Jehovah en sari-ati e kibri wi foe no lasi-ati

„Doe mi boen, o Gado, akroederi joe lobi boen-atifasi. Akroederi den sari-ati foe joe di de pasa marki, figi den ogri di mi ben doe, poeroe.” — PSALM 51:1.

1, 2. Fa wan serjoesoe sondoe kan abi krakti na tapoe wan foetoeboi foe Jehovah?

SMA no man pasa Jehovah wet sondro foe kisi strafoe. Fa disi e kon krin foe si te wi e doe wan serjoesoe sondoe na Gado! Ala di kande wi ben dini Jehovah jari langa na wan getrowfasi, a pasa di wi e pasa a wet foe Jehovah kan gi foeroe broko-ede noso hebi druk. Kande wi abi a firi taki Jehovah gowe libi wi èn taki wi no warti moro foe dini en. A sondoe foe wi kan sori leki na wan bigi wolkoe tapoe a leti foe a boen foe Gado.

² Kownoe David foe Israèl foe owroeten ben feni ensrefi wan leisi ini so wan situwâsi. Fa a situwâsi disi ben doe kon?

A misi di wan sma e misi foetoe kan tjari en go doe bigi sondoe

3, 4. San ben pasa nanga kownoe David na wan pisi ten di sani ben go boen?

³ David ben lobi Gado, ma a ben doe fowtoe sani di ben tjari en go doe hebi sondoe. (Teki gersi Galasiasma 6:1.) Disi kan pasa nanga ibri onvolmaakti libisma, spesroetoe te a abi makti na trawan tapoe. Leki wan kownoe di sani ben waka boen gi en, David ben abi barinen nanga makti. Soema ben prefoeroe foe tjalensi a wortoe foe en? Bekwaam man ben de klariklari foe dini en èn nanga faja, sma ben doe san a ben aksi den. Tokoe David ben meki fowtoe, foe di a ben e teki moro nanga moro wefi gi ensrefi èn ben e teri a pipel. — Deuteronomium 17:14-20; 1 Kroniki 21:1.

⁴ Ini a pisi ten disi di sani ben waka boen na skin fasi, David ben doe serjoesoe sondoe na Gado nanga libisma. Ija, a wan sondoe ben tjari wan trawan, neleki titei foe wan sani di Satan ben seti, èn ben brei en lontoelontoe en! Ala di kompe Israèlsma ben feti nanga den Amonsma, dan David ben de na tapoe a dak foe en oso èn ben e loekoe Batseiba, a moi wefi foe Uria di ben wasi en skin. Na a srefi ten di Uria ben e feti ini orlokoe, a kownoe ben meki sma tjari na oema kon na a kownoe-oso foe en èn ben doe soetadoe nanga en. Joe kan froestan taki a ben skreki srefisrefi di a ben kon sabi taki baka ten Batseiba ben abi bere! David ben seni aksi foe Uria kon, foe di a ben howpoe taki Uria ben sa didon a neti dati na Batseiba èn ben sa prakseri taki a pikin na foe en. Ma ala di David ben meki Uria kon droengoe, Uria ben weigri foe sribi nanga Batseiba. David ben kon broeja now èn a ben seni komando, di ben gi na wan kibrifasi, na en komandanti Joab, foe a meki Uria feti na a fesisei lin ini na orlokoe, pe sondro foe misi a ben sa dede. Uria ben dede ini a feti, a weduwe foe en ben hori a pisi ten foe low èn David ben trow nanga en, bifosi sma ben kon sabi taki Batseiba ben hori bere. — 2 Samuèl 11:1-27.

