14 Nisan — Wan dé foe memre
„Tan doe disi foe memre mi.” — 1 KORINTE 11:24.
1. Fa Jezus ben wini a grontapoe?
„ABI DEK’ATI! Mi ben wini grontapoe.” Nanga den wortoe disi foe trowstoe èn dek’ati Jezus ben gi tranga na en erfoe getrow apostel na a neti bifo a dede. Jezus ben bewijsi taki a ben wini na grontapoe! Nanga boen bakapisi a ben kakafoetoe gi ibri moeiti di en gensman, Satan na Didibri, ben doe foe broko en loyaliteit gi Jehovah. Èn now, aladi a ben sabi dati ini wantoe dri joeroe a ben sa dede na wan pina-oedoe, tokoe a ben de nanga foeroe fertrow dati te na a kaba a ben sa tan hori a en libifasi foe getrow soifri retifasi. — Joh. 16:33; Hebr. 12:2.
2. Foe san-ede Jezus ben poti na „Avondmaal foe Masra”?
2 Na sani disi di ben psa ben de foe universeel belang, èn a ben feni presi tinanégi hondro féfitenti na toe jari psa kaba tapoe na di foe 14 dé foe na moen Nisan, na fosi moenkenki moen foe na djoe kerki kalender. A dé disi ben sa de wan di en bakaman di e gi densrefi, noiti ben sa moe frigiti. Foe kan de séker taki en loyaal bakaman noiti ben sa waka psa na san a ben wani taki foe san ben sa psa, meki Jezus ben poti wan spesroetoe netinjanjan foe memre, di na apostel Paulus e sori a tapoe leki „na Avondmaal foe Masra”. Na ondro na krakti foe Gado jeje Paulus e ferteri dati Jezus na a okasi disi ben gi a komando na en discipel di ben de na a ten dati: „Tan doe disi foe memre mi” (1 Kor. 11:20, 24). Efoe joe abi belangstelling foe de wan foe den bakaman foe Jezus, joe e ferstan dan foe san-ede a ben gi na komando disi, san disi e aksi foe joe èn san a wani taki gi joe ini a ten di e kon?
Wan dé di warti foe memre
3. Foe san-ede èn ondro sortoe omstandigheid na di foe 14 Nisan foe na fosi tron ben meki kon tron wan dé foe memre?
3 Disi no ben de a fositron na ini na historia foe libisma dati na dé foe 14 Nisan ben poti aparti foe memre. Ini 1513 bifo G.T. Jehovah ben gi den Israëlsma na komando nanga mofo foe en dienstknegti Mozes: „Èn a dé disi moe de gi joe leki wan sani foe memre èn joe moe njan en leki wan fesa gi Jehovah ini ala joe geslagti.” San ben de na a ten dati na sani foe meki den ben njan en? Jehovah srefi e piki: „A de na srakti-ofrandi foe a Pascha gi Jehovah, di ben waka psa den oso foe den manpikin foe Israël ini Egypte di a ben naki den Egyptesma nanga na plaag.” — Ex. 12:14, 27.
4. Sortoe prenspari afersi ben de ini a tori foe a fri foe Israël komoto foe Egypte?
4 Na kefarlek ferwondroe fri foe ibri fosi gebore pikin foe den Israëlsma foe libisma te go miti meti, wan sani di ben psa na ini Egypte, ben feni presi na ini na neti dati foe 14 Nisan. A ben de na hémarki foe 9 naki di ben waka a fesi èn di ben kon tapoe den ogrijeje-gado foe Egypte èn di ben poti krakti a tapoe na prakseri di Jehovah ben meki bekenti na wan okasi na fesi na fesi na hémemre Farao: „Ma foe disi ede mi ben meki joe tan a libi, foe sori joe mi krakti èn foe mi meki mi nen bekenti na a heri grontapoe.” Wantoe dé a baka Jehovah nen nanga krakti ben tjari moro fara kon na krin di a ben fri miljoenmiljoen Israëlsma nanga wan bigi moksi groepoe na a Redi se aladi na bromki foe a legre foe Farao a ben meki dede a watra. A no de wan wondroe foe dat’ede dati Mozes nanga den manpikin foe Israël ben singi: „Meki mi singi gi Jehovah, bika hé a ben poti na tapoe”! — Ex. 9:16; 15:1.
