Wi „e preiki a Wortoe”
1 Neleki fa bijbel e taki foe den „lasti dei”, a moro bigi pisi foe sma na ini a ten disi abi soso „wan fasi foe a gi di den gi densrefi abra na Gado” (2 Tim. 3:1, 5). Disi e pasa foe di kerki fesiman no man gi troetroe jeje tiri na den ipi foe den. Den kerki tiriman foe krestenhèit no e horibaka gi bijbel. Den e froekisi foe taki na wan faja fasi den srefi soso leri baka foe den filosoofman nanga theoloog, noso foe taki foe sociaal nanga politiek tori na presi foe preiki a Wortoe foe Gado. Foeroe kerki fesiman no e bribi na ini bijbel. Den feni taki na wan fositen sani èn foe dati ede na wan fowtoe fasi den e horibaka gi na evolutie leri na presi gi a bijbel leri di abi foe doe nanga a Bigi Mekiman. A moro bigi pisi foe kerki tiriman no e gebroiki srefi a nen foe Gado, èn den no e opo taki teige a poeroe di sma e poeroe a nen foe Gado foe den njoen bijbelvertaling.
2 Leki fa a ben de nanga den kerki fesiman foe den dei foe Jesus, na so den kerki tiriman na ini a ten disi e preiki foe soso (Mat. 15:8, 9). Na neleki fa a profeiti Amos ben taki na fesi. „No wan angriten foe brede ede, èn no wan dreiwatra foe watra ede, ma foe a jere di sma e jere a wortoe foe Jehovah” (Amos 8:11). Moro leki iniwan tra sani, sma abi a jeje njanjan na ini Gado Wortoe fanowdoe.
3 Fa foe satisferi a jeje fanowdoe foe sma: Paulus ben froemane Timoteus foe tai hori na „den santa boekoe, di kan meki [wan sma] kon koni foe kisi froeloesoe”, èn a ben rikomanderi en serjoesoe foe „preiki a wortoe” gi trawan (2 Tim. 3:14, 15; 4:2). Leki Kotoigi foe Jehovah, wi moesoe tai hori na san bijbel e leri te wi e preiki, èn na so wan fasi wi e waka na baka wi Eksempre, Jesus, di ben taki: „San mi e leri, a no foe mi, ma na foe en di ben seni mi kon” (Joh. 7:16). Wi e gebroiki a Wortoe foe Gado leki a fondamenti gi den sani di wi e leri sma, foe di wi e erken taki a abi koni foe Gado, èn wi wani sma sabi a fonten foe a bodoi di wi e prati nanga den.—1 Kor. 2:4-7.
4 Sma moesoe jere a waarheid foe bijbel fosi so taki den man sabi Jehovah èn poti bribi na ini en. Foe dati ede Paulus ben skrifi: „Ma fa den sa kari en efoe den no e bribi na ini en? Ma fa den sa bribi na ini en efoe den no jere foe en? Ma fa den sa jere sondro foe wan sma e preiki?” (Rom. 10:14) Te wi e preiki a Wortoe foe Gado, wi e jepi trawan foe kisi bribi nanga jepi foe soifri sabi. A sabi disi kan èn e kenki sma libi kon boen. Na Ingrisi skrifiman Charles Dickens ben skrifi foe bijbel: „Na a moro boen boekoe di oiti ben de, noso sa de oiti na grontapoe, foe di a e leri joe den moro boen les di kan de nanga jepi foe san iniwan libisma mekisani di e proeberi foe de opregti èn foe de getrow kan kisi tiri.”
5 Den wan di e angri gi jeje waarheid te foe kaba e erken taki a e kisi en tranga foe a krakti foe a Wortoe foe Gado. Na ini 1913, Frederick W. Franz, leki wan jongoe studenti na tapoe universiteit, ben kisi wan brochure nanga a nen Where are the dead? (Pe den dedewan de?) Baka di a leisi a piki foe bijbel tapoe na aksi disi nanga foeroe belangstelling, a ben froeklari: „Disi na waarheid.” Miljoenmiljoen sma di e soekoe waarheid kon firi a srefi fasi. Meki wi tan preiki a Wortoe fajafaja èn na so wan fasi abi wan prati na a prisiri foe jere trawan e taki: „Disi na waarheid.”