Yeyses libi nanga diniwroko

Na rèy fu Yeyses leki kownu go na ini Yerusalen

NA TRA mmanten, sonde 9 Nisan, Yeyses nanga den disipri e gwe libi Betaniya fu waka abra na Olèyfbergi go na Yerusalen. A no e teki langa efu den e doro Bethfage, di ddon tapu na Olèyfbergi. Yeyses e gi tu fu en disipri na ordru:

„Go na ini na dorpu di unu e si na unu fesi, èn wanten unu sa feni wan umaburiki di tay nanga wan pikin buriki na en sey; lusu den èn tyari den kon na mi. Èn efu wan sma e taygi unu wan sani, unu musu taki: ’Masra abi den fanowdu.’ Tapu dati a sa seni den kon wantewante.”

Aladi den disipri biginbigin no e frustan taki den ray disi abi fu du nanga na kontru fu beybri profeytitori, toku den e frustan disi bakaten. Na profeyti Sakariya ben taki a fesi taki na pramisi Kownu fu Gado ben sa rèy na tapu wan buriki kon na ini Yerusalen, „iya, na tapu wan meti di bigi kba, na pikin fu wan umaburiki”. Kownu Salomo so srefi ben rèy na tapu wan pikin fu wan buriki go fu kisi salfu.

Te den disipri e go na ini Bethfage èn e teki na pikin buriki nanga en mma, dan sonwan fu den sma di tanapu drape e taki: „San unu e du?” Ma te den e fruteri den taki den meti de gi Masra, dan den e gi den disipri pasi fu tyari den go na Yeyses. Den disipri e bradi den tapusey krosi na tapu na umaburiki èn na tapu na pikin fu en, ma Yeyses e go sdon tapu na pikin buriki.

Te Yeyses e rèy go na a sey fu Yerusalen, dan na ipi fu sma e kon moro bigi. A moro bigi pisi fu den sma e bradi den tapusey krosi tapu na pasi, aladi trawan e koti taki fu den bon èn e poti den na tapu na strati. Den e bari taki: „Blesi musu de fu a sma di e kon leki Kownu na ini na nen fu Yehovah! Vrede na ini heymel èn glori na ini den moro hey presi!”

Wantu fu den Fariseyman na ini na ipi e kon bruya fu san den sma e bari gi Yeyses èn den e kragi na Yeyses taki: „Leriman, frumane den disipri fu yu.” Ma Yeyses e piki: „Mi e taygi unu: Efu den disi ben sa tan hori den mofo, den ston ben sa bari taki.”

Te Yeyses e kon moro krosibey fu Yerusalen, a e luku na foto èn a e bigin krey fu na foto ede, aladi a e taki: „Efu yu, iya yu, tapu na dey disi ben si den sani di ben abi fu du nanga vrede —  ma now den kibri gi den ay fu yu.” Fu na espresi trangayesi fu Yerusalen, meki a musu pay na payman so leki fa Yeyses taki na fesi:

’Den feyanti fu yu [den Romen ondro legre edeman Titus] sa bow lontu yu wan fortresi nanga srapu penti postu èn den sa lontu yu èn banawtu yu fu ala sey èn den sa masi yu nanga yu pikin na ini yu na gron. Èn na ini yu den no sa libi nowan ston tapu wan trawan.’ Na pori disi fu Yerusalen di Yeyses ben taki a fesi fu en feni presi trutru 37 yari a baka, na ini 70 G.T.

Soso wantu wiki a fesi, dan furu sma ini na ipi ben si di Yeyses ben wiki Lasarus. Now den disi ben tan fruteri trawan fu na wondru dati. So bun di Yeyses e rèy go na ini Yerusalen, na heri foto e kon na ini dyugudyugu. „Suma na disi?”, den wani sabi. Èn den ipi sma e tan taki: „Disi na a profeyti Yeyses, fu Nasaret na ini Galileya!” Te den Fariseyman e si san e psa, den e kragi taki den no man bigin noti nanga disi, bika so leki den e taki: „Grontapu e waka go na en baka.”

So leki fa a gwenti de te a e fisiti Yerusalen, dan Yeyses e go na a tenpri fu leri sma. Drape den breniwan nanga den malengriwan e kon na en, èn a e dresi den! Te den granpristri nanga meystri fu wèti e si den wondrusani di Yeyses e du èn te den e yere den boy e bari na ini na tenpri taki: „Yepi grantangi na manpikin fu David!” dan den ati e bron. „Yu e yere san den disi e taki?”, den e kragi.

„Iya”, Yeyses e piki. „Yu no leysi na sani disi noyti ete: ’Komoto fu na mofo fu nyofi pikin nanga pikin na bobi yu sorgu gi na prèyse fu yu’?”

Yeyses e tan gi leri èn a e luku lontu na ala sani na ini na tenpri. Esi-esi a e kon lati. Fu dati-ede a e gwe, makandra nanga den twarfu disipri èn e waka so wan dri kilomeytri baka go na Betaniya. Drape a e psa na sondeneti, kande na ini na oso fu en mati Lasarus. Mateyus 21:1-11, 14-17; Markus 11:1-11; Lukas 19:29-44; Yohanes 12:12-19; Sakariya 9:9.

◆ Oten èn na sortu fasi Yeyses e rèy leki Kownu go na ini Yerusalen?

◆ O prenspari a de taki den ipi sma e prèyse Yeyses?

◆ Fa Yeyses e firi te a e luku Yerusalen èn sortu profeytitori a e taki?

◆ San e psa te Yeyses e go na a tenpri?