Den „tra skapoe” nanga na Avondmaal foe Masra
„[Jezus] de wan zoenofrandi gi wi sondoe, ma no wawan gi di foe wi, ma ooktoe gi di foe na heri grontapoe.” — 1 JOHANNES 2:2.
1. San de den positief bakapisi foe na ’préki foe na boen njoensoe foe na kownoekondre’?
JEZUS ben taki: „Na boen njoensoe disi foe na kownoekondre sa préki na a heri grontapoe pe libisma e libi, leki wan kotoigi gi ala naatsi èn dan na kaba sa kon” (Matt. 24:14). Joe abi sma ete foe na geslagti foe 1914 na libi èn den kan kotoigi foe dati, dati Jehovah Kotoigi ben doe na gebod disi getrow. Na bakapisi de, dati hondrohondro doesoen opregti sma di ben kon broeja foe na grontapoe psa marki, ben opo doe wan positief sani tapoe na jere foe na boen njoensoe. Den ben gi den libi abra na Jehovah Gado èn den ben teki na sé foe en kownoekondre. Na gi di den gi densrefi abra den ben sori na publiki foe di den ben meki den dopoe den na ini watra. Na ini 1984 179.421 sma ben teki a bosroiti foe waka na baka na ferstan libifasi disi. Te joe loekoe en boen dan den ben taigi a pipel foe Gado nen: „Wi wani go nanga joe, bika wi ben jere dati Gado de nanga joe.” — Zach. 8:23.
2. Nanga sortoe sani ben bepaal oten Jezus ben sa tjari en tra skapoe konmakandra?
2 Na „bigi ipi” disi foe anbegiman di ala dé e kon moro foeroe de wan pisi foe na groepoe foe sma di Jezus ben taki foe den leki en „tra skapoe” (Openb. 7-9, 15; Joh. 10:16). Den abi na moi ferwakti foe libi foe tégo a ini wan njoen Paradijs (Ps. 37:29). Jezus ben taki a fesi dati a ben sa tjari den getrow bakaman disi foe en konmakandra baka te a ben poti fosi en herder prakseri a tapoe na tjari konmakandra foe wan „pikin ipi” foe sma di gersi skapoe, foe soema a e opo doe wroko leki a Mindriman foe na njoen ferbontoe (Luk. 12:32; Hebr. 9:15). Nanga a tjari kon makandra foe toe klasse foe sma di gersi skapoe, ini „wan ipi” ini prakseri dan wi kan ferstan foe san-ede na apostel Johannes ben taki dati Jezus Kristus, „de wan zoenofrandi gi wi sondoe, ma ooktoe gi di foe na heri grontapoe.” — 1 Joh. 2:1, 2.
Kenki na ini a fasi foe den foe si sani
3, 4. (a) Fa foeroe sma ben kisi wan kenki foe si sani ini a tori foe na hori foe na Avondmaal foe Masra? (b) San Paulus ben bedoel di a ben taki: „Somenitron leki oen e njan èn dringi”?
3 Foeroe foe den „tra skapoe” di ben tjari pas konmakandra ben gwenti foe go na „mis ofoe komuni. O foeroetron den ben doe disi èn a fasi fa na plegtigheid ben feni presi, ben e anga foe na bribi-overtoigi foe na kerki organisaatsi di den ben de na ini. Ma now den ben kon kisi na ferstan dati na Avondmaal foe Masra moe hori soso wantron ini wan jari. Foe san-ede disi de so? We, disi de makriki, foe di na djoe Pascha ben e hori soso wantron ini wan jari èn Jezus ben poti tapoe na srefi Paschaneti dati na Memrefesa, namkoe tapoe 14 Nisan. Na na okasi dati a ben taigi en discipel: „Tan doe disi foe memre mi.” Paulus e taki foe disi moro fara: „Bikasi someni tron leki oen e njan a brede disi èn e dringi a beker disi oen e tan meki na dede foe Masra bekenti, te leki a ben sa kon” (1 Kor. 11: 24-26). A de krin dati Jezus ben bedoel dati en discipel ben moe memre en dede tapoe a dé foe na Pascha, èn dati ben de wan sani di ben e psa ala jari. Na Memrefesa ben moe hori foe dat’ede, „foeroetron” ini ala na langaten dati, di na kristen gemeente de. Te joe loekoe en boen, dan na Memrefesa ben feni presi 1952 tron.
