Meki santafasi kon bun dorodoro na ini na frede gi Gado

„Meki wi krin wi srefi fu ibri doti fu skin nanga yeye, èn meki santafasi kon bun dorodoro na ini na frede gi Gado.” 2 KORINTE SMA 7:1.

1. Fa wi sabi taki engel di abi wan hey posisi e erken Yehovah santafasi?

YEHOVAH na a santa Gado. Engel di abi wan hey presi na ini heymel, e meki en santafasi bekènti ini wortu di wi no kan frustan fowtu. „Santa, santa, santa Yehovah fu den legre de. Na furu di sani furu heri na grontapu na en glori.” Dati ben de na elektrik kari fu den seraf di na profeyti Yesaya ben kon kisi fu si na ini wan fisyun na ini na di fu ayti yarihondro bifo G.T. Na a kba fu na fosi yarihondro fu na G.T. na apostel Yohanes ben si fisyun fu den sani di ben sa psa na ini „na dey fu Masra”, pe wi de now na ini. A ben si fo libi mekisani lontu Yehovah kownusturu èn ben yere sondro fu stop den e bari taki: „Santa, santa, santa Yehovah Gado de, na Almaktiwan, di ben de èn di de èn di e kon.” Taki Yehova, yeye mekisani dri tron e taki „santa”, e poti krakti tapu na moro hey santafasi fu na Mekiman di e psa ala santafasi. — Yesaya 6:2, 3; Openbaring 1:10; 4:6-8.

Santafasi èn a poti aparti fu wan sani

2. (a) San na den tu fasi ini santafasi èn fa Yehovah de ini ala tu fasi santa? (b) Fa Moses ben poti krakti tapu Yehovah santafasi?

² Santafasi no wwan wani taki krinfasi nanga soyfrifasi na ini a tori fu anbegi, ma so srefi tu a poti fu wan sani aparti ofu a toestand ofu fasi fu a de di wan sani de santa. Yehovah abi na moro hey fasi fu santafasi ofu soyfrifasi; a de krinkrin aparti fu ala fisti gado fu den nâsi. Na fasi disi fu en santafasi ofu eygifasi fu a de di a de santa Moses ben poti krakti a tapu di a ben singi: „Suma mindri den Gado de leki yu, o Yehovah? Suma de leki yu di e sori yu srefi makti na ini santafasi? — Exodus 15:11.

3. Na sortu fasi Gado ben aksi fu ala Israèl sma fu de santa, èn fa Yehovah ben yepi den na ini disi?

³ Na santa Gado Yehovah ben tanapu a tapu taki den Israèl sma fu owruten, en pipri na grontapu ben de santa tu. Disi a no ben aksi wwan fu den pristri nanga den lefi sma, ma sosrefi tu fu na heri nâsi. Yehovah ben taygi Moses: „Taygi na heri komakandra fu den manpikin fu Israèl èn yu musu taygi den: ’Yu musu sori taki yu de santa, bika mi, Yehovah, yu Gado, de santa’” (Leviticus 19:2). Nanga disi na ini prakseri meki Yehovah ben gi den weti fu yepi den tan krin na yeyefasi, moreelfasi, na frustanfasi. na skinfasi nanga na anbegifasi — na lastiwan ini a tori fu na anbegi fu den na a tabernakel èn bakaten na ini na tenpri.

Wan pipri di poti aparti

4, 5. (a) Fa na Israèl na skinfasi ben de wan santa nâsi? (b) San den e aksi fu den yeye Israèlsma èn fa na apostel Petrus e sori taki disi de so?

⁴ Na ini na marki pe den Israèl sma ben sa gi yesi na den weti fu Gado, meki den ben de krinkrin aparti fu den pori nâsi lontu den. Den ben poti aparti leki nâsi di ben de aparti ofu ben de santa gi na diniwroko fu na santa Gado, Yehovah. Moses ben taygi den: „Unu na wan santa pipri gi Yehovah, un Gado. Na unu Yehovah, unu Gado ben teki fu de en pipri, wan spesrutu gudu, fu ala pipri di de tapu a fesi fu na grontapu.” — Deuteronomium 7:5.

