Na ondrosoekoe di Jehovah e ondrosoekoe wi—Foe san ede a boen?
1 Ibriwan sma wani wan boen gosontoe. A e meki a libi de moro prisiri. Tokoe, foeroe sma di e njan boen foe wan boen gosontoe, e go meki datra loekoe den ten na ten. Foe san ede? Den e soekoe foe feni iniwan problema di kan opo ede kon na gosontoe sei, so taki den kan doe wan sani foe kon betre. A de moro prenspari srefi foe wi kibri wi jeje gosontoe. A feni di Jehovah sa feni wi boen, e anga foe a tan di wi e tan „gosontoe na ini bribi”.—Titus 1:13.
2 Nownowde na wan boen ten foe Jehovah ondrosoekoe wi. Foe san ede? Bikasi Jehovah de na ini en santa tempel, èn A e ondrosoekoe den ati foe ala libisma (Ps. 11:4, 5; Odo 17:3). Neleki David, wi e aksi Jehovah foe ondrosoekoe wi finifini: „Ondrosoekoe mi, O Jehovah, èn tesi mi; meki den niri nanga na ati foe mi kon krin.”—Ps. 26:2.
3 Wi moesoe de na ai gi kefar gi a jeje gosontoe foe wi, di kan kon foe inisei foe wi foe di wi onvolmaakti. Odo 4:23 e gi leki rai: „Kibri joe ati, moro leki ala tra sani di de foe kibri, bika foe drape den fonten foe libi e komoto.”
4 A jeje gosontoe foe wi kan kon ini kefar toe foe na kroeka grontapoe di de lontoe wi èn di no e libi akroederi boen gwenti nanga wet. Efoe wi e meki taki wi e kon toemoesi krosibei foe na ogri sistema disi, dan wi ben sa kan bigin denki fa a grontapoe disi e denki èn wi ben sa kan bigin kweki a fasi fa grontapoe e tjari ensrefi. Noso wi ben kan teki a fasi foe libi foe grontapoe abra, èn ben kan meki a jeje foe grontapoe teki wi abra.—Ef. 2:2, 3.
5 Satan kan gebroiki froefolgoe noso wantewante gens foe trawan, na ini a moeiti di a e doe foe broko wi na jejefasi. Ma boen foeroe leisi, na wan triki fasi, Satan e gebroiki moi sani foe grontapoe foe kori wi. Petrus ben gi wi tranga foe ’no broeja, de na ai’, foe di Satan de „leki wan krasi lew, di e soekoe foe swari wan sma”. Wi e kisi a tranga foe ’kakafoetoe teige en, e tan tranga na ini bribi’.—1 Petr. 5:8, 9.
6 A de fanowdoe foe wi kibri wi jeje gosontoe, e hori wi bribi tranga, foe di wi e tranga a bribi foe wi ibri dei. Na apostel Paulus e rikomanderi taki wi moesoe tesi wi bribi doronomo. Neleki fa wi e doe koni foe arki san wan boen datra e taigi wi foe doe, na so wi e arki Jehovah toe te na ondrosoekoe di En e ondrosoekoe wi, e tjari kon na krin taki wan problema de di wi moesoe loesoe. Disi e meki taki wi „kan kenki wisrefi”.—2 Kor. 13:5, 11.
7 Troetroe Jehovah na a bigi Ondrosoekoeman. Te a e ondrosoekoe wi, dan alaten a kan si soifri san na wi problema. A sabi soifri san wi abi fanowdoe. Nanga jepi foe en Wortoe èn nanga jepi foe ’a getrow srafoe’, a e gi wi gosontoe njanjan na jejefasi (Mat. 24:45; 1 Tim. 4:6). Te wi e njan doronomo foe a gosontoe njanjan disi na jejefasi na oso nanga na tapoe den konmakandra, dan dati e meki taki wi e tan gosontoe na jejefasi. Efoe wi e oefen na jejefasi doronomo, na ini a velddienst èn na ini tra kresten activiteit, dan dati boen toe gi wi. Foe dati ede, wi e feni en switi foe Jehovah ondrosoekoe wi doronomo, ala di wi e froetrow taki A sa meki wi tan nanga a moro boen gosontoe na jejefasi.