4 Na klasse foe „tra skapoe” ben go ferstan taki ete wan tra prenspari fasi foe loekoe sani de. Ma presi dati den e gebroiki a brede nanga a win, soleki foeroe foe den di ben doe dati fosten ini wan kerki, dan a e kon na krin dati a situwasi foe den now „poti reti”: den de sma di e sidon loekoe. Foe san-ede meki disi de so, èn fa wi kan bewijsi nanga na bijbel dati na na okasi disi joe abi sma di e sidon loekoe èn sma di e teki prati. — 2 Kor. 13:11; 2 Tim. 3:16, 17.
5. (a) Ferteri foe den fundamenti stap di wan sma moe doe foe njan foe Jezus srakti-ofrandi. (b) Foe san-ede meki Gado ben handri tapoe wan spesroetoe fasi foe na boen foe den 144.000 bakaman foe Kristus Jezus?
5 Efoe wan sma wani njan boen foe na „zoenofrandi” di Kristus Jezus ben gi, dan bepaalde sani moe doe awinsi a e ferwakti foe sa kisi hemel libi ofoe e abi na howpoe foe libi ini na grontapoe paradijs. Den fundamenti sani disi de den disi: (1) na kisi foe soifri sabi foe a Wortoe foe Gado (Rom. 10:13-15); (2) na sori foe bribi (Hebr. 11:6); (3) beraw (Matt. 4:17); (4) draibaka (Tori 3:19); (5) Gi joesrefi abra (Luk. 9:23); (6) na dopoe (Matt. 28:19). Pas baka te wan sma doe den sani disi, dan Gado tapoe wan spesroetoe fasi e handri nanga na sma di a ben teki poeroe foe de wan foe den 144.000, na „pikin ipi”. Nanga sortoe prakseri? Sodati so wan sma e tron wan jeje manpikin foe Gado di abi na ferwakti foe de makandra nanga Kristus Jezus, priester nanga kownoe (Openb. 20:4, 6). Nownow joe abi ete wan fikapisi foe den sortoe jeje manpikin disi na libi èn den de den sma di nanga leti e gebroiki den symbool. Disi e ferklari foe dat’ede foe san-ede a moro bigi pisi foe den Kotoigi foe Jehovah de sma di e sidon loekoe, èn no e gebroiki srefi foe den symbool.
Na Pascha èn na Memrefesa
6. Foe san-ede meki son sma ben taki dati den „tra skapoe” moe gebroiki foe den symbool, èn sortoe aksi e kon na fesi nanga dati?
6 Son sma ben tjari na prakseri kon na fesi dati na nomroe foe „tra skapoe” di e gro kon moro foeroe moe gebroiki foe den symbool. A fasi fa den e tak-go-tak-kon de dati „foe di na Wet de wan schaduw foe den boen sani di e kon” èn foe di wan foe den sani foe na Wet ben de dati den Israëlsma èn den freemde sma di ben besnij èn ben e libi a den mindri ben moe hori na sabbat èn dati disi ben sa wani taki dati ala toe klasse foe den „skapoe” di de na ini na ’wan ipi’ na ondro na ’wan herder’, moe gebroiki den symbool foe na Memrefesa (Hebr. 10:1; Joh. 10:16; Num. 9:14). Disi e meki wan prenspari aksi kon na fesi: A Pascha ben de wan prenki foe na Memrefesa?
7. Na sortoe fasi na Pascha ben de „wan prenki. . . foe den boen sani di ben o kon”?
7 A de troe dati bepaalde pisi foe na Paschafesa ini Egypte sondro degedege ben kon troe ini Jezus. Paulus ben teki Jezus gersi nanga a Paschalam di a ben taki: „Kristus, wi Pascha, ben srakti” (1 Kor. 5:7). Dati den ben it’iti na broedoe foe na paschalam tapoe den doropostoe nanga tapsé doropostoe, ben djaranti den fosi geborewan ini ibri oso foe den Israëlsma ferloesoe. Na net so toe „na gemeente foe den fosi geborewan, di nen skrifi na ini hemel” e kisi nanga na jepi foe na broedoe foe Jezus Kristus ferloesoe ofoe „ferloesoe nanga Jezus Kristus ferloesoeprijs” (Hebr. 12:23, 24; Ef. 1:3, 7). Boiti foe dati, no wan bonjo foe na Paschalam ben moe broko, èn ooktoe disi ben kon troe ini Kristus Jezus. (Ex. 12:46; Ps. 34:20; Joh. 19:36). A de wan joisti sani foe dat’ede dati na pascha, na ini bepaalde pisi ben de wan foe den foeroe wet, di ben gi wan „schaduw” . . . foe den boen sani di boo kon”. Ala den sani disi ben sori na fesi na tapoe Kristus Jezus na „Lam foe Gado”. — Joh. 1:29.