⁵ So wan krinfasi èn de aparti Gado e aksi so srefi tu fu na yeye Israèl. Na apostel Petrus ben skrifi gi den sma di den ben teki puru fu de yeye Israèl sma: „Leki pikin di e gi yesi no seti yu srefi moro langa akruderi den lostu di yu ben abi fositen di yu ben de na don, ma kon de santa na ini yu heri libi nanga waka akruderi na Santawan di ben kari yu, bika Buku skrifi: ’Yu musu de santa, bika mi de santa.’” — 1 Petrus 1:1, 14-16.”

6, 7. (a) Fa Openbaring kapitri 7 e taki fu den memre fu na „bigi ipi”, èn san den e aksi logikafasi fu den? (b) San wi sa luku ini den tra paragraaf di e kon?

⁶ Openbaring kapitri 7 e srifi taki den memre fu na „bigi ipi tanapu . . . na fesi fu na kownusturu fu Yehovah èn fu na lam, den ben Weri langa weti krosi”, fu di den „ben wasi den langa krosi fu den èn meki den kon weti na ini na brudu fu na Lam” (Openbaring 7:9, 14). Den langa weti krosi fu den e agersi na krin nanga regtvaardiki presi fu den na fesi fu Yehovah, wan presi di a e gi den fu na bribi ede fu den na ini na brudu fu Krestes di e frulusu sma, A de fu dati-ede krin taki no wwan den salfu kresten, ma so srefi tu den „tra skapu” musu tan na yeye fasi èn moreelfasi krin fu anbegi Yehovah tapu wan fasi di a e teki. — Yohanes 10:16.

⁷ Meki wi go luku now san den ben e aksi fu Yehovah pipri na ini owruten fu sori taki den ben krin èn santa, èn fu san-ede den srefi gronprakseri disi de gi Gado pipri na ini a ten disi.

Yeye krinfasi

8. Fu sortu reyde den Israèl sma ben musu hori den srefi aparti fu den fasi fu anbegi fu Kanan?

⁸ Den Israèl sma na skinfasi ben musu luku bun fu hori den srefi aparti fu den doti gwenti fu anbegi fu tra nâsi. Nanga mofo fu Moses Yehovah ben taygi Israèl: „Luku bun, fu meki wan frubontu nanga den sma fu na kondre pe yu e go, so taki a no tron wan trapu na unu mindri. Ma unu musu broko den latari fu den, èn den santa pilari [di den ben e kobroyki na ini tegu seks anbegi fu den] unu musu maskaderi, èn den santa postu fu den unu musu koti trowe. Bikasi unu no mag trowe unu srefi na gron na fesi tra gado, bikasi Yehovah, di nen na Dyarusu, na wan dyarusu Gado [ofu: „wan Gado di e aksi fu yu dini en wwan”, Nyun Grontapuvertaling, Stukabeybri futuwortu] so taki unu no meki wan frubontu nanga den sma fu na kondre, fu di seyker den sa abi hurudu gemeenschap nanga den gado fu den èn sa tyari srakti-ofrandi go gi den gado fu den.” — Eksodus 34:12-15.

9. Sortu soyfri lin fu libi ben gi na a kotrow fikapisi di ben hari komoto fu Babilon ini 537 bifo G.T.?

⁹ Someni yarihondro bakaten Yehovah nanga yepi fu en yeye ben tyari Yesaya go so fara fu taki den profeyti wortu di e kon gi na kotrow fikapisi di ben komoto fu Babilon dray go baka na Yuda: „Hari komoto fu drape, no fasi no wan sani di no krin; komoto fu en mindri, hori yu srefi krin, unu di e tyari den wrokosani fu Yehovah, [di ben musu kobroyki na a meki kon bun baka fu na soyfri anbegi na ini na tenpri na ini Yerusalen].” — Yesaya 5:11.

10, 11. (a) Sortu srefi lin fu libi ben gi ini na fosi yarihondro G.T. na den yeye Israèl sma? (b) Fa den lin disi fu libi spesrutu sensi 1919 nanga 1935 sma ben waka na den baka, èn na sortu tra fasi den salfuwan nanga den konpe fu den ben hori den srefi krin na yeyefasi?

