:14; Numeri 25:1-9). Go prakseri tu taki srefi David, ’wan man di ben plisi na ati fu Gado’, ben naki futu fadon go na ini na trapu fu seks hurudu (1 Samuwèl 13:14; 2 Samuwèl 11:2-4). Poti leki owruman so bun prakseri tapu na ray di na ’kotrow basya’ gi alaten baka fu noyti yu wwan go yepi wan yeye sisa ma fu sorgu taki wan tra owruman de tu te yu e du na frantiwortu disi — Lukas 12:42,
15. Fa na osofamiri fu wan owruman kan yepi en fu tan farawe fu na trapu fu na lobi fu gudu?
15 Ete wan trapu di wan owruman musu tan farawe fu en, na a lobi fu gudu. De tevrede nanga san de fanowdu, ini na sabi taki den sani di Yehovah seti sa de nofo (Mateyus 6:25-33; Hebrew sma 13:5). Ufen yu osofamiri fu de zuinig, bika frumorsu sani na wan fufuruman fu ten èn sani di yu abi fu kan kobroyki fu yepi na osofamiri èn so srefi tu fu teki prati na a velddienst, fu tranga na gemeente èn fu meki den Kownukondre belang go na fesi. Wan owruman e nyanbun fu a wroko makandra fu en osofamiri ini disi èn a de grantangi taki den no e druk en ini sani di no de trutru fanowdu. Iya, „a moro betre fu abi pikinso ini na frede fu Yehovah leki fu abi furu psa marki nanga bruya na ini”. — Odo 15:16.
„Poti prakseri na yu srefi”
16. Sortu ray Paulus ben gi den opziener na ini Efeyse?
16 Efu owruman wani kibri na panti di den kisi leki den frantiwortu, dan den musu poti na ray fu Paulus di a ben gi den opziener fu Efeyse na ini den libi. A ben taygi den: „Poti prakseri na yusrefi èn na a heri ipi, di santa yeye ben poti unu leki opziener fu wroko a den mindri, fu wey na gemeente fu Gado, di a ben bay nanga a brudu fu en eygi Manpikin. Mi sabi taki baka te mi gowe dan wolfu di e kwinsi sma sa boro kon na unu mindri èn den no sa handri na ipi nanga safufasi èn fu unu eygi mindri man sa opo tanapu di e taki verdraai sani fu hari den disipri kon na den baka. Tan nanga ay èn hori na ini prakseri taki dri yari langa, dey nanga netl, mi no ben tapu fu frumane ibriwan nanga watra na ay.” Tori fu den apostru 20:28-31.
17, 18. Sortu ray di ben poti so wan 80 yari psa kba na ini na tijdschrift disi de te now ete bun gi kresten owruman?
17 Moro leki 80 yari psa kba, The Watch Tower (1 maart 1909) ben teki na ray disi fu Paulus gi konpe owruman èn ben gi leki kommentaar tapu disi: „A de den Owruman di na sortu presi den de tu musu poti spesrutu prakseri a tapu disi; bika na ini ibri tesi a den sma di kisi moro grani èn di de den moro prenspariwan di e kisi moro seryusu problema nanga tesi. Fu dati-ede meki Yakobus e frumane: ’Meki no furu fu unu de leriman, brada, e sabi taki wan man sa kisi na moro seryusu tesi.’ Wi tu e frumane ala Owruman di abi wan soyfri ati sondro gridifasi fu den abi noti moro leki lobi èn bun winsi gi na heri libismafamiri èn fu den kon furu moro nanga moro nanga den froktu èn bunfasi fu na santa yeye, èn poti so srefi tu prakseri na a ipi. Prakseri taki na ipi na fu Masra èn taki yu abi wan frantiwortu na Masra fesi èn ooktu na fesi den. Prakseri taki yu e hori wakti tapu den sili fu den leki sma di musu gi frantiwortu na a Bigi Gran Hèrder. Prakseri taki na moro prenspari sani na Lobi na ini ala sani; èn aladi yu no e poti leri na wan sey, poti spesrutu prakseri na a gro fu na yeye fu Masra a mindri den difrenti memre fu en skin, so taki ’den kan kon meki kon bun gi na gudu fu den santawan na ini na leti’, èn akruderi na wani fu Gado no e kisi pasi taki den naki futu fadon na ini na ogri dey ma taki baka te den du ala sani dorodoro tanapu ini Krestes, en Skin, en Memre, en Konpe ofrandiman en Konpe-erfgenaam.”
18 Den wortu dati ben taki gi den owruman di kisi salfu nanga santa yeye nanga gi konpe bribiman ini akruderi nanga na frustan èn den omstandigheid fu Yehovah organisâsi ini den fruku dey dati. Ma o bun na ray dati de fu poti ini wi libi ini na ten disi! Efu a howpu fu den de fu heymel ofu fu grontapu, kresten owruman musu poti prakseri na den srefi, kibri na panti di gi a den frantiwortu èn nanga lobi e sorgu gi den belang fu na ipi fu Gado.
Prisiri e kon fu na kibri fu na panti di yu kisi leki frantiwortu
19, 20. Fu san-ede yu kan taki taki prisiri de na bakapisi te owruman e kibri na panti di gi a den leki frantiwortu?
19 Koloku — iya, wan dipi prisiri — e kon fu na kibri di yu musu kibri leki kresten owruman na panti di de na yu frantiwortu. A e gi prisiri fu du wan seryusu frantiwortu na wan yoysti fasi. So bun de na ay, suku na yepi fu Yehovah na ini begi, de nanga faya. Kibri na panti di de na yu frantiwortu leki wan owruman èn luku go a fesi na a ten di yu kan taki neleki na man nanga na skrifiman skrifitiki: „Mi du yoysti so leki yu ben komanderi mi.” — Eseykièl 9:3, 4, 11.
20 Iya, wroko loyaal leki owruman so taki den kan taki a srefi fu yu leki den ben taki fu Noa: „Yoysti so a ben du” (Genesis 6:22). Fu so wan diniwroko di e du nanga faya na gemeente e nyanbun fu en tapu furu fasi. Na moro prenspari sani de taki Yehovah e kisi grani fu a sey fu tranga gemeente di de nanga faya pe kotrow owruman di e kibri na panti di de na den frantiwortu e du dienst. Ma moro de fanowdu efu trutru yu wani yere den wortu: „Heri bun, yu bun srafu!” (Lukas 19:17) Leki owruman yu musu handri a ipi fu Gado nanga safufasi.
San yu ben sa piki?
◻ Sortu tra panti kresten owruman ben kisi ete leki frantiwortu?
◻ San wan owruman kan du ini positief-fasi fu kibri na panti di gi na en frantiwortu?
◻ Sortu trapu wan owruman musu tan farawe fu en fu kan kibri en panti?
◻ Fu san-ede a e tyari prisiri kon te owruman e kibri na panti fu den?
[Prenki na tapu bladzijde 10]
Kresten owruman musu de leki „wan kibripresi gi na hebi alen”
[Prenki na tapu bladzijde 13]
Abi leki owruman alaten baka wan prati na a veiddienst nanga sma fu yu osofamiri èn nanga trawan
[Prenki na tapu bladzijde 16]
Efu yu leki owruman e kibri na panti di de na yu frantiwortu, dan na gemeente na furu fasi e nyanbun fu dati