8-10. (a) Na ini sortoe prenspari fasi na ini a tori foe na broedoe na Pascha ben kenki foe na Memrefesa? (b) Fa krakti e poti a tapoe ete wan difrenti na ini den ferbontoe ai abi foe doe nanga na Memrefesa? (c) Disi e tjari wi kon na sortoe bosroiti?
8 Ma ete na Pascha no ben de ini strikte zin wan prenki foe na Avondmaal foe Masra. Foe san-ede? Di na Pascha ben poti na ini Egypte, dan a meti foe na losi lam ben njan, ma noti foe na broedoe foe na paschalam ben moe njan. Kontrari nanga disi, Jezus ben gi, di a ben poti a Memrefesa foe en dede, den sma di ben de drape na spesroetoe komando foe njan en skin, di a brede ben agersi èn foe dringi en broedoe, di a win ben agersi (Ex. 12:7, 8; Matt. 26:27, 28). Na ini na toemsi prenspari pisi disi — a broedoe — na Pascha no ben de wan prenki foe na Avondmaal.
9 Ete wan sani de di wi no moe loekoe psa en. Jezus ben e taki nanga en discipel foe toe ferbontoe di ben abi foe doe nanga makandra, „na njoen ferbontoe” èn ’wan ferbontoe foe wan kownoekondre’ (Luk. 22:20, 28-30). Ala toe ferbontoe abi foe doe nanga a tori disi, dati ’den sma di e gebroiki’ den symbool e kisi na grani foe de makandra nanga Kristus Jezus priester nanga kownoe. Ma ini Israël no wan enkri freemde sma di ben besnij èn di ben libi a den djoe mindri ben kan tron oiti wan priester noso kownoe. Ooktoe ini a pisi disi wi e si wan difrenti a mindri na Paschafesa foe Israël nanga na Avondmaal foe Masra.
10 Disi e tjari oenoe kon tapoe sortoe bosroiti soboen? Dati den freemde sma, di ben besnij èn ben e libi a den mindri ben e njan foe a brede sondro sroedeki, den bita wiwiri nanga na paschalam, no de wan bewijsi ete dati den sma di ini a ten disi de foe den „tra skapoe” foe masra èn di de na a ten foe na Memrefesa, moe gebroiki foe na brede nanga na win.
Na prensparifasi foe de na a Memrefesa
11. Na ondro sortoe prenspari réde den „tra skpaoe” moe de na a Memrefesa?
11 Ma disi no e sori dati a no de prenspari gi na klasse foe den „tra skapoe” foe de drape na a ten foe na Memrefesa? Kwetkweti! Disi de wan afersi gi ala bakaman foe Jezus di gersi skapoe foe memre en na ini wan toemsi spesroetoe fasi. Na a okasi dati den „tra skapoe” e go denki tranga, dati tapoe a gron foe a bribi foe den ini a broedoe foe Kristus, di ben trowe den ben kisi winimarki kaba na so wan fasi, dati Jehovah e si den kaba leki sma di ’ben wasi den langa krosi foe den èn ben meki den kon weti na ini na broedoe foe na Lam’. Foe dat’ede den kan doe ’dé nanga neti santa dienst ini a tempel foe Gado’ (Openb. 7:14, 15). Den kan go prakseri ooktoe, dati den moe tan soekoe ’Jehovah regtvaardikifasi nanga safrifasi’ ini a howppe foe psa „na dé foe Jehovah atibron” èn baka dati njan a prisiri foe kon kisi libisma volmaaktifasi. Dan te foe kaba den kan kon de regtvaardiki troetroe nanga jepi foe Jehovah èn disi sa psa baka te Jezus ben gi a kownoekondre abra na en Tata. — Zef. 2:2, 3; 1 Kor. 15:24; Openb. 20:5.
