Poti prakseri tapoe a profeiti wortoe
1 „A profeiti wortoe meki kon moro fasti gi wi” (2 Petr. 1:19). Foe san ede Petrus ben taki disi? Den Kownoekondre profeititori ini den Hebrew Boekoe foe bijbel èn den profeititori foe Jesus Krestes srefi, ben sori taki den de troe, noso ben „meki kon moro fasti”, nanga jepi foe a sani di Petrus nanga toe tra disipel ben si èn ben jere na a transfiguratie so wan 32 jari bifo Petrus skrifi en brifi. A fisjoen disi di e naki sma ati, ben tranga den agen taki Jesus Krestes troetroe ben sa kon ini Kownoekondre makti nanga brenki glori èn nanga a hori di en Tata e hori baka gi en dorodoro. Kresten ini a fosi jarihondro ben ’e doe boen foe poti prakseri tapoe a profeiti wortoe dati leki wan lampoe di e skèin’, noso tra fasi na ati foe den ben o kon doengroe. A poti di den ben poti prakseri tapoe a profeiti wortoe di e skèin, ben sa meki taki den tan de na ai èn kisi froelekti te leki wan njoen dei ben o bigin, te a „dei stari”, Krestes, ben sa opo kon ini Kownoekondre glori. — 2 Petr. 1:16-19; Mat. 17:1-9.
2 Wi no ben de drape foe si a glori transfiguratie makandra nanga Petrus. Tokoe, ini a geslakti disi kresten di ben poti prakseri tapoe a profeiti wortoe, abi a toemoesi bigi grani foe no si soso fa a Kownoekondre tiri foe Krestes ben sa de, ma foe si den toemoesi krin boeweisi taki a glori Kownoe e tiri troetroe! Ibri jari di e pasa sensi 1914, a profeiti wortoe e meki kon moro fasti te wi e si a kontroe foe den difrenti elementi foe a toemoesi aparti „marki” di Jesus ben gi foe a „denoja” foe en leki Kownoe. Wan prenspari pisi foe a marki na taki a tiri foe en, noso a Kownoekondre foe en, ben sa bariwroko gi ala den nâsi, bifo a Kownoe e tjari wan kaba kon na a seti foe sani disi. Na ondro a tiri foe Krestes, a Kownoekondre-preikiwroko e doe now ini 231 kondre na wan fasi di sma noiti no ben man denki foe dati na fesi (Mat. 24:3-14). Moro fara, ala di a ten foe „a bigi banawtoe” e kon krosibei, a Kownoe di poti tapoe kownoestoeroe, ben tjari „wan bigi ipi” kon makandra „foe ala den nâsi” di kon poti bribi ini a froeloesoe-ofrandi foe a „broedoe foe a Pikin Skapoe”. — Openb. 7:9, 10, 14.
3 Foe di a „dei stari” ben opo kon, dati wani taki Krestes kon ini Kownoekondre makti, meki reide de ete foe poti prakseri tapoe a profeiti wortoe? Ija! Jesus Krestes di ben kisi glori, ben gi na apostel Johanes wan lo fisjoen di e meki a boekoe Openbaring. Ala di disi ben de foe gi den fosi jarihondro kresten deki-ati nanga leri, tokoe den abi spesroetoe waarde gi denwan di e libi ini „a dei foe Masra”, pe wi de nojaso. — Openb. 1:10.
4 „Kolokoe a sma de di e leisi den wortoe foe a profeititori disi tranga èn den sma di e jere den èn di e ondrow ala san skrifi na ini; bika a fasti ten de krosibei” (Openb. 1:3). Efoe wi wani foe de kolokoe, dan wi moesoe sabi san den profeititori wani taki, ija, san den profeititori wani taki troetroe. San disi e aksi foe wi? Leri den profeititori baka de fanowdoe foe meki na ati foe wi kon froestan a tori foe Openbaring. Na apostel Petrus, wan memre foe a fosi jarihondro tiri skin, ben si a waarde foe taki baka foe gron waarheid foe ’wiki’ den brada foe en na jeje fasi (2 Petr. 1:12, 13). Na a srefi fasi, a disiten „getrow èn koni srafoe” e jepi wi foe meki wi tan abi warderi, foe di ibritron baka den e poti wi prakseri tapoe a profeiti wortoe. — Mat. 24:45-47.
5 Fa foe poti prakseri: Sortoe prakseri moesoe poti tapoe a profeiti wortoe foe Openbaring? Na apostel Paulus e memre wi taki Gado no taki nanga kresten nanga jepi foe engel noso profeiti, so leki fa a ben doe dati nanga den foetoeboi foe en bifo Krestes. Na presi foe dati, Jehovah taki nanga wi nanga jepi foe a Manpikin foe en di a lobi moro ala sma, èn di a ben poti na wroko leki „a sma di o kisi ala sani” (Heb. 1:1, 2). „Foe dati ede a de fanowdoe foe poti prakseri moro leki fa wi gwenti tapoe den sani di wi ben jere, so taki noiti wi kan drifi gowe” (Heb. 2:1). Ija, wi moesoe poti prakseri tapoe a Wortoe foe Gado èn spesroetoe tapoe a profeiti wortoe di e kon nanga jepi foe Jesus Krestes.
