Ala sortoe sma sa kisi kibri
1 Jehovah wani „taki ala sortoe sma moesoe kisi kibri èn moesoe kisi wan soifri sabi foe waarheid” (1 Tim. 2:4). Ala di te nanga wan bepaalde marki sani di sma erf foe den papa nanga mama, background èn presi pe den kweki, abi krakti na tapoe den, tokoe sma abi wan fri wani èn densrefi kan bosroiti fa den sa gebroiki den libi. Den kan doe san boen èn libi, noso den kan doe san takroe èn dede (Mat. 7:13, 14). Fa a sabi disi abi krakti na tapoe a fasi fa wi e si den sma na soema wi e go nanga a boen njoensoe foe a Kownoekondre?
2 Wi no moesoe denki na fesi taki sani soleki a nationaal noso koeltoeroe background noso a posisi di wan sma abi na ini a libimakandra, e bepaal a belangstelling foe en gi waarheid. Waarheid kan hari den sma di no kisi nofo skoro noso sma di kisi boen skoro, foe den wan di e soekoe foe go na ini politiek, èn te go miti sma di abi koni foe doe son wroko, sma di no e bribi taki Gado de, sma di e tweifri taki Gado de, èn srefi te go miti ogriman nanga bigi barinen. Sma foe ala sortoe background èn sociaal posisi kenki a fasi fa den ben tjari densrefi fosi èn e froewakti now foe kisi libi na ini Gado en njoen grontapoe (Odo 11:19). Foe dati ede wi no moesoe draidrai foe go nanga a Kownoekondre boskopoe na sma awinsi sortoe posisi den abi na sociaal sei.
3 Loekoe den eksempre disi: Wan man ben meki plan foe kiri en kwekipapa, ma a no ben doe en. Baka ten, a ben bosroiti foe kiri ensrefi, ma a no ben man doe dati. Baka di den ben sroto en na ini strafoe-oso foe di a ben foefoeroe èn ben handri na ini drugs ede, en trow ben broko. Now a sma disi abi wan eerlijk wroko èn a abi wan kolokoe trowlibi èn so srefi wan boen matifasi nanga en kwekipapa. Fa a kenki disi doe kon? A ben studeri bijbel nanga Jehovah Kotoigi èn ben gebroiki san a ben leri. Jehovah no ben si en leki wan sma di no ben man kenki moro.
4 A pôpi di wan jongoe oema ben pôpi leki wan sma di ben e plei na ini telefisi film, no ben gi en kolokoe. Ma foe di a toemoesi boen fasi fa Kotoigi e tjari densrefi na moreel sei ben naki en ati, a ben teki wan bijbelstudie, èn heri esi a ben e jepi tra sma foe leri foe a boen njoensoe foe a Kownoekondre. Ala sei pe a ben e go na a oso-foe-oso diniwroko sma ben herken en, ma a ben froeteri nanga prisiri taki a ben wani sma kon sabi en leki wan foe den Kotoigi foe Jehovah, na presi leki wan sma di ben e plèi na ini telefisi film.
5 Di wan Kotoigi ben meki mofo gi wan bijbelstudie nanga wan sma di ben abi abonnement na tapoe A Waktitoren, wan buurvrouw ben jere dati èn ben kon na a studie. Wantewante a buurvrouw ben si a waarheid di a ben e soekoe! En nanga en masra ben stòp a primisi di den ben kisi foe broko-trow èn ben kon boen baka nanga makandra. Na oema ben de dipidipi na ini astrologie èn ben de wan memre foe wan afkodrei groepoe, ma wantewante a ben trowe diri boekoe èn ala tra sani di a ben abi èn di ben abi foe doe nanga takroe jeje. No langa na baka dati, a ben bigin foe go na den konmakandra èn ben e bigin foe taki nanga famiri èn nanga mati foe a njoen bribi foe en. Now a e preiki fajafaja gi trawan.
6 Wi no moesoe kroetoe no wan sma na fesi. Na presi foe dati, meki wi prati a boen njoensoe fajafaja nanga sma na ala sei. Wi abi ala reide foe abi na overtoigi taki Jehovah, di „e si na ati”, sa tron a „Froeloesoeman foe ala sortoe sma”.—1 Sam. 16:7; 1 Tim. 4:10.