5. Sa ben pasa baka di David ben sondoe nanga Batseiba èn fa den sondoe foe en ben abi krakti na en tapoe?

⁵ Nanga jepi foe en profeiti Natan, Gado ben tjari den sondoe foe David kon na krin èn ben taki: „Mi e meki rampoe kon kontrari joe, di komoto foe joe eigi oso.” Akroederi disi, a pikin di Batseiba ben meki, ben dede (2 Samuèl 12:1-23). David fosi gebore manpikin, Amnon, ben go didon nanga tranga na en eigi afoe-sisa Tamar èn a brada foe Tamar kiri Amnon (2 Samuèl 13:1-33). A kownoe en manpikin Absalom, ben proeberi foe teki a kownoestoeroe nanga tranga èn ben gi en papa sjen, foe di a ben abi seks demakandra nanga den dorosei wefi foe David (2 Samuèl 15:1–16:22). Na orlokoe na mindri den borgroe ben kon na wan kaba nanga a dede foe Absalom èn ben tjari moro sari kon gi David (2 Samuèl 18:1-33). Ma David en sondoe ben meki a kisi sakafasi èn ben meki a kon si taki a ben de fanowdoe foe tan krosibei na en Gado di abi sari-ati. Efoe wi ben sa meki wan fowtoe, meki wi abi berow na wan sakafasi èn go moro krosibei foe Jehovah. — Teki gersi Jakobus 4:8.

6. Foe san ede kownoe David ben abi fowtoe spesroetoe?

⁶ David ben abi fowtoe spesroetoe, foe di a ben de wan tiriman foe Israèl di ben sabi Jehovah en Wet dorodoro (Deuteronomium 17:18-20). A no ben de wan farao foe Egipti noso wan kownoe foe Babilon di no ben abi a sabi dati èn kande ben gwenti foe doe sani di Gado no feni boen. (Teki gersi Efeisesma 2:12; 4:18.) Leki wan memre foe wan nâsi di ben gi ensrefi abra na Jehovah, David ben froestan taki soetadoe nanga a kiri foe sma na bigi sondoe (Exodus 20:13, 14). Kresten sabi Gado wet toe. Ma neleki David, wan toe foe den no e hori a wet, foe di den abi sondoe di den kisi foe den papa nanga mama, libisma swakifasi èn tesi di den no ben man kakafoetoe gi. Efoe dati moesoe pasa nanga wan foe wi, dan wi no moesoe tan ini wan doengroe situwâsi di e tapoe wi jeje fasi foe si sani èn e tai wi hori ini wan dipi firi foe lasi-ati.

Bekènti sani e tjari froelekti kon

7, 8. (a) San ben pasa nanga David di a ben proeberi foe kibri den sondoe foe en? (b) Foe san ede wan sma moesoe bekènti en sondoe èn tapoe nanga dati?

⁷ Efoe wi fowtoe foe di wi pasa Gado wet na wan toemoesi ogri fasi, dan wi kan feni en wan moeilek sani foe bekènti den sondoe foe wi, srefi na Jehovah. San kan pasa ini den situwâsi dati? Ini Psalm 32 David ben erken: „Di mi ben tan pî [na presi foe mi bekènti] den bonjo foe mi ben e drei, foe di mi ben geme a heri dei. Bika dei nanga neti joe [Jehovah en] anoe ben de hebi na mi tapoe. A watra foe mi libi ben kon kenki neleki na ini a faja foe dreiten” (vers 3, 4). A proeberi di a tranga-ede David ben proeberi foe kibri a sondoe foe en èn foe basi wan konsensi di ben e fon en, ben weri en skin. Hebi banawtoe ben meki a krakti foe en skin kon swaki so te, taki a ben de leki wan drei bon sondro a watra di e gi libi. Foe taki en leti, a kan de heri boen taki a ben ondrofeni siki na froestan èn na skin sei. Awansi fa a no fa, a ben lasi en prisiri. Efoe iniwan foe wi e kon feni wisrefi ini a srefi situwâsi dati, san wi moesoe doe?