5. San den ben abi na prakseri nanga na paschafesa?
5 Baka di den Israëlsma ben kon libi ini na kondre di ben pramisi na den fosten tata Abraham, dan na heri naatsi ben moe gi jesi na a komando ini Deuteronomium 16:1-8, foe njan a Pascha wantron ini wan jari ini Jeruzalem. Tapoe na fasi dati Jehovah ben meki taki na di foe 14 Nisan ben sa tan alaten krin ini a prakseri foe en pipel, di ben de leki wan prenki. San a ben abi nanga dati na ini prakseri? A ben moesoe de wan dé pe Jehovah nen ben moe kisi grani èn pe den ben moe memre den bigi wroko foe en di a ben fri den. Na so hondrohondro jari na baka, dan san na Pascha ben wani taki, ben sa teki na moro prenspari presi ini na ati èn prakseri foe na papa nanga mama foe Jezus, di a bijbel e ferteri wi, „ben gwenti foe go na Jeruzalem foe jari kon miti jari gi na Paschafesa”. Leki fa a gwenti ben de na den djoe, dan a manpikin foe den, Jezus, ben sa waka go nanga den. — Luk. 2:41, 42.
6. Foe sortoe réde meki Jezus ben angri foe njan na Pascha 33 G.T. makandra nanga en getrow apostel?
6 Baka na dopoe foe Jezus na ini na Jordaan, èn na bigin foe en diniwroko a ben tan njan na Pascha séker nanga Maria, en grontapoe mama èn en manpikin, en afoebrada. Ma bifo na di foe 14 Nisan foe na jari 33 G.T., Jezus ben seti sani foe njan a fesa nanga en twarfoe apostel. Na tori foe Lukas e ferteri fa Jezus ben prakseri foe na okasi disi: „Mi ben angri foe njan na Pascha disi nanga oenoe bifo mi pina” (Luk. 22:15). Foe san-ede meki Jezus ben abi na faja lostoe disi? Foe di a ben sabi o prenspari den sani di boo psa ben de èn di eri esi ben sa feni presi tapoe na dé dati di warti foe memre, di ben bigin di son ben dongo. Jezus ben sabi ooktoe dati den sani disi di ben o psa ben sa poti den sani di ben psa na ten dati na ini 1513 bifo G.T. ini wan schaduw. A nen foe Jehovah ben sa kisi grani moro leki oiti wan ten èn na fundamenti ben sa poti foe na blesi foe ala famiri foe grontapoe te foe kaba. Ooktoe a ben abi foeroe sani foe ferteri en discipel bifo a ben dede, bika a ben wani gi den dek’ati, sodati den ben sa tan en loyaal bakaman. Den Evangelium tori di skrifi finifini e meki wi arki te joe loekoe en boen na san Jezus ben taki èn e meki wi ondrofeni san a ben doe. — Joh. 12:31; 17:26.
San ben psa? San a ben wani taki?
7. (a) San ben psa na ini a ten foe a laatste Paschamaal foe Jezus bifo a ben poti na memre foe a dede foe en? (Joh. 13:1-30) (b) Ferteri fa Jezus ben poti na Avondmaal foe Masra.
7 Aladi den ben e njan, dan Jezus ben opo èn wasi den foetoe foe en discipel. Nanga dati a ben gi wan volmaakti eksempre foe sakafasi. Moro fara Jezus ben taki: „Wan foe oenoe sa tori mi.” Sjatoe a baka a drai loekoe Judas èn taki: „San joe e doe, doe dati moro esi ete.” Na tori di Johannes ben skrifi e ferteri wi: „A ben go wantewante na dorosé. Èn a ben de neti” (Joh. 13:21, 27, 30). Baka dati Jezus ben poti a memre foe a dede foe en. Meki wi arki pikinso Mattéus di ben de wan ai-kotoigi e skrifi foe san ben psa: „Aladi den ben e njan moro fara, Jezus ben teki wan brede, èn baka di a ben aksi blesi, a broko en èn gi en na en discipel èn taki: ’Teki, njan. Disi wani taki mi skin.’ Ooktoe a ben teki wan beker, a bakadi a ben taki tangi, a ben gi en na den, aladi a ben taki: ’Oen dringi alamala disi, bika disi wani taki mi „broedoe foe na ferbontoe”, di mi sa trowe foe na boen foe foeroe sma foe kisi pardon foe sondoe. Ma mi e taigi oenoe: Foe a momenti disi now mi no sa dringi kwetkweti moro wan sani foe na produkt foe na droifibon te na a dé dati tapoe san mi sa dringi en njoen baka ini na kownoekondre foe mi Tata.’ Dan te foe kaba den ben go na a olijfbergi, baka den ben singi singi foe prijse Gado.” — Matt. 26:26-30; loekoe ooktoe Markus 14:22-26; Lukas 22:19, 20 èn 1 Korinte 11:23-26.
