Yeyses libi nanga diniwroko

Abi frutrow ini a ten fu den lasti dey

TE TUDEWROKO 11 Nisan e kon na wan kba, dan Yeyses de nanga en apostru na tapu na Olèyfbergi. Syatu a fesi, den ben gwe libi na kontren fu na tenpri di den e si didon na ondrosey èn Yeyses e taki nanga den fu na marki fu en denoya ini kownukondre makti èn fu na kba fu na seti fu sani.

Ala di Yeyses e taki moro fara, dan a e warskow den fu no go waka na baka falsi krestes. Muyti sa du, so a e taki, „efu a ben kan, fu kori srefi den sma di den frukisi”. Ma neleki aka, di e si fara, na so den sma disi di den frukisi sa konmakandra pe na trutru yeye nnyan de fu feni, namku, na a tru Krestes na a ten fu en denoya di no de fu si. Sma no sa kori den èn tyari den kon na wan falsi krestes.

Falsi krestes kan sori den srefi nomo so taki sma e si den. Na a tra sey, Yeyses denoya no de fu si. Na denoya disi sa feni presi ini wan ten pe frede de na ini na libisma historiya, so leki Yeyses e taki: „Son sa kon dungru, èn munkenki no sa gi en faya.” Iya, a sa de a moro dungru pisiten ini a de di libisma de na grontapu. A sa de neleki son kon dungru a deyten èn munkenki no e gi faya na neti.

„Den krakti fu heymel sa seki”, Yeyses e go moro fara. A e sori sobun taki den trutru heymel ben sa go de wan presi di e pramisi ogri. Den heymel no o de wwan na kontren fu fowru, ma den ben sa kon furu nanga feti-opolangi, raket nanga ruimtesonde. Na frede nanga ogri sa psa ala sani san libisma na ini a libisma historiya a fesi ben ondrofeni.

Leki wan bakapisi fu dati, na so Yeyses e taki, dan „bruya skreki a mindri den nâsi sa de di fu na bbari fu na se nanga na sekiseki fu en no sabi wan pasi fu komoto, ala di den sma e kon weri fu frede nanga fruwakti fu den sani di e kon tapu a grontapu pe libisma e libi”. Iya, na moro dungru pisiten disi fu a de di libisma de na grontapu sa doro wan heymarki na ini na ten, pe so leki fa Yeyses e taki, „na marki fu na Manpikin fu libisma sa sori en srefi na ini heymel, èn dan ala lo fu grontapu sa naki den srefi ini sari”.

Ma a no ala sma sa sari te ’na Manpikin fu libisma e kon nanga krakti’ fu pori na ogri seti fu sani disi. Den „sma di den frukisi”, den 144.000 di sa teki prati nanga Krestes na ini en heymel Kownukondre, no sa sari, èn netso tu den konpe fu den, den sma di a fesi kba Yeyses ben kari en „tra skapu”. Ala di den e libi na ini na moro dungru pisiten fu na libisma historiya, toku den e teki na wan bun fasi den deki-ati wortu fu Yeyses: „Efu den sani disi bigin psa, opo tanapu leti-opu, èn opo unu ede go na tapu, bika na frulusu fu unu e kon krosibey.”

So taki en disipri di ben sa libi na ini den lasti dey, ben sa kan sabi soyfri na krosibeyfasi fu na kba, meki Yeyses e gi na gersitori di e kon now: „Poti prakseri tapu na figabon èn ala tra bon: Te a e meki bromki kba, dan yu sabi gi yu srefi, te yu e hori ay na tapu, taki dreyten de krosibey. Na so tu te yu e si den sani disi e psa, sabi dan taki na kownukondre fu Gado de krosibey. Fu tru mi e taygi unu: na geslakti disi kwetikweti no sa psa gwe bifo ala den sani psa.”

Te en disipri e si sobun den furu difrenti pisi fu na marki e kon tru, dan den musu sabi, taki na kba fu na seti fu sani de krosibey èn taki Gado kownukondre dyonsro sa figi ala ogri puru. Iya, na kba sa kon ini na ten fu na libi fu den sma di e si na kontru fu ala den sani di Yeyses ben taki na fesi taki den o psa! Leki wan frumane gi den disipri dati di ben sa libi na ini na ten fu den lasti dey di de warti fu memre, Yeyses e taki:

„Poti prakseri na yu srefi, taki noyti yu ati kon hebi nanga nyan psa marki èn dringi psa marki èn sorgu fu a libi, èn na dey dati wantewante, ini wan momenti e kon na tapu yu leki wan trapu. Bika a sa kon na tapu ala den sma di e libi na tapu na heri fesi fu grontapu. Tan fu dati-ede dan na ay, ala ten e begi tranga taki yu mag fu psa ala den sani disi di seyker o psa èn fu tanapu na fesi na Manpikin fu libisma.” Mateyus 24:23-51; Markus 13:21-37; Lukas 21:25-36; Openbaring 14:1, 3; Yohanes 10:16.

◆ Sortu grontapu toestand e marki na denoya fu Krestes?

◆ Oten „ala lo fu grontapu sa naki den srefi ini sari”, ma san den bakaman fu Krestes sa du?

◆ Sortu agersitori Yeyses e gi fu yepi en disipri na ini na ten di e kon fu si oten na kba de krosibey?

◆ Sortu frumane Yeyses e gi disipri fu en di ben sa libi na ini den lasti dey?