¹⁰ Na a srefi fasi den yeye Israèl sma nanga den konpe fu den musu hori densrefi sondro flaka fu den kruktugado fasi fu anbegi fu na grontapu disi. Na apostel Paulus ben skrifi gi salfu kresten na ini na gemeente Korente: „Sortu kruderi na tenpri fu Gado abi nanga kruktugado? Bika wi na wan tenpri fu wan libi Gado, so leki Gado taki: ’Mi sa libi na den mindri èn waka na den mindri, èn mi sa de den Gado èn den sa de mi pipri.’ ’„Komoto fu dati-ede fu den mindri èn hari yu srefi puru”, Yehovah e taki, „èn no fasi moro langa wan sani di no krin”’; ’„èn mi wani teki yu”’” — 2 Korente sma 6:16, 17.

¹¹ Sensi 1919 den memre fu na salfu fikapisi di kon krin èn soyfri ben kon de fri fu na doti nanga kruktugado fasi fu anbegi fu Babilon na Bigiwan (Maleaki 3:1-3). Den ben poti prakseri tapu na kari di ben komoto fu heymel: „Komoto fu en, mi pipri, efu unu no wani abi prati na ini en sondu, èn efu unu no wani kisi afu fu en plaag” (Openbaring 18:4). Fu sensi 1935 „wan bigi ipi” tra skapu di e gro dey fu dey ben poti so srefi tu prakseri tapu na kari disi èn ben dray baka gi na doti Babilon fasi fu anbegi. Den salfuwan nanga den konpe fu den e hori den srefi so srefi tu krin na yeyefasi fu di den e tan farawe fu ibri kontakti nanga den pori denki fu den sma di fadon komoto fu bribi. — Yohanes 10:16; 2 Yohanes 9-11.

Moreel krinfasi

12. (a) Nanga yepi fu sortu weti Yehovah ben opo na moreel kondisi fu den Israèl sma bun fare fu den di fu den nâsi di ben lontu den? (b) Sortu lin ben de gi den pristri fu hori soyfri?

¹² Nanga yepi fu na Wetfrubontu Yehovah ben opo na moreelfasi fu den Israèl sma poti hey moro leki den pori fasi pe den nâsi di ben de lontu den ben de na ini. Na trowlibi èn na osofamiri libi ben de sani di ben seti na ini Israèl èn di ben de kibri den. Na di fu seybi fu den tin komando ben tapu sutadu. Tapu sutadu nanga hurudu hebi strafu ben de (Deuteronomium 22:22-24). Nyunwenke ben kisi kibri na ondro na wet (Deuteronomium 22:28, 29). Den lin di ben gi na trowlibi, spesrutu den pristri ben musu hori den soyfri. Na granpristri ben mag teki soso wan krin nyunwenke leki uma. — Leviticus 21:5, 7, 10, 13.

13. Nanga san den e teki den memre fu Krestes „trowmisi” gersi, èn fu san-ede?

¹³ Na so na Bigi granpristri, Yeyses Krestes, abi so srefi tu wan „trowmisi” di de fu 144.000 salfu kresten, di den e teki gersi nanga „nyun wenke” (Openbaring 14:1-5; 21:9). Den e hori den srefi sondro flaka fu na grontapu fu Satan èn e tan soyfri ini a tori fu leri nanga moraal. Na apostel Paulus ben skrifi gi salfu kresten na ini Korente: „Mi dyarusu tapu unu nanga wan gado dyarusu, bikasi mi srefi ben pramsi unu fu trow nanga wán man so taki mi sa man pristeri unu leki wan krin nyunwenke na Krestes” (2 Korente 11:2). Paulus ben skrifi tu taki: „Krestes so srefi tu ben lobi a gemeente èn ben gi en srefi abra na en fu santa en, krin en nanga a wasi nanga watra nanga yepi fu na wortu, so taki a ben sa pristeri na gemeente na ini en glori na en srefi, sondro flaka ofu proyproy ofu so wan sortu sani, ma taki a ben sa de santa èn sondro flaka.” — Efesiya sma 5:25-27.

14, 15. (a) Nanga san na soyfrifasi fu na trowmisi-grupu musu go makandra, èn sortu tekst e sori disi? (b) San e sori krin taki den sortu weti disi fu moreel soyfrifasi de so srefi tu gi den tra skapu?

