Wan koni oema e sori dati a no de soekoe hen égi boen nomo
1, 2. (a) Sortoe sani di ben pasa leki wan drama ini na di foe féfi eeuw bifo G.T., wi e go loekoe now, en pe den ben skrifi? (b) Soema ben de Ahasveros? (c) Foe sainde na waka go ini na ten di pasa sa de warti?
DRAPE a ben tanapoe ini na foto Susan (Susa). Na oso ben de wan toemsi moi kownoe-oso. Den mekiman foe na oso? Kande na kownoe foe Persia-kondre Darius 1 nanga hen manpikin Xerxes 1. Den materiaal foe meki na oso moi, ben tjari komoto foe farawe presi. Foe eksempel, so a tanapoe foe lési tapoe wan skrifi foe Darius dati na sedre-oedoe ben komoto foe Libanon, na gowtoe foe Sardis en Bactria-kondre, na solfroe nanga kopro foe Egypte en den asaw-tifi foe den kondre leki Ethiopia nanga India.
2 Ini na ten disi soso wan toe broko-broko pisi foe na wanten moi kownoe-oso tan abra. Ma nanga na bijbelboekoe Esther, di kande na vroom Hebré soema Mordechaï ben skrifi, wi kan go „fisiti” na tanpresi dati foe na kownoe ini na di foe féfi eeuw bifo wi Gewoon Teri. Wi kan go ondrofeni njoen-njoen baka, leki wan drama, den sani di ben pasa ini wan toe tin-tron jari (foe so wan 484 te 474 bifo G.T.), di na pipel foe Gado ben tanapoe fesi na tesi foe den kiri den alamala poeroe ini na heri kownoekondre foe Persia. Dati ben de ini den dé foe Ahasveros (kande Xerxes 1). Na waka foe wi ini na farawe ten di pasa kaba sa de warti, bikasi den sortoe bijbel tori disi ben skrifi foe leri soema di lobi Gado, sodati wi „ben sa abi howpoe nanga jepi foe na hori-doro foe wi en nanga jepi foe na troostoe di komoto foe den Boekoe.” — Rom. 15:4.
NA SOEKOE FOE ÉGI BOEN E TJARI SJEN KON
3-5. San ben de na fortresi Susan en sortoe konmakandra ben hori drape ini na di foe dri jari foe na rigeri foe kownoe Ahasveros?
3 Kownoe Ahasveros foe Persia, di na kownoekondre foe hen abi 127 kroetoe-district, komoto foe Etiopia go miti India, de foe wan pisi ten tapoe hen troon ini wan foe den tanpresi foe hen, da foe taki na fortresi Susan, di de difrenti kownoe-oso makandra ini wan gebied di meki kon tranga. A de now na di foe dri jari foe hen rigeri en a ben kari kon na wan konmakandra hen dinari, granman, sroedati-edeman nanga gransoema. Na konmakandra disi ben hori 180 dé, kande disi ben de so, foe ben kan gi oso na den foeroe hé lantiwrokoman di na frantwortoe foe den no ben gi den pasi foe den alamala kan de tapoe a srefi ten. (A ben kan abi foe doe toe nanga wan afersi foe sroedati, bikasi na Griki Historiaman Herodotus ben verteri dati ini na di foe dri jari foe na rigeri foe Xerxes na kownoe ben hori wan konmakandra foe meki plan foe go feti nanga Grikikondre). — Esther 1:1-4.
4 Ini na kaba foe na spesroetoe konmakandra disi na kownoe e hori wan fesa-njanjan foe sébi dé gi ala soema ini na fortresi Susan. Na fesa disi e hori ini na fesi-djari foe na palési-djari. Meki wi loekoe lontoe pikinso! Ja, na mindri den artikel foe meki sani moi, joe abi linnen, katoen nanga blaw krosi, di fini sortoe tité tai den hori, so toe redi-purper ferfi wol ini solfroe linga. Wi e si dja marmer postoe, gowtoe nanga solfroe rostoe-bedi tapoe wan gron di mesre nanga purperston, nanga marmer nanga krara nanga blaka marmer. — Esther 1:5, 6.
