„Tan si den sortu fu man dati leki wan diri sani”
„Èrken . . . den sortu fu sma dati.” — 1 KORINTESMA 16:18.
1. Sortu man na apostel Paulus ben si spesrutu leki wan diri sani, èn san a ben skrifi fu wán fu sowan kristen?
NA SORTU fu man di na apostel Paulus spesrutu ben si leki wan diri sani, ben de den sma di ben de klarklari fu gebroiki na krakti fu den krinkrin gi Yehovah nanga den brada fu den. Fu wan fu sowan kompewrokoman Paulus ben skrifi „teki en fu dat’ede tapu na fasi di wi gwenti na ini Masra, nanga ala prisiri èn tan si den sortu fu man disi leki wan diri sani, bika fu na bun fu na wroko fu Masra a ben kon bun krosbei fu dede fudi a ben gi en sili na kefar.” — Filipi 2:29, 30.
2. Suma wi mu gi spesrutu respeki èn fu san-ede?
2 Ini a ten disi yu abi ini moro leki 55.000 gemeente fu Yehovah Kotoigi furu tumsi bun kristen man di spesrutu wi ben sa mu warderi fu na tranga wroko fu den a mindri den brada fu den. Fu sori taki wi mu si den sortu man disi leki wan diri sani, meki Paulus ben ferklari: „Now wi e begi unu brada, fu abi respeki gi den di e wroko tranga a mindri unu èn di abi na tiri tapu unu na ini Masra èn e fermane unu seryusu, èn fu sori den moro leki spesrutu respeki ini lobi fu na tranga wroko fu den. Sori gi makandra taki unu lobi vreide.” — 1 Thess. 5:12, 13.
3. (a) San sa yepi wi fu lolo nanga makandra a wan fasi pe wi e lobi vreide? (b) Na sortu fasi owruman mu gi na eksempre?
3 Na yoisti warderi gi ala wi brada nanga sisa èn spesrutu gi owruman di e wroko tranga de sondro degedege wan prenspari sani ini na demakandra pe wi e sori taki wi lobi vreide na ini wi gemeente. Ini disi, soleki na ini ala kontren fu wi kristenlibi, den owruman mu de „eksempre gi na ipi” (1 Petrus 5:2, 3). Aladi den owruman nanga leti mag ferwakti taki den brada sa warderi den fu a tranga wroko fu den dan den mu gi ooktu na eksempre na ini na sori fu respeki gi makandra di e fiti.
Sori grani gi makandra
4, 5. (a) San e sori taki na apostel Paulus ben warderi owruman di e wroko tranga? (b) San a ben skrifi gi den kristensma na ini Rome èn fu san-ede den wortu fu en spesrutu abi fu du nanga owruman?
4 Na apostel Paulus ben gi na ini disi wan tumsi moi eksempre. Soleki wi ben si na ini na artikel na fesi, dan a ben luku na den bun sani na ini en brada nanga sisa. Èn no wawan a ben gi tranga na kristen fu lobi owruman di e wroko tranga èn fu respeki den, ma a ben sori ooktu ensrefi warderi di fiti gi den man disi. A ben de krin taki a ben si man fu na sortu disi leki wan diri sani. — Teki gersi Filipisma 2:19-25; Kolossesma 4:12, 13; Titus 1:4, 5.
5 Na ini en brifi gi den kristen na ini Rome Paulus ben skrifi: „Abi na ini bradalobi safu firi fu lobi gi makandra. Teki fesi na ini na sori fu grani gi makandra. No du yu wroko safrisafri. De faya na ini yeye. Dini Yehovah leki srafu” (Romeini 12:10, 11). Seiker a de so taki den wortu disi spesrutu abi fu du nanga kristen owruman. Efu wan sma a mindri kristen mu teki fesi ini na sori fu grani gi makandra, dan a de den owruman.
6. (a) San owruman no mu du, èn fu san-ede? (b) Fa owruman kan meki na fertrow fu na gemeente na ini na heri skin fu owruman gro?