¹⁴ Na yeye soyfrifasi disi fu Krestes trowmisi musu go makandra nanga moreel krinfasi fu a sey fu den memre fu en. Na apostel Paulus ben fruklari: „No kori unu srefi. No huruman, no kruktugado diniman, no sutaman sa kisi Gado Kownukondre. Toku sonwan fu unu ben de dati. Ma unu ben wasi kon krin, ma unu ben kon de santa.” — 1 Korinte sma 6:9-11.

¹⁵ Taki den sortu libifasi disi, fu moreel soyfrifasi so srefi tu de gi tra skapu, e kon na krin te wi luku suma Yehovah sa tapu pasi gi, fu go na ini en pramisi nyun heymel nanga nyun grontapu. Wi e leysi: „Ma fu a sey fu den sma di de wan tegu sani na ini na dotifasi fu den nanga kiriman èn huruman. . ., na porsi fu den sa de na ini na se di e bron nanga faya nanga swarfu. Disi wani taki na di fu tu dede.” — Openbaring 21:1-8.

Wan krin trowlibi

16, 17. (a) Sortu tekst e sori taki na fasi fu de sondro fu trow ben de wan weti fu moreel krinfasi? (b) Fa wan kresten ini a teki fu wan trowpatna kan sori wan yoysti frede gi Gado, èn fu san-ede a no ben sa de wan koni sani fu poti na skotu fu na apostel na wan sey?

¹⁶ No den salfu memre fu na trowimisi-grupu no den tra skapu Gado ben aksi taki den musu tan sondro fu trow fu kan kibri den moreel krinfasi. Na fruplekti celibaat [tan sondro fu trow] no komoto fu beybri (1 Timoteyus 4:1-3). Sekslibi inisey fu na trowlibi no de wan sani di no krin. A Wortu fu Gado e taki: „Na trow ibi musu de krin a mindri ala sma èn na trowbedi sondro flaka bikasi Gado e krutu huruman nanga sutaman.” — Hebrew sma 13:4.

¹⁷ Ma wan kresten di „[wani] meki santafasi kon de bun doiodoro na ini na frede fu Gado”, no musu firi en srefi fri fu trow nanga suma en wani nomo. Leti bifo na apostel Paulus ben gi en konpe kresten na ray ’fu krin den srefi fu ibri doti fu skin nanga yeye èn meki santafasi kon bun dorodoro na ini na frede fu Gado’, a ben skrifi: „No kon na ondro wan tyatyari di no de a srefi nanga sma di no de na bribi. Bikasi san regtvaardikifasi abi fu du nanga kruktudu? . . . Ofu sortu pisi wan bribiwan abi nanga wan sma di no de na bribi?” (2 Korente sma 6:14, 15; 7:1). Leki wan memre fu Yehovah krin pipri di poti en srefi aparti wan kresten man ofu wan kresten uma di wani trow sa teki na skotu di na apostel poti fu trow „soso na ini Masra”, dati wani taki fu teki wan sma di de wan kotrow futuboy fu Gado di gi ensrefi abra èn teki dopu (1 Korente sma 7:39). Neleki na ini owruten na so a ben sa de tu na ini a ten disi wan sani di seyker no ben sa de wan koni sani te memre fu Gado pipri di gi den srefi abra ben sa poti na ray disi fu beybri a wan sey. (Teki gersi nanga Deuteronomium 7:3, 4; Nehemiya 13:23-25.) Wan sma no ben sa sori nanga dati wan gosontu frede gi wi tumusi bun meystri, Yehovah. — Maleaki 1:6.

18. Na sortu tra fasi kresten sma kan hori a trowlibi fu den krin?

¹⁸ Boyti fu dati, yu ben abi na ini Israèl weti di ben skotu seksdu srefi inisey fu a trowlibi. Wan trowmasra no ben mag abi seks nanga en uma efu a ben de na en futu (Leviticus 15:24; 18:19; 20:18). Disi ben aksi lobi èn a frustan di Israèl man ben musu frustan den uma èn a dwengi di den ben musu dwengi den srefi. Kresten man ben sa musu sori moro mendri taki den srefi tu e frustan na uma fu den na ini disi? Na apostel Paulus e taki taki kresten trowmasra musu libi na den uma fu den „akruderi sabi”, dati wani taki fu na fasi fu den leki „wan moro swaki prapi, na umasma fasi”. — 1 Petrus 3:7.

