Yeyses libi nanga diniwroko
Na bigin fu wan tumusi prenspari dey
TE Yeyses e gwe libi Yerusalen na tapu mundeneti, a e dray go baka na Betaniya, na a owstu skoynsi sey fu na Olèyfbergi. Tu dey fu en lasti diniwroko na ini Yerusalen psa kba. A no de fu taki, taki Yeyses ben psa na neti agen na en mati Lasarus. Fu sensi freyda di a komoto fu Yerikow, dan disi de na di fu fo neti fu en na ini Betaniya.
Now, tudewroko mmanten fruku, 11 Nisan, dan en nanga en disipri de agen a pasi. Disi sori taki a de wan tumusi prenspari dey fu Yeyses diniwroko, na moro druk wan te nanga now. A de na lasti dey di a e sori en srefi na ini na tenpri. Èn a de na lasti dey fu en publiki diniwroko bifo na krutu èn kiri fu en.
Den e waka na srefi pasi abra na Olèyfbergi go na Yerusalen. Na sey na pasi dati komoto fu Betaniya, Petrus e si na bon di Yeyses ben fluku a mmanten a fesi. „Rabbi, luku!”, a e bari, „na figabon di yu fluku kon drey.”
Ma fu san-ede Yeyses kiri na bon? A e sori fu san-ede, te a e go moro fara fu taki: „Fu tru, mi e taygi yu: Efu yu abi bribi nomo, èn no e tweyfri dan yu no sa du nomo san mi ben du nanga na figabon, ma so srefi efu yu taygi na bergi disi [na Olèyfbergi pe den e tanapu a tapu], ’Opo komoto dya èn trowe yu srefi go na ini na se’, dan a sa psa. Èn ala sani di yu e aksi na ini begi èn nanga bribi, yu sa kisi.”
Nanga na drey di Yeyses meki na figabon kon drey, dan Yeyses e gi en disipri wan moy leri fu na fanowdu fu den fu abi bribi na ini Gado. So leki fa a e fruklari: „Ala den sani di yu e begi èn e aksi fu den, abi bribi taki yu kisi den kba, èn yu sa abi den.” Fa a de wan prenspari leri gi den, spesrutu te yu e hori den furu tesi na prakseri di dyonsro sa kon tapu den! Toku wan tra sani de ete a mindri na kon drey fu na figabon nanga na eygifasi bribi.
Na nâsi Israèl, neleki na figabon disi, abi na dorosey wan bidrigi fasi. Ala di na nâsi de na ini wan frubontu matifasi nanga Gado èn kande na dorosey e sori taki a e hori den kobòt fu en, toku a sori taki a de sondro bribi èn no e meki bun froktu. Fu di den mankeri bribi meki den de srefi bezig fu trowe Gado eygi Manpikin! Nanga na drey di a meki na figabon disi di no e meki froktu kon drey, meki Yeyses e sori fu dati-ede na wan fasi di de fu si san sa psa nanga na nâsi disi di no e meki froktu èn no e sori bribi.
Syatu na baka dati, Yeyses e doro nanga en disipri na ini Yerusalen, èn akruderi a gwenti fu den, den e go na ini na tenpri, pe Yeyses e bigin fu gi leri. Den granpristri nanga den owruman fu na pipri, di abi seyker na ini den prakseri na fasi fa Yeyses ben handri nanga den sma di ben kenki moni na dey a fesi, e tyalensi en: „Nanga sortu makti yu e du den sani disi? Èn suma ben gi yu na makti disi?”
Yeyses e gi den leki piki: „Mi sa aksi unu so srefi wan sani. Efu unu taygi mi dati, dan mi sa fruteri unu so srefi nanga sortu makti mi e du den sani disi: Na dopu fu Yohanes, pe a komoto? Fu heymel ofu fu libisma?”
Den pristri nanga owruman e bigin fu taki nanga makandra san den sa piki. „Efu wi taki: ’Fu heymel’, dan a sa taygi unu: ’Fu san-ede unu no bribi en?’ Ma efu wi taki: ’Fu libisma’, dan wi musu frede den sma, bika den alamala e hori Yohanes leki wan profeyti.”
Den fesiman no sabi san fu piki. Fu dati-ede den e piki Yeyses: „Wi no sabi.”
Yeyses e taki fu dati-ede: „So srefi mi no e fruteri unu nanga sortu makti mi e du den sani disi.” Mateyus 21:19-27; Markus 11:19-33; Lukas 20:1-8.
◆ San de wan prenspari sani na ini na tori fu tudewroko, 11 Nisan?
◆ Sortu leri Yeyses e gi te a e meki na figabon dede?
◆ Sortu piki Yeyses e gi den wan di e aksi nanga sortu makti a e du sani?