5 Na a fesa disi win e dringi ini difrenti sortoe bigi gowtoe kan. Den Persia soema abi na nen dati den e dringi foeroe sopi. Ma tapoe na fesa disi den no e doe leki fa den gwenti foe verplekti wan soema foe dringi wan bepaalde hoeveelheid. — Esther 1:7, 8.
6. Sortoe oema Vasthi de en fa disi e kon na krin?
6 Ini wan foe den tra kownoe-oso na oema-kownoe Vasthi e hori wan fesa-njanjan gi den oema. A de now na di foe sébi dé foe na fesa foe na kownoe en leki wan bakapisi foe na win, hen ati de nanga prisiri. A de verteri sébi wrokoman foe hen kownoe-oso foe tjari kon na hen nanga hen fisitiman fesi na moi-skin oema Vasthi. Ma san na disi now? Vasthi e tan wégri foe gi jesi na a wortoe foe na kownoe. Nanga ati-bron, Ahasveros e soekoe na rai foe sébi foe den moro krosibé granman foe hen, wan groepoe foe koni man, di sabi lanti-wet boen. „Leki fa na wet taki”, na kownoe e aksi, „San moe doe nanga na oema-kownoe Vasthi?” Na oema disi di e soekoe hen égi boen nomo meki na fowtoe dati a wégri foe saka hensrefi na a kownoe ondro! — Esther 1:9-15.
7, 8. (a) Nanga soema Vasthi no ben tjari hensrefi boen, en san na fasi disi ben tjari kon gi hen? (b) San wi kan leri foe na waka en libi foe Vasthi?
7 Arki! Leki na Moro prenspari takiman foe den sébi granman, Memukan e tjari kon na fesi, dati Vasthi no wawan no tjari hensrefi boen nanga na kownoe, ma ooktoe nanga den granman en nanga den soema di e libi ini na heri kownoekondre. Den sma sa kon sabi na fasi fa a waka en ala den oema, srefi den oemapikin foe kownoe sa veragti den masra foe den. Foe datede Memukan e gi leki rai meki na kownoe meki wan bosroiti go na doro, dati Vasthi no mag kon moro na hen fesi, en dati hen kownoefasi gi na wan moro betre oema. Dan ala den trow-oema sa respeki den masra. — Esther 1:16-20.
8 Na rai disi prisiri Ahasveros. Heresi papira e seni go na ala kroetoe-district, gi ibri pipel ini hen égi tongo. Leki wan foe den wet foe den Meden nanga Persen di no kan kenki moro, na komando disi taki, dati „ibri man moe tan de leki granman ini hen égi oso” (Esther 1:21, 22). Na saka di Vasthi no ben saka hensrefi na ondro na kownoe en na soekoe di a ben soekoe hen égi boen ben kostoe hen na kownoe troon. Den fasi disi ben tjari sjen gi hen.
WAN OEMA NANGA SAKAFASI E KISI BOEN-ATI
9. Fa den ben sa teki wan oema-kownoe foe poti ini na presi foe Vasthi?
9 Wan pisiten e pasa bifo na atibron foe Ahasveros e kowroe. Dan akroederi nanga na rai foe den minister foe na kownoe, boskopoeman e go na ala kroetoe-district foe soekoe moi jongoe wendje. Den oema disi e tjari kon ini na fortresi Susan en den e kon ondro na frantwortoe foe na eunuch Hegai. Den sa ari na skin foe den wendje di den teki en na jongoe oema di Ahasveros lobi moro, sa tron oema-kownoe ini na presi foe Vasthi. (So wan fo jari pasa foe sensi na ten di Vasthi ben poeroe leki oema-kownoe te leki na poti ini hen presi foe wan tra oema en na drai drai disi kande kon, foedi a kownoe no ben de, ma ben e feti nanga den Griki). — Esther 2:1-4, 16, 17.