6 Owruman spesrutu mu luku bun fu no taki wortu di e soso tra kompe-opziener. Nowan enkri owruman abi ala kristen eigifasi te na ini na moro hei-marki, bika alamala de onvolmaakti. Na sonwan bepaalde kwaliteit de bun tranga, ma trawan baka ben de moro mendri. Te owruman abi na yoisti bradalobi èn safufiri fu lobi gi makandra, dan den no sa meki wan ambaran fu den swakifasi fu makandra. Na ini den takmakandra fu den brada den sa meki den tranga punt fu den kompe owruman kon na fesi. Te tapu sowan fasi den sa teki fesi ini na sori fu grani gi makandra, dan den sa meki na fertrow fu na gemeente na ini na heri skin fu owruman kon moro bigi.
Wroko makandra leki skin
7. San sa yepi owruman fu wroko makandra na ini wanfasi, èn fa den sa sori disi?
7 Bakaten Paulus ben taki fu den „presenti na ini libisma” di Kristus ben gi en gemeente na grontapu fu tyari brada kon tapu na reti pasi baka èn fu na dienst fu na diniwroko, dan a ben skrifi: „Meki wi gro nanga yepi fu lobi ini alasani ini en di de na ede, Kristus” (Efesesma 4:7-15). Na erkenning taki Kristus de na actief edeman fu na gemeente èn taki owruman mu saka densrefi na ondro en reti-anu fu makti, de wan sani di e tyari sani kon na wan na ini ibri skin fu owruman (Efesesma 1:22; Kolossesma 1:18; Openbaring 1:16, 20; 2:1). Den sa opo densrefi gi a tiri fu en nanga yepi fu na santa yeye, bijbelgronprakseri èn den richtlijn di na tiriskin fu „na getrow èn koni srafu” e gi. — Mattéus 24:45-47; Tori fu den Apostel 15:2, 28; 16:4, 5.
8. San ala owruman mu tan memre, èn fa den sa sori grani gi makandra?
8 Owruman sa erken taki Kristus nanga yepi fu na santa yeye kan poti den prakseri fu ibri owruman ini na skin fu owruman na sowan fasi tapu bijbelgronprakseri di de fanowdu fu kakafutu gi wan bepaalde situwasi ofu fu teki wan bepaalde prenspari bosroiti (Tori fu den Apostel 15:6-15). Nowan enkri owruman na ini na skin abi en wawan na reti fu na yeye. Owru man di sa sori grani gi makandra fudi den e arki bun na suma a kan de ooktu a den mindri di tapu a punt fu na takmakanra e gebroiki wan bijbelgronprakseri ofu wan instructie fu na Tiriskin.
9. (a) Sortu yeye eigifasi sa yepi wan owruman fu tan farawe fu basi en kompe owruman? (b) Fa wan owruman sa sori taki a de „redelek”, èn fa na fosi yarhondro tiriskin ben gi na ini disi na eksempre?
9 Kristen bescheidenfasi, safri atifasi nanga sakafasi sa tapu ibri owruman fu wani basi en brada èn fu pusu en prakseri kon na fesi (Odo 11:2; Kolossesma 3:12). Wan kristen owruman heri bun kan abi ini a tori fu wan bepaalde afersi wan aparti opregti prakseri, ma efu a e si dati en kompe owruman abi bijbel èn theokratis reide fu abi wan heri tra prakseri leki en dan a sa ’tyari ensrefi leki wan mendriwan’ èn sori taki a de „redelek” fudi a e fiti ensrefi na a prakseri fu na meerderheid (Lukas 9:48; 1 Timóteus 3:3).a A sa waka na baka na tumsi moi eksempre fu na fosiyarhondro Tiriskin di baka wan bijbel takmakandra èn ondro na tiri di ben gi nanga yepi fu santa yeye fu na sei fu Kristus, „ben agri krinkrin nanga makandra”. — Tori fu den Apostel 15:25.
10. (a) San e buweisi taki na poti na wroko fu wan skin fu owruman ini ibri gemeente de wan seti di abi en fondamenti tapu na bijbel? (b) Fa na buku Den orga wi fu klari wi diniwroko e sori den winimarki fu na seti disi?