⁸ Bekènti sani na Gado kan meki taki joe e kisi pardon èn e tjari froelekti. „Mi sondoe mi ben bekènti te foe kaba gi joe èn mi fowtoe mi no ben kibri”, David ben singi. „Mi ben taki: ’Mi sa bekènti den ogri foe mi na Jehovah.’ Èn joesrefi sa gi mi pardon foe den fowtoe foe mi” (Psalm 32:5). Joe de na ini banawtoe foe wan sondoe di joe e kibri? A no ben sa de moro boen foe bekènti disi èn tapoe nanga a sondoe, so taki joe kan kisi a sari-ati foe Gado? Foe san ede joe no e kari den gemeente owroeman èn e soekoe foe kon betre na jeje fasi? (Odo 28:13; Jakobus 5:13-20) Den sa erken a berowfasi foe joe èn baka wan pisi ten a kresten prisiri foe joe sa kon baka. „Kolokoe a sma di e kisi pardon foe na opo di a opo ensrefi kontrari trawan èn di a sondoe foe en tapoe krinkrin”, David ben taki. „Kolokoe a man di Jehovah no e teri a fowtoe foe en èn di no wan bidrigi no de ini a jeje foe en.” — Psalm 32:1, 2.

9. Oten David ben meki Psalm 51 èn foe san ede?

⁹ David nanga Batseiba ben moesoe gi frantiwortoe na Jehovah foe a fowtoe di den ben meki. Ala di den ben kan kiri den foe a sondoe foe den, Gado ben sari den. Spesroetoe a ben abi sari-atifasi gi David foe a Kownoekondre froebontoe ede (2 Samuèl 7:11-16). Ini Psalm 51 wi kan si David en fasi foe abi berow foe den sondoe foe en ini a tori foe Batseiba. A kownoe di ben abi berow ben meki a psalm disi, di e naki sma ati, baka di a profeiti Natan ben wiki a konsensi foe en foe meki a kon si o takroe a pasa di a pasa a wet foe Gado ben de. Natan ben moesoe abi deki-ati foe poti David prakseri na tapoe den sondoe foe en, neleki fa kresten owroeman di kisi a wroko moesoe abi deki-ati, so taki den kan doe den sani disi ini a ten disi. Na presi foe strei taki a no doe so èn gi a komando foe den kiri Natan, a kownoe ben bekènti na wan sakafasi (2 Samuèl 12:1-14). Psalm 51 e sori san a ben taigi Gado ini begi ini a tori foe den sjen sani di a ben doe èn a de heri boen foe go prakseri dipi foe dati na ondro begi, spesroetoe efoe wi ben meki fowtoe èn e angri foe kisi a sari-ati foe Jehovah.

Wi moesoe gi frantiwortoe na Gado

10. Fa David ben kan ondrofeni kon betre baka na jeje fasi?

¹⁰ David no ben soekoe foe regtfardiki a sondoe foe en, ma a ben begi: „Sori taki joe feni mi boen, o Gado, akroederi joe lobi boen-atifasi. Akroederi joe sari-ati di joe e gi pasa marki, figi den ogri foe mi poeroe” (Psalm 51:1). Foe di David ben doe san ogri, meki a ben pasa den skotoe foe Gado en Wet. Ma howpoe ben de, taki a ben o kon betre na jeje fasi, efoe Gado ben sori en boen, akroederi En lobi boen-atifasi, noso loyaal lobi. Na abi di Gado ben abi sari-ati pasa marki, ben gi a kownoe, di ben abi berow, wan fondamenti foe bribi taki a Mekiman foe en ben sa figi den ogri di a ben doe, poeroe.

11. San den ben wani taki nanga den ofrandi di ben tjari na a Verzoen Dei èn san den e aksi foe kisi froeloesoe ini a ten disi?

¹¹ Nanga jepi foe a profeitis prenki foe ofrandi di den ben tjari na a Verzoen Dei, Jehovah ben meki bekènti taki a ben abi wan fasi foe krin den sma, di ben abi berow, foe den sondoe foe den. Wi sabi now taki a e sori wi en sari-ati èn a e gi wi pardon tapoe a fondamenti foe a bribi di wi e bribi ini a froeloesoe ofrandi foe Jesus Krestes. Efoe David, nanga soso den prenki nanga skaduw foe na ofrandi disi na ini prakseri, ben kan froetrow na ini a lobi boen-atifasi nanga sari-ati foe Jehovah, omoro den disiten foetoeboi foe Gado moesoe poti bribi ini a loesoe ofrandi di gi foe meki den kisi froeloesoe! — Romesma 5:8; Hebrewsma 10:1.

