Abi wan joisti loekoe tapoe a sari-ati foe Gado

A DATRA ben abi switifasi èn a ben e broko en ede foe troe. So leki fa en ben si en, dan a siki oema ben abi trangatranga wan oparâsi fanowdoe, foe so fasi a ben kan tan na libi. Di na oema ben draidrai èn tjari a tori foe a teki foe broedoe kon na fesi, disi ben froewondroe a datra. Di na oema ben tjari kon na krin taki foe relisi reide ede, a no ben man foe agri nanga wan oparâsi di ben sa wani taki dati a ben sa moesoe teki broedoe, a datra ben froewondroe toemoesi. A ben broko en ede foe denki tapoe sortoe fasi a ben sa man jepi na oema. Te foe kaba, a ben denki taki a ben feni wan fasi. A ben taki: „Joe sabi, efoe joe no teki broedoe, dan joe sa dede. Joe no wani dati, a no so?”

„A no de foe taki”, na so a siki oema ben taki.

„Ma leki fa a sori, efoe joe e teki broedoe, joe sa doe wan sani teige den sani di joe e bribi, di de prenspari gi joe toe. We, dan disi na san mi e gi joe leki rai. Foe san ede joe no e teki broedoe èn kibri joe libi so boen. Dan joe e taigi Gado taki joe sondoe èn abi berow. Na a fasi dati, joe sa feni joe presi baka ini joe relisi toe.”

A datra di ben e meine en boen, ben denki taki a ben feni a moro boen piki. A ben sabi taki a siki oema ben e bribi ini wan Gado di abi sari-ati. Seiker, disi ben de wan moi okasi foe meki gebroiki foe Gado en sari-ati! Ma a rai foe en ben de nètso reidelek leki fa a ben piki?

Wi e taki-go-taki-kon na a fasi disi wan ten?

Sontron kande wisrefi e taki-go-taki-kon neleki fa a datra ben doe. Kande wan onfroewakti gens di opo kon na skoro noso na wrokope frede wi. Noso kande wi de ini wan situwâsi di e meki wi firi sjen, pe wi de na ondro druk foe doe wan sani di no e kroederi nanga wi konsensi. Foe di a kon onfroewakti na wi tapoe, wi kan abi a firi foe teki a moro makriki pasi èn doe san wi sabi taki a fowtoe, ala di wi abi na prakseri taki baka ten wi sa aksi pardon.

Noso sma kan kisi tesi foe den eigi takroe firi. Wan jonkoeman, foe eksempre, kan de ini wan situwâsi pe a e kisi tranga tesi foe doe hoeroedoe. Na presi foe a feti nanga a fowtoe angri, a kan broko kindi, ala di a abi na prakseri foe seti na afersi nanga Gado baka ten. Son sma ben go srefi so fara foe doe wan serjoesoe sondoe, ala di den sabi taki kande den ben sa sluit den uit foe a kresten gemeente. So leki fa a sori, dan den ben taki-go-taki-kon nanga densrefi: ’Mi sa meki wan sjatoe ten pasa. Dan mi sa abi berow èn meki den teki mi baka ini a gemeente.’

Ala den situwâsi disi abi toe sani di de a srefi. A fosi sani, sma e broko kindi na presi foe den e feti foe doe san boen. A di foe toe sani, den e firi taki baka te den doe wan fowtoe sani, dati Gado moesoe foe gi den pardon, efoe den e aksi dati nomo.

San na a joisti loekoe?

Disi e sori taki sma e froestan a sari-ati foe Gado boen? We, go denki pikinso foe a sari-ati dati. Jesus ben taki: „Gado ben lobi libisma so te, taki a ben gi en wanenkri gebore Manpikin, so taki ala sma di sori bribi na ini en, no ben sa kisi pori, ma ben sa abi têgo libi” (Johanes 3:16). Na apostel Johanes ben tjari kon na krin fa a sari-ati dati e wroko, di a ben taki: „Mi e skrifi oenoe den sani disi foe oenoe no doe sondoe. Efoe tokoe wan sma doe wan sondoe, wi abi wan jepiman na a Tata, Jesus Krestes, wan regtfardiki sma” (1 Johanes 2:1). Foe dati ede, efoe foe onvolmaaktifasi ede wi fadon na ini wan sondoe, wi kan go na Gado ini begi èn begi en foe kisi pardon tapoe a gron foe na ofrandi foe Jesus.

Ma dati wani taki dati a no abi trobi efoe wi e sondoe efoe no, so langa wi e aksi foe kisi pardon baka ten? Noiti. Memre den fosi wortoe foe san den ben teki den wortoe skrifi: „Mi e skrifi oenoe den sani disi foe oenoe no doe sondoe.” Den wortoe foe Johanes moro fara ini a vers dati e sori a lobi seti foe Jehovah foe handri nanga na onvolmaaktifasi foe wi. Tokoe wi moesoe proeberi so tranga leki wi man foe tan farawe foe doe sondoe. Noso wi e sori tapoe wan fasi di e gi sari, taki wi no abi lespeki gi a lobi foe Gado, neleki den sma di Judas ben taki foe den, di den ben gebroiki a no-froedini boen-atifasi foe Gado leki wan pardon gi wan loesoefasi foe tjari densrefi. — Judas 4.