10. (a) Soema na Mordechaï? (b) Soema na Esther?
10 Wan soema di abi foeroe belangstelling foe na soekoe foe wan njoen oema-kownoe de na dinari foe na kownoe, Mordechaï. Na vroom djoe disi foe na lo foe Benjamin de na bakaten-pikin foe wan seker Kis, di na Babylon kownoe Nebudkadnezar ben tjari komoto ini Jeruzalem go ini katibo, makandra nanga kownoe Jojachin (Jechonja) ini (617 bifo G.T.). Wan pisiten pasa kaba, Mordechaï ben de na kwekipapa foe na wésipikin Hadassa wan nen di wani taki „mirt” (wan bromki). Na oemapikin disi di den ben sabi toe nanga na nen Esther (san wani taki njoen mirt), ben de na oemapikin foe Mordechaï omoe, di dede en di ben nen Abichail. En fa a ben tron wan toemsi moi oema! Ja, a „ben moi na skin en moi foe loekoe.” A no de wan froewondroe sani foe datede, dati Esther de na mindri den jongoe oema di tjari konmakandra ini na fortresi Susan en di ben poti ondro na frantwortoe foe Hegai. — Esther 2:5-8, 15.
11. Fa Hegai e handri nanga Esther en san a no e verteri leki fa Mordechaï ben gi hen komando?
11 Hegai e feni Esther moi, foe datede meki ai doe moeiti foe gi hen na joisti ari skin nanga na joisti njanjan. Den e teki srefi sébi jongoe oema foe dini hen ini na moro boen presi foe na oemasoema-oso. Esther no verteri, dati hen na wan djoe-wendje, soleki hen owroe neef Mordechai ben gi hen komando. Siksi moen langa den wendje e kisi wan ari skin nanga mirre-oli en baka dati wan ari skin foe siksi moe nanga balsemoli. Dan ibri oema e go na inisé na Ahasveros en baka dati a de drai go na a „di foe toe oema-soema-oso” di de ondro na frantwortoe foe Saäsgaz, na waktiman foe den tra oema foe na kownoe. — Esther 2:9-14.
12. Sortoe égifasi Esther abi, fa Ahasveros e si hen, en nanga sortoe bakapisi?
12 Esther no e soekoe en prakseri hen égi boen nomo, a no e vertrow tapoe na meki moi foe hensrefi na dorosé en a no e aksi noti san Hegai no ben kari. Ala den ten dati, a ben kisi na boen-ati foe ibri soema di ben si hen. A de now na moen Tebeth (December-Januari), na di foe tin moen ini na di foe sébi rigeri jari foe Ahasveros. Na tori e span sref-srefi te den tjari Esther go na fesi na kownoe. Ai abi prisiri nanga hen? Ja, foe troe! Na kownoe foe Persia ben kon lobi Esther moro leki ala den tra oema, en meki hen tron oema-kownoe na presi foe Vasthi. Gi ala hen granman nanga dinari na kolokoe kownoe ben hori wan bigi fesa, „na fesa-njanjan foe Esther”. Boiti dati a gi na ala den kroetoe-district fri (kande foe pai belasting, fri foe sroedatiwroko, ofoe foe strafoe-oso ofoe toe foe den sani disi makandra). Ahasveros tan gi presenti soleki wan kownoe nanga goedoe kan doe. Fa disi de wan prisiri ten. — Esther 2:15-18.
13. (a) San ben de na moro prenspari prodo foe Esther? (b) Fa kristen oema ini disi ten kan njan boen foe dati te den e loekoe na waka en libi foe Vasthi nanga Esther?