12. San a wani taki foe sondoe èn fa David ben firi di a ben doe wan sani di no boen?

¹² Ini en tranga begi na Gado, David ben taki: „Wasi mi dorodoro foe den fowtoe foe mi èn krin mi srefi foe den sondoe foe mi. Bika misrefi sabi den ogri di mi ben doe èn den sondoe foe mi de doronomo na mi fesi” (Psalm 51:2, 3). Te wan sma e sondoe, a e misi a marki ini a tori foe Jehovah en markitiki. Wi kan de seiker taki David ben doe dati. Tokoe a no ben de leki wan kiriman noso wan sma di doe soetadoe di no e broko en ede nanga san a doe, ma di broeja nomo foe a strafoe di a kan kisi noso taki a man kisi wan siki foe san a doe. Leki wan sma di ben lobi Jehovah, David no ben wani si ogri na ai (Psalm 97:10). A ben tegoe foe a sondoe srefi di a ben doe èn a ben wani foe Gado krin en dorodoro foe dati. David ben froestan den ogri di a ben doe heri boen èn a ben sari srefisrefi taki a ben meki a sondoe lostoe foe en basi en. A sondoe foe en ben de foe dati ede doronomo na en fesi, foe di wan sma di e frede Gado, en konsensi fonfon noiti sa tapoe te leki a abi berow, a e bekènti sani èn e kisi a pardon foe Jehovah.

13. Foe san ede David ben kan taki a ben sondoe kontrari Gado wawan?

¹³ Foe di David ben erken taki a ben moesoe gi frantiwortoe na Jehovah meki a ben taki: „Na joe, joe wawan, mi ben sondoe èn san no boen ini joe ai mi ben doe, so taki joe kan sori foe de regtfardiki te joe e taki, so taki joe kan de soifri te joe e kroetoe sani” (Psalm 51:4). David ben pasa Gado en wet, a ben tjari sjen kon tapoe a kownoewroko èn „sondro degedege a ben handri nanga Jehovah sondro foe sori lespeki”, ala di a ben meki En kisi sjen (2 Samuèl 12:14; Exodus 20:13, 14, 17). Den sondoe sani di David ben doe ben de sani toe kontrari na Israèl libimakandra nanga den memre foe en osofamiri, neleki fa wan dopoe sma di meki fowtoe ini a ten disi e tjari sari noso banawtoe kon ini a kresten gemeente èn na mindri lobiwan. Ala di a kownoe di ben abi berow ben sabi taki a ben sondoe na den kompe libisma leki Uria, a ben kon si taki a abi wan moro hei frantiwortoe foe gi na Jehovah. (Teki gersi Genesis 39:7-9.) David ben erken taki a kroetoe foe Jehovah ben sa de regtfardiki (Romesma 3:4). Kresten di sondoe moesoe si sani na a srefi fasi.

Sani di Gado e hori na prakseri

14. Sortoe omstandigheid David ben aksi Gado foe hori na prakseri?

¹⁴ Ala di David no ben proeberi foe regtfardiki ensrefi, a ben taki: „Loekoe! Nanga fowtoe mi ben kon na libi nanga foeroe skin-ati èn ini sondoe mi mama ben kisi bere foe mi” (Psalm 51:5). David ben kon na libi nanga fowtoe èn en mama ben ondrofeni skin-ati di a ben meki en, foe di a ben kisi sondoe foe en papa nanga mama (Genesis 3:16; Romesma 5:12). Den wortoe foe en no ben wani taki dati wan joisti trow demakandra, a kisi foe bere nanga a meki foe pikin na sondoe sani, foe di Gado ben meki a seti gi a trowlibi èn a meki foe pikin; èn David no ben sori go toe na wan spesroetoe sondoe foe en mama. Na ini sondoe en mama ben kisi bere foe en, foe di a papa nanga mama foe en ben abi sondoe neleki ala onvolmaakti libisma. — Job 14:4.