Efoe wi e si a sari-ati foe Gado leki wan sortoe nèt di e fanga wi foe gi wi kibri ala ten awansi san wi e doe, dan dati e meki a sari-ati foe Gado gersi leki a de wan pikin sani èn a e meki a gersi leki sondoe no de so takroe. Disi no de so kwetikweti. Na apostel Paulus ben froeteri Titus: „A no-froedini boen-atifasi foe Gado di e tjari froeloesoe kon gi ala sortoe sma, tjari kon na krin èn a e leri wi taki wi moesoe wai pasi gi ogrifasi nanga grontapoe lostoe èn moesoe libi na mindri a seti foe sani disi nanga gosontoe froestan èn regtfardikifasi èn a gi di wi e gi wisrefi na a dini foe Gado.” — Titus 2:11, 12.

Paulus ben sori en warderi gi a sari-ati foe Gado ini a fasi fa a ben e feti nanga en eigi onvolmaaktifasi. A ben taki: „Mi e dwengi mi skin èn mi e tjari en leki wan srafoe, foe baka te mi preiki gi trawan, misrefi no poti na wan sei na a wan noso tra fasi” (1 Korentesma 9:27). Paulus no ben e teki en leki a ben de wan gewoon sani, taki a ben moesoe sondoe sontron. Wi sa moesoe doe dati?

A fasi fa Jesus e si sani

Na wan okasi, Jesus ben sori fa a ben si a prakseri foe meki wan skeki nanga san boen èn teki wan moro makriki pasi foe kan tan farawe foe pina. Di a ben bigin foe froeteri den disipel foe en, foe na ofrandi dede foe en di ben de krosibei, Petrus ben proeberi foe gi en a rai foe no doe san a ben moesoe doe, di a ben taki: „De boen gi joesrefi, Masra; a sani disi no sa pasa nanga joe kwetikweti.” San Jesus ben doe na tapoe disi? „Komoto na mi fesi, Satan! Joe de wan ston gi mi foe naki foetoe fadon, bika joe no e denki den prakseri foe Gado, ma di foe libisma.” — Mateus 16:22, 23.

A tranga piri-ai di Jesus ben gi Petrus, ben sori na wan toemoesi moi fasi taki Jesus ben weigri foe teki wan makriki pasi, di ben abi foe doe nanga a doe foe sani teige a wani foe Gado. A tori e sori wi taki sondro foe degedege a ben tan waka na tapoe a leti pasi, ala di ala joeroe Satan ben e hendri èn e trobi en. Te foe kaba den ben spotoe en, den ben fon en hebi èn a ben pina foe di a ben dede nanga banawtoe. Tokoe a no ben meki wan skeki, èn foe dati ede a ben kan òfer en libi leki wan froeloesoe-ofrandi gi wi. Seiker a no ben froedrage ala den sani disi, so taki wi ben kan de ’boen gi wisrefi’ te problema nanga tesi opo ede kon!

Foe Jesus den ben taki: „Joe ben lobi regtfardikifasi èn joe no ben wani si kroektoedoe na ai” (Hebrewsma 1:9). A teki foe a moro makriki pasi na wan fasi di nofotron abi foe doe nanga kroektoedoe. Foe dati ede, efoe troetroe wi no wani si disi na ai — so leki fa Jesus ben doe — dan ala ten wi sa weigri foe meki wan skeki. Ini a boekoe Odo, Jehovah e taki: „De nanga koni, mi manpikin èn meki mi ati prisiri, so taki mi kan gi wan piki na a sma di e spotoe mi” (Odo 27:11). A regtfardikifasi foe Jesus di ben de ini balansi, ma di no ben meki wan skeki, ben prisiri na ati foe Jehovah srefisrefi. Wi kan gi Jehovah so wan prisiri toe efoe wi e waka na baka a fasi fa Jesus ben hori en soifri retifasi. — 1 Petrus 2:23.

Kisi leri nanga jepi foe horidoro

Na apostel Petrus ben skrifi: „Ini a sani disi oenoe e prisiri toemoesi, ala di na a momenti disi, foe wan sjatoe ten, efoe a moesoe de so, difrenti tesi e miti oenoe, so taki a fasi foe bribi foe oenoe di kisi tesi èn di de foe moro bigi waarde leki gowtoe di e pori, ala di faja kan sori san a de, a kan sori foe de wan reide foe prèise èn glori èn grani te Jesus Krestes sa tjari kon na krin” (1 Petrus 1:6, 7). Foe di wi de onvolmaakti èn wi e libi na mindri foe a grontapoe foe Satan, ala joeroe wi sa abi foe doe nanga tesi èn kori. Leki fa Petrus e sori, dan disi kan de wan boen sani gi wi. Den e tesi a bribi foe wi, foe sori efoe a de swaki noso tranga.