13 Wan troe troe sakafasi oema ben kisi boen-ati. Aladi Esther kisi now na positie foe wan oema-kownoe foe Persia, tog a de gi jesi na den komando foe Mordechaï (Esther 2:19, 20). Te wi loekoe hen baka, dan wi kan si Esther leki wan moi oema nanga kownoe-krosi. Tog na moro prenspari „prodo ben de a inisé sma, disi kibri na ini ati nanga sani di no kan pori, foe taki, nanga wan tiri safri geest; dati de diri en warti ini Gado ai” (1 Petr. 3:3, 4). Kristen oema foe na ten disi abi ala reden foe no waka baka na fasi foe Vasthi, di den ben poeroe leki oema-kownoe, en di ben soekoe en prakseri hen égi boen nomo, en waka baka den gadofasi foe Esther foe sakafasi nanga no soekoe en prakseri foe hen égi boen.
14. Foe sainde Mordechaï spesroetoe ben sa abi prisiri di Esther tron oema-kownoe?
14 A de ooktoe wan moi sani foe taki, dati di den ben meki Esther tron oema-kownoe, bigi prisiri ben de en dati Mordechaï, hen owroe neefi, nanga hen heri ati ben teki prati ini disi. A ben moesoe firi dati disi, te foe kaba, ben sa tjari boen kon gi ala djoe ini den district foe Persia.
LOYAAL, SONDRO FOE POTI GADO WET NA WAN SÉ
15. Sortoe barki di meki Mordechaï e tjari kon na krin en san e pasa nanga den toriman?
15 Esther e tan miti nanga Mordechaï en ai doe leki fa a taki. Di a ben sidon ini na portoe foe na kownoe, den wrokoman foe kownoe Bigtan nanga Teres (di kande de hori wakti na a particulier kamra foe na kownoe) e kisi ati-bron en den tan soekoe wan fasi foe kiri kownoe Ahasveros. Di Mordechaï jere foe na mofo disi, a verteri Esther wantron wantron, di ini nen foe Mordechaï go verteri na kownoe. San Esther verteri meki den ondrosoekoe na tori. Ini wan sjatoe ten den gi den toe toriman na dede-strafoe en den anga den dede skin na publiki na wan postoe, foedi na a kownoe den ben wani doe ogri. Aladi Mordechaï no e kisi wan paiman na a momenti dati, tog na loyaal doe foe hen e skrifi poti ini na boekoe foe afersi di no pasa langa ete. — Esther 2:21-23.
16, 17. (a) Soema na Haman? (b) Foe sainde Mordechaï e wégri foe trowe hensrefi na Haman fesi?
16 Aladi Mordechaï de loyaal en a abi joisti respeki gi na makti foe lanti, tog a no de poti Gado wet na wan sé. Di wan pisi ten pasa, dan Ahasveros foe wan ofoe tra reden poti wan seker goedoeman Haman leki fosi minister. Boiti dati, na kownoe wani foe ala hen dinari na a portoe foe na palési, dati den boigi dipi gi Haman en trowe densrefi na gron. Ma loekoe na Mordechaï! Ai wégri foe trowe hensrefi na fesi na fosi minister di den poti. Disi e meki Haman kon foeroe nanga atibron. — Esther 3:1-5.
17 Foe sainde Mordechaï teki so wan fasti bosroiti? We, Haman na wan Agagiet, kande wan Amalekiet foe na kownoe famiri. Jehovah ben gi komando foe ben kiri den Amalekiet soema poeroe, foedi den ben sori ogri-ati gi Gado nanga hen pipel en den ben go feti nanga den Israël soema ini na sabana (Ex. 17:8, 14-16; Deut. 25:17-19; 1 Sam. 15:1-33). Foe datede meki Mordechaï di e frede Gado e wégri sondro degedege foe fadon fesi Haman. Boigi hensrefi no wawan ben sa sori respeki, ma ooktoe vréde en kande srefi grani gi na Amalekiet disi. Mordechaï joe no kan tjari hen kon tapoe wan tra prakseri, bikasi disi na wan afersi foe tan getrouw na Gado.