15. Ala di Gado ben sa kan hori omstandigheid na prakseri, san wi no moesoe doe?

¹⁵ Efoe wi doe sondoe, wi kan kari kon ini begi na Gado foe a hori ibri sani na prakseri di kande meki wi ben doe fowtoe sani. Ma no meki wi teki a no-froedini boen-atifasi foe Gado leki wan pardon foe wan loesoe fasi foe tjari wisrefi noso foe gebroiki sondoe di wi kisi foe papa nanga mama, leki wan sani foe broeja sma, foe kibri wisrefi na so fasi foe no gi frantiwortoe foe wi sondoe (Judas 3, 4). David ben teki a frantiwortoe, bika a ben tan prakseri sani di no krin èn ben broko kindi gi tesi. Meki wi begi taki wi no e gi pasi foe tesi kon tron oen basi èn meki wi doe wan sani dan akroederi so wan begi. — Mateus 6:13.

Begi foe kon krin

16. Ini sortoe eigifasi Gado ben abi prisiri èn fa dati moesoe abi krakti tapoe a waka nanga libi foe wi?

¹⁶ Sma kan sori leki den de toemoesi boen sma di e gi densrefi na Gado, ma Gado no e loekoe sani frafra èn e si san de na inisei. David e taki: „Loekoe! Joe [Jehovah] ben prisiri ini a troefasi srefi na ini den inisei pisi; èn meki a de so taki joesrefi sorgoe taki mi e kon sabi soifri koni” (Psalm 51:6). David ben abi fowtoe, foe di nanga lei èn trikifasi, a ben seti sani so taki Uria ben sa dede èn ben proeberi na so wan fasi foe kibri a tori foe a kisi di Batseiba ben kisi bere. Ma tokoe a ben sabi taki Gado e prisiri nanga troefasi èn santafasi. Disi moesoe abi krakti na tapoe a fasi fa wi e tjari wisrefi na wan boen fasi, foe di Jehovah ben sa kroetoe wi efoe wi abi trikifasi (Odo 3:32). David ben froestan toe taki efoe Gado ben ’meki a sabi soifri koni’, dan leki wan kownoe di abi berow, a ben sa man foe gi jesi na den markitiki foe Gado ini a tra pisi foe en libi.

17. San a ben wani taki foe begi foe kon soifri dorodoro nanga jepi foe hysop?

¹⁷ Foe di a psalm singiman ben si taki a ben abi Gado en jepi fanowdoe foe wini den sondoe firi, a ben begi morofara: „Meki a de so taki joe soifri mi foe sondoe nanga jepi foe hysop, so taki mi kan de krin; meki a de so taki joe wasi mi, so taki mi kan kon moro weti srefi leki snew” (Psalm 51:7). Den ben gebroiki a hysop bon (kande marjoram, noso Origanum maru) toe, ini a krin di den ben abi a gwenti foe krin sma di fosi ben kon siki nanga gwasi (Levitikus 14:2-7). So boen a ben joisti taki David ben begi foe kon soifri dorodoro foe sondoe nanga jepi foe hysop. Na idea foe soifrifasi abi foe doe toe nanga a begi foe en foe Jehovah wasi en, so taki a ben kan kon krin dorodoro, moro weti leki snew srefi di a smoko foe faja no blaka en noso tra sakasaka no doti en (Jesaja 1:18). Efoe wan foe wi e pina now foe konsensi fonfon foe di wi doe wan fowtoe sani, dan meki wi abi a bribi taki efoe na wan berowfasi wi soekoe foe kisi a pardon foe Gado, a kan soifri wi èn krin wi tapoe a fondamenti foe Jesus en froeloesoe ofrandi.

Begi foe kon boen baka

18. San ben de a kondisi foe David bifo a ben abi berow èn ben bekènti, èn fa a sabi di wi sabi disi kan jepi wi ini a ten disi?