8. Foe san-ede meki a de so prenspari foe ferstan san Jezus ben wani taki nanga san a ben taki èn doe di a ben poti na Memrefesa?
8 San ala sani ben wani taki san Jezus ben taki èn doe na na okasi dati? Paulus ben poti krakti a tapoe o prenspari a de dati ala salfoe bakaman foe Kristus ferstan disi boen. A ben taki namkoe: „Ala sma soboen di e njan foe na brede ofoe e dringi foe na beker foe Masra tapoe wan fasi di no fiti, sa meki fowtoe nanga a skin nanga broedoe foe Masra.” A no de foe taki dati no wan sma foe den salfoewan wani de ini Jehovah ai ’na wan fasi di no fiti’, san ben sa tjari wan takroe kroetoe kon foe a sé foe Jehovah. Morofara a „bigi ipi” wani foe den leri den leki warti kompe foe na salfoe fika pisi. Now di soboen wan memre-fesa e kon baka, tapoe fodewroko 4 april 1985 a de wan sani di fiti dati wi alamala makandra loekoe na afersi ete wantron finfini. — 1 Kor. 11:27.
9. (a) Foe san-ede meki a de moro joisti foe vertaal den wortoe foe Jezus nanga „disi wani taki mi skin” prefoe „Disi na mi skin”? (Loekoe voetnoot). (b) Sortoe spesroetoe betekenis Jezus ben gi na a brede? (c) Na a win?
9 Jezus ben taki: „Disi wani taki mi skin.” Di Jezus ben taki den wortoe disi, a ben gi wan spesroetoe betekenis na a brede — a ben de wan symbool foe en égi sondro sondoe metiskin di „a ben gi foe na boen foe na libi foe grontapoe” (Joh. 6:51). Èn di a ben taki foe na beker win: „Disi wani taki ’mi broedoe foe a ferbontoe’, di. . . sa trowe foe pardon sondoe” a ben gebroiki ooktoe gegiste win ini na beker leki wan symbool, dati wani taki en égi broedoe. Na broedoe disi ben sa tron na fundamenti foe meki „wan njoen ferbontoe” bigin wroko. A broedoe foe en di ben trowe ben sa de a wrokosani ooktoe, nanga san Gado ben sorgoe ini „pardon foe sondoe”. — Mat. 26:28; Jer. 31:31-33; Hebr. 9:22.
10. San a gebroiki foe na brede nanga na win e sori?
10 San den sma di e gebroiki na a ten foe na Memrefesa na brede nanga na win e sori nanga dati dan? A doe dati tapoe ensrefi de gi den sma di e teki prati na en, èn gi den sma di e loekoe, wan marki dati den abi kaba wini foe na ferloesoe ofrandi foe Kristus Jezus ma na wan spesroetoe fasi èn nanga wan spesroetoe prakseri. Fa so dan? Tapoe a fundamenti foe na bribi foe den ini Kristus srakti-ofrandi èn foe di den gi densrefi abra na Jehovah, meki Gado e gebroiki na verdienste foe Jezus libisma ofrandi foe na boen foe den nanga sortoe prakseri? Sodati a kan reken gi den libisma volmaaktfasi èn na so fasi den kan teki wan regtvaardiki positsi na fesi foe Gado. Jehovah e meki den sma disi kon njoen gebore moro fara nanga en santa jeje èn den e tron en jeje Manpikin. Now den man foe offer a reti foe den foe libi na grontapoe na ini a presi foe wan hemel goedoe. Ala disi ben feni presi bifo den e teki prati na a avondmaal foe Masra. — Rom. 5:1, 2; 8:15-17; Jak. 1:18.
11, 12. (a) Sortoe toe sani e kon moro ete a fesi nanga na dringi foe na win? (b) Leg uit san na ferbontoe wani taki, di Jezus ben meki nanga den sma di e gebroiki den symbool.