12. Sortoe winimarki ai tjari kon te wi e arki na a Memrefesa lezing?
12 Ete wan prenspari réde foe de drape, de dati den waarheid di den e taki foe den na a ten foe na Memrefesa lezing, de wan pisi foe „den dipi sani foe Gado”, ’a tranga njanjan di de foe lepi sma’, no soso na merki foe na „gronleri” (1 Kor. 2:10; Hebr. 5:13-6:1). Na lezing foe na bijbel sa dipi wi warderi gi na lobi di Jehovah ben sori, foe di a ben seti so wan wondroe kownoekondre tiri leki wan blesi gi na libismafamiri. A komakandra foe a neti dati e gi wi ooktoe na okasi ’foe poti ai na tapoe na moro prenspari Wrokoman èn a Sma di e tjari wi bribi kon volmaakti, Jezus’. Noiti wi mag teki na lobi di Jezus ben sori, èn ooktoe na pina di a ben ondrofeni leki wan sani di e kon foe en srefi (Hebr. 12:2, 3). Boiti foe dati wi alamala sa agri nanga disi, dati foeroe foe den diri prakseri di Jezus ben taki foe den na a ten di a ben poti na Memrefesa gi en apostel — prakseri di ben e go foe wanfasi, lobi nanga na gi glori na a nen foe Jehovah — de foe na boen gi na „pikin ipi” èn den „tra skapoe”.
Sori wan foeroe-nanga-lobi broko-ede gi ala sma
13. Foe san-ede a de prenspari foe meki den symbool waka lontoe a mindri ala sma di de drape?
13 A de prenspari dati wi tja kon ini a memre foe ala sma di de na a avondmaal foe Masra na procedure di Jezus ben poti. Na langa gi makandra foe na brede nanga na win e meki wi warderi gi den santa sani di den taki foe den na a neti dati kon moro dipi, Ooktoe a de so dati ibri wan sma e kisi nanga disi na okasi foe sori san en ferwakti de foe a ten di e kon — hemel ofoe grontapoe libi.a Te wi e waka na baka na joisti fasi foe doe sani dan na gemeente e de na ini wanfasi nanga san e psa na neti dati na a heri grontapoe. — 1 Kor. 14:40.
14. Fa den owroeman kan sori foeroe-nanga lobi broko-ede gi wan foe den salfoewan di siki a tapoe na neti foe a Memrefesa?
14 Kon taki now taki wan salfoewan foe wan gemeente siki èn no kan de na a hori foe na Memrefesa. San dan? Ala moeiti moe doe foe meki wan foe den owroeman go nanga den symbool na a siki kristen dati, èn efoe dati fiti dan na owroeman sa taki wantoe wortoe di fiti bifo a pristeri den symbool èn moro fara tapoe nanga wan begi di fiti. Fa na sikiman sa kisi tranga! Den sortoe doe disi foe, foeroe-nanga-lobi broko-ede e meki wan geest foe lobi kon moro foeroe na ini na gemeente. — Ps. 133:1.
15. Ferteri foe wantoe tra fasi fa wan sma kan sori respeki foe na Avondmaal foe Masra?
15 Moi aksi de ete foe na procedure di wi moe waka na en baka èn na sortoe foe symbool di moe gebroiki na a ten foe a Memrefesa. Na piki tapoe den aksi disi joe feni na tapoe bladzijde 10 ondro „Sori respeki gi na Avondmaal foe Masra”. Den frantwortoe owroeman ben sa doe boen foe gebroiki den richtlijn di de drape finfini.
16, 17. (a) Sortoe aksi son sma e poti na ini a tori foe na gebroiki foe den symbool na a ten foe na Avondmaal, èn soema wawan kan piki na aksi dati? (b) Fa Gado e gi den sma di kon njoen gebore nanga en jeje na overtoigi bewijsi foe dati?
16 Son sma de di degedege e tergi den ofoe den abi leti foe gebroiki den symbool. Den aksi disi sontron e kon a fesi ini den wiki bifo wan Avondmaalfesa de baka. Nofotron den sortoe aksi disi e kon foe sma di de sjatoe nanga Jehovah Kotoigi. Joe de wan foe den sma di abi den sortoe degedege dati? Fa joe kan sabi san de na joisti fasi foe doe?