¹⁸ Ibri kresten di oiti ben njanpina foe wan konsensi di ben fon en kan froestan den wortoe foe David: „Meki a de so taki, joe [Jehovah] meki mi jere foe prisiri pasa marki nanga breiti, so taki den bonjo di joe masi kan de nanga prisiri” (Psalm 51:8). Bifo David ben abi berow èn ben bekènti den sondoe foe en, a konsensi foe en di ben trobi en, ben meki a firi toemoesi froeferi. A no ben feni prisiri srefi ini singi di e meki sma prisiri pasa marki èn firi breiti, di toemoesi boen singiman nanga pokoeman ben prei. So bigi a banawtoe foe David di ben sondoe ben de taki Gado no ben o feni en boen, taki a ben de neleki wan man di den bonjo foe en ben masi nanga foeroe skin-ati. A ben angri foe kisi pardon, foe kon betre baka na jeje fasi èn foe meki a kisi a prisiri baka di a ben ondrofeni fosi. Wan sma ini a ten disi, di doe wan sani di no boen ma di abi berow, moesoe kisi pardon toe foe Jehovah so taki a kan kisi a prisiri di a ben abi, bifo a ben doe wan sani di ben tjari a matifasi foe en nanga Gado kon ini kefar. A kisi di wan sma, di abi berow, e kisi a „prisiri foe santa jeje” baka e sori taki Jehovah ben gi en pardon èn taki a lobi en (1 Tesalonikasma 1:6). Fa disi e gi trowstoe!

19. Fa David ben sa firi efoe Gado ben figi ala den fowtoe foe en poeroe?

¹⁹ David ben begi morofara: „Kibri joe fesi foe den sondoe foe mi èn figi poeroe srefi ala den fowtoe foe mi” (Psalm 51:9). Wi no ben kan froewakti taki Jehovah e si sondoe leki wan sani di a e feni boen. Tokoe David ben aksi Gado foe kibri en fesi gi den sondoe foe en. A kownoe ben begi toe taki Gado figi ala den fowtoe foe en poeroe, foe tapoe ala na onregtfardikifasi foe en. Efoe Jehovah ben sa wani doe dati nomo! A ben sa opo den jeje foe David, poeroe a hebi foe wan konsensi di ben trobi en èn ben meki a kownoe di ben abi berow now, sabi taki a ben kisi pardon foe a lobi Gado foe en.

San foe doe efoe joe sondoe?

20. San den e rikomanderi wan kresten foe doe, di sondoe na wan serjoesoe fasi?

²⁰ Psalm 51 e sori taki ibri foetoeboi foe Jehovah di gi ensrefi abra na en èn di ben sondoe serjoesoe ma di abi berow, kan aksi en nanga froetrow, foe sori en boen èn foe krin en foe den sondoe foe en. Efoe joe na wan kresten di ben meki wan fowtoe na so wan fasi, foe san ede joe no e soekoe foe kisi pardon foe wi hemel Tata ini wan begi di taki nanga sakafasi? Erken taki joe abi Gado en jepi fanowdoe, so taki a kan feni joe boen èn aksi en taki a meki a prisiri di joe ben abi fosi kon baka. Kresten di abi berow kan go ini froetrow na Jehovah ini begi nanga den sortoe aksi dati, foe di „a sa gi pardon pasa marki” (Jesaja 55:7; Psalm 103:10-14). A no de foe taki, dati wi moesoe kari den gemeente owroeman, so taki den kan gi a fanowdoe jepi na jeje fasi. — Jakobus 5:13-15.

21. San wi sa go loekoe now?

²¹ Jehovah en sari-ati e kibri en pipel foe no lasi-ati. Ma meki wi go loekoe tra moi begi foe David, di ben abi berow, na Psalm 51. A studie foe wi sa sori taki Jehovah no e wisiwasi wan ati di broko.

Fa joe ben sa piki?

◻ Sortoe bakapisi serjoesoe sondoe kan abi tapoe wan foe Jehovah en foetoeboi?

◻ Fa sani ben abi krakti tapoe David di a ben proeberi foe kibri den sondoe foe en?

◻ Foe san ede David ben taki a ben sondoe na Gado wawan?

◻ San wi no sa moesoe doe, ala di Gado kan hori omstandigheid na prakseri te wi e sondoe?

◻ San wan kresten moesoe doe te a sondoe na wan serjoesoe fasi?