18. San Haman poti na prakseri foe doe nanga Mordechaï nanga den djoe ini na heri kownoekondre foe Persia?
18 Nanga atibron Haman e bigin soekoe fasi foe kiri poeroe Mordechaï nanga hen pipel, den djoe ini na heri kownoekondre. Foe datede, ini nisan, na fosi moen foe na di foe twarfoe rigeri jari foe Ahasveros, na Agagiet, sondro foe abi konsensi-fonfon, go na loekoeman. A de meki „wan soema (kande wan astroloog) iti na Poer, dati wani taki na lot”. Disi a de doe foe kon sabi sortoe dé de na moro boen dé foe kiri na pipel foe Jehovah poeroe. — Esther 3:6, 7.
19, 20. San Haman e taki tapoe wan léfasi gi Ahasferos foe den djoe, en san e pasa foe datede?
19 Te Haman e taki now nanga na kownoe, Ahasveros, a de verteri tapoe wan léfasi, dati den djoe de soema di no boen en di e pasa wet. Dan na Agagiet e poti wan economia winimarki na tapoe en ai, taki: „Meki wan skrifi de dati den kiri den poeroe en mi sa pai tin doesoen talanti (dati de foeroe miljoen goloe) ini na anoe foe den soema di e doe na wroko, foedi den o tjari dati kon ini na goedoe-oso foe na kownoe”. — Esther 3:8, 9.
20 Ahasveros e bribi den falsi kragi? Ja, foe troe! Na kownoe e poeroe hen zegel-linga, di e gebroiki foe poti wan zegel tapoe den papira, di na kownoe e gi na Haman. „Mi e gi joe na solfroe en ooktoe na pipel foe joe doe nanga den san de boen ini joe ai”, na rigeriman foe Persia e taki. Heresi den kownoe sekretarsi ondro na tiri foe Haman e skrifi brifi nanga na komando foe kiri den djoe. Na a tra sé, Haman e gebroiki na zegel-linga, di abi na aparti marki foe na kownoe. Na ogri Haman e druk na linga ini was ofoe wan tra safoe sani tapoe den papira, sodati den abi krakti na lantiwet. — Esther 3:10-12.
21. Akroederi wan bosroiti foe na kownoe, san moe pasa nanga den djoe tapoe 13 Adar ini na di foe 12 jari foe Ahasveros rigeri?
21 Heresi den brifi de ini na anoe foe boskopoeman, di e rij gaw post-asi. Na bosroiti di meki bekenti ini difrenti tongo en di panja ini ala den kondre, e gi na reti foe kiri den djoe en poeroe ala sani na den anoe. Oten? Tapoe na di foe tina-dri wintermoen Adar (Februari-maart). Foe datede a de wan sani foe verstan, dati aladi Ahasveros nanga Haman e sidon dringi makandra, bigi broeja de ini na foto Susan, pe foeroe djoe de. — Esther 3:13-15; 9:18.
WAN TEN PE DEKATI BEN DE FANOWDOE
22. Fa Mordechaï nanga den tra djoe e doe te den jere foe na plan foe kiri den poeroe?
22 Te Mordechaï jere na plan foe kiri na djoe pipel poeroe, a de priti hen krosi, en weri wan saka-krosi nanga asisi leki wan marki foe sari en bari wan bita en tranga kré. Na kon krosibé foe wan bigi ongolokoe e meki ooktoe wan bigi babari kon na mindri den djoe ini ala kroetoe-district. Ma den e faste toe — en seker foeroe begi e seni go na Jehovah. — Esther 4:1-3.
