Prati nanga tra sma akroederi san den abi fanowdoe
1 Jehovah e sorgoe gi sani, foe gi wi san wi abi fanowdoe na jejefasi, nanga jepi foe a getrow „srafoe” (Mat. 24:45-47). Foeroe foe den sani disi wi e kisi nanga jepi foe boekoe, bijbel, jaargang, video, cassette, nanga computer disk foe kan ondrosoekoe sani na ini bijbel. Den sani di Jehovah e gi, de nofo ala ten sondro foe froemorsoe. A e froewakti foe wi taki wi e prati sani nanga makandra, foe de seiker taki wi alamala abi den srefi winimarki.
2 Ala den sani disi di gi, meki nanga kefalek foeroe moni. A bradafasi na heri grontapoe e sorgoe gi den kostoe disi. Disi de spesroetoe so foe sensi a ten di a Genootschap ben bigin a seti foe prati poeblikâsi sondro foe aksi den sma moni na son kondre, èn e froetrow soso na tapoe den friwani bijdrage foe man tapoe den kostoe. Boiti dati, foeroe bijkantoro e kisi den sani disi foe a Genootschap gi moro lagi kostoe, di e meki taki den brada kan abi san den abi fanowdoe gi den konmakandra èn gi a velddienst, ala di den abi pikinso materia sani nomo.
3 Fa wi kan jepi: Wi kan handri na tapoe a froemane foe Paulus foe prati nanga tra sma „akroederi san den abi fanowdoe” (Rom. 12:13). Te wi e gi moni bijdrage gi a wroko na heri grontapoe, dan langalanga wi e prati san wi abi nanga den brada foe wi na heri grontapoe.
4 Nanga disi na prakseri, wan toe sma bosroiti foe poti wan sani na wan sei leki bijdrage ibri moen gi a wroko na heri grontapoe, neleki fa den e doe gi den kostoe foe a Kownoekondre zaal. Den e froestan taki a moni disi no e gebroiki soso foe meki poeblikâsi, ma so srefi gi ala sani di abi foe doe nanga a wroko. Prakseri o foeroe winimarki wi bradafasi na heri grontapoe ben sa abi efoe moro sma ben sa prati sani doronomo na so wan fasi. Moro fara, wi kan prati nanga den foe di wi de ala ten bescheiden te wi e aksi sani di wi kan kisi wantewante. Te wi e bisteri soso den sani di wi abi troetroe fanowdoe, dan dati e gi den brada foe wi na wan tra presi na okasi foe kisi den sani na jejefasi di den abi fanowdoe toe foe tan tranga èn foe meki a preiki di den e preiki a boen njoensoe, go na fesi, na ini a pisi foe grontapoe pe den de. — Hebr. 13:16.
5 Wi moesoe hori disi spesroetoe na prakseri te wi e bisteri sani di a Genootschap e meki èn di e kostoe foeroe moni. Disi na sani soleki video, CD-ROM, bigi verwijs-boekoe, jaargang, nanga abonnement na tapoe cassette. Na presi foe aksi wán sani gi ibri memre foe na osofamiri, a ben kan taki a heri osofamiri kan abi nofo nanga wán nomo? Efoe wi e teki pikinso gi wisrefi, dan dati e gi tra sma na okasi foe kisi den srefi boen sani di wi abi. — Fil. 2:4.
6 Den kostoe di meki gi poeblikâsi di wi e prati na ini a velddienst kompenseer, nanga jepi foe den bijdrage di wi e gi na ini a Kownoekondre zaal gi a wroko foe a Genootschap na heri grontapoe èn nanga jepi foe den bijdrage di wi e kisi foe sma di abi belangstelling èn di e teki den poeblikâsi. Ma te a abi foe doe nanga poeblikâsi di wi e bisteri èn di wi sa gebroiki gi wisrefi, soleki singiboekoe, Jariboekoe, luxe bijbel, èn so moro fara, dan wi no kan froewakti foe sma di no de kotoigi taki den moesoe sorgoe gi den sani di wi abi fanowdoe. Den foetoeboi foe Jehovah di gi densrefi abra na en, na a moro prenspari fonten foe kan kisi a jepi disi na moni sei. Nanga dati na prakseri, foeroe preikiman na Amerkankondre noso na tra kondre pe den abi a seti foe fri bijdrage, e bereken san den sani disi ben o kostoe efoe den moesoe bai den na wan wenkri èn den e gi bijdrage akroederi dati. Foeroe foe wi sabi boen — èn den wan di abi foe doe nanga en sabi dati heri boen toe, bika foe den wroko noso foe a bai di den e bai sani — san den artikel soleki wan luxe bijbel di abi gowtoe ranki, wan verwijs-boekoe, wan kalender di abi foeroe kloroe èn di wi e anga na wan skotoe, wan encyclopedia na tapoe CD-ROM, pokoe na tapoe compact disk, nanga wan toe video, e kostoe nownowde na ini wenkri. Te wi no e gi nofo bijdrage foe tapoe den kostoe, dan te foe kaba dati kan meki taki na organisâsi no man doe so foeroe moro foe meki a wroko na heri grontapoe go na fesi.
7 Jesus ben froeklari taki sma ben sa kan kon sabi krin soema na den troe disipel foe en foe a lobi di den disipel abi gi makandra (Joh. 13:34, 35). A lobi di wi lobi foe gi materia sani èn a prati di wi e prati gi tra sma gi den sani di den abi fanowdoe, sondro foe prakseri wisrefi wawan, de troetroe toemoesi moi fasi foe boeweisi taki wi de troetroe kresten.