Yeyses libi nanga diniwroko

Na ini Betaniya, na ini a oso fu Simon

TE Yeyses e gwe libi Yeriko, dan a e waka go na Betaniya. Na waka e teki pikinmoro na heri dey, fu di a de wan kren go na tapu abra muylek kontren fu so wan sani fu 19 kilometri. Yeriko didon so wan 250 meter moro lagi leki a se èn Betaniya didon so wan 760 meter moro hey leki a se. Betaniya de, so leki yu kan memre ete, na presi pe Lasarus nanga en sisa e libi. Na pikin dorpu de so wan sani fu 3 kilometri moro fara leki Yerusalen èn didon na na owstu sey fu na skoinsisey fu na olèyfbergi.

Furu sma kon kba na ini Yerusalen fu na Paskafesa. Den kon fruku fu krin den srefi na ceremonieel fasi. Kande den ben fasi wan dedeskin ofu den du wan tra sani di ben meki taki den no ben de krin. Fu dati-ede den e du leki fa den wèti e taki fu wan sma kon krin so taki den kan nyan na Paska na wan fasi di Gado e teki. Te den sma disi di kon fruku e kon makandra na ini na tempel, dan furu fu den abi ala sortu prakseri ofu aksi efu Yeyses sa kon na a Paska.

Yerusalen de wan presi fu faya takmakandra di e go fu Yeyses. Ala sma sabi taki den kerkifesiman wani fu kisi en èn kiri en. Den gi srefi na komando taki efu wan sma sabi pe Yeyses e tan, den musu kon fruteri den dati. Na ini den mun di psa den kiriman disi dri tron proberi fu kiri en —  tapu na wiwirikampufesa, na inwijdingfesa èn bakadi Yeyses ben opo Lasarus fu dede. Den sma e aksi den srefi so bun efu Yeyses sa sori en srefi wantron ete. „San yu e prakseri?” den e aksi makandra. „Dati a no sa kon kwetikweti na a fesa?”

Disiten Yeyses e doro na ini Betaniya siksi dey bifo na Paska, di e fadon tapu 14 Nisan akruderi na dyu kalender. Yeyses e doro na ini Betaniya ini a ten fu freydaneti, san de na a bigin fu 8 Nisan. A no ben kan meki a rèys go na Betaniya tapu satra, bika fu rèys tapu sabbat —  fu freyda te son dongo go miti satra te son dongo —  no mag akruderi na dyu wèti. Yeyses kande seyker e go na a oso fu Lasarus, soleki a ben du a fesi èn e tan na freydaneti drape.

Ma wan tra sma di e libi na ini Betaniya e kari Yeyses nanga en konpe fu kon nyan wan neti-nnyan satraneti. A man disi na Simon, wan fositen gwasiman, di na wan okasi a fesi kande ben kon betre nanga yepi fu Yeyses. Lasarus de so srefi tu a mindri den sma di didon nanga Yeyses na tafra. Akruderi na fasi di a abi fu yepi du sani, dan Martha e sorgu gi den fisitiman. Ma a de wan aparti sani taki Mariya e poti prakseri tapu Yeyses, na tron disi tapu wan fasi di e tyari kesekese kon.

Mariya e opo wan albasten batra ofu kroyki di e hori wan sani fu wan pontu switi smeri oli, ’trutru nardus’. Disi de tumusi diri. Iya, na warti fu en e kruderi nanga wan wrokoman moni fu wan yari! Te Mariya e kanti na oli tapu Yeyses ede nanga en futu èn e drey Yeyses futu nanga en wiri, dan na switi smeri e furu na heri oso.

Den disipri ati e bron èn den e aksi: „Fu san-ede na frumorsu disi fu na oli?” Dan Yudas Iskariyot e taki: „Fu san-ede na switi smeri oli disi no seri fu drihondro dinari èn gi na den pôtiwan?” Ma Yudas no e broko ede trutru fu den pôtiwan, bika nofotron a ben fufuru a moni fu na monidosu fu den disipri.

Yeyses e opo taki fu a bun fu Mariya. „Meki a du en sani”, a e taki. „Fu san-ede unu e muylek en? Bika a e du wan tumusi bun wroko gi mi. Bika den pôtiwan unu abi alaten na unu, èn oten unu wani unu kan du den bun ma mi unu no abi alaten. A ben du san a ben kan; di na uma disi ben kanti switi smeri oli tapu mi skin, a ben du disi leki wan sreka fu na beri fu mi. Fu tru, mi e taygi unu: Alape pe na bun nyunsu disi e preyki na a heri grontapu, sosrefi tu den sa prakseri na uma disi èn fruteri san a ben du.”

Yeyses de now moro leki 24 yuru na ini Betaniya èn na nyunsu taki a de drape e panya leki wan faya. Furu sma e kon fu dati-ede na a oso fu Simon fu si Yeyses, ma den e kon tu fu si Lasarus. Fu dati-ede meki den granpristri e go taki nanga makandra fu no kiri Yeyses wwan ma sosrefi tu Lasarus. Disi e kon fu di furu sma e poti bribi na ini Yeyses fu di den e si na sma libilibi di a ben wiki opo fu dede! Ay baya, fa den kerkifesiman ogri! Yohannes 11:55–12:11; Mateyus 26:6-13; Markus 14:3-9; Tori fu den Apostru 1:12.

◆ Oten Yeyses e doro na ini Betaniya, èn pe kande seyker a e psa na sabbat?

◆ Sortu takmakandra e de na ini a tempel èn fu san-ede?

◆ Sortu sani san Mariya du e tyari kesekese kon, èn fa Yeyses e opo taki fu a bun fu en?

◆ San e sori na bigi ogridu fu den granpristri?