Na fanowdoe foe ondrosoekoe joesrefi
17 Paulus ben rikomanderi a sani di e kon now ini a tori foe na Avondmaal foe Masra: „Meki wan sma keur ensrefi boen fosi baka te a ondrosoekoe ensrefi finifini, èn meki a njan dan foe na brede èn dringi foe na beker” (1 Kor. 11:28, 29). Joe ben si dati Paulus ben taki dati joe de na sma di moe ’keur joesrefi boen baka te joe go ondrosoekoe joesrefi finifini’? A no de foe taki dati a no de fowtoe foe taki nanga wan lepi kristen foe sowan serjoesoe afersi, ma joe de a sma di moe bepaal foe sortoe matifasi joe de nanga Jehovah nanga en Manpikin. Gado no e meki no wan sma foe den 144.000 sma e degedege. Wi e kisi na djaranti: „Na jeje srefi e kotoigi nanga wi jeje dati wi de pikin foe Gado.” A de a jeje foe Gado di e wiki na ini na ati foe ibri memre foe Kristus skin na overtoigi, dati a de wan foe den jeje manpikin foe Gado. Na sma di den teki poeroe sabi disi èn no a foe aksi wan tra sma ini a gemeente foe taki efoe a de so. — Rom. 8:15, 16.
18. Sortoe troe tori foe na historia ini a tori foe den „tra skapoe” de prenspari foe oenoe sabi?
18 Na modern historia foe Jehovah Kotoigi e sori dati foe sensi 1931 den ben bigin foe poti moro prakseri tapoe den „tra skapoe” nanga jepi foe na kownoekondre boskopoe. Moro fara na lezing di ben hori na tapoe 31 mei 1935 foe „na bigi ipi”b ben tjari krin kon na fesi dati na „bigi ipi” di na apostel Johannes ben si ini wan visioen, de a srefi leki den „tra skapoe”. San a ben wani taki dati now moro prakseri ben poti na tapoe den „tra skapoe”? Dati a no ben kan de tra fasi ofoe na tjari kon makandra foe na „pikin ipi” ben e go na wan kaba èn dati na ten ben doro gi Jezus, foe poti en prakseri a tapoe a tjari konmakandra foe den „tra skapoe” nanga jepi foe na diniwroko foe „na getrow èn koni srafoe”. — Matt. 24:45-47.
19. Sortoe égi ondrosoekoe kan de fanowdoe gi den njoen wan di e taki dati den abi leti a tapoe foe de wan foe den salfoewan?
19 Nanga den sani di taki dja na fesi na ini prakseri, wi e taki gi ala sma di de sjatoe ete nanga Jehovah pipel èn di kande e taki dati den abi reti a tapoe foe de wan foe den sma foe na salfoe klasse: Ondrosoekoe finifini a matifasi foe joe nanga Jehovah. Aksi joesrefi: Na hemel howpoe di mi e taki dati mi abi de ete wan pisi di tan abra foe na kerkileri di mi ben bribi fosten na ini èn di ben taki dati ala memre foe kerki e go na hemel? A howpoe di mi abi tapoe wan ofoe tra fasi abi foe doe nanga wan gridi lostoe ofoe nanga mi firi? Paulus ben taki: ’Gado no kan lé noiti’ (Hebr. 6:18). Ma net so toe na ’jeje foe teki sma of adoptatie’ no kan lé. lbriwan sma di Gado jeje e meki kon njoen gebore foe dat’ede degedege no e tergi en, ma nanga wan soifri konsensi a kan taki, dati a de wan manpikin foe Gado.
Na fesa ini 1985
20. O prenspari na Memrefesa de gi Jehovah Kotoigi?
20 Na Avondmaal foe Masra de gi ala kristen sondro degedege a moro prenspari fesa foe a jari. Foe a doel ofoe procedure, no wan tra okasi de foe teki gersi nanga en. Foe dat’ede meki, aladi na grontapoe e drai lontoe en as, sodati na son na ala pe na grontapoe safrisafri e go na ondro, ibri gemeente foe Jehovah Kotoigi, efoe a disi de now bigi ofoe pikin, èn ibri geïsoleerde groepoe ini gehoorzaamheid foe na komando foe na meester sa kon makandra.
21. Sortoe firi nanga ferwakti na Memrefesa foe 1985 e wiki kon na ini a ati foe a pipel foe Gado?
21 Ala discipel di gersi skapoe e prisiri foe dat’ede foe na ferwakti foe de nanga makandra baka tapoe wan Memrefesa. Meki na fesa foe a jari disi de gi ala dienstknegti foe Jehovah wan ten di e gi dek’ati èn di e bow den op. Meki na srefi jeje foe fertrow di na bigi eksempre foe den, Jezus Kristus ben abi, gi den faja, di a ben taki: „Abi dek’ati! Mi ben wini na grontapoe.” — Joh. 16:33.