11 Loekoe now pikinso san de moro na ini na dringi foe na win. Aladi Jehovah ben reken gi en jeje Manpikin regtvaardikifasi èn ben teki den leki manpikin, dan tokoe ete den de ini na onvolmaakti skin. Den abi te now ete na firi foe sondoe èn den e erken disi. Te den e dringi foe na win, den e kotoigi dati ala dé den e anga foe na broedoe foe Kristus Jezus, di ben „trowe foe na boen foe foeroe sma foe pardon sondoe”. — 1 Joh. 1:9, 10; 2:1.
12 Ma ete wan sani de ete ini na dringi foe na win. Den sma di e gebroiki a win, e ferteri taki den poti go ini a „njoen ferbontoe” di langa ten psa kaba Jehovah ben taki foe en a fesi nanga mofo foe na profeti Jeremia. A ferbontoe disi ben bigin wroko nanga jepi foe na broedoe foe Jezus. Den partij na ini na ferbontoe disi de Jehovah Gado èn den jeje pikin foe en, di makandra de na jeje Israël. Gado e piki teki ibri memre. Jezus de na Mindriman foe a ferbontoe, èn nanga na ferbontoe dati a e teki den 144.000 ferbontoe memre dati foe de wan pisi foe a siri foe Abraham. (Jer. 31:31-34; 2 Thess. 2:13; Hebr. 8:10, 12; 12:22-24; Gal. 3:29). Den de ooktoe den sma di Jezus e teki poti ini wan ’ferbontoe foe wan kownoekondre’. Leki wan bakapisi foe disi, dan den sa gebroiki den te foe kaba makandra nanga a kownoe foe den, Jezus Kristus leki na kanaal pe Jehovah sa meki blesi, di e gi libi, lon go na ala famiri na grontapoe. — Luk. 22:28-30; Joh. 6:53; Openb. 5:9, 10; Gen. 22:15-18.
13. Na sortoe sani wi moe denki tapoe 14 Nisan?
13 Te wi e go poti ala wi prakseri ini san den wortoe foe Jezus di a ben taki na tapoe na memre dé disi, wani taki, dan disi e memre wi na a lobi di Jehovah ben sori nanga jepi foe en lobi pikin di a ben gi. Disi e memre wi ooktoe na a lobi di Jezus ben sori di a ben gi en libi leki wan loesoe-paiman foe na heri libismafamiri di e bribi (Joh. 3:16; Rom. 5:8; 1 Tim. 2:5, 6). Ma tra diri waarheid de ete di Jezus ben taki na a neti dati nanga en bakaman. Na apostel Johannes de na wan enkri bijbelskrifiman di skrifi foe na toemsi krosbé takmakandra disi.
Glori, lobi nanga wanfasi
14. (a) Fa Jehovah e kisi glori nanga ibri Memrefesa? (b) Sortoe rol lobi e pré na ini na memre foe Jezus, èn sortoe ondrosoekoe foe wi srefi ibri sma di e teki prati moe doe?
14 Jezus ben taki: „Now na Manpikin foe libisma e kisi glori, èn Gado e kisi glori nanga en” (Joh. 13:31). Foe sensi na fri di Israël ben kon fri foe Egypte, dan na dé foe 14 Nisan ben tai makandra nanga na poti reti foe na nen foe Gado en soevereiniteit nanga en makti. Now na nen foe Gado e kisi moro bigi grani nanga glori nanga na getrowfasi foe Jezus te na dede èn nanga na glori opobaka foe en di kon baka dati nanga jepi foe a makti foe Gado. (Teki gersi Odo 27:11). Jezus ben ferteri en discipel dati den ben sa bewijsi taki den de en discipel, efoe den ben o hori densrefi na a „njoen gebod”, na gebod ’foe lobi makandra soleki en ben lobi den’. (Joh. 13:34, 35). Na dipi foe wi brada lobi de wan sori foe warderi na a ten dati. — 1 Joh. 4:19.
15. (a) Sortoe howpoe tapoe libi de gi ala sma, di e gebroiki tapoe wan wartifasi den symbool, a den fesi? (b) San e sori dati wan sma abi lobi gi Jezus?