10 Na poti na wroko na ini ibri gemeente fu wan skin fu owruman fu gi tiri, abi en fondamenti tapu na eksempre fu na fosten kristen gemeente (Filipisma 1:1; 1 Timóteus 4:14; Titus 1:5) Na ini wan voetnoot na Titus 1:5 The Jerusalem Bible e tyari kon na krin taki na ini den moro fruku ten wan skin fu owruman ben tiri ibri kristen gemeenskap. Na buku Den orga wi fu klari wi diniwroko tapu bladzijde 38 e ferklari te ai taki syatu fu na koni fu na seti disi: „Son owruman sa kon moro a fesi na ini na wan eigifasi leki na ini na trawan, èn son memre na skin sa kon moro a fesi na ini eigifasi pe kande trawan swaki na ini. Ma na bakapisi de taki ini algemeen na heri skin abi na ini en ala tumsi moi eigifasi di de fanowdu fu hori ai tapu na gemeente fu Gado.”
Respeki gi makandra a mindri den skin fu owruman
11, 12. (a) Fu san-ede wan skin fu owruman kan du moro leki den aparti memre fu na skin dati di e opo du sani? (b) Fa Kristus Yesus nanga na apostel Paulus ben handri nanga na skin fu owruman, èn sortu rai den ben gi?
11 Na so wan skin fu owruman de wan bijbel wanfasi di alamala e teki presi fu moro leki na som fu den pisi. Te den e kon makandra èn e begi efu den mag kisi Yehovah tiri nanga yepi fu Kristus nanga na santa yeye, dan den kan kon na bosroiti di den no ben sa doro efu den ben go aksi den sani aparti leki wan sma. Te den owruman e kon makandra dan den aparti kwaliteit fu den e go prei wan rol èn bakapisi e kon di e sori na tiri fu Kristus fu den afersi. — Teki gersi nanga Mattéus 18:19, 20.
12 Taki Kristus e handri nanga den skin fu owruman na sowan fasi e kon na fesi na ini den boskopu di a ben seni go na den „seibi stari” ofu „engel fu den seibi gemeente” na ini Pikin Asia (Openbaring 1:11, 20). Na fosiwan fu den boskopu dati ben seni go na a gemeente na ini Efese nanga yepi fu na ’engel’ ofu skin fu salfu opziener. Sowan fotenti yari na fesi na apostel Paulus ben meki na skin fu owruman na ini Efese kon na Miléte fu wan spesrutu komakandra nanga en. A ben memre den fu poti prakseri na densrefi èn fu wei na gemeente. — Tori fu den Apostel 20:17, 28.
13. Fu san-ede owruman mu poti prakseri na a yeye di den e sori na ini na skin fu owruman fu na gemeente èn di den e sori na ini na matifasi fu den nanga tra skin fu owruman?
13 Den skin fu owruman spesrutu mu poti prakseri tapu taki den mu kibri wan fini èn positief yeye a den mindri èn na ini a gemeente fu den (Tori fu den Apostel 20:30). Net soleki wan aparti kristen e sori wan bepaalde yeye, na so ooktu den skin fu owruman èn heri gemeente kan kweki wan spesrutu yeye (Filipisma 4:23; 2 Timóteus 4:22; Filémon 25). Sontron a e psa taki owruman di ini den eigi gemente e respeki makandra no man feni en so bun nanga wan tra skin fu owruman. Ini foto pe difrenti gemeente e hori komakandra na ini na srefi zaal sontron kese kese e kon mindri skin fu owruman fu afersi leki komakandraten, gebiedgrens, sani di mu installeer ini na Kownukondrezaal, nanga so morofara. Densrefi gronprakseri fu bescheidenfasi, safri-atifasi, sakafasi nanga redelekheid di den owruman e meki tyari den na ini ibri skin, mu tiri ooktu na mati fasi mindri skin fu owruman. Na apostel Paulus ben gi na rai: „Meki ala sani pasa fu bow makandra.” — 1 Korintesma 14:26.