23. San Mordechaï e taigi Esther foe doe, ma san ben sa kan pasa efoe a ben go na a kownoe sondro dati a ben kari hen?
23 Esther ooktoe de nanga foeroe sari. A de seni krosi gi Mordechaï ini na presi foe hen sakakrosi, ma a no e teki den. Leki wan piki tapoe wan aksi foe sabi moro, Mordechaï seni gi na oema-kownoe wan foe den papira nanga na wet di djonsrode ben meki bekenti, ai taigi hen foe go na a kownoe foe begi boen-ati gi hen. pipel. Na piki foe Esther? „Ibri soema sabi, dati sortoe man ofoe oema, di go na a kownoe sondro foe a kari hen, den sa moe kiri. Soso efoe na kownoe langa na gowtoe kownoe-tiki gi hen, a sa tan na libi. Foe na sé foe mi, a de now moro leki dri-tenti dé dati a no kari mi foe kon inisé na hen” (Esther 4:4-11). Ja, Esther ben sa lasi hen libi, efoe kownoe Ahasveros no ben langa na taki gi hen, na tiki, di a ben tjari nanga hen leki wan marki foe hen kownoe makti en nanga disi a ben sa sori dati a de feni na kon foe hen boen. Troe troe dekati nanga bribi ini Jehovah ben de fanowdoe foe go na fesi na kownoe sondro dati a ben kari joe kon.
24. Sortoe overtoigi Mordechai e tjari kon na fesi leki wan reden foe sainde Esther ben kon ini kownoe fasi?
24 Tog Mordechaï ben piki: „No prakseri ini joe égi sili dati na oso-famiri foe na kownoe sa abi moro tjans foe lon komoto dan den tra djoe. Bikasi efoe ini na ten disi joe tapoe joe mofo krin krin, dan verlekti nanga verloesoe srefi sa kon gi den djoe foe wan tra presi; Ma foe taki foe joe nanga na oso foe joe papa, oenoe sa dede. En soema sabi, ofoe a no joisti ini wan ten leki disi joe ben kon ini na kownoe fasi?” (Esther 4:12-14). Mordechaï abi na overtoigi dati Esther ini na spesroetoe ten disi ben kon ini na kownoe fasi foe wan spesroetoe prakseri — na verloesoe foe na pipel foe Gado. Ma Esther sa sori na fasi dati a no e prakseri en soekoe en égi boen, a sa sori dekati nanga bribi?
25. San Esther, Mordechaï nanga den djoe e doe nanga na faste foe den?
25 Leki na piki tapoe disi, Esther gi Mordechaï tranga foe tjari ala den djoe kon makandra ini Susan foe faste foe hen ede. „Mi sa faste ooktoe”, a taki, „en baka dati mi sa go na a kownoe, aladi disi no de leki fa wet taki; en efoe mi moe dede, dan mi moe dede.” Esther de klari foe poti hen égi libi foe lasi, ma na koni oema disi teki na faste bosroiti foe handri nanga dekati en sondro foe soekoe hen égi boen, foe na pipel foe hen ede. Na so Esther, Mordechaï nanga den djoe ini Susan no wawan e begi ma e faste toe en loekoe na Jehovah foe gi den verloesoe. — Esther 4:15-17.
26. San féjanti foe na pipel foe Gado ini disi ten kan kisi pasi foe doe, ma san salfoe kristen nanga den kompe foe den di gi densrefi abra moe doe nanga disi?
26 Ini na ten disi ooktoe, den foetoeboi foe Jezus Kristus di kisi salfoe nanga jepi foe na geest, en di de djoe na jeje fasi, makandra nanga den kompe foe den, moe kaka foetoe gi tesi èn féjanti (Rom. 2:28, 29). Na rigeri kownoe, Jezus Kristus kande gi den féjanti foe Gado pipel pasi foe go boen fara ini na moeiti foe den foe pori den. O prenspari a de foe datede, dati salfoe kristen nanga den kompe foe den di gi densrefi abra, moe handri nanga dekati, aladi den e begi foe na koni foe Gado en e sori wan victori bribi! Ma Jehovah sa tan jepi hen pipel? Kroetoe foe joesrefi efoe den sani di ben pasa ini Esther ten leki wan drama go doro foe pasa na wi fesi.