15 Na howpoe foe libi wan dé na ini wan hemel oso, de wan firi di kompe tiriman nanga Kristus di a ferkisi abi na den fesi (Openb. 20:6). Jezus ben tjari na howpoe disi kon na fesi di a ben taki: „Mi e go foe sreka wan presi gi oenoe. . . . Mi e kon baka èn mi sa teki oenoe na mi oso” (Joh. 14:2-4). Fa a sa de wan switi kon na oso di e wakti ala den di tan getrow te na a kaba! Foe dat’ede meki Jezus ben gi na fermane: „Efoe oenoe lobi mi oenoe sa hori mi komando.” Disi wani taki ala en komando, èn ooktoe na gebod foe leri sma èn foe meki discipel. — Joh. 14:15, 21; Matt. 28:19, 20.
16. (a) Fa Jezus ben poti krakti tapoe na fanowdoe foe abi wanfasi a mindri en bakaman èn foe san-ede na wanfasi disi de so prenspari? (b) San ala bakaman foe Jezus moe hori na ini prakseri, ma san e jepi den foe doe disi?
16 O prenspari a de gi Jezus bakaman foe de na ini wanfasi nanga en èn nanga makandra! Jezus e gebroiki na agersitori foe wan olijfbon nanga en taki foe poti krakti na tapoe na sani disi. Wánfasi e meki froktoe kon èn nanga disi na Tata e kisi glori (1 Kor. 1:10; Joh. 15:1, 5, 8). Ferfolgoe nanga gens e wakti ala bakaman foe Jezus. Ma fa a de wan sani di e tranga wi bribi foe sabi dati Jezus ben kibri en reti soifrifasi èn ben wini na grontapoe, ondro ala den aanval foe Satan! — Joh. 15:18-20; 16:2, 33.
17. Taki foe wantoe foe den sani di Jezus ben aksi den na ini na begi di de na ini Johannes kap. 17?
17 Jezus e tapoe a neti dati nanga wan faja begi na en Tata. Na gi grani na en Tata e teki na fosi presi ini na tranga begi foe en. A e begi ofoe en bakaman kan kisi kibri tege na godlosoewan, Satan, aladi den e hori densrefi aparti foe na grontapoe. Èn a e begi ooktoe ofoe na srefi foeroe-nanga-lobi wanfasi di de a mindri en nanga en Tata mag kan gro a mindri en bakaman di sa tan gro kon moro foeroe ini nomroe. — Johannes kap. 17.
18. Foe san-ede meki soso pikinso sma e gebroiki den symbool, te joe loekoe na ala den sma di ben de na a Memrefesa na ini 1984?
18 Wi ben taki foe soso wantoe foe den diri waarheid nanga prakseri, di Jezus ben prati a neti dati nanga en discipel sowan 1952 jari psa kaba. Tokoe a de so dati den waarheid nanga prakseri disi kan jepi foe ferstan foe san-ede na dé foe 14 Nisan de troetroe wan dé foe memre. A no de wan ferwondroe sani foe dat’ede dati a jari di psa 7.416.974 kotoigi foe Jehovah nanga den mati foe den ben ferstan o prenspari a ben de foe kon makandra foe njan a Avondmaal foe Masra. Èn tokoe soso 9081 sma foe na bigi ipi disi ben gebroiki foe den symbool. Foe san-ede? Foe di na moro bigi pisi foe Jehovah Kotolgi ini a ten disi e si densrefi leki wan pisi foe na „bigi ipi” di „tanapoe a fesi na troon èn a fesi na Lam”. Den e loekoe na fesi foe kisi tégo libi na tapoe wi planeet na grontapoe, no foe kisi libi na hemel pe den 144.000 „sa tiri den doesoen jari nanga Kristus leki kownoe”. — Openb. 7:9; 20:6; Ps. 37:11.
19. San de na fundamenti foe na studi foe na tra wiki, èn foe san-ede a de prenspari foe wi alamala de a tapoe?
19 Ma wantoe aksi ben kon a fesi na ini a tori foe na Avondmaal foe masra, èn na „bigi ipi” „tra skapoe” (Joh. 10:16). Foe dat’ede a sori taki a de wan sani di fiti, dati wi taki foe den afersi disi na ini na tra artikel, sodati nowan broeja de na nowan sma prakseri, now di ete wan Memrefesa de a mofodoro e kon. — 1 Thess. 5:21.
Joe kan memre disi ete?
◻ Soema e gebroiki den symbool foe na Memrefesa?
◻ Na sortoe prenspari afersi na Memrefesa e meki wi prakseri?
◻ Fa wan sma e bewijsi taki a e memre Jezus?
◻ Sortoe prenspari afersi tai alaten nanga na di foe 14 Nisan?