Yoisti respeki gi opziener di e waka luku gemeente
14. Sortu tra sortu owruman wi mu si leki wan diri sani èn fu san-ede?
14 Wan tra seti di abi en fondamenti tapu na bijbel èn di e wroko a mindri den gemeente fu Yehovah Kotoigi, de taki owruman di e waka luku gemeente èn di den e kari kring-opziener ofu distriktopziener e fisiti den geregeld (Tori fu den Apostel 15:36; 16:4, 6). Den de spesrutu „owruman di e teki fesi na tapu wan tumsi moi fasi”. A de seiker so taki no moro mendri leki tra owruman taki den de warti „dobru grani, spesrutu den wan di e wroko tranga ini a tori fu taki èn a gi fu leri”. — 1 Timóteus 5:17.
15. Sortu rai na apostel Yohannes ben gi fu evangeliumpreikiman di e waka lontu?
15 Na ini en di fu dri brifi Paulus e feni fowtu na na apostel Yohannes Diótrefes di a ben weigri fu „teki den brada na oso nanga respeki” (vers 10) Den brada disi ben de kristen di ben waka luku gemeente èn di ben go a doro „fu na bun fu Yehovah nen” (vers 7). A de krin taki den ben seni den go leki evangelium preikiman fu preiki na bun nyunsu ini den foto di den ben fisiti èn fu bow den gomeente. Yohannes ben gi na komando taki den preikiman disi di e wroko tranga èn e waka lontu ’ben sa seni go a pasi tapu wan fasi di de warti na Gado’ (vers 6). Na apostel taki morofara: „Wi de fu dat’ede ferplekti fu teki den sma disi na oso na wan switi fasi sodati wi kan tron kompe wrokoman na ini na waarheid” (vers 8). Den mu ontvange den nanpa respeki.
16. Fa ala kristen na ini a ten disi kan waka na baka na eksempre fu Gayus ini na ’getrow wroko’ di a ben du gi fosi yarhondro evangeliumpreikiman èn fu san-ede disi de yoisti?
16 Na asrefi fasi na ini a ten disi wi mu teki na oso èn nanga respeki opziener di e waka lontu èn di na tiriskin ben seni fu preiki na bun nyunsu èn fu yepi den gemeente. Den brada disi nanga den uma fu den, (efu den trow, soleki dati de na furu fu den) de klarklri fu gwe libi wan faste presi pe den e tan. Den waka fu na wan presi go na a tra presi èn nofotron den e anga fu na teki di brada e teki den na oso fu nyan èn fu kisi wan bedi fu sribi. Yohannes ben skrifi gi Gayus di na wan lobifasi ben gi oso na evangeliumpreikiman di ben waka lontu na ini na fosi yarhondro G.T.: „Lobiwan, yu e du wan getrow wroko ini ala san yu e du gi den brada, èn dati ete gi freimdewan” (3 Yohannes 5). Na net so a mu de ini a ten disi gi den sma di e waka lontu ’fu na bun fu Yehovah nen’, taki wi mu si den leki wan diri sani èn dati wi mu sori den lobi èn respeki.
17. Fa gemeente owruman musu sori wan yoisti respeki gi sma di e teki presi fu na Tiri Skin èn di e fisiti den?
17 Owruman spesrutu mu sori wan yoisti respeki gi den brada disi di e fisiti gemeente èn di e teki presi fu na Tiriskin. Den e seni den go na den gemeente fu den yeye fasi ede èn fu den ondrofeni fu den di de gewoonlek moro bradi leki di fu furu owruman na ini gemeente. Sonwan fu den owruman disi di e waka lontu kande de moro yongu ini yari leki bepaalde owruman na ini den gemente di den e fisiti. Ma dati no de nowan bun reide fu weigri den na yoisti respeki. Kande den e feni en fanowdu fu rem owruman fu ge meente efu den wani poti es’esi wan brada leki dinari èn ini na diniwroko ofu leki owruman, èn den abi na ini disi na warskow fu Paulus gi Timóteus na prakseri (1 Timóteus 5:22). Aladi na opziener di e tyari wan fisiti mu gi prakseri di fiti na den buweisi di den owruman fu na gemeente e tyari kon na fesi, dan den disi mu de klari fu arki na en èn fu nyan bun fu na bradi ondrofeni fu en. Iya, den mu „si den sortu man disi leki wan diri sani”. — Filipisma 2:29.