6 Ini a fosi presi, a de toemoesi prenspari foe de tapoe den konmakandra ibri wiki baka. Son sma kan teki wan mi-no-ke-fasi foe fisiti ala den konmakandra, foe di den e prakseri taki srefi efoe den misi wan konmakandra, tokoe den sabi a materiaal kaba. Ma tokoe, nanga ibri jari di e pasa, moro nanga moro a profeiti bodoi disi wani taki wan sani èn a e kon na a joisti ten. Wi alamala moesoe de na ai gi den sani di e pasa ini a ten disi èn di e go na fesi esi-esi foe meki den profeititori kon troe. Dan wi kan sreka wisrefi foe handri akroederi a wani foe Jehovah. Meki en wan persoonlijk marki foe no misi no wan konmakandra, so fara leki a kan.
7 Ini a di foe toe presi, sreka joesrefi boen gi den konmakandra. Doe moeiti foe no kon sabi sani nomo, ma foe kisi koni èn foe froestan sani (Odo 4:7). Ini a di foe dri presi, abi wan fajafaja prati na den konmakandra, foe di joe e gi komentaar èn e leisi bijbeltekst. Awansi fa a no fa, poti en leki wan marki foe gi wán komentaar. Èn a ben sa moro boen efoe joe gi moro leki wán komentaar na ibri konmakandra. Efoe joe e doe dati, dan dati sa jepi joe foe tan poti joe prakseri tapoe den konmakandra.
8 Foe poti moro leki gewoon prakseri tapoe a profeiti wortoe, abi moro na ini leki foe sreka joesrefi, foe fisiti den konmakandra, èn foe abi wan prati na den konmakandra. A wani taki toe, dati srefi baka den konmakandra wi e go doro foe ’denki dipi foe den sani disi, foe meki a go dipi na ini joe’ (1 Tim. 4:15). Efoe wi wani taki a profeiti wortoe moesoe de leki wan lampoe di e skèin na ini wi ati, dan wi moesoe meki a abi krakti tapoe a sma di wi de inisei — den sani di wi e denki, den sani di wi wani troetroe, den firi foe wi, den sani di e poesoe wi, nanga den marki foe wi (2 Petr. 1:19). So boen, wi moesoe aksi wisrefi den sortoe aksi leki: San a bodoi disi wani taki gi mi persoonlijk? San mi leri foe Jehovah nanga en Manpikin Jesus Krestes? Sortoe gronprakseri e horibaka gi a materiaal? Na ini mi ati mi e kon sabi san a studie wani taki? Fa mi kan fiti den waarheid disi ini mi libi? Èn ini mi oso-famiri libi? Èn ini a gemeente? Foe di wi e fiti san wi e leri ini a libi foe wi, meki wi kan taki leki a psalm singiman: „Joe wortoe de wan lampoe gi mi foetoe, èn wan leti tapoe mi pasi.” — Ps. 119:105; Job 29:3, 4.
9 Tan na ai ini moeilek ten: Ini a jari 33 Gewoon Teri, Jesus ben warskow den disipel foe en foe a pori di Jerusalem ben sa kisi heri esi èn a situwâsi di ben sa de leki wan marki foe den disipel sabi a ten foe lowe go na wan kibripresi (Luk. 19:41-44; 21:7-21). Baka dati, moro leki 30 jari ben pasa. A ben sa kan gersi gi sonwan foe den kresten foe Judea taki no foeroe ben sa kenki ini a ten di ben de krosibei na den fesi. Fa a froemane foe a lobi apostel Petrus ben kon na a joisti ten ini a di foe toe brifi foe en, di skrifi ini a pisi ten foe 64 Gewoon Teri. A froemane disi ben taki foe ’poti prakseri tapoe a profeiti wortoe’! (2 Petr. 1:19) Sjatoe baka dati, ini 66 Gewoon Teri, den legre foe Rome ben lontoe a foto Jerusalem. Di wantronso, den legre foe Rome gowe sondro wan boen reide, den kresten foe Judea di ben de na ai, ben waka baka a rai foe Jesus èn den ben lowe. Baka dati, ini 70 Gewoon Teri, den legre foe Rome ben drai kon baka èn den ben pori heri Jerusalem. Fa den kresten dati ben moesoe breiti taki den ben poti boen prakseri tapoe a profeiti wortoe foe Jesus!