„Waka na pasi fu santafasi”

19, 20. (a) Fruteri fu na bradi pasi pe moro furu sma de a tapu. (b) Fa Yehovah pipri musu de tra fasi leki Satan grontapu? (c) Tapu sortu edepasi Gado pipri de, oten disi ben kon opo èn suma wwan e kisi pasi fu go a tapu?

¹⁹ San wi taki dyaso a fesi e poti krakti tapu na olo di dey fu dey e kon moro bradi èn di e prati Yehovah pipri fu Satan grontapu. Na disiten seti fu sani moro nanga moro e gi pasi fu sma du sani èn moro nanga moro e suku prisiri gi den srefi. Yeyses ben taki: „Psa go na ini na smara doro; bikasi bradi èn bigi na pasi de di e tyari sma go na pori, èn furu sma de di e psa go na ini” (Mateyus 7:13). Na moro bigi pisi fu libisma e waka na bradi pasi dati, ofu fu taki en nanga wortu fu na apostel Petrus, na pasi fu „lusufasi fu waka nanga libi, lostu, dringi win psa marki, nyan èn dringi psa marki, dringipartèy nanga kruktugado anbegi di no mag”, wan pasi di e tyari sma go na wan „lagi swanpu fu yayolibi” (1 Petrus 4:3, 4). Na kba fu dati na pori.

²⁰ Na pipri fu Gado na a tra sey e waka wan tra pasi, wan krin pasi, pe krin sma de a tapu. Taki na pasi disi ini a ten fu na kba ben sa opo, na profeyti Yesaya ben taki a fesi di a ben srifi: „Èn drape seyker wan edepasi sa kon, iya, wan pasi, èn na Pasi fu Santafasi den sa kari dati. Na sma di no krin no sa waka psa en” (Yesaya 35:8). Na ini wan kommentaar tapu na profeytitori disi na buku Seykerfasi na a heri grontapu ondro na Vredekownu e taki: „Na ini 1919 wan agersi edepasi ben opo gi den prisiri dienstknegti fu Gado . . . Den sma di ben wani de santa na ini Yehovah ay, ben waka tapu na ’edepasi’ dati, ’na Pasi fu Santafasi’ . . . now now, so fara na ini ’na bosroyti fu na seti fu sani’, ’na edepasi’ dati di Gado ben gi de te now ete opo. Ipi-ipi sma di abi warderi e koti go na ini na pasi di e go na a yeye paradeysi, ’na Pasi fu Santafasi’.”a

21. Fa èn fu san-ede Yehovah futuboy musu de aparti fu na ipi fu Ddibri, èn san wi sa luku na ini na tra artikel?

²¹ Na salfu fikapisi fu den yeye Israèl sma nanga den konpe fu den, den tra skapu, e poti den srefi ini a ten disi aparti leki wan pipri di hari en srefi puru fu Satan grontapu di lasi ala a frustan di den musu frustan san santafasi wani taki. Noti de santa gi na ipi sma di e waka baka Ddibri èn den e waka na ’bradi èn bigi pasi di e tyari sma go na pori’. No wwan na yeyefasi èn moreel fasi den no de krin ma na ini furu geval den de so srefi tu na skinfasi no krin, èn na fasi fa den e tan na dorosey de te yu taki en safri morsu. Toku ete na apostel Paulus e taki: „Meki wi krin wi srefi fu ibri doti fu skin nanga yeye èn ini na frede fu Gado meki santafasi kon bun dorodoro” (2 Korente sma 7:1). Na sortu fasi Gado pipri musu luku bun fu de krin na frustan èn skinfasi, na tra artikel o sori wi.

[Futuwortu]

Penti di wi wani luku ete wan tron

◻ Sortu tu sey de na ini santafasi èn fu san-ede wi kan taki taki Yehovah abi na moro hey fasi fu santafasi?

◻ Na sortu fasi den Israèl sma ben musu sori taki den de wan santa nâsi?

◻ San Gado e fruwakti fu yeye Israèl sma nanga den konpe fu den, den tra skapu?

◻ Fa na frede fu wi gi Gado musu abi krakti tapu a teki fu wan trowpatna?

◻ Sortu tu pasi sma kan waka na ini a ten disi, èn fu san-ede a musu de krin taki wi teki a mindri den tu disi?

[Prenki na tapu bladzijde 23]

Gado Wortu e taki: „Na trowlibi musu de krin”