’Èrken den sortu fu sma disi’
18, 19. (a) Fa Paulus ben sori en warderi gi kompe wrokoman? (b) Sortu eksempre e sori taki Paulus no ben abi bita-ati gi en brada?
18 Na ini den fosi brifi fu en gi den Korintesma Paulus ben skrifi: „Now mi e fermane unu un brada; unu sabi taki na osofamiri fu Stéfanas de na fosiwan fu Achaye èn taki den ben poti densrefi fu dini den santawan. Meki a de so taki unu ooktu saka unsrefi na den sortu fu sma disi èn na ondro ibri wan sma di e wroko makandra èn e wroko tranga. Ma mi e prisiri fu na de noya fu Stéfanas èn Fortuántus èn Acháikus, den ben pai taki yu no ben de dya. Bika den ben gi mi yeye nanga di fu yu kowru-ati. Erken fu dat’ede den sortu fu sma disi.” — 1 Korintesma 16:15-18.
19 Fa Paulus ben abi wn tumsi moi yeyefasi èn lobi fu gi sani na fesi fu en brada, di wantu fu den kwetkweti no ben de so bekenti. Ma Paulus ben lobi den fudi den ’ben wroko makandra’ èn sondro fu weri ben wroko tranga’, fudi den ben gi densrefi fu dini den santawan. Paulus ben de ooktu na ini disi wan moi eksempre taki ’owru tori no bun fu taki, a e gi yu atibron’. Aladi Yohannes Markus na ini on fosi zendingwaka ben meki a mandi, toku Paulus, baka ten ben rikomanderi en na wan waranfasi na a gemeente na ini Kolosse (Tori fu den Apostel 13:13; 15:37, 38; Kolossesma 4:10). Di Paulus ben sidon na ini dungr’oso a ben aksi efu Markus ben kan kon fudi ’a ben kan gebroiki en bun fu du dienst’ (2 Timóteus 4:11). Dyaso nowan enkri ogr’ati ben de na ini!
20. Fa kristen ini algemeen èn owruman spesrutu mu sori taki den e warderi getrow opziener èn dati den e „si den sortu fu man disi leki wan diri sani”?
20 Na ini a ten disi yu abi furu opziener di e gi densrefi èn di e dini den brada fu den netleki Stéfanas. A no de fu taki taki den no abi den fowtu nanga swaki fasi. Ma toku ete den e wroko makandra nanga na „getrow èn koni srafu” èn en Tiri Skin, èn den ’e wroko tranga’ na ini na preikiwroko è a yepi fu den brada fu den. ’Wi mu tan saka wisrefi na ondro den sortu sma disi’, e warderi den fu den kwaliteit fu den na presi fu go suku na den swakifasi fu den. Owruman mu teki fesi na ini na sori fu warderi nanga respeki di fiti gi den kompe owruman fu den. Owruman mu wroko nanga makandra na ini wan yeye fu lobi nanga wanfasi. Alasma sa erken na waarde fu den sortu getrow brada disi èn si den sortu fu man disi leki wan warti sani. — Filipisma 2:29.
[Futuwortu]
a Wan voetnoot na ini na New Grontapu vertaling, Studiebijbel e ferteri taki na wortu „redelek” na ini 1 Timóteus 3:3 de a vertaling fu wan Griki wortu di wani taki letterlek „taki dati wan sani de so; fiti ensrefi”.
Punt fu luku san wi ben leri
◻ Sortu sortu fu man Paulus ben si spesrutu leki wan diri sani èn suma e ferdini ini a ten disi wi spesrutu respeki?
◻ Fa owruman mu sori taki den e gi makandra grani?
◻ Fu san-ede wan skin fu owrurman kan du moro leki den aparti memre fu a skin dati di e opo du sani?
◻ Tapu sortu kontren wan skin fu owruman sa sori taki den e gi grani na wan tra skin fu owruman?
◻ Sortu sortu fu opiener e ferdini spesrutu fu wi si leki wan diri sani èn fa wi kan sori na yoisti respeki disi?
[Prenki na tapu bladzijde 6]
Owruman musu sori na yoisti warderi gi makandra
[Prenki na tapu bladzijde 9]
Sori lobi èn respeki gi opziener di e waka luku gemeente