10 Gi san wi, leki kresten ini a ten disi, de na ai? Ini den fisjoen foe Openbaring, Jesus ben warskow kresten di e libi now, gi foeroe sani di ben o pasa ini a dei foe Masra. Ini den 80 jari di pasa, wan nomroe foe den sani disi pasa kaba: a geborte foe a Kownoekondre; na orlokoe na hemel èn baka dati a lasi di Satan nanga den ogri jeje foe en lasi na orlokoe, èn baka dati a skotoe di den skotoe den foe tan soso ini a birti foe grontapoe; a fadon foe Babilon a Bigiwan; èn a kon foe a redi kloroe werdri meti, a di foe aiti grontapoe tirimakti. A kontroe foe den tori disi foe a profeiti wortoe ini Openbaring e meki en wan moro seiker sani taki heri esi wi sa si den sani di e naki sma ati èn di moesoe pasa ete: a tapoe di den sa tapoe foe tjari den lasti memre foe den 144.000 kon makandra, a kon di a tjari kon makandra foe a bigi ipi e kon na wan kaba, a pori foe Babilon a Bigiwan, na orlokoe foe Armagedon, a trowe di Satan sa trowe go ini a dipi peti, èn a Doesoen Jari Tiri foe Krestes. O prenspari a de taki wi e poti prakseri tapoe a warskow foe Jesus: „Loekoe! Mi e kon leki wan foefoeroeman. Kolokoe a sma de di e tan na ai èn di e kibri den tapoesei krosi foe en, so taki a no waka soso skin èn sma kan si a sjen foe en!” — Openb. 16:15.
11 Wi e tan na ai? O serjoesoe wi e teki a profeiti wortoe? Awinsi wi ben gi wi libi abra na Jehovah 5 jari pasa kaba, noso awinsi wi ben doe dati 50 jari pasa kaba, den wortoe foe Paulus gi den kresten foe Rome e fiti wi srefisrefi: „Oen pipel sabi a ten, taki a ten doro kaba foe oenoe wiki foe a sribi, bika now a froeloesoe foe wi kon moro krosibei leki a ten di wi ben kon ini a bribi. A neti de fara kaba; a dei kon krosibei kaba.” Baka dati, Paulus e froemane kresten foe „tapoe nanga den wroko foe doengroe” èn foe „waka na wan ordefasi” (Rom. 13:11-13). Wi e libi ini wan grontapoe di de dorodoro ini doengroe ini a tori foe boen gwenti nanga wet. San ben e seki sma 30 noso 40 jari pasa ini a fasi fa sma ben tjari densrefi, nownowde na wan gewoon sani gi sma foe grontapoe ini den lasti tin jari disi foe a di foe twenti jarihondro. Loekoe boen, brada, taki noiti joe meki joesrefi drifi go ini a doengroe foe grontapoe, so taki joe no e kisi wan mi-no-ke-fasi ini a tori foe boen gwenti nanga wet. Efoe joe e gi joesrefi pasi foe no loekoe so fini moro ini a tori foe a lagi fasi fa a grontapoe disi e prakseri èn e libi, dan joe no sa man si so krin moro den moro prenspari afersi di de na wi fesi èn di heri esi sa seti foe têgo. Den sani so leki: a regtfardiki foe a soevereiniteit foe Jehovah èn a meki kon santa foe a nen foe en. Efoe wan sma e fadon na sribi na jeje fasi, dan dati sa tjari a froeloesoe di a kan kisi èn di de so krosibei now, kon ini kefar.
12 Gro ini a warderi di joe e warderi a profeiti wortoe ini joe ati: Den Hebrew profeiti foe fositen, ben abi wan fajafaja belangstelling gi a kontroe foe den sani di den ben taki foe a Mesias, nanga jepi foe santa jeje. Den ben „angri foe aksi èn den ben ondrosoekoe finifini” fa a prakseri foe Gado ben sa waka (1 Petr. 1:10, 11). Joesrefi sa gro ini a warderi di joe e warderi sani na jeje fasi, efoe joe poti prakseri tapoe a profeiti wortoe ini a boekoe Openbaring. Na angri di joe e angri gi sani na jeje fasi, sa kon moro bigi, so taki a sa poesoe joe foe diki ini „den dipi sani foe Gado” (1 Kor. 2:10). Te joe e foeroe joe ati nanga warderi èn lobi gi a profeiti wortoe, dan a no sa de fanowdoe taki wan sma moesoe gi joe tranga foe fisiti den konmakandra; a sa boeweigi joe foe fisiti den konmakandra èn abi wan prati na den doronomo (Luk. 6:45). Èn efoe ’a wortoe de ini joe eigi ati’, dan dati sa boeweigi joe foe ’meki en bekènti na poebliki foe joe kan kisi froeloesoe’. — Rom. 10:8-10.
13 O moro fara wi e kon ini a ten foe a kaba, o moro sma sa lafoe wi foe a hori di wi e horidoro ini a bribi di wi e bribi den profeititori di Gado e meki bekènti (2 Petr. 3:3, 4). Tokoe, wi sa tan na ai ini a tori foe a profeiti wortoe. A lampoe foe Gado Wortoe e sori wi pe wi de ini a ten di e lon. Na wan toemoesi moi fasi a e skèin tapoe a troetori taki wi e libi ini den lasti dei foe a doengroe grontapoe disi. A dei stari opo kon! Krestes de ini Kownoekondre makti! Efoe wi e loekoe boen, dan wi e si kaba taki wan njoen dei e opo kon. Meki a njoen grontapoe di Gado pramisi, de leki wan troetroe sani gi wi, leki fa a Kownoekondre ben de wan troetroe sani gi den dri apostel di ben abi a grani foe si na fesi wan wondroe fisjoen foe Jesus en transfiguratie!