[Foetoewortoe]
a Ini wán bigi gemeente a ben de na gwenti taki den sma di ben e prati den symbol ben go tanapoe na a kaba foe ibri rij stoeroe pe sma ben e sidon èn dan den ben e sori den fisitiman tapoe den symbool. Den sma di ben wani gebroiki den symbool ben moesoe teki na pratiman kon sabi disi. Ma soleki disi ben tjari kon na krin dja na tapsé, dan disi no ben sa fiti, soboen.
b Na lezing disi ben hori na ini Washington D. C. foe a mofo foe J. F. Rutherford, na sma di ben de na presidenti foe na Watch Tower Bible and Tract Society ini a ten dati.
Joe kan memre ete -
◻ foe san-ede na Pascha no ben de wan prenki foe na Avondmaal?
◻ sortoe siksi stap moe doe bifo wan sma kan njan boen foe na srakti-ofrandi foe Jezus?
◻ foe san-ede a de so prenspari dati joe de na a Memrefesa?
◻ foe san-ede na ondrosoekoe foe joesrefi de boen bifo na Memrefesa?
[Faki na tapoe bladzijde 10]
Sori respeki gi na Avondmaal foe Masra
Den symbool di moesoe gebroiki
Brede sondro sroedeki: Brede soso mag gebroiki di meki foe soso tarweblon nanga watra, leki na djoe mason di no abi sowtoe. No gebroiki mason, ini san spesré soleki sowtoe, soekroe, asin, eksi noso ajoen de na ini. Joe kan meki joe égi brede di no abi sroedeki nanga na recept di e kon now. Moksi wan nanga afoe kopi tarweblon (gebroiki efoe oen no kan kisi disi alésiblon, karoeblon noso wan tra sortoe karoe) nanga wán kopi watra èn meki wan natnati degi. Lolo en plata te a kon doin troetroe. Poti en tapoe wan bakapan èn djoekoedjoekoe nanga wan forkoe boen foeroe na ini te a kisi pikinpikin olo. Baka en ini wan faja onfoe te a kon dré n de leki boeskoetoe.
Win: Gebroiki wan soifri redi droifiwin soleki wan chianti, bourgogne noso bordeaus. No teki win di sma e gebroiki baka te den njan njanjan, na ini san den poti winsopi noso di den moksi nanga cognac, soleki sherry, port noso muskadel. No gebroiki win na ini san den ben poti spesré noso wiwiri, soleki Dubonnet nanga tra winsortoe di den e gebroiki leki dringi bifo den bigin njan waran njanjan. Oen kan gebroiki wan win di oensrefi meki toe efoe disi no kisi soekroe noso spesré èn efoe oen no poti winsopi gi en,
Na sreka foe na komakandrapresi
Tafra foe den symbool: Poti wan krin tafradoekoe tapoe a tafra nanga na tapoe nofo préti nanga wingrasi sodati den kan prati ala sani boen. Bifo na komakandra bigin na win kan kanti ini den grasi. Jezus no ben meki foe a tori disi wan spesroetoe kerkifasi foe doe en. Efoe den omstandigheden e aksi disi, dan den symbool kan tapoe nanga krin doekoe sodati sani leki fréfré no kan go sidon a tapoe.
Den sma di o langa den: Gi bodoi a fesi foe na sé fa sani moe waka, sodati wi no kisi lasten noso broeja ini a prati foe den symbool gi ala sma di de drape, na takiman èn den pratiman ooktoe.
Dienstjepiman: Wan heri pisten bifo na komakandra bigin nofo dienstjepiman moesoe de na ini na zaal, sodati ibriwan sma kan kisi wan switikon te den doro èn kan kisi wan sidonpresi.
Meki sani moi nanga bromki: Oen mag sorgoe foe meki sani moi nanga bromki, ma disi moe de eenvoudig èn moe fit’ai.
Fa na komakandra e waka
Ten foe na fesa: Nanga aladi na lezing mag bigin moro froekoe, deb symbool mag go lontoe pas te son dongo kaba. Na ini a presi pe oen de oen moesoe loekoe oten na son e dongo tapoe 4 april ini oenoe libipe.
Memrefesalezing: Na takiman moesoe sreka ensrefi boen a fesi, sodati a kan behandel en stof na inisé foe na ten di a ben kisi. A lezing moesoe de krin foe ferstan èn a moe de wan dek’ati gi ala sma di de drape.