Den e dini toe foe gi wi leri. Jesus ben „leri foe gi jesi foe den pina di a ben moesoe njan” (Hebrewsma 5:8). Wi toe kan leri foe gi jesi, so boen leki foe froetrow na tapoe Jehovah, efoe wi e horidoro na ondro tesi. Èn a fasi disi foe leri, sa go doro te leki a kon de dorodoro, so leki fa Petrus ben taki: „Gado . . . srefi sa meki a leri foe oenoe doro en marki, a sa meki oenoe tan fasti, a sa meki oenoe kon tranga.” — 1 Petrus 5:10.

Ma efoe wi e meki wan skeki na ondro tesi, dan wi e sori taki wi no abi man-ati noso wi swaki, no abi nofo tranga lobi gi Jehovah èn gi regtfardikifasi noso no man dwengi wisrefi nofo. Iniwan swakifasi leki disi kan tjari wi matifasi nanga Gado serjoesoe ini kefar. Foe troe, a warskow foe Paulus kan kon troe ini wi kefal: „Efoe foe espresi wi e doe sondoe, baka di wi ben kisi a joisti sabi foe a waarheid, dan no wan srakti-ofrandi gi sondoe no tan abra moro” (Hebrewsma 10:26). Omoro betre a de na a fosi presi foe no sondoe, leki foe broko kindi gi swakifasi, nanga a tjans taki joe sa lasi ala froewakti foe a libi!

Soifri retifasi sondro foe poti kondisi

Ini den dei foe a profeiti Danièl den ben pramisi dri Hebrewman foe kiri den ini faja efoe den no ben sa anbegi wan kroektoe gado. Fa den ben piki? „Efoe a moesoe, dan a Gado foe wi di wi e dini man froeloesoe wi. Foe a faja onfoe di e bron èn foe joe anoe, o kownoe, a sa froeloesoe wi. Ma efoe a no moesoe, dan joe sa sabi, o kownoe taki wi no sa dini den gado foe joe, èn a gowtoe popki di joe meki, seiker wi no sa anbegi dati.” — Danièl 3:17, 18.

Den ben teki a sei dati, bikasi den ben wani doe san boen. Den ben de klariklari foe dede, efoe tra fasi no ben de. A froetrow foe den ben de ini na opobaka. Ma efoe Gado ben fri den, dan dati ben sa de moro boen. Ma a tanapoe di den ben tanapoe kánkan ben de sondro kondisi. So a moesoe de ala ten nanga foetoeboi foe Gado.

Ini a ten foe wi, den ben poti sonwan di ben weigri foe meki wan skeki, na strafoe-oso, den ben pina den, den ben kiri den srefi. Trawan ben òfer den grontapoe goedoe foe den, èn ben wani tan pôti moro leki foe kon goedoe nanga a bakapisi foe òfer den joisti gronprakseri. San ben pasa nanga a kresten oema di wi ben kari na a bigin foe na artikel disi? A ben warderi a boen reide di a datra ben abi, ala di dati ben fowtoe, ma a no ben meki wan skeki nanga en bribi. Na presi foe dati, a respeki foe en gi a wet foe Jehovah, ben meki a ben weigri na oparâsi. Kolokoe a kon betre èn a e go fajafaja doro nanga a dini foe Jehovah. Ma di a ben taki foe a sei di a ben teki, a no ben sabi san ben sa de a bakapisi, ma a ben sreka ensrefi foe libi a heri tori ini Jehovah anoe.

San ben jepi en foe tan so kànkan na ondro druk? A no ben proeberi foe froetrow na tapoe en eigi krakti èn so toe no wan foetoeboi foe Gado moesoe doe dati. Memre taki, „Gado de gi wi wan kibripresi nanga krakti, wan jepi di de makriki foe feni ini ten foe banawtoe” (Psalm 46:1). Omoro boen a de foe dati ede foe go na Gado foe kisi jepi, ala di wi de na ondro tesi, na presi foe sondoe èn go baka dati na en foe kisi sari-ati!

Ija, no meki noiti wi e doe nanga a kefarlek moi sari-ati foe Gado leki a de wan soso sani. Na presi foe dati, meki wi kweki wan opregti angri foe doe san joisti, srefi efoe wi e kisi foe doe nanga moeilekhèit. Disi sa meki a matifasi di wi abi nanga Jehovah kon moro tranga, a sa gi wi a leri di wi abi fanowdoe foe kisi têgo libi èn wi sa sori wan joisti lespeki gi a sari-ati foe Gado. So wan koni fasi foe handri sa prisiri na ati foe wi hemel Tata.

[Prenki na tapoe bladzijde 31]

A dorodoro froetrow ini na opobaka ben jepi den dri Hebrewman foe tan hori den soifri retifasi